Daniel 12 - ŊWÀʼ NYÙY

Kinyo keé ghan sé bàm sí

¹ Nshìylav Nyùy ye yì‑iì màʼàn ndzə̀y ye baán nèn kfə̀n a suúy jii, «Ghán see shooy si wíy gheén, é Mayker woo nshìylav Nyùy ye kuʼùn ŋáʼáy, a kù dzə̀ wun woo shó wo wù shiy wír vé, wù ŋáʼayì, é ghán sé ŋgeʼ ye tavín sí tsə́ŋén, a kfə́ə ŋgeʼ rə̀n wíy a dzə, a yì yòʼ‑oò ghàn ne a dzə mo vé‑eè kèʼèn, e gwàr woŋ, é bo vitúm vi wáa dzə e nsay. Wíy lòo dzə e ghan fóo fèy, é wír vée luŋ, wír adzə̀m, ve yír sév sí wíy a dzə e Nyùy ŋwàʼ.

² Màŋgòŋ wo wù buúne lèn e sày wíy fəə fo kpu, aámóʼó nəə́ é dzə̀ʼə̀m yee là may, aámóʼó nəə́ é nshoórmé wùn ǎ nshéʼmé woo là may.

³ Wír ve á kiiy jeéyjeéy fó vinyòo wíy a dzə kév, a ran, a njàʼkìr moo rán ye yí fəə́ fo kikùm keé yuv. Áwune vin ve á danèr wíri, aá yii mo Nyùy taʼàa wíy a ban moo mejiy, a ban bèy, e dù, e jòʼsì.

⁴ Daniel, fo ké ki, sə́tí jí se sí dzəə̀n é ŋwàʼ fèn si, e fìnèr e kifin ki, e meé mo ghán sé bàm sin si wíy gheén. Aneéníne wíy a leʼnín, a koʼ, a səy, a mùm ji á wáa kiíy vinyo, a dù duùn fó mbìy.»

⁵ Á bèy, mo woo Daniel leéy, e yèn rúrú, a wíri tíy abaà, a wùmòʼ tíy e ghaa ndzəv é ndzən və̀n, a wùmòʼ tíy e ndzən və̀sə.

⁶ Wùmòʼ nèn dzə̀r e nshìylav ye yì‑iì màʼàn ndzə̀y ye baán, a tiy e mbìv kùy ndzə̀v rə̀y jii, «Viŋgaʼnìn ve vinyò vìn vi wíy a koóy bèn, a ví wíy runér wún a dzə̀ é ghàn ka?»

⁷ Nshìylav ye yì‑iì màʼàn ndzə̀y ye baán, a tiy e mbìv kùy ndzə̀v nèn nàn wó rə́ yee baà, a kìʼ yúv shó. M yú, a yì yí kilìʼ, kan wun wo wù dzəə̀n shó, e wìy dù, e jòʼsì, yoŋ jii, «Wíy a dzə e bǎm viya vitaár e kimbéʼ ki, a sì ghán sin se á maysì, e ghaʼ wír Nyùy, é nə̀ʼsì və̀n nèn mày.»

⁸ Mo m fə̀m‑eè yuun kinyo ke wù‑uù suuyì, bó m yòʼ‑oò lo gwàrìr ji wù sà‑aà yoŋ bèy, a nsàv dzə̀ kaá. M kfən wèʼèr wún, e dzə̀r shó jii, «Tàr wor, kinjòʼsìbàm ké vinyò vìn ki wíy a dzə ka?»

⁹ Wù bìnèr e mò jii, «Daniel, kú a dù du yée. Jí see shooy si dzə̀, aá sə̀tí ne e kifin ki. A kù dzə̀ bey, e dù, e meé e ghan sé bàm sí.

¹⁰ Wír aníne wíy a shaà e mvə̀m vinyò fèn, é ví wáa shèŋrì áwune, a ranér, aá wáa dzə ajuŋ. Yii bèy, a wír ve á méŋ Nyùyi wíy shaà fo mbìy wùn à liì kisaŋ wov, a bó wìr fo áwune yòʼ wíy a gwàrìr kinyo. Ké wìr ve á kiiy jeéyjeéy fó vinyò ki dzə̀, aá wíy a gwàrìr mvə́m se vinyò vìn.

¹¹ «Á bèy, e kèʼ fo ghan se á wíy màyìr cu yee yiì kishiíy kidzə̀m, aá tiír ne kifá ke kí kóʼoy, bívir virə́ʼ, é vishiíy vímóʼ ví kfə́n a dzə kishóv e mbvə̀ʼə̀ e ghiì baà é nsə̀kì (1,290).

¹² Bòŋ ké wìr wo wù wíy a dzə, a shìy Nyùy, e dù, e meé e kishiíy ke dzəə̀n kee nshòv sitàn e mtaár e ghiì taár e nsə̀kì (1,335).

¹³ «Kí nén a dzə jii, Daniel, kú a tiy kitávín, e dù, e jòʼsì. À yíi kpu. Yii bèy, à kù wíy fəə fo kpu, e sə vilaámé vé e ghan sé bàm sí.»