Cù 20 - ŊWÀʼ NYÙY

Seʼ kitu ke tavín kí

¹ Nyùy Tàr yòŋ e Mooser

² ji wù suúy á e wír veé Israyi jii, «A wìr fo vèn, kìn kiŋgwìy ke kí dzə́ vèn áwune kí lòo dzə, e fò wán ji á cu *Molek sho, bo wìr dzə̀m yíi tsəmrí ŋgaàŋ e tíyí, e yuyrí.

³ A mómò kitú kém, m yíi shwivír ŋgaàŋ, e fəə́r fo wír veé Israyí mvəm, bìʼ fo wù liìn wán, e cù Molek sho, e bìvír kibàn kém ké ntàsín, e kfə̀n shòór yír yém, mo, a m dzə̀ e ránén.

⁴ Yii bèy, a wìr lòo dzə, e fò wán e Molek, wíri li fó tèr, e tèn fóo yuyrí ŋgaàŋ,

⁵ bo m yíi shwivír ŋgaàŋ wùn à kfə́ə rəə́ e dzə̀m, e fəə́r áwune fo wír veé Israyí mvəm. M fəər wùn áwune adzə̀m ve á suusin, e mèŋ Nyùy Tàr, a ghvəm a dzə̀ Molek.

⁶ «A wìr bìnkìr, a beè vé fùú, kìn dzə̀ ji wù wáa beè ve á ká aŋkfə, a baŋrí a dzə̀ vifá vee bey, bo m yíi shwivír ŋgaàŋ, e fəə́r wun fo wír veé Israyí mvəm.

⁷ Vèn ku fò vitú vén ji vém vee wír, a dzə aránén, bìʼ fo mo woo Nyùy Tàr dzəə̀n Nyùy won.

⁸ Vèn ku ghàr nsər sém sí sidzə̀m, a yiì mo sí dzəə̀n. Dzə̀ mo woo Nyùy Tàr wo wù kù yii, bo vèn wáa dzə aránén ji wír vém.

⁹ «A wìr kuù tàr wov, kìn yè wov, á kù yùyrí ŋgaàŋ. Kpú rəə́ kù dzə̀ e wun kiwo.

¹⁰ «A wìr lì wiíy wìr, á tàtí ŋgaàŋ wùn à wiíy woo shooy, e kù yùyrí yuyrín.

¹¹ A wìr lì kifə́sín ke yè wov, bo wù shòór ne tàr wov. Aá kù yúyri ŋgaàŋ wùn à wiíy woo shooy. Kpú yéví kù dzə̀ aáwuné wo.

¹² A wìr lì wiiy wan və, á kù yùyrí wùn wiíy woo shooy. Dzə̀ nsəə̀laʼ. Kpú yéví kù dzə̀ aáwuné wo.

¹³ A lùmèn lì lumèn mo á lì wiíy, bo áwune adzə̀me yiì kinyo ke koʼoyín kí. Bo á kù táti áwune adzə̀m, e yuyrí. Kpú yéví kù dzə̀ aáwuné wo.

¹⁴ A wìr wày wiíy e lav, e kfə̀n lì yìy à wiíy, bo dzə̀ liì kisaŋ. Á kù yíi tatí áwune adzə̀m, e tòn e və̀y, aá kpúkír, fo liì kisaŋ wáa dzə e věn mvəm.

¹⁵ A wìr lì nyám, e shìíy sho, bo á yúyri ŋgaàŋ, e yuyrí nyám yee shó.

¹⁶ A wiíy lèvtí nyám, yì neem e wun, bo á yúyri wiíy, e yuyrí nyám. Á kù táti, e yuyrí, kpú yéví kù lò fo áwune.

¹⁷ «A wìr cèm wiíy a dzə̀ fə́r və, kìn dzə̀ wan tàr wov, kìn wo yè wov, bo dzə̀ nshoórsí. Bo á jum áwune fo wír véví mvəm, bìʼ fo ŋgaàŋ shiiyin e fər və, kù kì áwune fo áwuné lòn.

¹⁸ A wìr shìíy e wiíy, a wù yén ghán sə́, á kù tàtí áwune, e jùm fo màŋgòŋ mvəm, bìʼ fo áwune shoʼorin nsər yee kùm *kifàn.

¹⁹ «A wìr lì jemèr yè wov, kìn ye tàr wov, bo áwune adzə̀me yíi lì lòn, bìʼ fo á bùʼùn nsəə̀laʼ.

²⁰ A wìr lì wiiy lùmer tàr wov, bo wù shòór ne lúmér tàr wov. Bo ŋgaàŋ wùn wiíy wíy gòʼ là rám.

²¹ A wìr lò, a dzə sho e tin, fə̀r li wiíy ŋgaàŋ, bo dzə̀ kifàn. Wù shòór fə́r və. Áwune wíy gòʼ là rám.

²² «Nyùy Tàr kú a suúy jii, vèn wáa yunín nsər sém, a jùmrì ntir sém sí sidzə̀m, a yiì mo sí dzəə̀n, é la nsay Kanan yee fo m li ven, e dù sho yòʼ wìy mèŋ ven.

²³ Lá vèn yòʼ wìy lì liì vitum ve m jum fo věn mbìy, e fəə́r fo nsay ji vèn nəə́ shó. Dzə̀ bìʼ joonè wo vé‑eè yii, é bo m nyáŋ áwune,

²⁴ e nèn kàʼ a dzə̀ ven ji kù wíy yòv a ven nsay yev. A m fò ne e vèn ji vitsə́ʼ vén. Dzə̀ nsay, a vín nàʼ wùn à vilu vi tsəətìn sho tsə́ətin. Dzə̀ mo Nyùy Tàr woo Nyùy won, wo m shavin ven fo vitúm ví mvəm ji wír vee jeéyí.

²⁵ Kí wáa dzə jii, vèn kér fó kiíy jeéyjeéy fó nyàm kifàn, à ye yì yòʼ kér kifàn, à fó shinə̀n shé kifàn shí, à she shí yòʼ kér shi. Lá vèn yòʼ wìy lòr vitú vén é nyàm, kìn e shinə́n shí, kìn dzə̀ ka ke kí ŋaŋrì e nsay, ke m shaʼnin fo vèn ji dzə̀ kifàn.

²⁶ Vèn kú a dzə wír vém, aá dzə̀ aránén, bìʼ fo mo woo Nyùy Tàr dzəə̀n e ránén. M shàv ne ven fo vitúm ví mvəm ji vèn kú a dzə ji wír vém.

²⁷ «A lùmèn, kìn wiíy lò, a dzə wír wo wù shwéŋ fú, kìn wù ká aŋkfə, bo á kù tsə́mri e tíyí, e yuyrí. Bo kpú ŋgaàŋe kù dzə̀ e wun kiwo.»