Daniel 10 - ŊWÀʼ NYÙY

Daniel yén wír, a wù máʼ ndzə̀y ye á baan e làv wo fəvír

¹ Wáa dzə e kiya ke kí‑iì meen ji taár, ke Sayrus‑iì sáʼ ji fon woó Persia, ntum Nyùy wìy fo Daniel wo yír yímóʼó‑oò dzəə̀n ji Belteshasar. Ntum rə̀n‑eè dzə̀ ntum ye ru, aá fínér, a yì‑iì tàv é ŋàŋ fo wìr kiíy mvə́m. Daniel wáy vifií é ntum fèy, kinjeenjèm ki wìy e wun si, wù kiíy mvəm ntum rə̀y.

² Yì‑iì dzə̀ é ghan see shooy, a mómò woo Daniel, a m sí diy ji ŋgàm sitaár,

³ tén viyíkìr, kfəə́ne a dzə̀ ve kfəənén ví, a bó kintín ke nyàm, kìn bàr shilùʼ yòʼ‑oò lo kùm shuu wóm. M yòʼ‑oò lo ghàn sòr wún féyì, e dù meé mo ŋgàm see sitaár sìn si‑iì shaàn.

⁴ Á bèy, wìy lòo dzə kishiíy nshòv sikweè e mbaà fó ŋwee Nisan, kù mo m tíy e sə́r ndzəv yee Tigris,

⁵ m nàn sí, e lòo leéy, rúrú, e yèn wír wùmòʼ, a wù máʼ ndzə̀y ye á baan e làv wo fəvír, e sìŋ kikuúví é mentìntìn, a dzə̀ ke á fèrìn e *kisha ke mbàm ke baar kee wúntí kíwun ki.

⁶ Wún vəə́‑əə̀ kiʼ moo *síbaŋ yee beril, a rə́r sə́ sí bavkìr mo ŋwàŋ kishèv, wón sii wáa njàʼkìr moo kiliímé ke və̀y. Kóy sə́ wùn à shwín sí‑iì dzə̀ moo kisha kee *brons ke á sòtìrìn, a wù súŋnin, a kí koó mo ko màŋgòŋ.

⁷ Kù‑uù jòʼsì mo woo Daniel wo mò‑oò yenen kinyo kìn e njà kinjeenjèm. Wír fo wìr ve vèr áwune‑eè dzəə̀né yòʼ‑oò lo yèn. Yii bèy, fan ye tavíné súm áwune, á léʼkír, e dù, e lìr.

⁸ M ku nèn a dzə fo vèr mòʼón, a leéy kinjeenjèm kìn, a kitar ki yòʼ dzə̀ə́ e mǒ wùn. M lò, a kìʼ e dzə́ʼsín, ye a shwéri‑iì feè mo, m gbù.

⁹ M nèn lò, e yù, a wìr və̀y súŋninè, e lòo yuurí kisúŋnìn kfə́, mbuùné sí súm mo súmen, m wáa neŋ fo nsay kfə̀ə́kfəv.

¹⁰ Kiwó ke wìr ki nèn sàsìn, e kùm mo, e nàn mo, a m kì sí nyáʼ nyaʼán, m wáa yàʼ yàʼàn, ŋkoŋ si wáa kùmsìn, wóo wáa dzən dzənén.

¹¹ Nshìylav Nyùy rə̀y nèn yòŋ mo jii, «Daniel, wò wo Nyùy kòŋèn é ŋàŋ, Nyùy tùm ne mo fo wò wùn. Lò é yuv, e fò vituʼùr ví é kinyò ke m lo, a suúy e wò.» Kù mo wù suuy e mò bey, m túm, e tìím e yuv, a yàʼ yàʼàn.

¹² Yì nèn yòŋ mo jii, «Daniel, lá à yòʼ a fàn. Nyùy kù‑uù yù ne tóŋ yé, e kèʼ fo kishiíy ké mbìy ke wò‑oò neèmèn e wun si, a lon ji wù ku yiì, áà kiíy jeéyjeey ntum ye yì‑iì wìyìn e wò. M wìy bèn, a dzə̀ bìʼ kinyo kee shooy.

¹³ Yii bèy, mò‑oò lòo wìy, nshìylav ndzə vitsə̀ʼ ye yì shiy kitúm kee Persia téʼtín mo fo m shaa. M shiíy fó kishiíy nshòv mòʼón e mbaà. Mayker wo dzəə̀n taà nshìylav Nyùy yìmòʼ wìy ji wun sə́ mo, bìʼ fo vé‑eè səərin mo e fòn woó Persia wòŋ.

¹⁴ M wìy ne lèn ji m yii, áà kiíy kinyo ke kí wíy a koóy wír vé e ghan se sí wiyì, bìʼ fo kinjeenjèm kìn ki din a dzə̀ ghán se sí dzəə́ wìy a wìy.»

¹⁵ Kù mo nshìylav Nyùy rə̀y tiísi kinyo kìn e mò, m joór kitú e nsay, shúu sə́tí mo.

¹⁶ M lòo sə̀n, Nshìylav Nyùy ye yì‑iì shwínin wir msòŋ rə̀y kúm mo fó ntù shuù. M ku nèn mvə̀ʼ shuu wóm, a suŋnín e wun wo wù‑uù tíy e mǒ si, a suúy sho jii, «Tàr wor, kinjeenjèm kém kin ki rèŋèr ne mo, a bó kitar ki yòʼ dzə̀ə́ e mǒ wùn.

¹⁷ Tàr wor, a dzə̀ m ghàn é le, e bó a suŋnín wòsò, a m dzə̀ kém ji kwàn wó? Kém kí dzə̀ lèn, a kitar ki yòʼ dzə̀ə́ e mǒ wùn, a m sí yoy, yoy ntéŋ.»

¹⁸ Á bèy, ŋgaà wo wù‑uù shwínin wir msòŋ və̀y nèn kfə̀n kùm mo, e yiì, vitaáví vém ví kfə́n fó.

¹⁹ Wù nèn yòŋ mo jii, «Wò, wo Nyùy kòŋèn é ŋàŋ, lá à yòʼ a fàn. Nyaáŋ wáa dzə vèn wun. Á dzə kitávín, ku tàv ben, e kòŋrí.» Wù súŋnín bey, vitaáví ví ku nèn wìy e mǒ wùn. M bìnèr jii, «Tàr wor, kú a suŋnín. À kù kì tàvír ne mo, wún wómé kfə́n fó.»

²⁰ Nshìylav Nyùy rə̀y nèn kfə̀n dzə̀r e mò jii, «À kì nsàv wìy ye m wìyìn fo wò wùn á? A m lo, e kfən e bàm lèn lèn, e dù, e fùnèn nshìylav ndzə vitsə̀ʼ ye yì shiy kitúm kee Persia. M funèn, gháʼ wun, é nshìylav ye yì shiy kitúm kee Grik wiy, e taàmé mo.

²¹ Yii bèy, bo m wáa lò, m yíi sàr e wò, áà kiíy kinyo kidzə̀m ke á saŋen é ŋwàʼ wo dzəə̀n wó kinyò ke ru kí. A ké mbìy ki, à kér fóo kiíy ji bó wìr yòʼ dzə̀ shó wo wù tóm mo e vèr à nshèelav sìn sí kinyò. Kù jòʼsì nshìylav Nyùy yee Mayker ye yì shiy wír vén.»