Cù 2 - ŊWÀʼ NYÙY

Cu yee yiì e vifá ve yi vi

¹ «Wìr lóo cù Nyùy Tàr a dzə̀ e cu vifa ve yii, bo wù lo, e yiì a dzə̀ e meŋkfəŋ me kpuún mè. A wù yíi cuùrì meŋgvə́r shó, e neèr kiláy kee *frankinsen e kitu wo.

² Wù yii bèy, é wù nèn lì, e dù, e yèn wón Aaron sho, áwune vee vitó və́, vee atàá cù, é taà cù wùmòʼ ŋeʼ meŋkfəŋ fo meŋkfə̀ŋ me á cuùrìn ne meŋgvə́r shó mèy, kiwó kifur, e tàtí wùn à kiláy kí, e tòn e kiy cù ji sàʼ vifa ve cù. Dzə̀ cu ye və́yí bin fo fo, a kirəm kfə́ kí boŋ Nyùy Tàr.

³ Wù yii bèy, bo kibér ke meŋkfə̀ŋ kìn ki sì ké Aaron wùn à wón vəə́. Dzə̀ vifá ve yi vee jeéy ví féyì feyì, bìʼ fo dzəə̀n mbìv vifa ve á cuùn Nyùy Tàr shó e cu ye və́yí bìnèn fó fo.

⁴ «Wìr lóo wìy e vifá ve cù vi, a dzə̀ viyíkìr ve á tònèn é kiy wo boméné, bo yíi a dzə kibán ke tonèn kí kee là nyaà, aá kù li a dzə̀ meŋkfəŋ me kpuún mè, e tov e meŋgvə́r mè. Kìn á ton e ntuʼ si, kìn á vemèr, e bóo tòn. Lóo dzə ke vemèrìn kí, á kfə̀n yòʼ meŋgvə́r shó.

⁵ «Yii bèy, a vifá ve cù ve wìr vi lò a dzə vifá ve á ton a dzə̀ é kikaŋ kee tèéter, bo wù yíi lì a dzə̀ meŋkfəŋ me kpuún mè, e tov e meŋgvə́r mè, e bóo tòn.

⁶ Wù ton, é wù nèn bvə̀ʼə́y, e cuùrì meŋgvə́r shó. Dzə̀ cu vifa ve yi.

⁷ «A vifá ve cù ve wìr vi lò a dzə, a dzə̀ vifá ve yi ve á yii ton e kikaŋ ke á sə́ti, bo wù yíi fèr a dzə̀ e meŋkfəŋ me kpuún mè, à meŋgvə́r mè.

⁸ Á yií wiy e cu vifa ve yi ve á fèrìn a dzə̀ e vifá vìn vi ji á fó e Nyùy Tàr, á wày e taà cù kiwo, é wù nèn dù sho e ghaa kiy cù,

⁹ e fə̀ə́r vímóʼ ví ji sàʼ, e tòn e kiy cù. Dzə̀ cu ye və́yí bin fo fo, a kirəm kfə́ kí boŋ Nyùy Tàr.

¹⁰ Á bèy, bo kibér ke vifa ve cù vìn vi sì vé Aaron wùn à wón vəə́. Dzə̀ vifá ve yi vee jeéy ví féyì feyì, bìʼ fo dzəə̀n mbìv vifa ve á cuùn Nyùy Tàr shó e cu ye və́yí bìnèn fó fo.

¹¹ «Lá nyaà yòʼ a dzə e vifa ve yi ve vèn cu Nyùy Tàr shó. Á yòʼ kér fó tòn kifá ke kí kér nyaà, kìn vilu, a cù Nyùy Tàr shó ji cu ye və́yí bin fo fo.

¹² A dzə̀ á lì nyaà wùn à vilu vi, e tàtí e ŋgòn se vifa ve á kavin, e wìy, e cù Nyùy Tàr shó. Yii bèy, é la á yòʼ tòn ji cu Nyùy Tàr ye və́yí bin fo fo.

¹³ Vèn wáy shiŋgwáŋ shi é cù vifa ve yi vidzə̀m. Lá shiŋgwáŋ she *mensàŋ me vèn à Nyùy won shí yòʼ wìy a buŋ fo cù ye vèn yii e vifá ve yi vi. Cu yén e dzə̀me kú a ker shiŋgwáŋ.

¹⁴ «Vèn lóo wìy e ŋgòn se vifa ve yi si ji á cu Nyùy Tàr shó, kù a dzə se á buʼun, e kàŋ, e kàʼtí.

¹⁵ Á ku cuùrì meŋgvə́r shó, e neèr kiláy kee *frankinsen e kitu wo. Kù dzə̀ cu vifa ve yi.

¹⁶ Taà cù yíi ŋòʼ mbìv yìmòʼ, e tatí wùn à kiláy kí, e tòn ji sàʼ. Bo dzə̀ cu Nyùy Tàr ye və́yí bin fo fo.