Aysaya 8 - ŊWÀʼ NYÙY

Wan Aysaya woo kisəəm ké kinyò kee kùm Damaskus wùn Samaria

¹ Yì‑iì dzə̀ é kishiíy kímóʼ kí, Nyùy Tàr yòŋ mo woo Aysaya, e sùúy e mò jii, «Leéy kiwaŋ ke kici ke kuʼùn kí, e sàŋ jí sìn si shó bèn, é sí faŋkir. Sáŋ jii, Maher‑Shalal‑Hash‑Bas.»

² Á bèy, m nèn kwàr Uria woo taà cù wùn Sekariya woo wan Jeberekia. Mò‑oò kwàr áwune vee wír jwáʼa, á tiím vinjen vém, bìʼ fiʼtì.

³ Ghán sí lòo koʼtí, yeè lav wom tiím bvəm, e wìy dzə̀ə́ wán lumèn. Nyùy Tàr yòŋ e mò jii, «Shù yír wan və̀ne ji Maher‑Shalal‑Hash‑Bas.»

⁴ Nyùy kfə́n a suúy jii, «Wan və̀n wíy lòo jì ji wun wáa yòŋ kitàr, kìn kiyìy, é fòn woó Assiriya tsə́nsí vé rərí, aá tátí bùʼ woó Damaskus, à woó Samaria, e kù kùúy kuuyín e dzə̀m, e dù sho.»

Fòn woó Assiriya wiyì

⁵ Nyùy Tàr kfən lò, e sùŋnín e mò, e sùúy jii,

⁶ «Wír veé Judàa bìn ne ndzə̀m e mò, a m kù yii kér áwune ji weè, moo ndzə́v yee Shiloa ye yí léŋ bèn ji weè. Á kù sí yú vijuŋ a dzə̀ vé wóov woo ntaŋ kùm Fòn Resin, à Fòn Peka woo wan Remalia.

⁷ Bìʼ kee shooy, á kù lo, e yen kinyo ke mo woo Nyùy Tàr lo, e mùm. M lo, e tsənsí fon woó Assiriya wùn à vé rər vəə́, aá ghíʼ Juda. Á wíy cuùrì, e Juda moo ndzə́v ye wiyí yee Yufret, ye yí rún, fəə́ e meshavtí.

⁸ Á wíy sùm Juda moo ndzə́v ye kuʼùn ye yí rún, sum virə́ʼ, kóʼ, mee e wìr kilòŋ.» Yii bèy, Nyùy dzə̀ vèsən áwune. Wù kù wíy a kìŋsìn wír veé Juda mo shinə́n shí kùʼtí wón é sar vàv.

⁹ Ven vee vitúm, vèn báʼtí, e kù a fàn fànèn. Vèn yuúrí kijuŋ, ven ve á dzəə̀n é vitum veé ndzəywoŋ. Vèn báʼ vifá ve rər ví, a fàn, a yàʼ. Ké ru kí, vèn báʼ vifá ve rər ví, a fàn, a yàʼ.

¹⁰ Vèn suúsín, e bà antaŋ véné, yii bèy, a kí yòʼ yíi lìm. Vèn suúy kinyo ke vèn taʼ suúy ki, yii bèy, a kí yòʼ yíi koóy mo vèn kwaʼtì. Ke kí dzəə̀n kí dzə̀ jii, Nyùy dzə̀ vèr áwune.

Nyùy Tàr tír ŋgaà ntum və

¹¹ Á bèy, Nyùy Tàr wáa suŋnín e mò woo Aysaya, m wáa yu vitaáví və́ e mǒ wùn, kù moo ji wun woo Nyùy kum mo kúmen e kiwó ki. Wù‑uù tír mo, kantì jii, m wáa yen a fó a jùmrì vinyo ve wír vìne yii. Wù‑uù sùúy e mò jii,

¹² «Vèn aàŋgàa ŋgoo véné wáa yen. Wíri lóo yòŋ ji menàŋ menàŋ, lá vèn yòʼ kù nèn biìmé biimén. Áwune lóo fàn kifá, lá vèn yòʼ a fàn, a yiì, é kí wáa bemér ven.

¹³ Vèn kú a yu kén a dzə̀ fo Nyùy Tàr woo Taà Mànjòŋ ji kù mày wun wo wù dzəə̀n e ránén ji Nyùy. Kù mày wun wo dzə̀ vèn wàa fàn, a leéy, é wù wáa beemé ven.

¹⁴ Wù wíy a dzə e věn mvəm ji kikiŋ kén. Yii bèy, wù wíy a dzə sa ji tíy ye wír veé Juda wùn à veé Israyi wíy a bàyrìn sho, a dzə ji kilán ke kí wíy yiì, aá gbukir, e kfə̀n a dzə ji kitám ke wír veé Jerusaleme wíy a gbù sho.

¹⁵ Kùʼùn wìr wíy a bàyrìn, a gbù, é kinyo kév kidzə̀m ki bvəə́rí. Á wíy koʼór kitám, aáwune li shó, aá koórí áwune.»

Aysaya kántí wír fo á wáa mbaà aŋkfə

¹⁶ Á ku bàʼtí ntum ye m fìʼtìn, e bàʼtí yéʼéy yémé, e wày é ŋwàʼ, e wày kifin sho, e lèm aàŋgàa ŋgoo vémé.

¹⁷ M kù yíi a shìy Nyùy Tàr ji wù yii kinyo ke wù‑uù kàʼàn. Wù bìn ne ndzə̀m e rám Jakovi, a m kù yíi a yòy, a tiír a dzə̀ e wun wùn.

¹⁸ Rúrú, mo və̀ne, vèr à wón ve Nyùy Tàr foon e mòó, wun woo Nyùy Tàr woo Taà Mànjòŋ, wo wù shiiy e Gwàn Sion. Wù kù tiir ver ji kisəəm ke kí din kinyo ke wù wíy yiì e Isray.

¹⁹ A tàm é ghanmóʼ wíri yiì a tir ven jii, «Vèn du, e mbaà vé fùú wùn à vé səme.» Á yoŋ bèy, a vé səme dzə̀, aá kù yii lamrì làmrìn moo lèŋ. A tàm á wìy a dzətí e vèn jii, «Kí bìr é gha, fo vèn wáa tàr vinyo a dzə̀ fo anyùy véné? Bó yòʼ dzə̀ wír ve tine wàa tàʼ ntir a dzə̀ fo aŋkfəə a?»

²⁰ Á lóo yòŋ bèy, vèn bìnèr aáwune ji á kú a yuurí a dzə̀ á yéʼéy ye yí dzəə̀n é ŋwàʼ, a yuurí ntum Nyùy Tàr ye yì dzəə̀n shó. A wìr dzə̀, a bó wù yòʼ suuy kinyo ke kí shémsín wùn à kee shooy ki, bo yì wíy sən wun, e làŋsìn.

²¹ Wíri kù wíy a jan, a tosín kitúm, aá sì ŋgeʼ ŋgeʼ, a jìŋ sí kóm vitó fo áwune kómén. Jìŋ gháʼá, é dòʼshwiíy wo ghaʼán keʼ, a kiv áwune, aá wáa jàʼ fon wov, a bìnkìr, a jàʼ Nyùy wov.

²² Áwune leey ke kí kooy áwune é nsay fèn, aá ku yèn, a bér ŋgeʼ wùn à ndzə ye sənér, a yì sə́n ji cùm, beéme. Á bèy, aá kù wíy màʼ áwune é mvə̀m ndzə, a yì sə́n, e làŋsìn.