Cù 23 - ŊWÀʼ NYÙY

Ntò se vinyò see kùm ŋkàʼ sé a ghvəm Nyùy Tàr

¹ Nyùy Tàr yòŋ e Mooser jii,

² «Suúy e wír veé Israyi jii, ŋkàʼ se dzəə̀n sé Nyùy Tàr se vèn wíy lòo banén ji á bunrì mo woo Nyùy Tàr é ghan sí ghan sí sí dzə̀kìr. A sí dzə̀ jii,

³ vèn lim lim yéné vishiíy ntuùfú, yii bèy, kee saàmbà ki dzə̀ kishiíy ké bam ke vèn meeme é mbòŋén fo věn antàʼtìn, e bàʼtí, a bùnrì mo é virə̀ʼ vidzə̀m ve vèn dzə́ sho. Lá vèn yòʼ yiì lim yímóʼó gheéy. Dzə̀ kishiíy ké bam ke Nyùy Tàr.

⁴ «Ŋkàʼ sé Nyùy Tàr sí nén a dzə se a dzə̀ vèn wìy a kaarí, a bùnrì mo shó, woo shó, e sə́ see ghán sí.

Ŋkǎʼ Yáʼayshaà wùn à wó Kiban kee là Nyaà

⁵ «Lóo dzə e ŋkuùr kishìíy kee nshòv sikweè e ghvə̀m fo ŋwee mbìyi, á yiì Ŋkǎʼ Yáʼayshaà, e ghvə̀m Nyùy Tàr.

⁶ Lóo dzə, e kèʼ fo kishiíy kee nshòv sitàn e ghvə̀m, kù é ŋwee foo fèy, é vèn yii Ŋkǎʼ Kiban kee là Nyaà, a ghvəm Nyùy Tàr, aá kù wíy a yiì kishiíy saàmbà, a yi kibán a dzə̀ kee là nyaà.

⁷ Lóo dzə e kishiíy ké mbìy ki fó vishiíy ve dzəə̀n vé ŋkàʼ vən, vèn kaàrí, a bùnrì Nyùy Tàr. Lá wìr yòʼ yiì lim ye wù yii yii e vishiíy vee viy e kishiíy fen.

⁸ Vèn cu Nyùy Tàr e cu ye tonèné kishiíy saàmbà. Lóo dzə e ke kí meen ji saàmbà ki, vèn kfə̀n kaàrí, e bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví.»

Ŋkǎʼ Ŋgòn se Vifa

⁹ Nyùy Tàr kfən yòŋ e Mooser jii,

¹⁰ «Suúy e wír veé Israyi jii, vèn wíy nəə e wòŋ woo fo m li ven, e dù sho, káv vifá, vèn tòmbìy lì ŋgòn se vifa, e sə̀ə́y, e dù, e yèn taà cù sho.

¹¹ Taà cù yíi nàn cu rə̀n e Nyùy Tǎr si ji Nyùy fiʼ biìmé ŋgaà cù. Wù yíi nàn a dzə̀ é kishiíy ke kí jùmrìn kishiíy ké bam.

¹² Lóo dzə, a kù dzə̀ é kishiíy ke á yii cu ye nanèn rə́ne, á kù seè wan kiyaʼ woo kiyá woo là nsem ji cu Nyùy Tàr ye tonèné.

¹³ Cu vifa ve yii yíi a dzə meŋkfəŋ me kpuún mè akilu abaà, aá shwír meŋgvə́r shó. Kù dzə̀ cu ye və́yí bin fo fo, a kirəm kfə́ kí boŋ Nyùy Tàr. Á ku tàtí sa cu melùʼ fo, lita mòʼón.

¹⁴ Lá wìr mùm, e yì ŋgòn se vifa, kìn sí dzə̀ sikó, kìn sikáŋén, kìn á tòn a dzə̀ kibán sho, a bó á yií ne cu rə̀n. Dzə̀ nsər ye vèn wíy a lèm e ŋgwàʼ sí ŋgwàʼ si, e virə̀ʼ vidzə̀m ve vèn dzə́ sho.

Ŋkǎʼ Vifa ve Kavín ví

¹⁵ «Vèn ku tàŋ ŋgàm si saàmbà, e kèʼ fo kishiíy ke kí batin kishiíy ké bam, a kù dzə̀ kishiíy ke vèn wìyìn e nsə̀ə́y ŋgòn se vifa ji cu Nyùy Tàr.

¹⁶ A kí dzə̀ jii, vèn ku tàŋ kishiíy mtàn, e dù, e meé e kishiíy ke kí batin kishiíy ké bam ke kí meen ji saàmbà, e nèn yiì cu Nyùy Tàr yee yé vifa ve yi ve fíy vi.

¹⁷ Vèn lóo wìykìr fo věn virə̀ʼ vé dzə, kfə́ə e mòʼón mòʼóne lì ntuʼ se kiban sibaà sibaà ji cu ye nanèné, e wìy cù Nyùy Tàr shó ji cu vifa ve yi ve ví biyin fó mbìy. Aá kù fer ntuʼ mòʼón mòʼón e meŋkfəŋ me kpuún mè akilu abaà e nyaà shó.

¹⁸ Nyám se vèn wíy a tatí cu vifa ve yi vìn sho si wíy a dzə jii, wón viyaʼ saàmbà vee kiyá kiyá wùn à nàʼ woo lumèn, à viyáʼ vi vibaà, a nyám sìn si kù dzə̀ là nsem sidzə̀m. Sí yíi a dzə ji cu Nyùy Tàr ye tonèné, aá kù yii sa cu vifa ve yi, à yé melùʼu fó ghaŋ. Dzə̀ cu ye və́yí bin fo fo, kirəm kfə́ kí boŋ Nyùy Tàr.

¹⁹ Vèn ku fò sá kibév ji cu ajay, e fò wón viyaʼ abaà vee kiyá kiyá ji cu kikòŋnìn.

²⁰ Taà cù wíy nàn ntuʼ se kiban ke vifa veé sum vé mbìy vi ji cu Nyùy Tàr ye nanèné, e nàn sa wón viyaʼ vee abaà. Dzə̀ cu Nyùy Tàr yee jeéyí, a yí du a dzə̀ áàtàá cùu.

²¹ Lóo dzə e kishiíy fóo fèy, vèn jàŋ ŋkàʼ, e kaàrí, a bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví vee viy. Sì nsər ye vèn wíy a lèm mo ŋgwàʼ sén sí wíy a dzə e virə̀ʼ vidzə̀m ve vèn dzə́ sho.

²² «Vèn wíy lóo kav vifá fo sum, lá á yòʼ a dìy ji á síy á súm siyín, e dù, e meé e ŋguùŋè si, kìn dzə̀ ji á kfə́nrí wuú, e sìyrí. Vèn lem vee shooy vi ji vé aghéʼncey wùn à viŋgwìy vi. Dzə̀ mo Nyùy Tàr woo Nyùy won.»

Ŋkǎʼ Sòŋ ye Toŋéné

²³ Nyùy Tàr kfən yòŋ e Mooser jii,

²⁴ «Suúy e wír veé Israyi jii, lóo dzə e kishiíy ké mbìy ki, é ŋwee woo saàmbà, vèn kù lèm ji kishiíy ké bam, e rə̀sí, aá tóŋ sóŋ, é wíri kaárí, a bùnrì Nyùy, é wù fíʼ a kuumé ven.

²⁵ Lá vèn yòʼ wìy lìm lim e kishiíy fen moó vishiíy vímóʼ ví. Vèn kú a cù a dzə̀ Nyùy Tàr e cu ye və́yí bin fo foo.»

Kishiíy ké Kiman

²⁶ Nyùy Tàr kfən yòŋ e Mooser jii,

²⁷ «Lóo dzə e kishiíy kee ghvə̀m, kù é ŋwee wo wú meen ji saàmbà, é wáa dzə *Kishiíy ké Kiman, a wíy a dzə ghán se vèn kaári, a bùnrì mo. Vèn kù wíy nə̀ʼsì vitú vén, a vèn kfə̀n wíy a cù Nyùy Tàr e cu se və́yí bin fo fo si.

²⁸ Lá vèn yòʼ lìm lim e kishiíy fóo fèy. Dzə̀ Kishiíy ké Kiman ke á mán vinyo vén e Nyùy Tàr woo Nyùy wón si.

²⁹ A dzə̀ wír, e làa yòʼ nə̀ʼsì kitú kfə́ é kishiíy fen, á kù fə̀ə́r wun fo wír Nyùyí mvəm.

³⁰ Wìr lim lim e kishiíy fen, bo m laar ŋgaàŋ fo wír vəə́ mvəm.

³¹ Lá wìr yòʼ wìy lìm kifá. Sì nsər bèy, e wìy dù, e mày mo ŋgwàʼ sén sí wíy a dzə e virə̀ʼ vidzə̀m ve vèn wíy a dzə sho.

³² Kù wíy a dzə kishiíy ké meèmè kee jeéy kí fo vèn, a vèn kù wíy a tèr fo vifa veé shií, e kèʼ fo ŋkuùr kishìíy kee bvə̀ʼə̀, e meé e ŋkuùr kishìíy kee ghvə̀m. Vèn ku lèm kishiíy kin ki.»

Ŋkǎʼ Tàv sé Ghan

³³ Nyùy Tàr kfən yòŋ e Mooser jii,

³⁴ «Suúy e wír veé Israyi jii, lóo dzə e kishiíy kee nshòv sitàn e ghvə̀m, kù é ŋwee woo saàmbà, vèn kèʼ ŋkǎʼ Nyùy Tàr wo dzəə̀n Wó Tàv sé Ghan, e yiì kishiíy saàmbà.

³⁵ Lóo dzə e kishiíy ké mbìy ki fó vishiíy fen, vèn kaàrí, e bùnrì Nyùy Tàr. Lá wìr yòʼ lìm lim e kishiíy fen moó vishiíy vímóʼ ví.

³⁶ Vèn ku cù Nyùy Tàr e cu se və́yí bin fo fo si, vishiíy saàmbà, lóo dzə e kishiíy ke kí meen ji waamé, vèn kù kaàrí, a bùnrì Nyùy Tàr, a cù wun e cu ye və́yí bin fo foo. Dzə̀ kishiíy ké bùnrì kímóʼ kí jeéy, é la wìr yòʼ lìm lim e kishiíy fen moó vishiíy vímóʼ ví.

³⁷ «Á ŋkàʼ se á lèmèn ji sé Nyùy Tàr se vèn wíy a kaarí, a bùnrì wun, a cù wun e cu se və́yí bin fo fo si. A dzə̀ jii, cu ye tonèné, à yé vifa ve yii, à yé kikòŋnìne, e lì sa yé melùʼ. Yee shó e wun kishiíy mo nsər dinè.

³⁸ Ŋkàʼ sin si bàr kishiíy ké bam ke Nyùy Tàr, a cu se ŋkàʼ sin si bàr afómo ámóʼó ve vèn fó e Nyùy Tàr wùn à cu sén símóʼ sí moo yé ŋkàʼmé, à yé kimbòŋwùné.

³⁹ «Ké *Ŋkǎʼ Tàv sé Ghan ki nén a dzə jii, lóo dzə e kishiíy kee nshòv sitàn e ghvə̀m fo ŋwee woo saàmbà, a vèn káv ne vifá fo kwaʼ, ví máy, vèn lèm ŋkǎʼ Nyùy Tàr kishiíy saàmbà. Kishiíy ké ŋkàʼ vən ké mbìy ki kù dzə̀ kishiíy ké meèmè kee jeéy kí, a ke kí meen ji waamé kí kù dzə̀ sá bèy.

⁴⁰ Lóo dzə e kishiíy ké mbìy kìn ki, é vèn ku tày báŋ si fó vici ve ví koom báŋ se juŋ si, e tàʼ viyáŋ ve ten, à tám se vici se rəŋsìn sí, à tám se kici ké *wilo fo ghaa ndzəv, e kèʼ, a ndzəʼ e Nyùy Tàr woo Nyùy wón si, aá kù yíi a sàvnìn bèy, kishiíy saàmbà.

⁴¹ Vèn kú a lèm ŋkàʼ və́ne, a ghvəm Nyùy Tàr shó, kishiíy saàmbà e kitu ke kiya. Sì nsər bèy, e wìy dù mày mo ŋgwàʼ sén sí wíy a dzə. Vèn ku lèm e ŋwee wo wú meen ji saàmbà.

⁴² Vèn kù wíy a shiíy e tàv sé ghan kishiíy saàmbà. Wìr dzə̀m woo dzəə́ yeé Isray kù wíy a shiíy a dzə̀ é tàv sé ghan vishiíy vee saàmbà vìn,

⁴³ é rám sén sí fiʼ wìy a kiíy ji Nyùy Tàr‑iì yiì, wír veé Israyi wáa shiíy e tàv sí, e ghan se wù‑uù fəərin áwune fó wòŋ Ejiv. Dzə̀ mo Nyùy Tàr woo Nyùy won.»

⁴⁴ Mooser ku nèn naàrì ntò se ŋkàʼ sé Nyùy Tàr e wír veé Israyi bey.