Cù 17 - ŊWÀʼ NYÙY

Nsər yee kùm mensə́

¹ Nyùy Tàr lò, e kfə̀n sùŋnín e Mooser, e sùúy jii,

² «Naàrì nsər símóʼ sí e Aaron wùn à wón vəə́, à wìr dzə̀m woó Isray.

³ A sí dzə̀ jii, a wìr woó Isray seè nàʼ, kìn bvəy njiì, kìn ye loŋ, a dzə̀ é kibeèy, kìn é shweesí kibeèy

⁴ ji wun cu Nyùy Tàr shó, e làa yòʼ wìy sho a dzə̀ é shùu *kibàn ké ntàsín, e see e Nyùy Tǎr si, bo njò mensə kù dzə̀ e ŋwèrín kitu. Wù jaár mensə́ me cù jaárín, á kù fə̀ə́r wun fo wír Nyùyí mvəm.

⁵ Nsàv nsər rə̀n dzə̀ jii, mo wír veé Israyi‑iì seéri nyám si fó səné, á wáa wìy lèn, a seerí a dzə̀ e Nyùy Tǎr si, bó a cù wun sho. Á kù wíy a wìy, a yen taà cù sho e shùu kibàn ké ntàsín, a see fo ji cu Nyùy Tàr yee yé kikòŋnìn.

⁶ Taà cù yíi waŋrí mensə́ e Nyùy Tǎr kiy cù wo wú tíy e shùu kibàn ké ntàsín, e tòn fóm si fó ji kirəm ki wáa rə̀ʼtìn, a bòŋ Nyùy Tàr.

⁷ Kí lóo dzə bèy, é la wír veé Israyi yòʼ dzə́ə a ghan viŋkar fo anyùy kisaŋe, a see nyám si, a cù anyùy vee bvə́y si shó. Wír veé Israyi kù wíy a lèm nsər rə̀n, e wìy dù, e mày, e ŋgwàʼ sí ŋgwàʼ si mo sí wíy a dzə.

⁸ «À kù yíi sə̀ntì aáwune jii, a wìr woó Isray, kìn kiŋgwìy ke kí dzə́ aáwuné mvəm kí wìy yiì cu ye tonèné, kìn dzə̀ yee rəneé,

⁹ a bó wù yoʼ wìy sho e shùu kibàn ké ntàsín ji yé Nyùy Tàr, bo á wíy fəə́r wun fo wír Nyùyí mvəm.

¹⁰ «Kí kfə̀n dzə̀ sá jii, a wìr woó Isray, kìn kiŋgwìy ke kí dzə́ aáwuné mvəm kí yì nyám e mensə́ mè sho, bo m yíi shwivír ŋgaàŋ, e fəə́r wun fo wír vəə́ mvəm.

¹¹ Dzəʼə̀m kifa ke ŋeʼèn kí e dzə̀me dzə̀ é mensə. M nen fò mensə́ ji á wáa cùtì e kiy cù, a taŋrí ven shó. Mensə́ mè dzə̀ dzəʼə̀m, nén a dzə mewun me mè mán ajay.

¹² Á kinyo ke kí yiìn, é bo m yoŋ e wír veé Israyi ji lá wìr fo áwuné mvəm yòʼ wìy yì kifá e mensə́ mè sho, kìn dzə̀ kiŋgwìy ke kí dzə́ wùn áwune.

¹³ «Wìr woó Isray, kìn kiŋgwìy ke kí dzə́ wùn áwune kí lóo dù jwím, lóo koo nyám, kìn shinə́n she á yii yí, lá wù yòʼ yì e mensə́ mè sho. Wù ku fə̀ʼrì nsay, e seè nyám, kìn shinə́n fó, e jìír mensə́ e bii, e sə̀tí.

¹⁴ Mo dzəʼə̀m kifa ke ŋeʼèn kí kidzə̀me dzəə̀n é mensə, m nen shàʼnín ji lá wír veé Israyi yòʼ wìy yì á kifá e mensə́ mè sho, bìʼ fo dzəʼə̀m kifa kidzə̀me dzəə̀n é mensə. Wìr yí, á fə̀ə́r wun fo wír Nyùyí mvəm.

¹⁵ «Wìr wáa dzə wan nsay, kìn kiŋgwìy, e yì kifá ke kí kpuun kpuún, kìn ke yuyrin koosàʼ, bo wù yíi sù ndzə̀y sə́, e sù wún, a dzə e *kifàn kí wùn, e meé e ŋkuùr, e bó a dzə e ránén.

¹⁶ Yii bèy, wù wáa dzə, e làa yòʼ sù ndzə̀y sə́, kìn wù sù, e lèm wún, bo wù kù lì ne njò.»