Cù 10 - ŊWÀʼ NYÙY

Wón Aarone kpúkír bìʼ jay wov

¹ Wón Aaron vee Nadav wùn Abihùu nèn lò, e lì vikáŋ vév vé kilay, e wày və́y shó, e neèr kiláy é kitu wo, e nèn a kfəmrí e Nyùy Tǎr si. A dzə̀ və́y kisaŋe mo vé‑eè ton bèy, bìʼ fo Nyùy Tàr yòʼ‑oò lo yòŋ ji dzə̀ á yiì bey.

² Nyùy Tàr ku nèn tùm və́y, wú wìy, e tòn áwune, á kpúkír e wun si.

³ Mooser nèn yòŋ e Aaron jii, «Á kinyo ke Nyùy Tàr‑iì suuy e ghan se wù‑uù yòŋèn jii, ‹Fo wìr ve dzə̀ á wàa koʼtí e mǒ ghaŋ, m kù wíy a dìn mo m dzəə̀n jeéy, e ránén, a m wíy a ker ghvə́m e wìr dzə̀m si.› » Aaron yú bey, e kù nèn gòʼ kisə́sə.

⁴ Mooser lò, e jàŋ Mishael wùn Elsafan vee wón Ussiel woo fər tàr à Aaron, e sùúy aáwune jii, «Vèn kóʼtí fó mentsə̀m, e tsə̀ʼ dzə́n sé afə́r vén sí fó kibàn ké Nyùy, e fəə̀ kibeey shó.»

⁵ Á nèn wìy, e lì dzə́n siy mo sí kù‑uù dzəə̀n e ndzə̀y sév sé cù sí wùn, e fəə̀sín kibeey shó, mo Mooser kì suuyin.

⁶ Mooser yòŋ Aaron, e yòŋ sa Eleasar wùn Itamar vee wón Aaron ámóʼó, e sùúy aáwune jii, «Lá vèn yòʼ màʼtì é kitú kén kí fəvri. Lá vèn yòʼ saàsì ndzə̀y sén, fo vèn yiì kpù, é Nyùy Tàr kfən màʼ ŋgeʼ e màŋgòŋ dzə̀m kitu. Yii bèy, a dzə̀ afə́r vén vee kfə́ə Israyi wàa dìy, a rə̀m kfə́ə və̀y wo Nyùy Tàr tumen vən.

⁷ Fo kén kí, lá vèn yòʼ lò fo shùu *kibàn ké ntàsín fo vèn kpú. Vèn dzə̀ ben, a meŋgvə́r me yoʼ me Nyùy Tàr mè sì e věn wùn.» Áwune ku nèn yiì mo Mooser kì suuyin.

Nsər see bìʼ atàá cù

⁸ Nyùy Tàr lò, e yòŋ e Aaron jii,

⁹ «Vèn lóo nəə́ e kibàn ké ntàsín, lá wìr yòʼ nò meluʼ, kìn kifá ke noón ke tavín kímóʼ kí, kìn dzə̀ wò, kìn wón vé, fo wìr kpú. Kù sí wìy a dzə nsər bèy, e wìy dù, e mày e ŋgwàʼ sí ŋgwàʼ si.

¹⁰ Vèn kù kér fó a kiíy jeéyjeéy fó kifa ke dzəə̀n ji ké Nyùy wùn à kee kiy ki, e kfə̀n a kiíy sa jeéyjeéy fó kifa ke kí kér *kifàn, à ke kí yòʼ kér ki.

¹¹ Vèn kù kér fó yeʼéy wír veé Isray adzə̀m nsər se Nyùy Tàr‑iì yòŋèn e vèn, e shaà fo Mooser.»

¹² Mooser yòŋ e Aaron, e yòŋ sa e Eleasar wùn Itamar vee kibér ke wón Aaron ki jii, «Vèn li kifá ke kí berin fó vifa ve yi ve á cuùn Nyùy Tàr shó vìn vi ji cu ye və́yí bin fo fo, e nàŋsín là nyaà, a yi e ghaa kiy cù. Dzə̀ cu yee jeéyí féyì feyì.

¹³ A vèn kù wíy a yi a dzə̀ é kirə̀ʼ kee jeéy kí, bìʼ fo dzəə̀n mbìv ye vèn à wóné kù wíy a ker fo cù Nyùy Tàr ye və́yí bin fo fo. Á mo Nyùy Tàr‑iì yòŋèn e mò ben.

¹⁴ Yii bèy, ké mbìv yee shúu shiliv wo à nanè, à ké kibìy ke à fó ki, kí dzə̀ jii, a dzə̀ vèn yì é kirə̀ʼ kee là kifàn, a fə̀m dzə̀ feé. Kù yí vèn à wón vee vilume, à vee vikìyí, bìʼ fo dzəə̀n mbìv ye vèn áwune adzə̀me kérí fo cù kikòŋnìn wìr veé Isray.

¹⁵ Áwune lóo yiì cu, lóo wìy e fóm si ji á ton ji cu ye və́yí bin fo fo, á kù wìy sa e kibiy ki, e wìy e shúu shiliví ji á nan e Nyùy Tǎr si. Á yéen yee mbìv. Kù sí wìy a dzə vidzə̀ vé vèn à wóné, e wìy dù, e mày mo Nyùy Tàr‑iì yòŋèn.»

¹⁶ Mooser nèn kfə̀n lò ji weè, e dzə̀r bvəy cù ajay, e lò, e yù ji á tòn a ne tónen. Wù nèn a shwiíy kilòŋ wùn à Eleasar, à Itamar vee kibér ke wón Aaron, a suúy jii,

¹⁷ «Kì yiì ka la vèn yòʼ yì nyam cù ajay e mbìv yìmòʼ é ghaa *kibàn ké ntàsín mo kì siìn kifá kee jeéy kí féyì feyì, a Nyùy Tàr fó ne e vèn ji vèn fiʼ lì ajay kintatì, e màn e wun woo Nyùy Tǎr si?

¹⁸ E ké ru kí, mo bó á yoʼ lò lì mensə́ mvə, e dù sho e kibàn é kirə̀ʼ kee fó mvəm, bo vèn kì yíi yi nyam cù rə̀n e ghaa kibàn mo mò‑oò yòŋèn e vèn.»

¹⁹ Aaron nèn sùúy e Mooser jii, «Leéy, lán və̀n, á yiì ne cu ajay, e kfə̀n yiì ye tonèné, yii bèy, m ku ràn wón vém vee abaà. Á bèy, a m kì lóo dzə lán, e yì nyam cù yee biʼ jay rə̀y, bo kí lo ghèén Nyùy Tàr á?»

²⁰ Mooser yú bey, kí gheén wun.