Cù 14 - ŊWÀʼ NYÙY

Mo dzə̀ á kfə̀mrí wír wo wù kér yàsí woó jùv wùn

¹ Nyùy Tàr yòŋ e Mooser jii,

² «Nsər se kinyò ke dzə̀ á yiì é kishiíy ke á *kfə́mri wír wo á yenen ji wù bònén ne fo wun yàsí woó jùv wùn wo bi sí dzə̀ jii, á ku lì ŋgaàŋ, a dù, e yèn taà cù sho.

³ Á lóo wìy, é taà cù fəə́ kibeey, e wìy, e kàʼày wun. Wù yén, a yàsí woo shooy bónén ne rú,

⁴ é taà cù yoŋ vifá ve kfəmrí ve á wiy shó. Á kù taʼ menə́n me yòʼ dzəə̀n me kifàn mè mebaà, a mè dzə̀ metin, e tàʼ sa kinsév ke kici ké *sidar, à shinsàrìn she ndzə̀y she shí baaŋè shi, à tíŋ *hisovi.

⁵ Á wiy sho, é taà cù yoŋ, aá seé shímóʼ shee shinə́n é kitu ke ntòn mbóm wo wù kér mendzə́v me á tuun fó ndzəv ye yí léŋé.

⁶ Á seé, é taà cù li shinə́n she shí berin wùn à kinsév ke kici kee sidar kìy ki, à shinsàrìn she ndzə̀y shí, à hisov, e tàtí, e wày é mendzə̀v me mensə́ me shinə̀n she á kì seen mè dzəə̀n shó.

⁷ Wù yíi waŋrí mensə́ mèy e ŋgaà wo á kì kfə́mri wùn kàŋ saàmbà, e nèn toʼór ji wù ràn á ne, é wù nèn màʼtì shinə́n she tin shi, é shí wáa feŋ, a dù.

⁸ Ŋgaà wo á kì kfə́mri yíi sù ndzə̀y sə́, e kom kitú kfə́ kidzə̀m, e sù wún é mendzə̀v. Wù yii bèy, bo wù ràn ne, e nen kfən, e nəə́ e kibeèy, yii bèy, e làa yòʼ nəə́ e wun kibàn. Wù yíi a shiíy fo ndzə kishiíy saàmbà.

⁹ Lóo dzə e kishiíy kee saàmbà, é wù kfən kòm kitú kidzə̀m, e kòm kighev wùn à bvə́ybvə́y sé si si, e kòm wuy e dzə̀m fo wun wùn. Wù yii bèy, é wù kfən sù ndzə̀y sə́, e sù wún. Wù yii vinyo vìn, é wù nèn màysì ràn fo wun *kifàn.

¹⁰ «Lóo dzə e kishiíy kee waamé, é wù li wón viyaʼ abaà vee là nsem wùn à kifum ke njiì kee là nsem ki, kee kiyá, e kfə̀n tàʼ sa meŋkfəŋ me kpuún mè akilu ataár, aá shwír e meŋgvə́r me *oliv mè, e tàʼ meŋgvə́r pámpám e fur.

¹¹ Taà cù wo wù kfəmrin wun yíi lì wun wùn à vifá və́ vé cù vi, e koʼór, e dù sho e Nyùy Tǎr si, e shùu *kibàn ké ntàsín.

¹² Wù kóʼorì, é wù nèn lì kiyáʼ kee kimòʼón, e lì pámpám meŋgvə̀r, e fò ji cu ye yí tsəʼ njò, a wù yíi nàn e Nyùy Tǎr si ji cu ŋgaàŋ ye nanèné,

¹³ a wù kù yíi see kiyáʼ kìy e kirə̀ʼ kee jeéy kí, fo á yii seé cu ajay, à ye tonèné. Mo cu jayi yii dzə́ vidzə̀ vé taà cù, kù dzə̀ mo cu ye yí tsəʼ njò jay rə̀ne yíi a dzə. Dzə̀ cu yee jeéyí féyì.

¹⁴ «Taà cù yíi lì mensə́ me kiyaʼ memoʼ mè, kiyáʼ ke á yiìn cu njò shó kìy, e kùm shóy kitùʼùr ké yìy kí ké ŋgaà wo wù kì kfə́mri sho, e kùm sa kiyìy ké kiwo ke yìy kí, à kiyìy ké kiwuù ké yìy kí.

¹⁵ Taà cù yíi ŋèʼ meŋgvə́r memoʼ mè e wun mbvə̀ʼ kiwo ke ŋkoòvì ki,

¹⁶ e sə̀ʼ mensə́ mee wun mbvə̀ʼ kiwo, e wàn kiwo və yìy, e waŋ kàŋ saàmbà e Nyùy Tǎr si,

¹⁷ é wù kfən sə̀ʼ kibér ke meŋgvə̀r mee wun kiwo, e dòn shóy kitùʼùr ké yìy kí ké ŋgaà wo á kì kfə́mri, e kfə̀n dòn kiyìy ké kiwo ke yìy kí, à kiyìy ké kiwuù ké yìy kí, a wù kù yíi dòn a dzə̀ é kitu fo á yoʼon mensə́ mee bìʼ cu ye yí tsəʼ njò.

¹⁸ Wù donè, é wù maysi kibér ke meŋgvə̀r mee wun kiwo, e sòr kitú ke ŋgaàŋ sho. Á mo taà cù kú a kfəmrí ŋgaàŋ e Nyùy Tǎr si bèy.

¹⁹ «Wù lóo kfəmrí, é wù ku yiì cú ajay, e màn kinyo ke ŋgaà wo á kì kfə́mri və̀y. E bǎm kee shooy, é taà cù seé nyám yee bìʼ cu ye tonèné,

²⁰ e nèn yiì cu yee shooy, à yé vifa ve yii é kiy cù. Á mo taà cù ku kfə̀mrí ŋgaàŋ bèy, é wù nèn ràn fo wun kifàn.

²¹ «Yii bèy, a ŋgaàŋ dzə̀ ŋgaà kitàn, ye bó yòʼ dzə̀ wù kòóy vifá vìn, bo wù yíi tàʼ a dzə̀ wan kiyaʼ e mòʼón ji cu njò ye á yíi nàn, e man kinyo kfə́ shó. Wù yíi tàʼ sa meŋkfəŋ me kpuún mè kilu e mòʼón, aá shwír e meŋgvə́r mè, e yiì cu vifa ve yi sho, e tàʼ sa pámpám meŋgvə̀r,

²² e kfə̀n tàʼ sa vibìŋ vibaà, kìn vibuù vibaà, kee shó ke dzə̀ wù kòóy, é kímóʼ kí wáa dzə ké cù ajay, é kímóʼ kí wáa dzə ké cù ye tonèné.

²³ Lóo dzə e kishiíy kee waamé mo wù kfənen é kibeèy, é wù li vifá ve cù vìn ve á yíi kfəmrí wun sho, e dù, e yèn taà cù sho e shùu kibàn ké ntàsín, aá kóʼór e Nyùy Tǎr si,

²⁴ é taà cù nèn lì kiyáʼ ke cù yee bìʼ njò, e lì meŋgvə́r, e nàn e Nyùy Tǎr si ji cu ye nanèné.

²⁵ Wù yíi see kiyáʼ ke cù njò, e sə̀ʼ mensə́ memoʼ mè, e dòn kituʼùr ké yìy kí ké ŋgaà wo wù kì kfə́mri fo shoy, e dòn kiyìy ké kiwo ke yìy kí, à kiyìy ké kiwuù ké yìy kí.

²⁶ Taà cù yíi ŋèʼ meŋgvə́r memoʼ mè e wun mbvə̀ʼ kiwo ke ŋkoòvì ki,

²⁷ e sə̀ʼ e wàn kiwo və yìy, e waŋrí kàŋ saàmbà, e Nyùy Tǎr si.

²⁸ Wù wáŋri, é wù səʼ kibér ke meŋgvə̀r mee wun kiwo, e kùm shóy kitùʼùr ké yìy ké ŋgaà wo á kì kfə́mri, e dòn kiyìy ké kiwo ke yìy kí, à kiyìy ké kiwuù ké yìy kí, a wù don a dzə̀ fo á yoʼon mensə́ me cù ye yí tsəʼ njò.

²⁹ Wù donè, é wù maysi kibér ke meŋgvə̀r mee wun kiwo, e sòr kitú ke ŋgaà wo á kì kfə́mri sho. Á mo taà cù kú a kfəmrí ŋgaàŋ e Nyùy Tǎr si.

³⁰ Wù maysì kee shooy, é wù nèn yiì cu e vibìŋ ví, kìn e vibuù vi mo ŋgaà cù kì kooyin.

³¹ Kímóʼ kí yíi a dzə ji ké cù ajay, é kímóʼ kí wáa dzə ji ké cù ye tonèné, aá nèn tàtí wùn à cu vifa ve yii. Á mo taà cù ku kfə̀mrí ŋgaàŋ e Nyùy Tǎr si bèy.

³² Á nsər ye yì dzəə̀n ji á kfə́mrí wír wo wù bonen fó yàsí woó jùv wùn, a bó wù yòʼ kér mentàsìn mée yun vifá ve cù mo ví yii dzə́.»

Mfə̀m seé lav

³³ Nyùy Tàr yòŋ e Mooser wùn Aaron jii,

³⁴ «Vèn yií nəə e wòŋ Kanan wo m yíi fo e vèn ji vitsə́ʼ, m yii, mfə̀m sí koó e lav, e věn nsay foo fèy,

³⁵ bo ŋgaà lav wíy yen taà cù, e suúy sho jii, ‹Kí shwínin fo mò mo mfə̀m sé ntèmntém sí koò á e mǒ lav bèy.›

³⁶ Wù suuyì, é taà cù nèn sùúy, aá fəə́r vifá fo lav vidzə̀m, é bo wù wiy, e kàʼày mfə̀m see shooy. Là bey, bo á yíi toʼór ji kifá kidzə̀m keé lav ki kér a *kifàn. Taà cù wiyì, é wù nèn nə̀ə́ e lav, e kàʼày.

³⁷ Wù yií kaʼày mfə̀m siy, yén, a sí dzə̀ é wǔn lav, yén, a vishom vi səə́ne, kìn a ví baaŋè, yén, a mfə̀m sí kfə́r wún lav, nəə,

³⁸ bo wù yíi fəə, e sətí lav, é yì tiím kishiíy saàmbà.

³⁹ Taà cù kfə́n wíy kfə́n fo e kishiíy kee saàmbà, kaʼàyì, yén, a mfə̀m sí dzə́sí é virəv vé lav,

⁴⁰ é wù suúy, aá shóʼtí tíy se sí dzəə̀n shó, e kùúy, e fəə̀ ŋkàlaʼ sho, e màʼày e ròŋ, e kirə̀ʼ ké kifàn,

⁴¹ é wù suúy, aá kuu wún lav e dzə̀m fo mvəm. Á kuu bèy, aá kuúy nsay se á kuùn, e dù shùʼ e ròŋ fey.

⁴² Aá nèn wàyrí tíy se sən sí fo á kì shoʼtin siy, e lì nsay ye sən, e yòʼ lav sho.

⁴³ «A mfə̀m sí kfə̀n sìíy, e kòʼ é lav, aá kì shòʼtí ne tíy, e kuù wún lav, e kfə̀n yòʼ,

⁴⁴ bo taà cù kfə̀n du, e nəə́ e lav, e kàʼày. Wáa dzə ji mfə̀m sí kfən kòʼ é lav, bo sì mfə̀m sé ntèmntém sí, a sì kifàn.

⁴⁵ Á bèy, bo taà cù suuy, aá saʼ lav, e kùúy tíy sí wùn à vicí ví, à nsay se kinjoʼ si sidzə̀m, e bèʼèy, e fəə̀ ŋkàlaʼ sho, e shùʼ e ròŋ.

⁴⁶ Kímóʼ kí jii, à wìr lò, e nə̀ə́ e lav e mvə̀m vishìíy ve nsər din ji lav wáa dzə e sə́tín, bo wù yíi lì kifàn, é kí goʼ é wùn wó, e dù, e meé e ŋkuùr.

⁴⁷ Wìr wo wù shiiyin é lav foo fèy, kìn dzə̀ wo wù yikin fó, yíi sù ndzə̀y sə́.

⁴⁸ «Yii bèy, wáa dzə ji taà cù yiì kfə̀n, e lòo kàʼày, a bó mfə̀m sí yoʼ dzəə kòʼ é lav, e kèʼ mo á yoʼon, bo wù yíi toʼór ji yì dzə̀ á e ránén, là kifàn, bìʼ fo á laàrìn ne yàsí mfə̀m e dzə̀m.

⁴⁹ Móo *kfəmrí lav, bo taà cù kù taʼ menə́n me ŋeerín mè mebaà, à kicí kee *sidar ki, à shinsàrìn she ndzə̀y she shí baaŋè shi, à tíŋ hisovi.

⁵⁰ Wù yíi see shinə́n shímóʼ shí é kitu ke ntòn mbóm, wo wù kér mendzə́v me á tuun fó ndzəv ye yí léŋé.

⁵¹ Wù seé bèy, é wù nèn lì kicí kee sidar, à hisov, à shinsàrìn she ndzə̀y shí, e bóo lì shinə́n she tin shi, e nyòʼ e mensə me shinə̀n she á kì seen é mendzə̀v me á kì tuun fó ndzəv mè. Wù yii bèy, é wù wáŋrí é lav kàŋ saàmbà.

⁵² Á mo wù yíi tatí mensə́ me shinə̀n wùn à mendzə́v mee tú fó ndzəv mèy, à shinə́n she tin shi, à kicí kee sidar ki, à hisov, à shinsàrìn she ndzə̀y she shí baaŋè shi bey, e bóo kfəmrí lav sho.

⁵³ Ké shinə̀n she tin shi kù dzə̀ jii, wù fəə́ ŋkàlaʼ sho, e màʼtì e kwaʼ, é shí wáa feŋ, a dù. Á mo taà cù yíi kfəmrí lav bèy, é yì nèn ràn.

⁵⁴ «Á nsər see bìʼ ayàsí veé jùv wùn ve bií,

⁵⁵ à sé mfə̀m seé ndzə̀y sí, à sé mfə̀m se sí koʼon é lav si,

⁵⁶ à sé virə̀ʼ ve ví gvəm vi, à sé vintokìr vi, à sé vimbùvrì vi.

⁵⁷ Nsər sìn si naarì wíri kifá ke kí kér kifàn, à ke kí yòʼ kér ki. Á nsər se vifa ve ví siìn ji ntèmntém.»