Cù 18 - ŊWÀʼ NYÙY

Nsər se sí sháʼnin liì kisaŋ wiíy wùn lùmèn

¹ Nyùy Tàr yòŋ e Mooser

² ji wù suúy á e wír veé Israyi jii, «M dzə̀ Nyùy Tàr woo Nyùy won.

³ Lá vèn yòʼ wìy yiì mo wír veé wòŋ Ejivi‑iì yii fo vèn‑eè dzə́. Lá vèn yòʼ yiì sa mo á yii e wòŋ Kanan fo m li ven, e dù sho. Lá vèn yòʼ bìʼnìn liì wov.

⁴ Vèn wáa yu sáʼ yém, a yunín nsər sém, a yiì mo sí dzəə̀n. Dzə̀ mo Nyùy Tàr woo Nyùy won.

⁵ Bo dzə̀ jii, a wìr lò, a yu sáʼ yém, a yunín nsər sém, a yiì mo sí dzəə̀n, bo wù wíy lùŋ. Dzə̀ mo Nyùy Tàr.

⁶ «Wìr fo vèn wáa yen fó wìy shiíy e fər və. Dzə̀ mo Nyùy Tàr.

⁷ «Lá wìr yòʼ wìy lì yè wov, fó shoór tàr wov. Dzə̀ yè wov, lá wìr yòʼ mùm, e yèn kinshóʼ kfə́.

⁸ «Lá wìr yòʼ lì kifə́sín ke yè wov, é kí shoór tàr wov.

⁹ «Lá wìr yòʼ lì jemèr rə yee kitàr kimòʼón, kiyìy kimòʼón, kìn dzə̀ ye wùn wun dzəə̀n kitàr kimòʼón, viyìy jeéy jeéy, kìn ye á dzəən kiyìy kimòʼón, vitàr jeéy jeéy, kìn wùn wun kùy láʼ e mòʼón, kìn á kùy jeéy jeéy.

¹⁰ «Lá wìr yòʼ lì wan wan və, kù dzə̀ nshoórsí fo ŋwèrín.

¹¹ «Lá wìr yòʼ lì wan kifə̀sín ke yè wov wo tàr wov dzəən, kù dzə̀ jemèr rə.

^12-13 «Lá wìr yòʼ lì jemèr tàr wov, dzə̀ mensə́ me tàr wov, kìn ye yè wov, kù dzə̀ mensə́ me yè wov.

¹⁴ «Lá wìr yòʼ lì wiiy fə̀r tàr wov, wù kù dzə̀ sá ji yè wov.

¹⁵ «Lá wìr yòʼ lì wiíy wan və, dzə̀ wiiy wàn.

¹⁶ Lá wìr yòʼ lì wiíy fər və, dzə̀ wiiy fə̀r.

¹⁷ «Lá wìr yòʼ lì kiyìy, e lì wán, kìn ji wù li sá wan wàn. Dzə̀ mensə́ mewun, a kee shooy ki sì nsəə̀laʼ.

¹⁸ «Lá wìr yòʼ lì fər yeè lav ji wiíy, a yeè lav və dzə̀ shó e tin.

¹⁹ «Lá wìr yòʼ shìíy e wiíy, a wù yén ghán sə́, bìʼ fo wù sì e *kifàn kí é wùn.

²⁰ «Lá wìr yòʼ lì wiíy wìr. A wìr mùm, bo wù lór kitú kfə́, e lì kifàn.

²¹ «Lá wìr yòʼ wìy lì wán, e fò ji cu ye tonèné e nyùy woo *Molek. Kee shooy ki shoor yír yém. Dzə̀ mo Nyùy Tàr.

²² «Lá lùmèn yòʼ lì lumèn mo á lì wiíy, kee shooy ki kóʼoyì.

²³ «Lá lùmèn yòʼ neèm e nyàm. Lá wiíy yòʼ lèvtí nyám, é yì neem e wun. Kee shooy ki dzə̀ liì kisaŋ, a kí yii, a wìr lór kitú, li kifàn.

²⁴ «Lá vèn yòʼ lòr vitú vén e kfə́ə vinyò vee ben vi. Dzə̀ mo vitúm ve m jum fo věn mbìy vi kù‑uù sí yii, lór vitú vév.

²⁵ Nsay nen bìr, m ghéʼ nsay, yì méŋ vé nsayi.

²⁶ Yii bèy, fo kén kí, vèn wáa yunín nsər sém sí, a yiì mo m taʼà, e làa yòʼ yiì kinyo kímóʼ kí fó vinyò ve joònè vin, kìn dzə̀ ven vé nsayi, kìn viŋgwìy ve ví dzə́ vèn áwune.

²⁷ Vinyo vìn vidzə̀m vi dzə̀ ve wír ve á dzə́ foo kù‑uù sí yii, é bo nsay bír.

²⁸ Kí nén a dzə jii, a vèn wìy mùm, bo nsay wíy meŋ ven mo yì‑iì meŋen wír ve vé‑eè dzə́ fo.

²⁹ Bo dzə̀ jii, a fə̀m yiì la kinyo fo vinyò ve joònè vin, bo á fəər fo wír Nyùyí mvəm.

³⁰ «Á bèy, vèn yúnín nsər sém, e baàmè liì joònè wo wír veé wòŋ fène yii, a yen fó lor vitú vén shó. Dzə̀ mo Nyùy Tàr woo Nyùy won.»