Daniel 1 - ŊWÀʼ NYÙY

Kimfèr ke Daniel wùn à ŋkar sə́ sí é Babilon 1.1–6.28 Á lém Daniel wùn à ŋkar sə́ sí e Fòn Nebukadnessar ntoʼ

¹ Yì‑iì dzə̀ é ghan se fòn woo Jehoyiakim‑eè sáʼ woŋ Juda, kí lòo meé ji viyá vitaár, Nebukadnessar woo fon woó Babilon wùn à vé rər vəə́ lév, e wìy e ŋkàlaʼ Jerusalem, e gìŋ fó, e tàr.

² Nyùy Tàr máʼtí, áwune tón Fòn Jehoyiakim wùn à wír vəə́. Á tón, e kùúy vikáŋ vímóʼ ví fó lav cù, Fòn Nebukadnessar nèn lì, e kfə̀n shó e Babilon, fo lav cù anyùy və́‑əə̀ dzəə̀n, e lèm e kitàv ké lav cù yee shooy.

³ Fòn Nebukadnessar nèn tòóy Ashpenas woo kitú ke nsheèlav sə́, e sùúy sho ji wù shóʼtí á wónlě nsùm veé Isray ámóʼó fo fòn wùn aàtǎr wòŋé kfəə.

⁴ A wónlě nsùm vìne kù kér fó a dzə ve á yòʼ kér ndzə́m, aá kér sí ye juŋe, kér mbùʼme vifiì, kiiy vinyo e ŋàŋ, kfə̀n táv gwarìr kinyo cér, aá dzə̀ ji wír ve á gheenen fó a lìm e ntoʼ. Wù shóʼti, é wù wáa yeʼéy áwune á mo á wáa saŋ, e kfə̀n a yòŋ lám woó Babilon.

⁵ Fòn kfən fò sáʼ ji áwune yíi a yi a kifá ke wun woo fon yí kishiíy kidzə̀m, a no bóm. Aá yéʼéy áwune viyá vitaár. Yéʼeyì, ghán see shooy si lóo mày, aá fíʼ ghèén mo dzə̀ á wàa lìm e ntoʼ.

⁶ Á nèn lò, e shòʼtí wír vee wón veé Juda vìn, aámóʼó dzə̀ jii, Daniel wùn à Hananiya, à Mishael, e lì Asaria.

⁷ Kitú ke vé lìm kìy ki nèn shùrì yír sév, a dzə̀ se fíy si. Wù‑uù shù yé Daniel ji Belteshasar, e shù yé Hananiya ji Shadrak, e shù yé Mishael ji Meshak, e shù yé Asaria ji Abednego.

⁸ Daniel nèn lò, e wày kfə́ ji bó yòʼ dzə̀ á wun lùʼ viyíkìr veé ntoʼ e wun shuù, kìn ji wun nó bóm, e lor kitú kfə́. Wù nèn kù lòn kitú ke vé lìm kìy ji kí ku màʼtì a kilíŋ kfə́, fo wun li *kifàn.

⁹ Nyùy nèn yiì, Ashpenas woo kitú ke nsheèlav kìy ki shóʼ Daniel, a kòŋ, e kfə̀n a rər mendzən mvə.

¹⁰ Yii bèy, wù nèn lò, e wèʼèr wún, e sùúy e Daniel jii, «Mo kì shavin fon kfə́ə viyikìr vén wùn à nóo, bo m fan ji a kí kòóy ji tàr wor fòn yén, aà kiʼ e soóyín, fo wónlě nsùm ve vèn áwune yéʼey lime, bo wù yùyrí ne mo bìʼ wò.»

¹¹ Daniel nèn dù, a suŋnín e wìr lìm wo Ashpenas‑iì lèmèn ji wù wáa leéy a wùn à Hananiya, à Mishael, e lì Asaria.

¹² Wù wáa yòŋ, a lon jii, «Kii wò, ku mùm ver vee vé lìm vée, e bǎm vishiíy e ghvə̀m, aá kú a fo ver a dzə̀ nyóo see vikwiíy, a fo mendzə́v.

¹³ Vèr yí, nó, áà kaʼay rə́r sér, e fìʼsìn vèr à wónlě nsùm ve á yí sa viyíkìr ve fòn yí. Yén mo vèr kiʼkìrì, áà yii e vèr mo kwaʼtì yée dzəə̀n.»

¹⁴ Wù nèn yù e kév kí, e mùm áwune kishiíy e ghvə̀m.

¹⁵ Á yiír áwune e nyóo see shooy si, kishiíy kee ghvə̀m ki shaá, á wáa kìʼ bèn atávkín, e kfə̀n rùnkír, e shaà wónlě nsùm ve vé‑eè yí viyíkìr ve ntay ve fòn yí.

¹⁶ Kí koóy bey, wìr lìm və̀y nèn tsə̀ʼ viyíkìr ve vé‑eè fó fo ntoʼ wùn à meluʼ mè, e nèn a yiír áwune a dzə̀ e nyóo see shooy si.

¹⁷ Wónlě nsùm vee akweè vìne dzə̀, a Nyùy‑iì fò áwune vifií ve á wáa kiíy jeéyjeéy fó vinyò, e yiì, á fiír é ŋàŋ. Daniel ló kfə́, e kìíy kinyo kee kùm vinjeenjèm wùn à ké njèm se toʼtín sí é ŋàŋ.

¹⁸ Viyá vee vitaár vi mày, fòn toóy ji á li lèn wír vìy, e wìy a sho e wun si. Kitú ke nsheèlav kìy ki nèn lì áwune, e kòʼtí sho e Fòn Nebukadnessar si.

¹⁹ Á tiím, fòn nèn kèʼ, a dzətí vinyo aáwune. Yii bèy, a wìr yòʼ‑oò ló a dzə aáwuné ŋgoo wo yì‑iì dzə̀ wù dzə̀v kiwó ke Daniel, à ké Hananiya ki, e bóo lì Mishael wùn Asaria. Á bèy, áwune nèn a lìm e ntoʼ.

²⁰ Fòn káʼáy vifií vév, à kiíy ye á kiiy jeéyjeéy fó vinyòo, e yèn jii, aá lòo dzə, e neèr vifií vév kirə́ʼ e ghvə̀m, la aŋgàa səm wùn à vé fù vee wun kitume yòʼ lì a kee kimòʼón ki.

²¹ Á bèy, Daniel ku shaà fo mbìy, a lìm e ntoʼ, e lìm, e mèé mo vé‑eè koʼorin Sayrus ji fon.