Cù 9 - ŊWÀʼ NYÙY

Aaron wùn à wón vəə́ kéʼ lim yév ji atàá cù

¹ Á yóʼ Aaron wùn à wón vəə́ bey, wáa dzə e kishiíy kee waamé, Mooser jàŋ áwune, e kfə̀n jàŋ vilìmbìy veé Isray.

² Á wìy, wù yòŋ e Aaron jii, «Lì nàʼ woo lumèn, woo là nsem, e yiì cu ajayi shó, e lì kiyáʼ kee là nsem ki, e yiì cu ye tonèné shó. Ku yiì cu sìn si, e cù Nyùy Tàr shó.

³ À yíi yòŋ, é wír veé Israyi taʼ kibév kée yiì cu ajay sho, e tàʼ nàʼ woo kiyá, woo là nsem, e kfə̀n tàʼ njiì woo kiyá, woo là nsem ji cu ye tonèné.

⁴ Á yíi tàʼ sa nàʼ wùmòʼ wùn à kiyáʼ ki, aá yii cu kikòŋnìn sho, e see e Nyùy Tǎr si. Á ku wìy sa e cu vifa ve yii, a dzə̀ meŋkfəŋ me á shwirin ne meŋgvə́r shó. Á ku yiì bèy, bìʼ fo Nyùy Tàr yíi dìn kitú kfə́ e vèn áwune lán.»

⁵ Á ku nèn wìy e vifá ve Mooser yòŋèn ví, e bàʼtí e shùu *kibàn ké ntàsín. Wìr dzə̀m woó Isray kóʼtí fó mentsə̀m, e tìím e Nyùy Tǎr si.

⁶ Mooser yòŋ aáwune jii, «Á kinyo ke Nyùy Tàr yòŋèn ji vèn yii, e yèn á vikuʼùy və́.»

⁷ Wù nèn yòŋ e Aaron jii, «Kóʼtí, e wìy e ghaa kiy cù, e yiì cu yé yee bìʼ ajayi, à ye tonèné, e màn ajay vé, e màn sá vé wíri.» Áà nèn wìy e cu wìr veé Israyi, e màn ajay vév mo Nyùy Tàr yòŋèn.

⁸ Aaron nèn kòʼtí e ghaa kiy cù, e seè nàʼ wo yì‑iì dzəə̀n wo cu ajay və́.

⁹ Wón vəə́ leérí mensə́, e fò shó, wù sə̀ʼ e wàn kiwo, e yòʼ loŋ se kiy cù sho, e lèér kibér e sar kiy cù.

¹⁰ Wù lí fóm si wùn à ndzəʼ si, à kimbày ke bày ki, e tòn e kiy cù mo Nyùy Tàr‑iì yòŋèn e Mooser.

¹¹ Yii bèy, ké jav wùn à jùv, wù lì, e fəə̀sín kibeey shó, e tòn a dzə̀ é shweesí.

¹² Aaron nèn kfə̀n seè nyám yee bìʼ cu ye tonèné. Wón vəə́ leérí mensə́, e fò shó, wù wáŋrí é kiy cù, e kaàrí, e tàr.

¹³ Áwune kfən fò jav nyàm sho, e vibàr vibàr, à kitú ki, wù tón e kiy cù.

¹⁴ Á sù vifá ve mvəm ví wùn à vikoy vi, wù neér é kitu ke nyàm ye yì‑iì shwí e kiy cù, e tàtí, e tòn.

¹⁵ Aaron màysì rə́ yee cu, e nèn kòʼór nyám se wíri sé cù. Wù lì bvə́y ye dzəə̀n ye cù yee bìʼ ajay wíri, e seè, e yiì cu ajay sho mo wù‑uù yiìn e yee fó mbìy,

¹⁶ e lì nyám yee bìʼ cu ye tonèné, e yiì cu sho, réŋréŋ mo nsər dinè,

¹⁷ e lì sa cu vifa ve yi, e ŋèʼ kiwó kifur, e tòn e kiy cù. Wù yiì cu ye tonèné rən, e bàr yee kijàvndzə sho.

¹⁸ Aaron seé sá nàʼ wùn à kiyáʼ ki ji cu wíri yé kikòŋnìn. Wón vəə́ fó mensə́ sho, wù wáŋrí é kiy cù, e kaàrí, e tàr,

¹⁹ e lì fóm se nàʼ wùn à sé kiyaʼ si, fóm seé kùn wùn à se sí sətin vitó si, à ndzəʼ si, à vimbày ve bày vi,

²⁰ e bàʼtí e kitu ke kibàr keé shùu shiliv. Wù nèn bèʼèy kidzə̀m, e dù sho e kiy cù, e tòn fóm si.

²¹ Ké shùu shiliv wùn à vibiy ve yìy ví, wù nàn vibar vee shooy e Nyùy Tǎr si ji cu ye nanèné, réŋréŋ mo Mooser‑iì yòŋèn ji á kú a yiì.

²² Aaron màysì, e yiì cu ajay wùn à ye tonèné, à yé kikòŋnìne, e nàn wó rə́ é yuv, e kìʼ wíri shó, e səə̀vì áwune, e nèn sə̀ʼə́y fo wù kì yii cu fèy.

²³ Mooser wùn Aaron nèn nə̀ə́ e kibàn ké ntàsín. Áwune yiì fəə̀ fó fo, e tàtí, e səə̀vì wíri, rán Nyùy Tàrí ŋwàŋ e wìr dzə̀m si.

²⁴ Nyùy Tàr ku nèn tsə̀nsí və́y, wú wìy, e laàr cu ye tonèné wùn à fóm si fó kiy cù. Wìr dzə̀m yén, e bùʼ shirəə́, e tsə̀m sí e nsay.