Daniel 11 - ŊWÀʼ NYÙY

¹ Fo kém kí, mò‑oò lò, e ŋàʼáy, e tòm sá wun, a kù‑uù dzə̀ é kiya ke mbìy ki, ke Darius woo naaŋkàntì wìr Media‑aà sáʼ kitúm kee Babilon.

Vitúm ve afòn veé Ejiv wùn Siiria

² Ké lèn ki, m lo, e suúy wò suuyru vinyò ve ví wíy a dzə. Rúrú, afone dzəə́ wìy ŋaʼáy e kitum kee Persia ataár, a wo wù wíy meé ji kweè wíy a ker bùʼ, e shaà vé mbìyi. Sáʼ rəə́ wíy tav, bìʼ káv wo wù kérí, é wù maʼ melaà, é wìr dzə̀m binkir, e taàmé kitúm kee Grik.

³ Á bèy, é fòn wo kuʼùn wùmòʼ nèn ŋàʼáy, a wù wíy a saʼ woŋ e wiíwíy, a yiì kinyo a dzə̀ ke kí gheen wun.

⁴ Sáʼ rəə́ tuuy a yí tuúy ne, é yí ku nèn bvəə̀rí, aá javsin woŋ və́ mbìv sikweè, é sí waá kìʼ buú se ndzə jeéy jeéy, a bó sáʼ rəə́ yòʼ wíy dù a dzə̀ e rám rəə́. Afon vee fóo yòʼ kfə̀n wíy a ker vitaáví vé saʼ mo wù‑uù kérí, bìʼ fo wóŋe jàvsìn ne, sáʼa dú e wír ve səné.

⁵ Fòn wo wù wíy a saʼ kitúm kee Ejiv dzə̀ bey, a wù kù yòʼ wíy a ker vitaáví vé saʼ e ŋàŋ. Yii bèy, taà ntoʼ və wùmòʼ wíy a tav, a shaà wun, a tsəy kóy wùn wun, e wìy lò, e faàsì mbìv wòŋ yìmòʼ, a saʼ. A sáʼ rəə́ dzə̀ sáʼ, a yí wíy a dzə e gháʼtín.

⁶ Viyá vi lóo shaà, áàfon vìne suúsín viŋkar, é fòn woó Ejiv fó wan ntoʼ və ji wiiy ntoʼ fòn woó Siiria ji wùn wun tàr á ne shuu. Yii bèy, a wiiy ntoʼ və̀n yòʼ wíy yu fóo tar shuu wóv, a bó viŋkar vév ví yòʼ wíy tiytíy. Á bèy, kù é mvə̀m ghàn see shooy, aá tátí wun woo wiiy ntoʼ, à lum və, à wan və, e lì wír ve vé‑eè tsəənen wun, e wìy sho, e yuyrí áwune adzə̀m.

⁷ Yii bèy, wìr woo à wiíy kfəə wíy ŋaʼáy e tàr wóv kiliŋ, e wìy wùn à vé rərí. Wiyì, aá kív kirə́ʼ ké fòn woó Siiria ke tavín kí, e nəə́, e gìm wun e rə́r sí, e tòn wun.

⁸ Wù wíy kuúy mebvə̀m mee anyùy vév, e tatí wùn à vikáŋ vév vee *kisha ke mbàm ke fəvír kí, à vee ke baar kí, ve dzəə̀n vifá vév ve ghaʼtín ví, e dù sho e Ejiv. Wù du bèy, é la wù yòʼ dzəə ghìʼ fon woó Siiria e rə́r sí e bǎm viya vinín.

⁹ Fòn woó Siiria wíy lò kfə́, e nəə́ kitúm ke fòn woó Ejiv e rə́r sí, yii bèy, aá wíy tsəy wun, e siìr e bàm e wun kitum.

¹⁰ Wón fòn woó Siiriàa wíy taŋ rə́r, e baʼtí vé rər é mfòn, ve á wíy a kuŋ virə́ʼ moo ndzə́v. Á wíy nyoòrì rə́r, é sí du, e mèé e wír veé Ejiví virə̀ʼ ve tavkín ví, e kèm melaà.

¹¹ Wù yii bèy, é fòn wo wù sáʼ kitúm kee Ejiv nèn shwìíy kilòŋ, e fəə̀, e fùnèn fon woó Siiria. Wù fəə́, aá fəə́r mànjòŋ vé rərí, a wù wíy tòn vé rər veé Siiria adzə̀m.

¹² Wúnwun woo fon woó Ejiv maysì yúyri mànjòŋ vé rər və̀n, é wù nèn a koʼór wún bìʼ nyanyày wìr wo wù yuyrin. Yii bèy, a bó wù yòʼ wíy yòv nsiì və̀n, é ntàm dar,

¹³ bìʼ fo fòn wo wù sáʼ kitúm kee Siiria kfə̀n wíy baʼtí mànjòŋ vé rərí, a wù táv é ŋàŋ, e kfə̀n kùʼ, e shaà wo wù‑uù kér fo mbìy. Ghán sí wíy gheen, é wù kfən fəə̀ rə́r, a wù kér mànjòŋ vé rər e gháʼán, kér kifá ke rər kidzə̀m.

¹⁴ Kù é ghan see shoon, wíri wíy ŋaʼáy anín, a taamé fon wo wù sáʼ kitúm kee Ejiv. Vé melàa wíy fəə fo věn kitum, a gùynìn ji á fiʼ rùnér kinyo ke Nyùy‑iì ghemen ndzə, e dìn e wíri é njà kinjeenjèm. Yii bèy, a bó kí yòʼ wíy lìm.

¹⁵ Fòn woó kitum kee Siiria wíy fəə, e gìŋ ŋkàlaʼ yìmòʼ e rə́r sí. Á wíy fum nsay e wǔn kày, e nəə́ kay fo fo, e tòn ŋkàlaʼ rə̀n, é la vé rər veé Ejivi yòʼ kfə̀n wìy a ker kitar kée tsəy áwune é bàm. Fə̀m mo á tavin é ŋàŋ, bó á yòʼ wíy tam wùn à mànjòŋ rə̀r woó Siiria və̀n.

¹⁶ Mo fòn woó Siiria sùmèn woó Ejiv e rə́r sí, wù kù wíy a yiì kinyo a dzə̀ ke koŋ wun, a bó wìr yòʼ wíy a meʼ wun. Wù wíy faàsì nsay ye dzəə̀n ye mbùʼmé, a wù wíy a ker vitaáví vée laàr fó ŋkuuŋkùŋ.

¹⁷ Fòn woó Siiria wíy lò, e way ji wùn à mànjòŋ və e dzə̀ə́dzəədzə̀m kù‑úù nəə́ á fon woó Ejiv e rə́r sí, e kàn wun, aá yar rə́r. Wù wíy fo wán və ji wiiy ntoʼ Ejiv, ji wun fiʼ màʼ sáʼ vifòn. Yii bèy, a bó ntaŋ və yòʼ wíy shem.

¹⁸ Fo bàm, é fòn woó Siiria və̀n nèn bìnkìr, e kìʼ vitúm ve ví dzəə̀n é ŋguùŋè rìbà ndzə̀v, e koorí wíri é mfòn. Yii bèy, mfòómé wùmòʼ wíy sə̀r kiŋkoʼòrwùn kfə́, e siìr vinyo və́, a kù dzə̀ e wun kitu.

¹⁹ Kee shooy ki shaa, é wù binkir ji á kfə́n á e bàm, e làáy e virə̀ʼ ve tavkín vee áwuné wòŋ. Yii bèy, aá ku tòn wun tónen, é wù lay, à yírí shó.

²⁰ Njìlaʼ fòn woó Siiria və̀n wíy yi vifon, é wù tsə́nsí wír wo wù báʼti mbàm se bàràʼ ji wù fiʼ ghàr bùʼ woó kitum, é wù wáa tiy fo. Shintàm shi lóo dàr, aá laar fon və̀n, a bo wù yòʼ wíy kpu a dzə̀ bìʼ melaà, kìn rə́r.

Fòn woó Siiria woo ŋgaà yiì ye bií

²¹ Á yúyri wun woo fon woó Siiria, aá bun njìlaʼ və, a dzə̀ wír wo wíri taʼ kinyè kfə́ ntéŋ. Wír, a bó wù yoʼ fə̀m ràm kfə́ə wón ntoʼ. Wù kù wíy sàsìn sàsìn, e wìy, a borkír, a leèrì wíri a dzə̀ e shúu, e bóo yi vifon.

²² Wù yí vifon, é wù nèn laàr mànjòŋ vé rər e dzə̀m wo wù taamen wun, e laàr, à taà cù wo kuʼùn shó.

²³ Vitúm vímóʼ ví wíy suusín wùn áwune, é wù nèn kèʼ sáʼ rə́ kinshwìvi. Fə̀m mo wír vee wùn wòŋe dzəə̀n ashàr, sáʼ rəə́ kù wíy a kuy, a dzə e távín.

²⁴ Wù wíy lò, é wù sasin, e nə̀ə́ mbìv wòŋ ye yì kér bùʼ e rə́r sí, e kùúy bùʼ woo shooy, e nèn jàv aàŋgaà və́ ŋgoo, wùn à kéŋ ye á faàsìn sáa. A dzə̀ kinyo feyì ke bó atàr vəə́ yòʼ‑oò ghàn mùm, a fə̀m dzə̀ vee fó ŋgùʼ féyì. Wù wíy a ba ntaŋ ji wun laar á virə́ʼ ve tavkín ví, yii bèy, a bó ntàm yòʼ wíy dàr, a bó ntaŋ və bvəə́rí.

²⁵ Fòn woó Siiria və̀n wíy baʼtí mànjòŋ vé rərí, a wù táv é ŋàŋ. Wù távir wun, é wù yú shilív, e ŋàʼáy, e taàmé fon woó Ejiv. Fòn woó Ejiv wíy meʼ wun wùn à mànjòŋ vé rərí, a wù táv, e shaà və́ə. Yii bèy, wùn wun wíy lóo tam, é wù ton fon woó Ejiv, bìʼ menàŋ me á wíy ba, e fiìnè fon woó Ejiv.

²⁶ Fə̀m wír ve wùn à fòn yí viyíkìr veé ntoʼ vee jeéy, á kù wíy a woŋ wuú fòn. Á bèy, aá wíy laàr mànjòŋ woó Ejiv e dzə̀m, e seerí wíri é mfòn.

²⁷ Afon vee abaà víne wíy lò, e dzə̀ʼə̀m, a yikír kidàŋ kimòʼón, a kwaʼtì yéví kù sí tíy a dzə̀ é kinyò ke bi kí. Á wíy a boʼtí vitú vév bóʼtín, áàntaŋ véví kú a shaà shaàn fó ghaŋ, bìʼ fo ghán se Nyùy‑iì lèmèn ji vinyo vév ví may si yóʼ ne ghèén.

²⁸ Fòn woó Siiria wíy lò, a kfən e wun kitum, a wù kér bùʼ e gháʼán, wo wù faàsìn. Wù lóo dù, bee, é kwaʼtì rəə́ kúvsín, é wù keʼ, a taamé wír ve wùn à Nyùy gwàrìn *mensaŋ ji wun laar á vinyo vév vee bìʼ Nyùy, é wù nèn dù, e nyàvrì aáwune, e bó a kfən e wun wòŋ.

²⁹ Wù kfə́né, ghán sí gheenè, é wù kfən nə̀ə́ kitúm kee Ejiv e rə́r sí. Nəə, é meŋgíy mè kúvsín fəʼ, a kí yòʼ kfə̀n dzəə́ wìy a dzə mo kí‑iì dzəə̀n fó mbìy.

³⁰ Kí yòʼ wíy a dzə bèy, bìʼ fo wíri wíy wìy fo mbìv à Saypur e vikoŋ, e tay wun, é wù wáa fàn, a leʼ. Wù lóo kfən e bàm é kilòŋ ke shwiiyín kí, é wù nèn dù, a tay wír ve wùn à Nyùy gwàrìn mensaŋ ji wun fiʼ bvə̀ə́r vinyo vév. Wù du bèy, é wù wáa nàn kóy wìr ve á bìnèn ndzə̀m é mensàŋ mee shooy.

³¹ Wù wíy fəə́r vé rər və́, aá nəə́ é kirə̀ʼ ke tavín kí ke dzəə̀n lav cù, e bivír fó. Wù wíy màyìr cu ye vé‑eè yii fo kishiíy kidzə̀m, é wù nèn tìír kifá e mbìv lav cù yìmòʼ, a dzə̀ ke kí kóʼoy, bívir virə́ʼ.

³² Wù wíy leèrì wír ve á yaʼayin mensaŋ me Nyùy, e boʼtí áwune. Yii bèy, a wír ve á lumen kinyo ke Nyùy, e kpù shóo wíy tiím kitávín, e meŋ sáʼ rə́.

³³ Vilìmbìy vee afií ve ví dzəə̀n aáwuné mvəm ví wíy mvə̀ʼtì vifií vé wíri. Aá ku nèn a nyàvrì aáwune vee vilìmbìy vìn fo ghan símóʼ sí, a seerí ámóʼó, a tòn ámóʼó tónen, a koorí ámóʼó, e kfə̀n a kuúy vifá vév.

³⁴ Kù mo á yúyri áwune bey, é wír Nyùyi koóy sə́mo shishàr. Yii bèy, aámóʼó wíy wooné, e nəə́ e ŋgoo, a dzə̀ wír ve á diy a dzə̀ shuu wóv.

³⁵ Á wíy a dzə̀ wuú vilìmbìy vee afií vin, a kí wíy shèŋrì wír Nyùy, e ranér, e yiì, aá wáa dzə là shilóm, e meé mo ghán se Nyùy lèmèn sí wíy gheén.

Fòn wo wù kóʼor wún

³⁶ Fòn woó Siiria wíy a yiì kinyo a dzə̀ ke kí gheen wun. Wù wíy a koʼór wún, a tiy tiyín áànyùyí kitu, a shùr Nyùy wo wù shaàn anyùy, e liy si. Wù kù wíy a yiì bèy, é vinyo və́ ví wáa ghan, e meé mo Nyùy wíy màʼ ŋgeʼ e wun kitu. A Nyùy kù kér fó wiy yiì kinyo ke wù‑uù sìysìn.

³⁷ Fòn və̀n wíy a ŋway anyùy ve atàr vəə́‑əə̀ ghvə́mé, fə̀m anyùy ve vikìy koŋè. Rúrú, wù wíy a meŋ kifá kidzə̀m ke wíri ghvə́m ji nyùy, e kù a tiy tiyín áànyùyí kitu.

³⁸ Wù wíy shaà vin vee anyùy, a ghvəm a dzə̀ nyùy wo wù kiŋsìn virə́ʼ ve tavkín ví. Wù wíy a cù nyùy və̀n, a kù dzə̀ wo atàr vəə́ yòʼ fə̀m‑eè ló a ghvəm, a cù wun e kisha ke mbàm ke baar kí, à ke fəvír kí, a cù e vifá ve sùsù vi, a cù sa e vifá veé kilùm vímóʼ ví.

³⁹ Wù wíy a tòn virə́ʼ və́ ve tavkín ví, a kíwun kee kirə́ʼ kí fə̀m tàv é le. A kù wíy a tavír nyùy kitum və̀y wun. Wù wíy bùʼ wír ve á biimen wun ji ŋgaà saʼ, e jàvtì nsay aáwune ji vilaámé vév.

⁴⁰ Ghán sí wíy gheén, se vinyo ve fòn woó Siiria vi sí seeyì, é fòn woó Ejiv ghíʼ wun e rə́r sí. Ghíʼí, é fòn woó Siiria fəə́, e kùúy wun e njà kiìkir. Wù wíy a fùnèn e *viténtén vé rər ví, a fùnèn e nyám se ŋkoʼ si, a fùnèn e vikóŋ veé ndzəv ví vinín. Wù wíy nəə́ vitúm vinín, e kù tosín, e shaà moo ndzə́v ye yí runen, e fəə̀ é meshavtí.

⁴¹ Wù wíy nəə́ sa rə́r é nsay ŋkàʼmé, e tòn vitúm vinín, yii bèy, a vitúm vee Edom wùn Moav vi wíy bòy fo wun wo, e bóo lì vilìmbìy ve wìr veé Ammon.

⁴² Wù wíy dìn vitaáví və́ e vitúm vi vinín, a bó kitúm kee Ejiv ki yòʼ wíy bòy fo wun wo.

⁴³ Kù wíy a ker wun vitáv vé kishà ke mbàm ke baar kí, à ke fəvír ke wír veé Ejivi kérí, à vifá vév veé kilùm vi vidzə̀m. Á bèy a wír veé Libiya, à veé Etiopiàa wíy a neŋ a dzə̀ e wun si, a yu fo fo.

⁴⁴ Yii bèy, a wù wíy yu sáʼka wo wù loòn fó mbìv ye shùy yii tó fo fo, à wo wù sə́y fo mbìv wòŋ yee fó kùy, é wù fó wun shiiykìʼ. Tímé ndzə́ʼ wun, é wù fəə́, e dù, e yùyrí wír anín, e sə̀ʼsí səʼsín.

⁴⁵ Wù fəə́ rə́r bey, é wù tám kibeey kfə́ ké vifòn e kintìntìn ke rìbà ndzə̀v wùn ǎ gwan wo lav cù tíy sho. Yii bèy, a wù wíy kpu fo, là ŋgaà ghar.