Daniel 9 - ŊWÀʼ NYÙY

Daniel búnrí fo wír vəə́

¹ Yì‑iì dzə̀ é ghan se Darius‑iì sáʼ kitúm kee Babilon ji fon, a Darius və̀n‑eè dzə̀ wan Ahasuru woo naaŋkàntì wìr Media,

² wáa dzə a wù dzə́ə sáʼ ji kiyá ke mbìy ki, mo woo Daniel wáa yeʼéy Ŋwàʼ Nyùy, e yèn kinyo ke Nyùy Tàr‑iì yòŋèn e *ŋgaà ntum və woo Jeremia. Wù‑uù sàŋ jii, Jerusalem kù wíy a tiy e vifə̀m e bǎm kiya msaàmbà.

³ Á bèy, m nèn bìnkìr, e kìʼ Nyùy Tàr woo Taà Ndzə, a bùnrì, a lon wun, a m wáy ne vifám vé kpu, e sèsín e kibvə, a lèm jíŋ.

⁴ M ku nèn a bùnrì Nyùy Tàr woo Nyùy wom, a tunrí ajay wìr vém, a yòŋ sho jii: «Éè Nyùy Tàr, à dzə̀ Nyùy, aà shaà vitaáví, a vèr ghvə́m wò. À kù yii tíy e *mensàŋ me wò‑oò gwàrìn vèn à wír vée, din koŋ yé e wír ve á koŋ wò, kfə̀n yúnin nsər sé.

⁵ Vèr jày ne, e yiì kinyo ke bi kí. Vèr kù sì wír ve á méŋ wò, tsə́y kóy vèsən, ŋwáy nsər sé wùn à kinyo ke à tínen ki ŋwáyín.

⁶ Jòkìnyàʼ, vèr yoʼ yùnín kinyo ke aŋgàa ntum vée‑eè fìʼtìn e wò yir, aáwune ve aŋgàa lim vée‑eè lo fìʼtì kinyo ké aàfon vérí, e fìʼtì aàtǎr wòŋe, e fìʼtì aàtàr vér vee fó mbìyi, e lì wir dzə̀m woó kitum.

⁷ Éè Nyùy Tàr, à dzə̀ là shilóm. Yii bèy, fo kér kí, woómé si sùm ne ver bìʼ kinyo ke vèr mum e wò, e shem lán. Ver ve á dzə́ e wòŋ woo Juda, à veé Jerusaleme, e lì veé Isray ve à taʼarin vitúm vidzə̀m, à vee fó mentsə̀mé, à vee kwaʼdáa. Vèr kù sí woóme woòmén, ver adzə̀m adzə̀m.

⁸ Éè Nyùy Tàr, woómé si kù sùm ne vèr aàfon vérí, aàtǎr wòŋe, e lì atàr vér vee fó mbìy súmen, bìʼ fo vèr jayin ne e wò.

⁹ Yii bèy, Nyùy Tàr woo Nyùy wor, à dzə̀ ké, aà kù yii shám wír vé shámén. À lo, à làysìn ajay vér, fə̀m mo vèr tsəyin kóy vèsən.

¹⁰ Nyùy Tàr woo Nyùy wor, vèr yoʼ yùnín wò, e lèm nsər se wò‑oò tsənsin ji aŋgàa ntum vée fó e vèr.

¹¹ Rúrú, wír veé Israyi shòʼór ne nsər yè adzə̀m, e bìn ndzə̀m, e làa yòʼ dzə́ə a yunín jí yè. À nen lò, e màʼ lòn e věr kitu, bìʼ fo vèr jayin ne e wò, a kù dzə̀ lòn wo vé‑eè yiin kilìʼ, e lèm e Ŋwàʼ Nsər wo Mooser woo ŋgaà lìm wò‑oò saŋen.

¹² À yiì ne kinyo ke wò‑oò suuy ji à wíy yiì e vèr aàtǎr saʼ vérí, e màʼ ŋgeʼ ye tavín e věr kitu. Á yòʼ‑oò ghàn ne màʼ ŋgeʼ e kirə̀ʼ é sar shùy fèn moo ye à màʼàn é Jerusalem.

¹³ Ŋgeʼ sidzə̀m se á saŋen é Ŋwàʼ Nsər Mooser si gbù ne e věr kitu. Yii bèy, a bó vèr yoʼ tòŋ e wò ji à shám ver, é vèr maʼti vinyo vér ve bi ví, a kiíy a dzə̀ suuyrú wò.

¹⁴ Bìʼ bey Nyùy Tàr, à shwèʼtí ne, e kìíy ghán sée màʼ ŋgeʼ e věr kitu. Aà kù yiì bèy, bìʼ fo à dzəə̀n Nyùy, aà yii yii vinyo réŋ, fə̀m mo bó vèr yoʼ yuùrí jí yè.

¹⁵ «Éè Nyùy Tàr woo Nyùy wor, wò‑oò fə̀ə́r wír vé fo wòŋ Ejiv e vitaáví vé vi, e yiì, vitúm vi kiíy vitaáví vé, e shem lán. Vèr dzə̀ kér, a vèr jày ne, e yiì kibí féyì e wò.

¹⁶ Éè Nyùy Tàr, ku rə̀ʼ dòʼshwiiy wò fo wò ŋkàlaʼ yee Jerusalem, réŋréŋ mo à yii yii vinyo vé tìítiy. Ŋkàlaʼ ye kù dzəə̀n ye, a dzə̀ gwan wò wo ranén. Jerusalem sì kifá ke nshéʼmé ki, a vèr sì sá kifá ke nshéʼmé ki fo vitúm ve ví dzəə̀n e věr ghaŋ vi, bìʼ vinyo ve vèr jayin, e bóo lì sa vinyo ve atàr vérí‑iì bùʼtìn.

¹⁷ Éè Nyùy wor, ku yuùrí bunrì yémé, mo woo wan lìm wò. Yuúrí vinyo ve m lón fo wò vi. Éè Nyùy Tàr, ku lèéy lav yè cù ye yì sàʼkìn ne, e shilív she juŋ shi, bìʼ shií wo dzəə̀n wo.

¹⁸ «Éè Nyùy wom, ku tèér kituʼùr ké ki, e yuùrí. Ku mvə̀ʼ sí yée, e yèn búʼú mo ŋkàlaʼ sàʼkìn ne. Ŋkàlaʼ feyì, a dzə̀ ye. Vèr yòʼ lón vinyo ve vèr lón fo wò, bìʼ fo vèr kwaʼtì ji vèr dzə̀ tìítiy. Kù dzə̀ cáʼ bìʼ fo à yii shám ver é ŋàŋ.

¹⁹ Éè Nyùy Tàr, kii wò, ku yuùrí kinyo kér kí, e làysìn ajay vérí. Nyùy Tàr, ku mvə̀ʼtì vituʼùr vé vi, e sə̀ ver, é wíri fiʼ yèn vitaáví vé. Éè Nyùy wom, lá à yòʼ ndzə̀y, bìʼ fo wò‑oò shoʼon ne ŋkàlaʼ rə̀n ji ye, a wír vee fóo sì vé.»

Gabriel yíysí ghán se Nyùy lèmèn bìʼ Jerusalem

²⁰ M ku nèn a suŋnín e mvə̀m bùnrì, a tuuné ajay vém, e kfə̀n a tuuné vé wìr veé Isray, a neèr vinyo ve m lóné e Nyùy Tǎr si, wun woo Nyùy wom, e kù a lon feyì bìʼ lav rə cù ye ranén.

²¹ Kù mo mò‑oò súŋnin e mvə̀m bùnrì, nshìylav Nyùy yee Gabriel féŋ, e wìy, e yèn mo, a sì é fìʼ wo á yii yii cu yee ŋkuùr. A kù dzə̀ wun woo Gabriel wo mò‑oò yenen ne fo mbìy e njà kinjeenjèm.

²² Wù wíy, e yèn mo, a naàrì vinyo e mò, a suúy jii, «Daniel, m wìy ne bèn ji m yii, áà wáa kiíy mo dzə̀ à wàa tàr vinyo, a kiíy jeéyjeéy fó fo.

²³ À kì kèʼ, e lòo lon vifá ve à kì lón e mvə̀m bùnrì, Nyùy nen kù tsə̀nsí binèr, a m wìy ne ji m naari e wò, bìʼ fo Nyùy kòŋèn wò e ŋàŋ. Yuúrí binèr ye Nyùy fooné kijuŋ, a mùm ji à kiíy á jeéyjeéy fó vinyò ve Nyùy ghemen ndzə, e dìn e wò.

²⁴ «Ku kìíy ji Nyùy lèm ne ntàm bìʼ vinyo ve wìr vén, à vé ŋkàlaʼ yen ye ranén ví, a ntàm rə̀n dzə̀ kiyá saàmbà kàŋ msaàmbà. Wù lèm ji á mayir á yii ye bií, é vinyo ve á jáy vi seéy, aá kfən màn lòn woo bìʼ vinyo ve bi ví, é Nyùy nèn tìír kinyo kee tínén é nsànloŋ, é kí wáa tiy fo ŋkuuŋkùŋ, e kfə̀n tiír kinyo ke wù‑uù ghemen ndzə e wír vəə́, à ke wù‑uù tumen aŋgàa ntum və́ shó ki. Wù tiirì, aá nèn *kfə̀mrí kirə́ʼ keé lav cù kee jeéy kí féyì.

²⁵ Ku yuùrí kijuujùŋ, a kiíy jii, kèʼ mo ntum Nyùy‑iì fəən ji á baʼri Jerusalem, e siìr fo, ghán sí wíy shaà kiyá saàmbà, kàŋ saàmbà, e meé mo taà saʼ wo á yoʼon ne wíy wìy. Á wíy bom Jerusalem, e naŋsín dzə́ə seé mvə̀m sé laʼ wùn à virə́v vé kày vi, é wù tiím fó kiyá saàmbà, kàŋ nshòv sibaà e mntuùfú. Ghán sin si kù wíy a dzə sé ŋgeʼ.

²⁶ Ghán sin si wíy shaà, aá laar taà saʼ wo á yoʼon ne, e buúr sáʼ fo kiwo wo. Taà saʼ wùmòʼ wíy ŋaʼáy e ghan fèn, é vé rər vəə́ laar ŋkàlaʼ wùn à kirə́ʼ ké cù ki. Á wíy laàr fó mo laàr ndzə́v, é rə́r sí kú a shaà fo mbìy, e meé mo ghán see shooy si‑íì shaa. Á mo Nyùy wayin ji ŋgeʼ si wíy a koóy.

²⁷ Taà saʼ və̀y wíy gwàr *mensaŋ wùn à vitúm vi vinín, e gwàr, é mè táv é bǎm kiya saàmbà ji wun fiʼ tàvír ntaʼ və. Yii bèy, viyá vìn vi lóo meé e ntìntìn, é wù sháʼnín fo á kfən cù Nyùy, kìn dzə̀ e nyàm, kìn e fómo wùmòʼ. Wù wíy lèm kifá ke kí kóʼoy, bívir virə́ʼ é mbìv lav cù yìmòʼ, é kí kú a dzə fo, e dù, e meé e ghan se Nyùy wíy laàr wun woo taà saʼ.»