Aysaya 57 - ŊWÀʼ NYÙY

¹ Wír ve á yúnin Nyùyi lo, á sàsìn, e gbù, e kpù, la wìr yòʼ a ghay ji sà kooy ka bén a? Kpúu lo, yí tàyrí wír vee jwáʼ, e wày é sày, yii bèy, a wìr yòʼ gwarìr kinyo ke kí kooyin. Kí lo, kí kòóy bey, bìʼ fo Nyùy lo, wù tsə̀ʼ wír ve á yú wun, e kù tsə̀ʼ bèy, e fíʼ kìŋsìn áwune fó viròm veé nsay fèn.

² Wù tsəʼ áwune fó kitu ke nsay, wù fò áwune nyaáŋ. Wír ve á ghán e Nyùy mbòv é nsay fène kpúkir, á dù a dzə̀ é kirə̀ʼ ké meèmè.

Nyùy Tàr nyaysì Isray a dzə̀ bìʼ anyùy ve á cu

³ «Yii bèy, ven vee wón aŋgàa səm, ven vee rám vé kinjàŋ wùn aàsàkìi, vèn kóʼtí fen, e yuùrí kinyo ke m yoŋ ki.

⁴ Vèn kwaʼ ji vèn shéʼ a dzə̀ la? Vèn té lám, nan shuu, dúŋer a dzə̀ e la? Vèn dzə̀ aŋgàa yìi vinyò ve bi ví, a dzə̀ rám vé kimboʼtìi.

⁵ Vèn lóo cù anyùy vén é sar kici ké *terebint, á wàa yiì jooně kineŋ fo, e kù a yiì bèy, sár se vici sidzə̀m. Vèn lo, á kfə̀n lì wón vén, e sə̀y shó e kiwoóy, e seèrí e sar se koŋ ji cu.

⁶ Vèn lì ne ji vèn wáa cù tíy se lerìsìn seé sar se koŋ ji anyùy vén. Vèn sər meluʼ e nsay ji vèn cu anyùy vìn sho, li vifá ve yi, cu áwune shó. Vèn kwaʼ ji m shéʼri kinyo ke vèn mumè à?

⁷ Vèn sàŋrì ne vikún vé joònè é vitu ve virùmèn, fo vèn du ji á du, a cù anyùy.

⁸ Vèn sàŋ visəəm vé mebvə̀m men e věn bǎm shuù se lav, e sàŋ e věn mboòmè se shùu lav. Vèn ŋwày mo woo Nyùy, a kìʼ a dzə̀ anyùy, réŋréŋ moo sàkì wo wù naŋsin ne kikún, a shìy vilum. Ké ru kí, Isray, à kòʼ ne e kikun ké visàkì, a kwàr anyùy. Woo shó bvə́yí, vèn wun kàvnín, wù làʼ wò, e shìíy e wò, vèn wun nyòmèr wún.

⁹ Vèn‑eè du, cu nyùy woo *Molek, lóo dù, á lì meŋgvə́r me *oliv, e lì kfəə́ se virə̀ʼtìn ve bìʼ sinín, e dù, a cù sho. Vèn‑eè taʼ anyùy, tsə́nsi vé ntume, aá du e ndzəywoŋ, tsə́nsi, aá du aàŋkfəə́ wòŋ.

¹⁰ Vèn‑eè ghàn ntàmda, e dòrkír, a làv làvìn, yii bèy, bó vèn yòʼ‑oò ló a suúy ji vèn dzə́n a dzə̀ á kintóʼ ke nshùm. Vèn‑eè lò kén, e kòóy a dzə̀ vitaáví, a fiyír vitú vén, e làa yòʼ dor fo kinyò.»

¹¹ Nyùy Tàr kú a dzər jii, «Anyùy ve vé‑eè bemerin ven, é bo vèn bóʼtí kimboʼtì vèsən, e làysìn mo ŋkuuŋkùŋe dzə̀ viné? Vèn tèn fó a ghvəm mo, bìʼ fo m kfəmen, e dzə̀ʼə̀m kisə́sə ntàmda à?

¹² Bo mo‑óò lo lèn, e sùŋnín, e naàrì vinyo ve vèn yoŋ ji ve réŋ ví, e sàr yii yén. Yii bèy, a bó ví yòʼ yíi sə ven mo vèn kwaʼtì.

¹³ Ŋgeʼ si yií nəə ven, vèn tòŋ, áànyùy véné sə́ ven. Kinyè kí dzə̀ ka áànyùyi? Dzə̀ vifá, a shwéri lo, e feér feerín. Vifá, aá feèsí feesín, kiyoy ki nèn kù tsə̀ʼ, e dù sho. Yii bèy, wìr wo wù lir e mǒ wùn kù wíy dzə̀ʼə̀m e wòŋ, e koŋrí. Áwune kù wíy a wàʼrì, a cù mo e mǒ gwan wo ranén.»

Nyùy káʼ ji wun wíy sə wír və́, e fèr kitú kév ke tavín kí

¹⁴ Á wíy yòŋ jii, «Vèn túŋ dzə́ə, e nàŋsín, e rùnér. Vèn tsəʼ kifá kidzə̀m ke kí jívir fo wír Nyùyi wáa kfən e bàm.»

¹⁵ Wun woo Taà Vitu, wo viwìr və́ ví yòʼ kér mfìʼ, a wù kù dzə̀ shó ghán sidzə̀m, e dù, e jòʼsì, a yír rəə́ dzə̀ Ŋgaà wo Ranén, wù suuy jii, «M kù yii dzə́ kém é ntoò yùv, e mǒ kirə̀ʼ ke ranén kí, a m kfə̀n dzə́ sa vèr à wír ve á diy bìʼ ajay vév, néŋ e mǒ sii. M yiì bèy ji áwune fíʼ a ker fo á tiir vifií.

¹⁶ M yòʼ wíy gòʼ, e kù a roòmè wír vém, e dù, e jòʼsì, a m yòʼ wíy gòʼ, e kù a shwiíy kilòŋ vèr áwune. Kù yii mo, é bo wíri wáa dzə sho atin, a kù fó mo dzəʼə̀m e wíri.

¹⁷ Mò‑oò shwiiy kilòŋ vèr áwune, a dzə̀ bìʼ kiŋkùvrì ke áwune‑eè kérí. Á nsàv kilòŋ ke mò‑oò shwiiyin, e bóo màʼ ŋgeʼ aáwuné kitu. Yii bèy, áwune ku shaà fo mbìy, a tav kitú, a jùmrì a dzə̀ kinyo ke melív mev mè tíy sho.

¹⁸ M kì liì kisaŋ wov e dzə̀m, yii bèy, m yíi fèr áwune, aá kfə́n é bàm e mǒ wùn. M wíy a dànèr áwune ji weè weè, a rəə̀r melív mev, é wír ve á diyìi kfə́n a sheʼrí, a burí mo.

¹⁹ M wíy fo nyaáŋ e wìr dzə̀m, à vee kwaʼdáa, à vee fó mentsə̀mé. Rúrú, m wíy fèr áwune.» Kù suuy wun woo Nyùy Tàr.

²⁰ Yii bèy, wír ve á méŋ Nyùyi yòʼ dzə̀ á wìy a ker meemè, réŋréŋ moo rìbà ndzə̀v wo wù kù yii binkìr bìnkìn, tsə́yninè, lóo tsəynín, wù wàa fəə́r kishaʼàr wùn à ŋaʼrì sí é meshavtí.

²¹ Kù dzə̀ kíwun ke Nyùy wom suuy jii, «Feyì feyì, bó yòʼ dzə̀ wír ve á méŋ Nyùyi wàa ker nyaáŋ.»