Aysaya 6 - ŊWÀʼ NYÙY

Nyùy lí Aysaya ji ŋgaà ntum və

¹ Yì‑iì dzə̀ é kiya ke Ussiya woo fon woó Juda‑aà làyìn, mo woo Aysaya yén Nyùy Tàr é lav cù, a wù dzə́ e kàvàʼ, a kàvàʼ tíy e kirə̀ʼ kee fó kùy, fo yuúyuv. Nyùy dzə́ʼə́m, shúu ndzə̀y vəə́ sáŋrí wún, e sə̀tí nsaàlav cù.

² Vifá veé yuv vímóʼ ví‑iì dzə́ e wun ghaŋ, njaʼkìr mo shwí və́y. Ví‑iì dzə̀ vidzə̀m, a ví kér vav si ntuùfú ntuùfú. Kee shó ki‑iì li yee baà, téʼ sí sho, li yee baà yímóʼó, sə́ti wuú shó, nèn féŋ e yee bàá.

³ Ví‑iì jaŋnìnè, a kímóʼ kí suuy e kímóʼ kí jii, «Nyùy Tàr woo Taà Mànjòŋ dzə̀ e ránén, wù dzə̀ e ránén, wù dzə̀ e ránén. Vikuʼùy və́ ví rùn kitú ke nsay kidzə̀m.»

⁴ Vifá veé yuv vin vi‑iì lóo jàŋnìn, jì yev wàa sə̀ʼ kinsə̀ŋ ke lav cù wùn à shuu si, kindzə́ʼ ki wàa sətí lav cù.

⁵ Á bèy, m nèn sùúy jii, «Lòné gbù ne e mǒ kitu. Ké ru kí, kém kí kù mày ne bèy. M shòv ne Fon e si, wun woo Nyùy Tàr woo Taà Mànjòŋ, a m dzə̀ kém wír wo kù fəə́ kinyo ke bi kí fó shuù wo, a m kù dzə́ a dzə̀ vèr à wír ve fəə́ kinyo ke bi kí fo áwuné shuù.»

⁶ Kee kimòʼón kee kifá keé yuv kí nèn fèŋ, e sə̀y fo mò‑oò dzə́. Kí wáa səy, a kí fár káy və̀y wo kí kì fəərin fó kiy cù e kimfar, a wú dzəə́ gheʼè.

⁷ Kí sə́ʼə́y, e kùm shuu wóm e káy və̀y və́yi, e yòŋ e mò jii, «Yuúrí kijuŋ. Mo káy və̀y wo wú loòn fó kiy cù və̀ne kùmèn ntù shuù yè, bo Nyùy Tàr sù ne njò yè, a wù kù màn ne vinyo vé ve bi ví.»

⁸ M yú jí Nyùy Tàr, a yì súŋnin, gháy jii, «Mo‑óò túm la? Yí‑íì li la kirə́ʼ kér, e lò ntum rə̀n?» M nèn bìnèr jii, «M dzə̀ kibáʼtín, túm ri mo.»

⁹ Nyùy Tàr nèn sùúy ji m du, e yòŋ a e wír veé Israyi jii: «Vèn kú a yuurí yuurín, yii bèy, vèn yòʼ ló a yu. Vèn wáa leéy leeyín, yii bèy, vèn yòʼ ló a yen.»

¹⁰ Nyùy Tàr kfən sùúy e mò jii, «Ku yiì, é melív me wìr vìn mè lur, e sə̀mrì vituʼùr vév ví, e sə̀tí sí yéví, fo sí yéví wáa yen virə́ʼ, é vituʼùr vév ví wáa yu, é melív mev mè wáa səə̀m kinyo, aá binkir, é m fer áwune.»

¹¹ M nen dzə̀r e Nyùy Tàr jii, «Nyùy Tàr, kí wíy koóy bèy, e dù, e meé e le?» Nyùy Tàr bínér e mò jii: «Kí kù wíy a dzə bèy, e meé mo ŋkà se laʼ seé Isray si wíy dù e vifə̀m, a tiynín kisáŋ, a wìr yòʼ dzəə́ kum fo, e meé mo lav sév sí wíy kwiíy, a wìr yòʼ dzəə́ shiiy sho, a nsay sí tíy kisáŋ ji ŋkfə̀ŋkìkì.

¹² Kí kù wíy a dzə bèy, e dù, e meé mo m wíy fəə́r wír veé Isray fo áwuné nsay, e fəə́r bèn, e tsənsí, aá du, a dzə kwaʼda, é yéev yee nsay siíy, e gòʼ, a tiy e vifə̀m.

¹³ A wíri fə̀m bèr é Isray e shitàmèn, bo m kù yíi a laàr kitúm kév láarin, a dù fo mbìy. Yii bèy, m laarì, é bo ŋgwàʼ ye fíy keʼ, a kuy, ŋgwàʼ ye m shoʼon fo wír veé Israyí mvəm, e bùʼ ji yéem, réŋréŋ mo á gwar kicí ké *terebint, kìn kee *oak, kí kfə̀n tòkír, a kuy.»