Cù 26 - ŊWÀʼ NYÙY

Séʼ wó a yunín Nyùy Tàr

¹ Nyùy kfən sùúy jii, «Lá vèn yòʼ wìy bòm kifá, a ghvəm ji Nyùy, kìn dzə̀ ji á fer mebvə̀m, kìn ji á tuúy sə́y si, kìn ji á sém vilán. Dzə̀ mo Nyùy Tàr woo Nyùy won.

² Vèn wíy a lèm kishiíy kém ké bam, a ghvəm kibàn kém. Dzə̀ mo Nyùy Tàr.

³ «A vèn wìy a yu sáʼ yém, a yunín nsər sém, a yiì mo sí dzəə̀n,

⁴ bo m wíy a fo ven wuú é ghan se juŋ si, é nsay nèn a fəə́r vifá ve yi, é vicí ví wáa koóm.

⁵ Vèn wíy a kav vifá ve yi nyanyày, lóo kòy vicí ve á fer meluʼ sho, aá kù dzəə́ búʼ vifá ve yi ve á kavin. Lóo way ŋgoòy se vifa, aá kù dzəə́ koy vicí. Vèn wíy a fàmtìn fàmtìn e vifá ve yi vi, a dzə e věn nsay akiŋsìn.

⁶ «M wíy yiì, é nyaáŋ wáa dzə e věn nsay, é vèn wáa buuné, e làa yòʼ a fàn. M wíy laàr nyám se biibí sí fo věn mvə̀m wòŋ, é la nyùy rə̀r yòʼ a shaàsìn e věn nsay.

⁷ Vèn wíy a ghaʼ aŋgaà vén vibàn é shùu rər.

⁸ Wír vén atàne wíy a tòn aŋgaà vén vibàn wií, é wír vén vee wií wáa tòn vee nsə̀kì e ghvə̀m. Dzə́n sév sí wíy a neŋnín e shùu rər.

⁹ «M wíy a ker shíi won, a yiì, é vèn wáa kùʼ. M wíy a yùŋrì *mensaŋ me m gwàrìn vèsən.

¹⁰ Vèn wíy a yi vifá ve yi ve mvə ví, é ví wáa shaàrì, é vèn wáa tsə̀ʼ tsə̀ʼə̀n, e bó a ker kilíŋ ké a lèm ve fíy vi shó.

¹¹ M wíy a ker kirə́ʼ kém ké dzə e věn mvəm, a bó m yòʼ wíy a ŋway ven.

¹² M kù wíy a dzə e věn mvəm, a m wíy a dzə Nyùy won, é vèn wáa dzə wír vém.

¹³ Dzə̀ mo Nyùy Tàr woo Nyùy won wo wù‑uù fəərin ven fó wòŋ Ejiv ji lá vèn yòʼ a dzə akwàn vév. M bèʼ ne kimbùŋ ké vikwàn fo věn mbèʼ, e yiì ji vèn wáa ghan kicaárín.

Seʼ kitu ke tavín kí

¹⁴ «Yii bèy, a vèn yiì tèn fó a yunín mo, e tèn fó a yiì mo nsər sém sí dzəə̀n,

¹⁵ a ŋway sáʼ yém ŋwayín, a ten fó a yu kinyo ke m tínenè, a shoʼór *mensaŋ me mò‑oò gwàrìn vèsən,

¹⁶ bo m yíi màʼ ŋgeʼ si e věn kitu. A sí dzə̀ jii, vinyo ve bi ví yíi a sàsìn, a koóy ven moo ayàsí ve á reŋèr wún, wùn à vinjàʼ ve ví fir sí, kfə̀n senèr wír vi. A vèn kfə̀n wíy a way vifá, é ví wáa lày kisáŋ, bìʼ fo aŋgàa vibàn véné wíy a kav.

¹⁷ M yíi shwivír ven, áàŋgaà vén vibàné wáa ghaʼ ven. Wír ve á ban vené yíi a fo sáʼ e vèn. Vèn wíy a leʼ, a bó wìr yòʼ jum ven.

¹⁸ «Vinyo ve ghaʼtín vin vi kooy bèy, vèn lurì, kfə́n tén fó a yunín mo, bo m yíi dzə̀sì ŋgeʼ sén kàŋ saàmbà bìʼ ajay vén.

¹⁹ M yíi laàr kiŋkoʼòrwùn kén ke tavín kí, e tiír wuú é yuv, e yiì, é nsay yen távtí moo kisha.

²⁰ Vèn wíy a bvəʼtí wún é lìm kisáŋ, bìʼ fo nsay yen yòʼ wíy a fəə́r kifá ke yi feyì, a bó vicí ví yòʼ wíy a koóm báŋ si gheéy.

²¹ «Vèn shaa fó mbìy, e kù a tav kitú vèsən, e tèn fó a yunín mo, bo m kfə̀n yíi dzə̀sì ŋgeʼ sén kàŋ saàmbà mo jay won dzəə̀n.

²² Dzəsì, é m kfən tsə̀nsí nyám se bi sí e věn mvəm, é sí wáa yuyrí wón vén, a laàr nyám sén, a fàr ven, é vèn wáa dzə ashàr, é dzə́ə sén sí kfə́n é vifə̀m.

²³ «Á bèy, ŋgeʼ sìn sidzə̀m si kooy ven bey, vèn kfə́n tén fó a yunín mo, shaa fo mbìy, kú lóo meŋ mo,

²⁴ bo mómò, m kù yíi meŋ sa ven, e màʼ ŋgeʼ e věn kitu kàŋ saàmbà mo jay won dzəə̀n.

²⁵ M yíi màʼ rə́r e věn kitu, e siìr ŋkfə́tir mensàŋ me vèn bivirin. Vèn nyéŋ fo kwaʼ rər, du, laay e věn mvə̀m ŋkà se laʼ seé mvə̀m kày se bomén sí, bo m yíi tsənsí yàsí wo bi e věn mvəm, e dòmsì ven, e way aàŋgaà vén vibàné wo.

²⁶ M yíi shèr dzə́ə yen viyikìr. Kibán ke vikìy kì yíi a fèr lav e ghvə̀m, kí yíi kfən ji kee lav e mòʼón cáʼ, aá wáa ŋèvtì ŋèvtìn, a yi, e kù a shwaa shwaán.

²⁷ «Vinyo ve ghaʼtín vin vi kooy bèy, vèn kfə́n tén fó a yunín mo, kú lóo meŋ mo méŋén,

²⁸ bo m yíi shwiíy kilòŋ ke biibí kí, e shwivír ven, e dzə̀sì ŋgeʼ e věn kitu, é sí foy, e shaà sé mbìy si kàŋ saàmbà, kù bey, bìʼ vinyo vén ve bi ví.

²⁹ Mentaàshì mè wíy ghaʼtí, é vèn wáa kfər wón vén vee vilum, à vee vikìyí.

³⁰ M wíy kètì virə́ʼ vén vé cù, e bvəʼtí kíy sén sé cù kilay, é mebvə̀m men mè wáa neŋnín fo, vifá, a bó ví yòʼ ŋeʼè, é m nèn màʼrì dzə́n sén é kitu wo, e nyaŋ nyaŋén.

³¹ M wíy siìr ŋkà se laʼ sén, é sí kfə́n ji vifə̀m ŋkuuŋkùŋ, e bvəʼə́y virə́ʼ vén vé cù, e làa yòʼ a ker shií e věn cù, ye kirəm ki yii rəm, rəʼtìnè.

³² M wíy sàʼtì woŋ wón féyì, aŋgaà vén vibàn ve á yovìi lóo leéy, aá wáa ker gháʼ.

³³ Fo kén kí, m wíy taʼár ven, é vèn sáŋrí e vitúm vímóʼ ví nsay, é m kfə́n a ròn wúu yén e rə́r sí. Woŋe siiy bèy, é wú nèn dù e vifə̀m, é ŋkà se laʼ sén si kerkir.

³⁴ Á bèy, é nsay koóy kibaámé, e kfə̀nsí e mvə̀m ghàn se yì dzəə̀n é vifə̀m, a vèn dzə̀ kén áàŋgaà vén vibàné nsay. Ké ru kí, é yì ku kòóy kibaámé é ghan fóo fèy.

³⁵ Nsay kù wíy kfənsí a dzə̀ é ghan fen, mo bó vèn yòʼ‑oò ló a biimé ji yì meeme é ghan se vèn‑eè dzə́ sho.

³⁶ «Ké wìr ve vé‑eè berin, aá du shó aàŋgaà vén vibàné nsay. M wíy way kindzə́m aáwuné meliv, ye a fə̀m wàʼ kibábár, aá kú a fàn fànèn, a nyeŋkír mo wìr nyèŋ rə́r, a nyeŋ, a gbùkìr, a wìr yòʼ jumè.

³⁷ Wìr wíy a bàyrìn e wùmǒʼ kitu mo wìr lèʼ rə́r, fə̀m mo bó wìr yòʼ jumè. Vèn yòʼ wíy a ker kitar kée tam vèn aàŋgàa vibàn véné.

³⁸ Vèn kù wíy a kpukír a dzə̀ é vitum. Nsay aŋgaà vén vibàn wíy mèy ven, é vèn lay.

³⁹ Wíri bér aàŋgaà vén vibàné nsay ashàr, aá ku rèŋ fo réŋen bìʼ ajay vév, e kfə̀n a rèŋ sa bìʼ ajay atàr vév ve á kù dzəə́ ron wúu yév.

⁴⁰ «Yii bèy, aáwune fen tuùné vinyo vév ve bi ví, à vé atàr véví, atàr vév ve vé‑eè ŋwayin mensaŋ mem, e mèŋ mo,

⁴¹ e yiì, m méŋ sá áwune, e tsə̀nsí aàŋgaà vév vibàné nsay, aáwune fen tuùné bèy, e kùvsín melív mev, e biìmé ji ŋgeʼlàʼ yev dzə̀ á bìʼ vinyo vév ve bi ví,

⁴² bo m yíi yùŋrì mensaŋ me mò‑oò gwàrìn vèr à Jakov, à Aysi, à Abraham, e kuumé woŋ wo mò‑oò kàʼàn wír vém shó.

⁴³ Yii bèy, a kibaámé ké nsay ki kù‑úù tombìy a dzə, é yì kfə́nsí, mo bó á yòʼ dzə́ sho. Áwune kù sə́ vilaʼày vév vé vinyò ve bi ví, bìʼ fo á kù‑uù tén vinyo ve mò‑oò tinen ténén.

⁴⁴ Ŋwáy sáʼ yém ŋwayín. Mo á fə̀m‑eè lóvti bèy, áwune wíy lòo dzə aàŋgaà vév vibàné nsay, é la m yòʼ wìy màʼày áwune. Bó m yòʼ wíy meŋ áwune, e laàr ŋkuuŋkùŋ, e yaʼáy mensaŋ me mò‑oò gwàrìn vèr áwune. Kù dzə̀ mo Nyùy Tàr woo Nyùy wov.

⁴⁵ Á bèy, bìʼ shíi wov wo m kérí, m kù wíy a kuumé mensaŋ me mò‑oò gwàrìn vèr aàtǎr ram véví, ve mò‑oò fəərin fó wòŋ Ejiv, ji m fíʼ a dzə Nyùy wov, a vitúm vi leey, yéné. Dzə̀ mo Nyùy Tàr.»

⁴⁶ Á nsər wùn à ntir si, a ntò se vinyò si se Nyùy Tàr‑iì foon e Mooser e Gwan Sinay ji wù naari e wír veé Israyi ji á wáa yiì.