Cù 4 - ŊWÀʼ NYÙY

Cu ye yí tsəʼ lǒn jay

¹ Nyùy Tàr yòŋ e Mooser ji

² wù suúy á e wír veé Israyi vinyo ve dzə̀ wìr kù yiì, a wù jáy ne kinyo a dzə̀ ke wun woo Nyùy Tàr sháʼnin ji lá wìr yiì, wù ló, e yiì là kiíy.

³ A dzə̀ ji yii á taà cù wo á yoʼon ne jay və̀n, e sə̀ŋ lòn, e wìy sho e wírí kitu, bo wù kù‑úù wiy e wàn nàʼ woo lumèn, woo là nsem, ji á cu á Nyùy Tàr shó bìʼ jay wo wù kì yiìn, é wáa dzə cu yee bìʼ lǒn jay.

⁴ Wù yíi wìy e wàn nàʼ və̀n e shùu *kibàn ké ntàsín, e neèr kiwó kfə́ é kitu wo, e nèn see e Nyùy Tǎr si.

⁵ Seé, é taà cù wo á yoʼon ne və̀n nèn lì mensə́ me wàn nàʼ memoʼ mè, e dù sho e kibàn ké ntàsín.

⁶ Wù yíi way wan kiwo sho kàŋ saàmbà, a waŋ e mbìy ndzə̀y se sí ràŋèn fó ji Nyùy Tàr yén,

⁷ e nèn kfə̀n yoʼ mensə́ e loŋ se kiy cù kilay wo wú dzəə̀n é kibàn ké ntàsín fey, e nèn fəə, e leér kibér ke mensə e kiyìy ke *kiy cù woo wó cù ye tonèné, a wú dzə̀ é dzəə̀ ndzə, e shùu kibàn.

⁸ Wù yíi fəə́r fóm sidzə̀m fo nyàm ye á yii cu ajay sho. Fóm se sí sətin vifá veé bvə̀m, à se sí dzəə̀n é wǔn vito si,

⁹ à ndzəʼ see sibaà sí, à fóm sə́ se sí dzəə̀n é wǔn shintay si, e kfə̀n shoʼ kimbày ke bày, e tatí wùn à ndzəʼ si,

¹⁰ réŋréŋ mo á fə̀ə́r fóm fo nyàm ye dzəə̀n ye cù kikòŋnìn. Wù fəər bèy, é taà cù nèn tòn e kiy cù.

^11-12 Yii bèy, kibér ke nyàm, é wù ku lì, e fəə̀ shó fo kibeèy, e dù sho e kirə̀ʼ ke ranén kí, kee là *kifàn. A dzə̀ jii, wù li wúntí nyàm wùn à jùv, à kitú ki, à vikoy vi, à vifá veé bvə̀m vi, e dù, e neèr e kirə̀ʼ kee fo á yii shuʼ kibvə́, e nèn tòn e meŋkàʼ, e kitu ke kibvə fèy.

¹³ Wáa dzə ji kintatì ke wìr veé Isray kidzə̀m ki lo, e jày kinyo là kiíy, e yiì kinyo ke Nyùy Tàr shaʼnin ji lá á yòʼ yiì, aá yii bèy, la kí yòʼ fə̀m a wìy e màŋgòŋ vifii, bo á kù lì ne njò.

¹⁴ Á yiì lò, e kìíy jay woo shooy, bo màŋgòŋ yíi fo wan nàʼ woo lumèn ji cu yee bìʼ lǒn jay, e lì, e wìy sho e shùu kibàn ké ntàsín.

¹⁵ Á wiy sho, vilìmbìy ve wíri ví neer wó yév é kitu wo, aá nèn seè fó e Nyùy Tǎr si,

¹⁶ é taà cù wo á yoʼon ne li mensə́ memoʼ mè, e dù sho e kibàn ké ntàsín,

¹⁷ e sə̀ʼ mensə́ e wàn kiwo kàŋ saàmbà, a waŋ e mbìy ndzə̀y se sí ràŋèn fó,

¹⁸ e nen teè mensə́ memoʼ mè e loŋ se kiy cù, wo wú dzəə̀n é kibàn ké ntàsín fey, é Nyùy Tàr yén, é wù nèn màysì kibér ke mensə, e lèér e kiyìy ke kiy cù wo dzəə̀n wó cù ye tonèné, wo wú dzəə̀n é shùu kibàn é dzəə̀ ndzə.

¹⁹ Wù yii bèy, é wù nèn lì fóm se nyàm cù sidzə̀m, e tòn e kiy cù.

²⁰ Wù kù yii e wàn nàʼ və̀n réŋréŋ mo wù‑uù yiìn e wo á cuùn Nyùy sho bìʼ və́ə woo jay. Wù yii bèy, bo sì cu ye yí manen jay wìr veé Isray, Nyùy láysín.

²¹ Á bèy, bo wù sí li nyám, e fəə kibeey shó, e tòn mo wù‑uù tònèn ye mbìy. Kù dzə̀ cu yee bìʼ lǒn jay màŋgòŋ woó Isray.

²² A taà saʼ lòo dzə, e jày kinyo là kiíy, e yiì kinyo ke Nyùy Tàr shaʼnin ji lá wìr yòʼ yiì, bo wù lì ne njò.

²³ Á yii, wù kiíy kinyo ke wù kì jayin, bo wù wiy e kibév ki, a kù dzə̀ kee là nsem ji cu rə́.

²⁴ Wù wiy sho, é wù kóʼór fo á yii seé ye cù ye tonèné, e neèr kiwó kfə́ é kitu wo, e see e Nyùy Tǎr si. Dzə̀ cu ye yí tsəʼ lǒn jay.

²⁵ Taà cù yíi sə̀ʼ mensə́ me nyàm cù e wàn kiwo, e teè e loŋ se kiy cù woo wó cù ye tonèné, e nèn cuùrì kibér ke mensə e kiyìy.

²⁶ A wù yíi tòn fóm se nyàm sidzə̀m e kiy cù moo fóm se cù kikòŋnìn bèy. Á mo taà cù ku tàŋrí taà saʼ bèy, e bóo man ajay və́, é Nyùy laysin.

²⁷ A wìr wo dzəə̀n ghéʼncey lòo dzə, e jày kinyo là kiíy, e yiì kinyo ke Nyùy Tàr shaʼnin ji lá wìr yiì, bo wù lì ne njò.

²⁸ Á yii, wù kiíy kinyo ke wù kì jayin, bo wù wiy e kifum ke bvəy loŋ ki, a kù dzə̀ kee là nsem ji cu rə́, bìʼ jay və.

²⁹ Wù wiy sho, é wù kóʼór fo á yii seé ye cù ye tonèné, e neèr kiwó kfə́ é kitu wo, e see fo.

³⁰ Taà cù yíi sə̀ʼ mensə́ e wàn kiwo, e teè e loŋ se kiy cù woo wó cù ye tonèné, e leér kibér e kiyìy.

³¹ Wù yíi fəə́r fóm se nyàm sidzə̀m mo á fə̀ə́r fóm fo nyàm cù kikòŋnìn, e tòn e kiy cù ji wáa dzə kirəm ke kí boŋ Nyùy Tàr. Á mo taà cù ku tàŋrí wír woo və̀y bèy, e màn ajay və́, é Nyùy laysin.

³² A wù lò, a wìy a dzə̀ e wàn njiì ji cu yee bìʼ jay və, bo wù wiy a dzə̀ e kifum ke njiì kee là nsem ki.

³³ Wù wiy sho, é wù kóʼór fo á yii seé ye cù ye tonèné, e neèr kiwó kfə́ é kitu wo, e see ji cu yee bìʼ lǒn jay.

³⁴ Taà cù yíi sə̀ʼ mensə́ me nyàm cù rə̀n e wàn kiwo, e teè e loŋ se kiy cù woo wó cù ye tonèné, e leér kibér e kiyìy.

³⁵ Wù yíi fəə́r fóm se nyàm sidzə̀m mo á fə̀ə́r sé wàn kiyaʼ woo wo cù kikòŋnìn, e nèn tòn e kiy cù, a wù yíi neèr a dzə̀ é kitu ke nyàm ye á sí ton, e fo ji cu Nyùy Tàr ye və́yí bin fo fo. Á mo taà cù ku tàŋrí ŋgaàŋ bèy, e màn jay və, é Nyùy laysin.