Cù 13 - ŊWÀʼ NYÙY

Nsər see kùm ayàsí veé jùv wùn

¹ Nyùy Tàr fó ntò se vinyò vímóʼ ví e Mooser wùn Aaron jii,

² «A wìr lò, a ker viváv e wun wùn, kìn vinto, a ví sí du ji yàsí wo bi é wùn wó, á dù, e yèn Aaron woo taà cù sho, kìn taà cù woo wán və.

³ Taà cù yíi kàʼày kirə́ʼ kee shó, e yen ji wuy yee fóo sà fə́rí a, wùn à ji fóo sà shoò, e shaà juv wùn á. Wù yén, a kí dzə̀ bey, bo sì yàsí wo bi, é taà cù nèn tòʼór e màŋgòŋ ji wù sí kér a *kifàn.

⁴ Wáa dzə ji kirə́ʼ kee shooy ki fə́rí, a kí yoʼ shoò e shaà juv wùn, a bó wuy yee fóo yòʼ fə́rí, bo taà cù yíi tsə̀ʼ wun jeéy kishiíy saàmbà.

⁵ Taà cù kfə́n yií kaʼày wun e bǎm kishiíy ke kí meen ji saàmbà, yén ji yàsí və̀n kù tíy a fo, a bó wù yòʼ dzəsì, bo wù kfə̀n‑éè maʼti wun e bǎm vishiíy saàmbà.

⁶ Vishiíy vee shooy vi lóo mày, é taà cù kfən kàʼày wun e kishiíy ke kí meen ji saàmbà. A wù kàʼày, e yèn ji yàsí və̀n laàkír a ne, a bó wù yòʼ kfə̀n dzəsì e virə̀ʼ vímóʼ ví, bo taà cù sí tóʼor ji wù yòʼ dzə̀ á e kifàn kí wùn, kù dzə̀ á vinto fo tèr, é ŋgaàŋ nèn sù ndzə̀y sə́, a dzə e ránén.

⁷ Yii bèy, a vinto vi lò, a dzə̀sì e virə̀ʼ vímóʼ ví, a wù kì dìn ne kitú kfə́ e taà cù, taà cù yóŋ ji wù sì á là kifàn, bo wù kfə̀n kér fó kfən, e yen taà cù, é wù kaʼay wun.

⁸ Taà cù kaʼay wun, e yèn ji yàsí dzə̀sì a ne rú, e dù e virə̀ʼ vímóʼ ví, bo taà cù tóʼor ji wù kér a kifàn. Dzə̀ yàsí woó jùv wùn.

⁹ «A wìr kér yàsí woó jùv wùn, á lì ŋgaàŋ, e wìy, e yèn taà cù sho.

¹⁰ Taà cù yií kaʼày wun, yén, a fóo gvə́m, wuy yee fóo wáa fəəsí, a kí sí du ji kiváv,

¹¹ bo dzə̀ yàsí woó jùv wùn wo wù nəənin ne. Taà cù nèn tòʼór ji wù kér a kifàn, a shií wó á tsəʼ ŋgaàŋ jeéy ji á yiì kàʼày yòʼ dzə̀, bìʼ fo kí siìn kikiíyín ji wù kér a kifàn.

¹² Yii bèy, a yàsí woó jùv wùn fəə̀, e laàkír e wìr wùn, taà cù yén, a wù laákír ne, e kèʼ fo kitu, e meé e wuù,

¹³ bo wù yíi kàʼày yàsí woo shooy. Wù yén, a yàsí və̀n sə́tí ne wún və́ e dzə̀m, wù wáa fər fərín, bo wù tóʼor ji ŋgaàŋ yòʼ kér a kifàn, bìʼ fo wún vəə́ fə́r fərín e dzə̀m.

¹⁴ Yii bèy, a jav yee fó lò, a jèʼèm, bo wù kér kifàn.

¹⁵ Taà cù kù yíi kàʼày kirə́ʼ kee shooy, yén ji fóo jèʼèm a rú, é wù tóʼór ji dzə̀ á kifàn. Virə́ʼ ve jeʼèmèn ví dzə̀ kifàn, kù dzə̀ yàsí woó jùv wùn.

¹⁶ Yii bèy, a kiváv kí lò, e yuùmé, fóo wáa fəəsí, bo ŋgaàŋ kù du, e yen taà cù,

¹⁷ é wù kaʼay wun, yén ji kiváv kí yuùmé a ne rú, fóo wáa fəəsí, bo wù tóʼor ji ŋgaà kivàv waà ràn, wù yòʼ kér a kifàn.

¹⁸ «Wìr wáa dzə, a wù kì kér kinto e wùn, kí lo, e bònén,

¹⁹ fóo kfən lò, e gvə̀m, a fər, kìn fóo baŋrì bàŋrìn, bo ŋgaàŋ du, e dìn kitú kfə́ e taà cù.

²⁰ Taà cù kaʼày ŋgaàŋ, yén, a fóo shoó, e shaà juv wùn, kfə́n yén, a wuy yee fóo fəə́si, é wù nèn tòʼór ji ŋgaàŋ kér a kifàn. Dzə̀ yàsí woó jùv wùn wo wù loòn fó kinto fèy.

²¹ Yii bèy, a taà cù lòo kàʼày wun, e yèn a wuy yee fóo yòʼ fəə́si, e kfə̀n yèn ji fóo yoʼ waà shoò e shaà juv wùn, á bèy, a fóo laákirì, bo taà cù tsəʼ wun, e lèm jeéy kishiíy saàmbà.

²² Wáa dzə ji yàsí və̀n dzə̀sì wún, e dù e virə̀ʼ vímóʼ ví, taà cù nèn tòʼór ji ŋgaàŋ kér a kifàn, bìʼ fo dzəə̀n yàsí woó jùv wùn wo bi.

²³ Yii bèy, a kinto ki dzə̀ làa yòʼ dzə̀sì, e dù e virə̀ʼ vímóʼ ví, bo kí kù yíi jòʼsì ji kilur, é taà cù tóʼór ji wù waà ràn, wù yòʼ kér a kifàn.

²⁴ «A wìr lòo dzə e shwì, fóo buvri, a bàŋrì bàŋrìn, kfə̀n a fəəsí fəəsín,

²⁵ bo taà cù yíi kàʼày ŋgaàŋ. Wù lòo kàʼày, e yèn a wuy yee fóo kúvsín ne, a fər, fóo kfən shoò, e shaà juv wùn, bo sì yàsí woó jùv wùn wo bi, wo wù loòn fó kileemé ké və̀y. Bo taà cù sí tóʼor ji ŋgaàŋ kér a kifàn, a kù sì yàsí woó jùv wùn.

²⁶ Yii bèy, a taà cù kàʼày wun, e yèn a wuy yee fóo yòʼ fəə́si, e kfə̀n yèn ji fóo yoʼ waà shoò e shàa juv wùn, á bèy, a fóo laákirì, bo taà cù tsəʼ wun, e lèm jeéy kishiíy saàmbà.

²⁷ Taà cù kfə́n yií kaʼày wun e kishiíy ke kí meen ji saàmbà, yén ji kileémé kí dzə̀sì a wún dzə́sin, e dù a e virə̀ʼ vímóʼ ví, bo taà cù yíi toʼór ji wù kér a kifàn. Dzə̀ yàsí woó jùv wùn.

²⁸ Yii bèy, a kileémé kí gòʼ a tiy fo, e làa yòʼ a dzə̀sì wún é virə̀ʼ vímóʼ ví, á bèy, a laakír, e làa yòʼ a bùvrì, bo taà cù yíi toʼór ji wù waà ràn, wù yòʼ kér a kifàn, bìʼ fo dzəə̀n kilur ke kileemé ké və̀y.

²⁹ «A lùmèn kìn wiíy lò, a ker vimbùvrì e kitu, kìn é diŋ,

³⁰ bo taà cù yíi kàʼày, yén, a fóo shoó e shaà juv wùn, a wuy yee fóo kfə̀n baaŋè, dzə́ ji sèém, bo taà cù yíi toʼór ji wù kér a kifàn, bìʼ fo dzəə̀n yàsí vintàŋ woó kitu, kìn woó kighèv.

³¹ Yii bèy, a taà cù kàʼày kirə́ʼ ké kimbùvrì kìn, e yèn, a bó fóo yoʼ shoò, e shaà juv wùn, a bó wuy ye sənérí yòʼ dzə̀ fó, bo taà cù tsəʼ wun, e lèm jeéy kishiíy saàmbà.

³² Taà cù kfə́n yií kaʼày yàsí və̀n e kishiíy ke kí meen ji saàmbà, yén, a bó yàsí yoʼ dzə̀sì wún, a bó wuy ye yí baaŋèe yòʼ dzə̀ fó, a bó fóo yoʼ shoò, e shaà juv wùn,

³³ bo á yíi kom kitú kfə́, yii bèy, lóo kom, aá maʼti virə́ʼ ve ví yárí, é taà cù kfən tsə̀ʼ wun vishiíy vímóʼ ví saàmbà.

³⁴ Taà cù yíi kàʼày wun e kishiíy ke kí meen ji saàmbà, yén, a bó yàsí yòʼ dzəsì wún, du e virə̀ʼ vímóʼ ví, a bó wù yoʼ shoò, e shaà juv wùn, bo taà cù yíi toʼór ji wù dzə̀ á là kifàn, wù ku sù a ndzə̀y sə́, a dzə e ránén.

³⁵ Yii bèy, a yàsí kimbùvrì və̀n dzə̀sì, e dù e virə̀ʼ vímóʼ ví, aá kì *kfə̀mrí ne wun,

³⁶ bo taà cù yíi kàʼày ŋgaàŋ, yén, a yàsí dzə́sí, bo taà cù yòʼ kfə̀n leey wuy ye yí baaŋè, bo ŋgaàŋ kù sí kér kifàn.

³⁷ Yii bèy, a taà cù yèn ji bó yàsí və̀n yoʼ kfə̀n dzə̀sì, e kfə̀n yèn a wuy ye sənérí kfə́n ne fəə̀ fó, bo yàsí bònén ne, wù rán. Bo taà cù kù‑úù tóʼór ji wù ràn á ne, a dzə a là kifàn.

³⁸ «A lùmèn kìn wiíy lò, a ker vishim e wùn, a ví fəə́si,

³⁹ bo taà cù yíi kàʼày ŋgaàŋ, yén, a vishim vee shooy vi fəə́si fo tèr, bo dzə̀ kinsaàsì mo kí fəən é wùn wó, a ŋgaàŋ dzə̀ là kifàn.

⁴⁰ «Ké wìr wo nə́ŋ si keesin fó kitu, kí feésí, ŋgaàŋ dzə̀ e ránén là kifàn.

⁴¹ Sí keésí fó fum, bo fóo feèsí feesín, a wù kù dzə̀ e ránén.

⁴² Yii bèy, a kitú ki lò, e feèsí, kìn feèsí fúm, kifá ki buvri fó, a baàŋè baàŋèn, bo dzə̀ yàsí woó jùv wùn wo wù fəən é kitu.

⁴³ Taà cù kù kaʼày wun, yén, a fóo gvə́m, e kfə̀n a bàŋ, a fəəsí réŋréŋ mo yàsí woó jùv wùn yii yénsinè,

⁴⁴ bo wù sí kér yàsí woó jùv wùn wo bi, a dzə̀ kifàn, a bó wù yoʼ ràn. Taà cù kér fó toʼór ji wù kér a kifàn bìʼ yàsí wo wù dzəə̀n e wun kitu.

⁴⁵ «Wìr wo wù kér yàsí woó jùv wùn kér fó a màʼ a dzə̀ vinsàʼ ve ndzə̀y, a lèm kitú là saa, e kfə̀n sùm shuu, a jàŋ jii, ŋgaà kifàn, ŋgaà kifàn.

⁴⁶ Wù kù wíy a dzə ji ŋgaà kifàn, e meé mo yàsí woo shooy wíy mày fo wùn wó. Kù sì ŋgaà kifàn, a wù wíy fəə kibeey, e dù, a dzə jeéy wùn mòʼón.

Nsər yee kùm mfə̀m

⁴⁷ «A mfə̀m sí kòʼ é ndzə̀y, kìn dzə̀ ndzə̀y see làv wùy se bvəy, kìn see làv wo kpuún,

⁴⁸ kìn sí kòʼ é kifa kee làv wo kpuún, kìn kee làv wo á teen teén, kìn sí kòʼ é làv wo wù wáv wavín, kìn e wo wù sə́y səyín, kìn sí kòʼ a dzə̀ é jùv, kìn é kifa kee fèr e jùv,

⁴⁹ kí wáa dzə ji mfə̀m sí səə́ne səə̀nén, kìn ji sí baaŋè baàŋèn, bo dzə̀ ji ntèmntém. Á kù kér fó dìn e taà cù, a fə̀m dzə̀ ndzə̀y, a fə̀m dzə̀ júv.

⁵⁰ Taà cù yíi kàʼày mfə̀m sin, e tsə̀ʼ kifá ke sí koʼon shó, e lèm jeéy kishiíy saàmbà.

⁵¹ Lóo dzə e kishiíy kee saàmbà, é wù kaʼay. A yàsi mfə̀m və̀n dzə̀sì e ndzə̀y, kìn é làv, a fə̀m dzə̀ vəné, kìn é jùv, kìn é kifa kee júv, bo sì mfə̀m sé ntèmntém sí, a dzə̀ *kifàn.

⁵² Bo taà cù sí yìi tòn kifá kee shooy, kìn dzə̀ ndzə̀y see làv woo vəné, kìn kee jùv rəné, bo kù dzə̀ mfə̀m se biibí sí, a dzə̀ á kù tòn tònèn.

⁵³ «Yii bèy, a taà cù lòo kàʼày, e yèn, a bó sí yoʼ dzə̀sì e ndzə̀y se á fèrìn, kìn dzə̀ e làv vəné, kìn dzə̀ é kifa kee jùv kee ka,

⁵⁴ bo taà cù yíi yòŋ, aá su kifá kee shooy, e tsə̀ʼ, e lèm jeéy fó vishiíy vímóʼ ví saàmbà.

⁵⁵ Á su kifá kee shooy, é taà cù kfən kàʼày. A wù yèn, a bó kirə́ʼ kee shooy ki yoʼ kùvsín nshòm mo á suùn, fə̀m mo kí yoʼ dzə̀sì, aá ku tòn tònèn é və̀y. Kù dzə̀ ntèmntém wo wù kù yíi a dzə̀sì, a kùʼ kùʼùn, kìn dzə̀ é mvə̀m kifa, kìn fó ndzə.

⁵⁶ Yii bèy, a taà cù lòo kàʼày, e yèn a mfə̀m sí fárkír ne, mo á suùn, bo wù tiíne kirə́ʼ ke kí shìmèn é ndzə̀y, kìn é jùv.

⁵⁷ Wáa dzə ji sí kfə̀n sìíy, e kòʼ é ndzə̀y, e kòʼ é làv wo wavín, kìn wo səyín, kìn ji sí kfə̀n sìíy, e kòʼ é kifa ke jùv ki, bo sì mfə̀m sé ntèmntém, á kù tòn kifá ke ntèmntém kin tónen é və̀y.

⁵⁸ Yii bèy, a kifá ke mfə̀m sí kì dzəə̀n shó, kìn dzə̀ ndzə̀y, kìn dzə̀ júv, á su, sí may fó fo, bo á su fo akàŋ vee abaà, é kí nèn ràn, a dzə là kifàn.

⁵⁹ «Á nsər see kùm mfə̀m sí se sí koʼon é ndzə̀y, kìn dzə̀ see làv wùy se bvəy, kìn dzə̀ seé làv wo kpuún, kìn sí kòʼ a dzə̀ é làv wo wavín, kìn e wo səyín, kìn sí kòʼ a dzə̀ é kifa ke jùv ki. Kù dzə̀ nsər se sí din ji kifá ki sà kér kifàn mo bó kí yòʼ kérí a.»