Efesor 1 - ŊWÀʼ NYÙY

¹ Ŋwàʼ və̀ne sàŋ mo woo Por wo dzəə̀n ŋgaà ntum Jesus Kristu. A kù‑uù sìysì Nyùy ji m wáa yiì a lim rə̀n. A m sàŋ a dzə̀ fo vèn vee wír Nyùy ve á dzəə̀n é Efesor, ve vèn gharin ne kinyo ke Jesus Kristu kitávín.

² A m lón ji Tàr wòsən Nyùy wùn Taàtá wòsən Jesus Kristu kú a kòŋ ven, a leéy fo vèn, e yiì, é melív men mè wáa dzə nyaáŋ.

Mbùʼme wìr Kristu

³ Vèsən kú a burí Nyùy woo Tàr à Taàtá wòsən Jesus Kristu ghán sidzə̀m. Wù tàtí vèsən à Jesus Kristu, e bùʼ e vijuŋ və́ veé yuv ví vidzə̀m.

⁴ Bo wù fə́m a bom ndzə, a wù‑uù yiì ne shòʼ vèsən ji á wíy tatí vèsən à Jesus Kristu, a dzə a wír wun woo Nyùy, a tiy e wùn si là shilóm.

⁵ Mo wù‑uù sí koŋ vèsən, wù nèn sìysì ji wun kù wíy yiì a kinyo ke wun wayin kin, e lì vèsən ji wón və́ bìʼ kinyo ke Jesus Kristu‑uù wíy yiì fo vèsən.

⁶ A wù‑uù wíy lì vèsən bey ji wíri wáa burí wun fo mbùʼmé wo ghaʼán wo wù‑uù wíy bùʼ vèsən shó kisáŋ və̀n, bìʼ fo vèsən tatin vèsən à Wan və wo wù koŋ e ŋàŋ.

⁷ A kí dzə̀ jii, mo Jesus Kristu‑uù cùtìn mensə́ mvə fo vèsən, Nyùy làysìn ne vinyo vesən ve bi ví, vèsən vee wír Kristùu bóy á fo ŋgeʼ, e lùŋ. Á mo Nyùy kòŋèn vèsən é ŋàŋ, e bùʼ e lúm mbùʼmé və̀ne ben,

⁸ a bó mfìʼ yòʼ dzə̀.

⁹ Wù yiì ne lèn, vèsən kiíy kinyo ke wù‑uù yiìn ne sìysì fo ŋgùʼ, e tìír e Kristu wùn kin, a kí‑iì dzə̀ é kilìtì, la wìr yòʼ a kiíy. A wù‑uù ghàn a dzə̀ é dzəə̀ vifiì, e bóo dìn, é vèsən kiíy, bìʼ fo wù kiìn mo vifií vé wìr vi dzəə̀n.

¹⁰ Wù‑uù sìysì jii, ghán sí wíy gheén, é wun wáy vifá vidzə̀m e Kristu kiwo, kìn dzə̀ veé yuv, kìn dzə̀ veé nsay fèn, é wù tátí, é wùn à Nyùy kfə́n á ji kifá kimòʼón.

¹¹ Nyùy‑iì yiì ne shòʼ ver vee wír veé Isray fo ŋgùʼ ji á tátí wùn à Kristu, a dzə wír wun woo Nyùy. A wù‑uù shóʼ a dzə̀ mo wù kiìn réŋréŋ mo wù kù yii siysì vinyo veé ndzə vidzə̀m, a ví kooy mo nsìysì və dzəə̀n.

¹² Vèr nén a dzə wír mbìyi ve vé‑eè tiirin vifií e Jesus Kristu wùn, a shìy. Nyùy‑iì yiì bey ji wíri wáa yen mo wun woo Nyùy dzəə̀n e gháʼán, a burí wun.

¹³ A kù dzə̀ sá mo kén kí dzəə̀n, ven ve bó yòʼ dzəə̀n wír veé Isray. Vèn‑eè yù sáʼka woo rú woo kùm Jesus Kristu wo dzə̀ wù lùŋèr ven, e wày shilív é wùn wó. Mo vèn à Kristu siìn kintatì, Nyùy nen fò ven Kiyoy kfə́ ke Ranén kí ke wù‑uù yiìn ne kàʼ wír və́ shó. Wáa dzə kisəəm ke wù səə̀mèn ven shó ji və́ vee wír,

¹⁴ kfə́n a dzə ji sàʼ vijùŋ ve wù wíy fo e vèsən vee wón və́ vidzə̀m e ghan se wù wíy màysì, e lùŋèr vèsən ŋkuuŋkùŋ. Wù‑uù sìysì vinyo vìn vidzə̀m bèn ji wíri wáa yen mo wun woo Nyùy dzəə̀n e gháʼán, a burí wun.

Por beerì Nyùy fo wír veé Efesori

¹⁵ M nén a sheʼrí wun woo Nyùy mo m yú ji vèn kù wáy shilív e Tàr wòsən Jesus Kristu wùn kitávín, koŋ wír Nyùy adzə̀m.

¹⁶ M lóo bùnrì ghán sidzə̀m, m kù a kuumé ven, a beèrì Nyùy bìʼ ven.

¹⁷ A m lón fo Nyùy woo Ŋgaà Vikùʼùy, wun woo Tàr à Taàtá wòsən Jesus Kristu ji wù ku mvə̀ʼ vifií vén, é vèn wáa kiíy mo vinyo ve wù din e vèn ví dzəə̀n, e nèn màysì, e kiíy wun.

¹⁸ A kí dzə̀ jii, wù ku ŋàʼár melív men, é mè wáa tiy a dzə̀ é kinyò ke wù‑uù liìn ven shó, é vèn wáa kiíy mo kí dzəə̀n, e kfə̀n a kiíy vijuŋ ve ghaʼán ve wù kàʼàn wír və́ shó adzə̀m,

¹⁹ e kfə̀n a yu sa mo vitaáví vé wun woo Nyùy vi lim e věn wùn, a wù fó e vèsən là mfìʼ, vèsən ve á wayin shilív e Jesus Kristu wùn. A vitaáví ve ghaʼán vin vi kù dzə̀ víwun

²⁰ ve wù‑uù fəərin Jesus Kristu sho fo kpu. Wù fəə́, wù lì, e kòʼór e yuv, e dzə̀ʼə̀r e wùn ghaŋ e wùn wòŋ woó yuv.

²¹ Wù nèn a dzə kitú, a saʼ vifá ve ví dzəə̀n é yuv vidzə̀m, kìn dzə̀ nshèelav se Nyùy, kìn vitú vév, kìn kifá kímóʼ kí ke kí kér vitaáví é yuv. A ntaʼ və shaà antaʼ adzə̀m, kìn dzə̀ woó ndzə yee lèn, kìn woó ndzə ye yì dzəə́ wìy a wìy.

²² Nyùy wày ne vifá vidzə̀m a dzə̀ e wun woo Kristu kiwo, e lèm ji kitú ke kintatì ke wìr və́, á wáa yu a dzə̀ fó fo.

²³ A kintatì ki dzə̀ ji wún və́ mo wù taamen shó, e rùn, réŋréŋ mo wù tatin ndzə e dzə̀m, a taa e kitu wo.