Daniel 2 - ŊWÀʼ NYÙY

Njèm shí Fòn Nebukadnessar

¹ Fòn Nebukadnessar‑iì sàʼ vifon, kí lòo meé ji viyá vibaà, njèm si shí wun, shilív sə́ shí wáa buʼ, mbuùné sí káŋ fo wun si.

² Wù nèn tsə̀nsí toóy e vé fù ve á yii tóʼti njème, e tòóy aŋgàa ŋgàŋ wùn à vé səme adzə̀m, e tòóy wir dzə̀m wo wù yén virə́ʼ ji á wiy, e tòʼtí a njèm sə́. Á wìykìr, e tìím e wun si.

³ Fòn nèn sùúy aáwune jii, «Njèm shì ne mo, shilív shí wáa buʼ mo búʼún ji m ku kìíy a nsàv.»

⁴ Wír ve á yén virə́ʼə́ bùn fon e Lǎm Aramayik jii, «Bvərə̀ʼ, sàŋ wo wù lo ghán sidzə̀m, fòn ku fèr a njèm rə, áàkwàn vəə́ tóʼtí á, e fò e fòn.»

⁵ Fòn nèn bìnèr aáwune jii, «M kù tíy e kinyò ke m kì wayin. A vèn dzə̀ làa yòʼ fèr njèm ye yì kì shiin mo, e toʼtí nsàv, bo m lo, e yòŋ, aá sheti ven é vintin vintin, é láʼ sén sí du é kibvə.

⁶ Yii bèy, a vèn lòo dzə, e fèr mo njèm yem dzəə̀n, e tòʼtí, bo m lo, e nəʼsín ven áàfómo wùn à vikaanè ví, e kfə̀n bùʼ ven. Kí nén a dzə jii, vèn ku fèr mo njèm yem dzəə̀n, e tòʼtí nsàv, é m yú.»

⁷ Áwune nèn kfə̀n bùn fon jii, «Nyàr, á ku fèr a njèm ye yì kì shiin wun, áàkwàn vəə́ tóʼtí, e fò á e wun.»

⁸ Fòn bìnèr aáwune jii, «M kì kiránén ji vèn kù ghvəə́ bèy ji ghán sí fíʼ a koʼtí, bìʼ fo vèn kiìn ji kinyo ke m kì wayin kí kù tíy a fo.

⁹ Kí nén a dzə jii, a vèn dzə̀ là fóo fèr njèm rə̀n e mò mo yì dzəə̀n, é m kiíy, bo m kù kér kinyo kimòʼón ke m lo, e yiì e vèn. Vèn suùsín ne ji á wáa boʼtí mo, a taŋrí vinyo a kù dzə̀ vé kinshwìv vi, bìʼ fo vèn kwaʼtì ji á lóo yiì bèy, ghán sí lóo dù, é kinyo ke m sév ki kúvsín. Bìʼ bey, vèn fer njèm yem e mò, é m bóo fíʼ kiíy ji dzə̀ vèn tòʼtí nsàv.»

¹⁰ Vé si vìne bùn fon, e bìnèr sho jii, «Nyàr, bó wìr yòʼ dzə̀ shó a e kitu ke nsay wo dzə̀ wù yiì kinyo ke fòn suuy kìn. Bó fòn wùmòʼ, kìn taà saʼ wùmòʼ yòʼ‑oò ghàn ne dzə̀r á kfə́ə kinyò kee ben e ŋgaà fù, kìn e ŋgaà ŋgàŋ, kìn e ŋgaà si, a fə̀m dzə̀ taà saʼ, a wù táv é le.

¹¹ Kinyo ke á dzə́r fo ntoʼ ji á yii kin ki ghàʼ á feyì, a bó yòʼ dzə̀ wìr yù á fó yiì. A kù dzə̀ á fìʼtì anyùy e wun, yii bèy, a bó anyùyi yòʼ dzə̀ á e wìr msǒŋ mvəm.»

¹² Fòn yú, kí tínsín wun e ŋàŋ, tím rəə́ ndzə́ʼ, wù nèn fò sáʼ ji á ku laàr a wir si e dzə̀m láarin fó wòŋ woo Babilon.

¹³ Sáʼa nèn kù fəə̀ ji á yúyrí á vé sii. Á nèn dù ji á taʼ á sa Daniel wùn à ŋgoo rə, e yùyrí.

Nyùy dín nsàv njèm e Daniel

¹⁴ Kù mo Ariok woo mfòómé anshìy fòn fəən ji wun du, a yuyrí vé si veé Babilon, Daniel méʼ wun, e sùŋnín sho moo wír wo wù fiirin, e kfə̀n a kiíy móo tàr kinyo kijuŋ.

¹⁵ Wù wáa suŋnín e Ariok, a dzər sho jii, «Ábaáy, sáʼ fòne lò, e fəə̀ kigir kigir bèn ji ka?» Ariok nèn naàrì mo kinyo kee shó ki kì dzəə̀n e Daniel, e naáy naáy.

¹⁶ Daniel ku nèn dù e ntoʼ, e bùn fon, a lon ji fòn ku fò á wun ghán shishàr, é wun tóʼtí á nsàv njèm rə.

¹⁷ Wù yiì kfə̀n e wun lav, e naàrì kinyo kìy aàŋgaà və́ ŋgoo vee Hananiya wùn Mishael, à Asaria,

¹⁸ a boòrì áwune bóorin ji á kú a lon a dzə̀ á Nyùy woó yuv ji wù shám áwune, e tòʼ á kilìtì ke kinyò kìn aáwune, fo kí koóy ji á li áwune, e tàtí wùn à vé si veé Babilone, e yùyrí.

¹⁹ Yiì lòo dzə vitsə́ʼə́, kilìtì ke kinyò kìn ki wìy e Daniel si e njà vinjeenjèm. Á bèy, Daniel wáa burí Nyùy woó yuv.

²⁰ Wù wáa burí, a suúy jii: «Búríi wáa dzə fo Nyùy, e dù, e jòʼsì. Kù kér wun vifií, a kér wun vitaáví.

²¹ Wù lo, wù kùvsín ghán sé vinyò, à seé kiya si. Kù kóʼor wun afon, a kù sə́ wun vifon fo áwune. Kù fó wun vifií áàfií, yii, a wír ve á fiiriné kiiy jeéyjeéy fó vinyò.

²² Wù lo, wù fə̀ə́r vinyo ve ví shoon, à vilìtì ve vinyò vi é ŋgèŋgèr. A kì soò ka feé fó mesənér, bo wù kù kì. Ráne kù lo a dzə̀ fo wun.

²³ Éè Nyùy wo atàr vémé‑eè ghvə́mé, m beerì, kfə̀n búri wò. À fò ne mo vifií wùn à vitaáví ví, e yiì, m kiíy kinyo ke vèr‑ii lòn wò sho. À yiì ne, vèr kiíy kinyo ke fòn‑ee dzə́r e vèr.»

Daniel naárí njèm fòn, e tòʼtí

²⁴ Á bèy, Daniel nèn dù, e yèn Ariok woo mfòómé wo fòn‑eè shoʼon ji wù laar vé si veé Babilon. Wù dù, e sùúy sho jii, «Kii wò, lá à yòʼ laàr vé si veé Babilon. Ku lì mo, e dù sho e fòn si, é m naari njèm rə shó, e tòʼtí nsàv.»

²⁵ Ariok nèn kù lì Daniel cércér, e dù sho e Nebukadnessar si, e bùn, e yòŋ jii, «Nyàr, m yèn á ne wír wo dzə̀ wù tòʼtí á nsàv njèm rə á e wun. A dzə̀ á wír fo wír veé Juda ve vé‑eè koorin é kwaʼ rər, e wìy sho fèn.»

²⁶ Fòn nèn dzə̀r e Daniel wo yír yímóʼó‑oò dzəə̀n ji Belteshasar jii, «A kù yòʼ dzə̀ rú, à yù fóo naàrì kinyo ke mò‑oo yenen é njèm, e tòʼtí e mò mo nsàv dzəə̀n á?»

²⁷ Daniel bùn fon jii, «Nyàr, kilìtì ke kinyò ke vé‑ee dzərin, a fə̀m dzə̀ vé fù ve á yii tóʼti njèm, kìn aŋgàa ŋgàŋ, kìn vé səm vifòne, kìn vé sii, bo bó yòʼ dzə̀ á naàrì á e fòn.

²⁸ Yii bèy, a Nyùy dzə̀ á e yuv, wo wù yii sar vinyo veé kilìtì. Wù dìn a ne e fòn kinyo ke kí dzəə́ bvəə́shi a koóy. Mo‑óò fiʼti á e fòn njèm ye fòn‑ee neèmèn é mbvə̀ʼ, yì shí wun, vinyo ve fòn‑ee yenen é njà vinjeenjèm.

²⁹ «Éè Lumnyàm, kù mo vé‑ee néŋ e wun mbvə̀ʼ, vifií vé fòn vi‑ii binkir, á wáa kwàʼtì vinyo ve ví dzəə́ wìy a koóy. Ŋgaà wo wù yii sar vinyo veé kilìtì nen yiì, fòn kiíy kinyo ke kí dzəə́ wìy a koóy.

³⁰ Fo kém kí, Nyùy nen yiì, m kiíy á kilìtì kìn, a bó yòʼ‑oo dzə bey a bìʼ fo m kér vifií é ŋàŋ, e shaà wir msòŋ e dzə̀m. Kí‑ii koóy bey, éè tàr wor, ji tàr wor ku yù á nsàv njèm rə, e kiíy a jeéyjeéy fó vinyò ve ví dzəə̀n e wun kwàʼtì.

³¹ «Éè bvərə̀ʼ, rúrú, tàr wor‑ii lo yèn á e njà vinjeenjèm, a kibámmbó kímóʼ kí tíy e wun si kiwiíwíy, a kí rán bèn, kfə̀n njaʼkìrì, a mbom rə beéme ji wùm.

³² Vé‑eè fèr á kitú ke kibámmbó kin a dzə̀ e *kisha ke mbàm ke baar ke á shèŋrìn ne ki, e fèr a nsaŋ wùn à kóy si a dzə̀ e ke fəvír kí, e bóo lì a bvəm wùn à mentáy mè, me vé‑eè fèrìn a dzə̀ e kisha kee *brons ki.

³³ Vé‑eè fèr á shwín sí a dzə̀ á e kisha kee kisha ki, wuú rəə́ wáa dzə, aá fér á mbìv kiwuù yìmòʼ a dzə̀ e kisha ki, e fèr yìmòʼ a dzə̀ á e nsay mbóm.

³⁴ Kù mo á tíy leey fo ntoʼ, kilán ki nèn wàʼám, a bó yòʼ fə̀m wàʼ á wír e wóo. Kilán kìn ki tsə́y á kibámmbó kin fo wuù, wuú nèn bvə̀ʼə́y e vimbvəʼ vimbvəʼ. Wuú ye vé‑eè fèrìn mbìv kiwuù yìmòʼ a dzə̀ e kisha ki, e fèr yìmòʼ a dzə̀ e nsay mbóm.

³⁵ Á bèy, kibámmbó kí ku nèn keèsì, vifá ve á fèrìn shó vi bvə́ʼə́y vidzə̀m, a dzə vikpuún á moo mvə́y se ŋgwàsáŋ wo á buʼun. Kisha kee kisha ki bvə́ʼə́y, à nsay mbóm shó, à kisha kee brons ki, e bóo lì a kisha ke mbàm ke fəvír kí wùn à ke baar kí. Shwéri nèn wìy, e fèér, e dù a sho, la kfəʼ yòʼ kfə̀n à bèr. Yii bèy, kilán ke kí‑ii kèrìn kibámmbó kin ki nen lò, a kùʼ, e mèé e kirùmèn ke wiy kí, e sə̀tí a kitú ke nsay.

³⁶ «Á mo njèm ye yì‑ii shiin á fon waà dzəə̀n. Ké lèn ki, vèr lo, e toʼtí a njèm fòn, e fo a e wun.

³⁷ Nyàr, á dzə̀ á fon fo afone. Nyùy woó yuv fò á ne wun kitúm ji á wáa saʼ, e fò á wun vitaáví wùn à vikuʼùy ví.

³⁸ A wìr fə̀m‑eè soò feé, nyàm kwaʼ soó feé, e bóo lì menə́n me mè féŋ e yuv, bo Nyùy kù wày á ne vifá vìn vidzə̀m a dzə̀ e wun kiwo, e lèm a wun ji taà saʼ, á wáa saʼ a vifá vìn vidzə̀m. Kitú ke kibámmbó ke kí‑iì dzəə̀n é njèm, aá fér a dzə̀ e kisha ke mbàm ke baar kí, fèn dzə̀ á wun.

³⁹ Kí nén a dzə a jii, sáʼa wíy gbù fo wun vibìy, é kitúm kímóʼ kí ŋáʼáy, a bó sáʼ kitúm kee shooyi yoʼ tàv á moo rə́. E bǎm kee shooy, é kímóʼ kí wàá ŋáʼáy, a sáʼ rəə́ dzə̀ á yé kishà kee brons, a kitúm kìn ki wíy a saʼ a kitú ke nsay.

⁴⁰ Kitúm ke kí wíy meé ji kweè, sáʼ rəə́ wíy tav a moo kisha kee kisha ke kí yii saʼtì vifá vidzə̀m, bvə́ʼəy a e vimbvəʼ vimbvəʼ. Kitúm kìn ki kù wíy a sàʼtì virə́ʼ, a sə̀ʼsì sáʼ vitum ve mbìy vi vidzə̀m réŋréŋ á mo kisha ki yii bvə́ʼəy kifá.

⁴¹ Kù mo fòn‑eè yenen wuú kibámmbó kin, wùn à wón wùú, aá fér a dzə̀ e mbóm wo á tònèn, a mbìv yìmòʼ dzə̀, aá fér a dzə̀ e kisha kee kisha ki, bo nsàv dzə̀ á ji bó kitúm kìn ki yòʼ wíy a dzə shuu e mòʼón. Yii bèy, kù mo á yenen, a mbìv yìmòʼ dzə̀ kisha, kibér ki wáa dzə nsay mbóm, bo dzə̀ á mo sáʼ kitum kee shooyi wíy tav sa e mbìv yìmòʼ.

⁴² Mo wuú kibámmbó rəne dzəə̀n á kisha e mbìv yìmòʼ, bo yìmòʼ wáa dzə mbóm, bo kù dzə̀ sá réŋréŋ á mo sáʼ yeé kitum fène wíy a ker vitaáví é mbìv yìmòʼ, a gbù gbuùn e yìmòʼ.

⁴³ Mo fòn‑ee yenen, aá shwír kisha e mbóm wo á tònèn, bo nsàv dzə̀ á jii, atǎr saʼ veé kitum fène wíy a mùm ji á juur a wón vév e kfəə́ se vé saʼa ve wùn áwune sə́ kóy, aá fíʼ tàr shuu. Yii bèy, a bó yòʼ dzə̀ á kí lìm, kù mo bó yòʼ dzə̀ wìr shwír kisha e nsay mbóm, kí lìm.

⁴⁴ «Atǎr saʼ vìne wíy lóo saʼ, é Nyùy woó yuv neer á rə́ yee sáʼ ye yí yòʼ wíy mày, a bó wír ámóʼó yòʼ wíy yu a fó sə, a saʼ. Yí wíy laàr a sáʼ afòn vìy, é yí may ŋkuuŋkùŋ, é nèn kù a tiy a sáʼ Nyùy rə̀n fo, e dù, e jòʼsì.

⁴⁵ Fo ké kilan ke fòn‑ee yenen é njèm, a kí wáʼám fó gwan, a bó yoʼ wàʼ wír e kiwó ki, a kí bvə́ʼtí kisha kee kisha, e bvə̀ʼtí kee brons, e bvə̀ʼtí mbóm, e bvə̀ʼtí kisha ke mbàm ke fəvír kí, à ke baar kí, bo nsàv dzə̀ á jii, Nyùy wo ghaʼtín dìn a ne e fòn kinyo ke kí dzəə́ wìy a koóy. Njèm rə̀n dzə̀ á rú kinyo ke kí‑ii kooyin fon, a kinyo ke m tóʼti e fòn ki dzə̀ á kinyo ke ru kí.»

Fòn búʼ Daniel

⁴⁶ Á bèy, Fòn Nebukadnessar nèn gbù e Daniel si, a ghvə̀m wun, e lò, e fò sáʼ ji á ku wìy a e vifá ve cù vi wùn à virə̀ʼtìn ve kilay ví, e cù a Daniel sho.

⁴⁷ Fòn suúy e Daniel jii, «Rúrú, Nyùy wò shaà anyùy adzə̀m. Dzə̀ wun Tàr wo wù sáʼ afon adzə̀m, a sar wun kinyo keé kilìtì kidzə̀m. M kìíy bìʼ fo à sàrìn kilìtì kém ké kinyò.»

⁴⁸ Á bèy, Fòn Nebukadnessar nèn kòʼór Daniel, e nə̀ʼsín wun aàfómo ve wiyí anín, e lèm wun, wù wáa saʼ kishév ke wòŋ kee Babilon kidzə̀m, e kfə̀n fò wun vitaáví, wù wáa saʼ vé si adzə̀m vee fó.

⁴⁹ Daniel nèn bùn fon bìʼ ŋkar sə́, wù lém Shadrak wùn à Meshak, à Abednego, á wáa lìm vinyo veé wòŋ woo Babilon, wúnwun Daniel góʼ kfə́ é mvə̀m ntoʼ.