Cù 21 - ŊWÀʼ NYÙY

Nsər se atàá cù wìr veé Isray

¹ Nyùy Tàr yòŋ e Mooser ji wù suúy á e wón Aaron vee vitó və́ ve dzəə̀n atàá cùu jii, «Wìr woo taà cù kfəə kpú, lá taà cù yòʼ shaà a fo, fóo lor kitú kfə́.

² Kù jòʼsì a wir kfəə və woo fó mentsə̀m, moo yè wov, kìn tàr wov, kìn wán və woo lumèn, kìn woo wiíy, kìn lúmér rə.

³ Lóo dzə jemèr rə ye yì kù dzə́ e wun sar, a bó yì yòʼ sí kér lúm, a dzə̀ wù lòr sá kitú kfə́ bìʼ woo shooy.

⁴ Wù yòʼ kér fó ndzəv kitú kfə́, bìʼ kpú asə́ və́, e lì lor.

⁵ «Lá taà cù yòʼ mùm, e shùn kitú, kìn wù kèŋrì a dzə̀ kighev, kìn wù shùnrí a dzə̀ wún ji wun diy kpú.

⁶ Wù kù kér fó a dzə wír woo jeéy ji wo Nyùy, e làa yòʼ shoór yír Nyùy. Dzə̀ wun wo wù cu Nyùy Tàr e cu ye və́yí bin fo foo, ye dzəə̀n vifá vém vé yi, mo woo Nyùy won. Taà cù kù kér fó a dzə wír woo jeéy.

⁷ «Taà cù yòʼ kér fó tàʼ wiíy wo wù lorin ne kitú kfə́ e visàkì vi, kìn dzə̀ wiíy wo á bivirin ne, kìn dzə̀ wiíy wo wù fəən ne fo lum, bìʼ fo taà cù dzəə̀n wír woo jeéy ji wo Nyùy Tàr.

⁸ Wìr Isray e dzə̀m kú a ghvəm taà cù ji wír wo á lèmèn jeéy ji wóom, bìʼ fo dzəə̀n wun wír wo wù cu Nyùy wov, fó vifá və́ vé yi. Vèn kú a ghvəm wun ji wír wo ranén, bìʼ fo mo woo Nyùy Tàr, m dzə̀ e ránén, a m yii ji vèn wáa dzə aránén.

⁹ A wan taà cù lòr kitú kfə́ e visàkì vi, bo wù shòór ne tàr wov, bo á kù ton, e yuyrí e və́yí.

¹⁰ «Taà cù wo kuʼùn yòʼ kér fó màʼtì kitú kfə́ é kí fəvri, kìn ji wù saasi ndzə̀y sə́ ji wun diy kpú. Bó yòʼ dzə̀ wù yiì bey, bìʼ fo á cuùrìn ne meŋgvə́r me yoʼ e wun kitu, e yòʼ wun, wù wáa màʼ ndzə̀y sé taà cù see jeéy sí.

¹¹ Wù yòʼ wíy a koʼtí e dzə́n wìrí ghaŋ, fó lor kitú kfə́, a fə̀m dzə̀ tàr wov, kìn yè wov.

¹² A wù yòʼ wíy a lò sa fo shùu kibàn ké Nyùy Tàr ji wun du kpú, fó dù, e wìy bivír kibàn. Mo vé‑eè yoʼon ne wun ji wír woo jeéy e meŋgvə́r me Nyùy Tàr mè, bo yòʼ dzə̀ wù mùm kee bey. Dzə̀ mo Nyùy Tàr.

¹³ Taà cù wo kuʼùn ku tàʼ wiíy a dzə̀ wo wù yóʼ ne kìíy lumèn.

¹⁴ Lá wù yòʼ tàʼ wiíy a dzə̀ wiiy ŋkfə, kìn wiíy wo wù fəən ne fo lum, kìn dzə̀ wiiy visàkì. Á bèy, wù ku tàʼ wiíy a kù dzə̀ wo wù yóʼ ne kìíy lumèn, a kfə̀n dzə̀ wo dzəə̀n wan nsay.

¹⁵ Là bey, bo wón vəə́ yíi a dzə wón nshoórsíi e wír vəə́ mvəm. Dzə̀ mo Nyùy Tàr wo m lèmèn wun jeéy ji taà cù wo kuʼùn.»

¹⁶ Nyùy kfən yòŋ Mooser, e sùúy jii,

¹⁷ «Suúy e Aaron jii, a wìr fo věn mvəm kér ndzə́m, lá wù yòʼ mùm ji wun cu Nyùy. Kú a dzə nsər mo ŋgwàʼ sén sí wíy a dzə.

¹⁸ Kí nén a dzə jii, a wìr kér ndzə́m, lá wù yòʼ kòʼtí e mǒ ghaa kiy cù, kìn dzə̀ mfìr, kìn dzə̀ ŋkivkìr, kìn dzə̀ wo wù ndzəmen fó si, kìn dzə̀ kfə́ə ndzə́m vəné é wùn,

¹⁹ kìn dzə̀ wír wo wù kér kileémé é kiwuù, kìn é kiwo,

²⁰ kìn dzə̀ wír wo lùŋ kivin, kìn dzə̀ wír wo wù ghvəərin, kìn dzə̀ wo wù kér ndzə́m é wàn si, kìn dzə̀ wír wo wù kér yàsí woó jav wùn, kìn dzə̀ wo wù ndzəmen fó baŋ si.

²¹ Bó yòʼ dzə̀ wír e taà cù Aaron ram, a wù kér ndzə́m, wù kòʼtí é kiy cù ji wun cu Nyùy Tàr, e yiì cu ye və́yí bin fo fo. Mo wù kér ndzə́m, bo bó yòʼ dzə̀ wù kòʼtí ji wun fó vifá ve yi e Nyùy və.

²² Yii bèy, a dzə̀ wù yì vifá ve á cuùn mo shó. A dzə̀ wù yì vee jeéy, à ve ví dzəə̀n jeéy féyì feyì.

²³ Yii bèy, mo wù kér ndzə́m, bó yòʼ dzə̀ wù wìy é ghaa ràŋ, a bó yòʼ dzə̀ sá wù kòʼtí é ghaa kiy cù. Bó yòʼ dzə̀ wù yiì bey, fó bivír kibàn kém ké dzə kee jeéy kí. Lá wù yòʼ mùm, bìʼ fo yì‑iì naŋsin mo woo Nyùy Tàr vifá vee shooy, e shìvìr ji vee jeéy ví.»

²⁴ Mooser ku nèn naàrì vinyo vìn vidzə̀m e Aaron wùn à wóné, à wìr dzə̀m woó Isray.