Daniel 8 - ŊWÀʼ NYÙY

Daniel yén kiyáʼ wùn à bvəy loŋ e njà kinjeenjèm

¹ Wáa meé ji viyá vitaár mo Belshasar‑iì sáʼ vifon, mo woo Daniel, m kfən yèn kinyo e njà kinjeenjèm, e bàr ké mbìy ke kí‑iì meésinè sho.

² M lòo leéy kinjeenjèm kìn, e yèn, a kí din ji m dzə̀ á e Susa wo dzəə̀n ŋkàlaʼ yee fo sáʼ yeé wòŋe lo, a yì dzə̀ é mbìv wòŋ yeé Elam. M kfən yèn, a m dzə́ e ghaa ndzəv yee Ulay.

³ M lò, e ŋàʼár sí, e yèn kiyáʼ, a kí kér loŋ sibaà, a kí tíy e ghaa ndzəv. Loŋ see sibaà sin si‑iì dàrkìr, yii bèy, a yìmòʼ‑oò dàr, e shaà yìmòʼ, e kfə̀n a kìʼ e fíy, e shaà yee shooy.

⁴ M yén, a kiyáʼ kìy ki guutì virə́ʼ mbìv sidzə̀m ji lá nyàm yìmòʼ yòʼ tàm wùn wun. Kí‑iì guutì mbìv yee fo shùy yii tó, guutì mbìv yee kuy, kfə̀n guutì mbìv yee tsə́n, a bó nyàm yòʼ‑oò dzə̀ shó ye a yì‑iì dzə̀ yì bòyìr kitú kfə́ fó wùn wó.

⁵ Kù mo mò‑oò dzə́, tar ji sà kooy kaá, kibév ki sàsìn, e meè fó mbìv ye shùy yii nəə, a kí kér loŋ e mòʼón, a yì tíy e wun nsàn wón si, a yì yénsin e ŋàŋ. Kibév kìn ki wáa fetí kileʼ, a shaà, a wuú yòʼ kum nsay.

⁶ Kí wìy, e yèn kiyáʼ ke kí‑iì kér loŋ sibaà, ke mò‑oò yenen, a kí tíy e ghaa ndzəv kiy. Kí yén, a leʼ kitávín, a dù e wùn wó, e dòʼshwiíy.

⁷ M yén, a kibév kìy ki nyoorì kiyáʼ e mensə me bi mè. Dòʼshwiíy kív, kí fúnrí kiyáʼ kìy, e kìvtí loŋ sə́ see sibaà, a bó kiyáʼ ki yòʼ‑oò ló a ker mentàsìn mée tam wùn kibév kìn ki. Á bèy, kibév ki ku kùúy wun, e sàn é nsay, a nyèŋrì, a bó wìr wóo sə wun yòʼ dzə̀.

⁸ Kibév kìn ki ku nèn a dzə̀v kfə́ a dzə̀ nsaŋ ji moo wun yòʼ waà dzə̀. Kí wìy tàv, e mèé e ntìm yìwun, loŋ rə ye tavín rə̀y nèn kìvín. Yì kívín, se sən see loŋ se tavkín símóʼ sí fəə́kír fo rə̀y kì kivin sikweè, a ròm mbìv sí jeéy jeéy.

⁹ Fo loŋ see sikweè sìn, yee mòʼón‑eè kér yìmòʼ yee loŋ shitérí, ye yì‑iì loòn, e fəə̀, a ker vitaáví, a ví dú, e mèé e mbìv wòŋ yee tsə́n, e mèé e yee fo shùy yii tó, e kfə̀n mèé e wòŋ, a dzə̀ woŋ ŋkàʼmée.

¹⁰ Yì‑iì kùy, e tàv é ŋàŋ, e taàmé vifá veé yuv, a dzə̀ ji mànjòŋ vé rər veé yuv. Yì máʼ vifá veé yuv vímóʼ ví é nsay, e nyèŋrì e wuú.

¹¹ Jòkìnyàʼ, yì‑iì kòʼór kitú kfə́, a sə kóy wùn Taà Mànjòŋ vé rər veé yuv, a shaʼnín cu ye vé‑eè cu Nyùy sho kishiíy kidzə̀m, e bìvír lav rə cù.

¹² Kiguynìn ki ku nèn a kuy kuyín. Á nèn lò, e wày sá wír Nyùy e loŋ rə̀n kiwo, yì wáa ker vitaáví, a ghaʼ áwune, e ndzəə̀r cu ye vé‑eè yii kishiíy kidzə̀m. Yì‑iì maʼ kinyo ke Nyùy fo nsay, yii vinyo vìn, a kinyo kfə́ kí kù kúy kuyín, ghán e mboʼ.

¹³ M nèn lò, e yù, a nshìylav Nyùy yìmòʼ súŋninè, dzə́r e yìmòʼ jii, «Vilìtì ve vinyò ve á yenen é njà kinjeenjèm vìn vi wíy yensín e ghàn ka? Kiguynìn ke kí bívir kirə́ʼ bívírín kin ki wíy dù, e meé e le, bóo ndzəə̀r cu ye á yii kishiíy kidzə̀m? Á wíy nyèŋrì wír Nyùy wùn à kirə́ʼ ké cù ki, e dù, e meé e le?»

¹⁴ Nshìylav rə̀y bínér jii, «Kí wíy shaà fo mbìy bèy kishiíy kishóv ghii taár aànsə̀kìi abaà (2,300), ǎ shùy, à vitsə́ʼ, aá nèn siìr kirə́ʼ ké cù fo.»

Nshìylav Nyùy yee Gabriel naárí nsàv kinjeenjèm

¹⁵ Mo mo woo Daniel‑iì yenen vinyo vìn e njà kinjeenjèm, m ku nèn a tàr ji m kiíy á nsàv. Wìr nèn sàsìn, e fəə̀sín, e tìím e mǒ si, a wù shwínin wír woo lumèn.

¹⁶ M yú jí, a yì wiy fo kitu ke ndzəv yeé Ulay, jaŋ Gabriel, suuy sho jii, «Gabriel, tóʼtí nsàv kinjeenjèm kìy e wìr və̀n.»

¹⁷ Á bèy, Gabriel kóʼtí fo mò‑oò tíyí. Kù mo wù koʼtin, m nèn a fàn, e gbù fo nsay, e tsə̀m sí. Yii bèy, wù suúy e mò jii, «À dzə̀ ké wir msòŋ, a m taʼ e yiì, áà kiíy ji kinjeenjèm ki din a dzə̀ kinyo ke kí wíy a koóy e ghan se ndzə wíy a mày.»

¹⁸ Wù‑uù súŋnin vèr wun, a m kì buùné ne, e tònén, a sí yémé kù dzə̀ə́ e tsə́mén fó nsay e njèm. Yii bèy, wù ghár mo, e nàn, e tìír, m tiím tìítiy.

¹⁹ Wù nèn sùúy e mò jii, «Leéy, e yèn, m taʼ e yiì, áà kiíy kinyo ke kí wíy a koóy, e ghan se Nyùy wíy fəə́r dòʼshwíiy və, a màʼ ŋgeʼ e kitu ke nsay, a kí sí wìy a mày. A wun woo Nyùy kù lèm ne ghán se ndzə wíy mày.

²⁰ «Kiyáʼ ke wò‑oò yenen, a kí kér loŋ sibaà kí din a dzə̀ afon vee abaà, fon woó Media wùn à woó Persia.

²¹ Kibév ki din a dzə̀ kitúm kee Grik. Lúm loŋ wo wú‑uù tíy e nsàn wón si kiyaʼ və̀ne din a dzə̀ fon wov wo mbìy.

²² Ké loŋ see sikweè se sí‑iì fəəkin fo lúm loŋ və̀yi‑iì kivin, kee shooy ki din ji woŋ e dzə̀m wo wír veé Griki kooné wíy jàvsìn vilíŋ vikweè, é kee kimòʼón ki wáa ker və́ə woo fon, a bó vitaáví vév ví yòʼ wíy meé e vé fòn woo wo mbìy vi.

²³ «Yii bèy, wíy lòo dzə, a sáʼ yéví sí wìy dù a mày, a wír ve á guynìn, shóʼor nsər Nyùyi jáy ne vinyo bèn, e tònén, é fòn wùmòʼ ŋáʼáy, a vishí və́ ví kù wíy a dzə rə́r rə́r, é kfə́n a dzə wír, a wù kì móo ba menàŋ, e kèm ŋgeʼ.

²⁴ Vitaáví və́ ví kù wíy a dzə vigháʼtín. Yii bèy, a bó kee shooy ki yòʼ wíy lò a dzə̀ fo wun. Wù wíy a tòn virə́ʼ, a bemér wíri, é vinyo ve wù yii vi kú a dù duùn fó mbìy. Wù wíy laàr antav, e kfə̀n laàr wír ve dzəə̀n ji vé Nyùy.

²⁵ Wù wíy a fiír feyì, a yiì vinyo və́ bám bám, é kimboʼtì ki kú a kuy kuyín e wun saʼ. Wù wíy a koʼór kitú kfə́, a yen ji moo wun yòʼ dzə̀. Aníne wíy lòo kwàʼ ji á dzə̀ akiŋsìn, e wù nèn tò, e laàr áwune. Wù wíy lò, a tsəy kóy wùn Fòn woo Fon fo afone. Yii bèy, sáʼ rəə́ wíy gbù, a bó kee shooy ki yòʼ fə̀m wíy ghan a dzə̀ wó wìr msòŋ.

²⁶ Kinyo ke à yenen é njà kinjeenjèm kùm cu ki kù wíy gheén wùn à kinyo kee kùm cu yee kijàvndzə wùn à yee ŋkuùr ke á kì naàrìn ne ki. Yii bèy, ké lèn ki, ku lèm kinjeenjèm kìn ki é kilìtì. Kí din a dzə̀ kinyo ke kí wíy a koóy fo mbìy, e bǎm viya nyanyày.»

²⁷ Á bèy, mo woo Daniel nèn lò, a mày màyìn, e jòy feyì fo bǎm vishiíy. M jòy bèy, e ŋàʼáy, e nèn kfə̀n é bàm, a lìm vinshìylav vém é ntoʼ. Kinjeenjèm kìn ki‑iì yiì, shilív shí wáa buʼ mo búʼún, la m yòʼ kìíy nsàv rə.