Cù 24 - ŊWÀʼ NYÙY

Mó á wáa leéy fo lam seé kibàn ké ntàsín sí

¹ Nyùy Tàr yòŋ e Mooser jii,

² «Sáʼ ji wír veé Israyi wiy á e meŋgvə́r me *oliv mee rèéŋ mè, aá wáa way e làm seé *kibàn ké ntàsín, é sí wáa ban ghán sidzə̀m.

³ Lóo dzə aŋkuùr adzə̀m, é Aaron səʼ lam sìn, é sí wáa baarí e Nyùy Tǎr si e mbìy ŋkùv mensàŋ, aá fəəsín ne raŋ, a baarí, e meé mo ndzə yíi ran. Sì nsər bèy, ghán sidzə̀m, e ŋgwàʼ sí ŋgwàʼ si.

⁴ Aaron kù wíy a naŋsín lam sìn, se sí dzəə̀n é kitiir ke làm, aá fér e *kisha ke mbàm ke baar kí, kee wúntí kíwun, é sí wáa ban e Nyùy Tǎr si, ghán sidzə̀m.»

Kibán ke á neer e Nyùy Tǎr si

⁵ Nyùy Tàr kfən yòŋ e Mooser ji wù suúy á ji á li á meŋkfəŋ me kpuún mè akilu nshòv sikweè e mbaà, e fèr ntuʼ se kiban sho nshòv sibaà e ghvə̀m.

⁶ Á yíi daà ntuʼ se kiban sìn ŋgoo sibaà é kidàŋ ke á laʼtin kisha ke mbàm ke baar kee wúntí kíwun sho. Ŋgoo yíi a ker ntuʼ ntuùfú.

⁷ Á yíi neèr kiláy kee *frankinsen kee wúntí kíwun e ŋgoo si fóo fèy ji á yií lóo tòn, é kí wáa dzə ŋkùvtu kiban ji cu Nyùy Tàr ye və́yí bin fo fo.

⁸ Lóo dzə vishiíy vé bam vidzə̀m, taà cù neèr ntuʼ se kiban sìn e Nyùy Tǎr si ji fómo wìr veé Isray. Kù sì mo Isray wíy a yiì bèy, e wìy dù, e mày.

⁹ Wíy a ker Aaron wùn à kfə́ə rəə́ kibán kìn, aá kù wíy a yi e kirə̀ʼ kee jeéy kí, bìʼ fo dzəə̀n mbìv vifa ve á cu Nyùy Tàr shó, e cu ye və́yí bin fo foo, a dzə̀ kifá kee jeéy kí féyì feyì mo á foon aáwune, e wìy dù, e mày.

Nsər see kùm Nyùy wùn à mbóm və

¹⁰ Yì‑iì dzə̀ é ghan símóʼ sí, wàn wiíy woó Isray wùmòʼ, a kitàr kí dzə̀ wir Ejiv lò, e fəə̀, a kaarí e kibeèy keé Isray. Wàn wiíy woó Isray və̀y wùn wìr woó Isray wùmòʼ nèn lò, a taŋnín.

¹¹ Á lòo taŋnín bèy, wàn wiíy woó Isray nèn kuù Nyùy, e shòór yír rə́. Á lì, e wìy, e yèn Mooser sho, a yír yìy à wìr və̀ne‑eè dzə̀ ji Shelomit woo wan Dibri woo rám Dan.

¹² Á nèn wày ŋgaàŋ e kibuʼ, a shìy, e meé mo Nyùy Tàr yíi yòŋ mo á yii shó.

¹³ Nyùy Tàr nèn sùúy e Mooser jii,

¹⁴ «Vèn li ŋgaà ŋkáymé və̀n, e fəə̀ kibeey kí shó, é wìr dzə̀m wo wù yuun mo wù yoŋè neer wó rə́ é kitu wo, é màŋgòŋ tsə́mrí e tíy sí.

¹⁵ Naàrì e wír veé Israyi jii, wìr wo wù kuùn Nyùy və, bo wù lì ne a lòn.

¹⁶ A wìr shòór yír Nyùy Tàr, bo wìr dzə̀m yíi tsəmrí ŋwèrín e tíyí, e yuyrí. Kìn dzə̀ kiŋgwìy, kìn dzə̀ wan nsay, wù shoór yír Nyùy Tàr, á kù yùyrí yuyrín.

¹⁷ «A wìr yùyrí wír, á yùyrí ŋgaàŋ.

¹⁸ A wìr yùyrí nyam wùmòʼ woo wír, bo wù kér fó fo ŋkùvtu. Á kù laʼ kifá ke á yuyrín e ke tin ki.

¹⁹ «A wìr lèmér fə́r və, á kù lèmér sa wun. Mo wù yiìn e wùmòʼ, á kù yiì sa e wun réŋréŋ bey.

²⁰ A dzə̀ ji wù bèʼ kighvə́r, á bèʼ kfə́. A wù tòʼ sí wìr, á tòʼ rə́. Wù shóʼ sóŋ, á shòʼ rə́. Kfə́ə kileemé ke wù yiìn e wìr, á siìr ŋkfə́tír e wun bèy.

²¹ Wìr yúyrí nyam wìr, wù fò ŋkùvtu. Wìr yúyrí a dzə̀ wír, á yùyrí ŋgaàŋ.

²² Nsər rə̀n kù dzə̀ yìwun, a yì kiŋ wir dzə̀m, à wìr woó Isray, à kiŋgwìy ki, bìʼ fo m dzəə̀n Nyùy Tàr woo Nyùy won.»

²³ Mooser súŋnín e wír veé Israyi bey, á nèn lì wír woo ŋgaà ŋkáymé və̀y, e fəə̀ kibeey shó, e tsə̀mrí e tíy sí, e yùyrí. Wír veé Israyi kù‑uù yiì réŋréŋ mo Nyùy Tàr‑iì foon sáʼ e Mooser.