Aysaya 49 - ŊWÀʼ NYÙY

Ŋgaà lìm Nyùy Tàr wo dzəə̀n Isray dzə̀ rán vitum

¹ Ven vee vitúm veé ndzəywoŋ, vèn yuúrí. Ven ve vèn dzə́ e virə̀ʼ vee kwaʼda, vèn bónén, e yuùrí kijuŋ. Bo á wáa dzəə́ mo, a Nyùy Tàr‑iì shòʼ ne mo, e yòŋ mo ji wír və lìm, a m dzə̀ə́ e yè wór bvə̀m.

² Wù yiì ne, shuu wómé wáa njim e kisuŋnìn moo nyùy rə̀r. Wù kiŋsìn mo, kù mo wìr wày kifá e bàr, a sətí e kiwó ki, fo kifá ki tó shó. Wù yiì ne, m wáa dzə moo mvən ye wù sayin, e lèm e wun ŋkòʼ.

³ Á bèy, Nyùy Tàr yòŋ e mò jii, «Wò, wo à dzəə̀n ji Isray, à dzə̀ wír wom lìm. Wíri wíy a ghvəm mo, bìʼ wò.»

⁴ Yii bèy, m bìnèr kém jii, «M yiì ne lim ye Nyùy Tàr wayin e mǒ kiwo, a bó noshìndzə̀v yòʼ dzə̀ shó. M bvə̀ʼtí ne wún é lìm fèn, e bvə̀ʼtí bèy, a bó séʼ yòʼ dzə̀. Yii bèy, suuyrú dzə̀ jii, Nyùy Tàr kù wíy a kìŋsìn ghay wóm. Wun woo Nyùy wom kù wíy laamé mo fó lìm ye m lìmèn.»

⁵ Nyùy Tàr‑iì shàv ne mo, e bàʼtí ji wír və lìm, é bo yè wor wìy a dzəə́ mo. Wù‑uù shòʼ mo ji m báʼtí á rám Jakov, aá kfə́n fo wun wùn, e shòʼ ji m li wír veé Isray, aá bánén, e wìy, e yèn wun. Bùʼ wun mo, a kù távir wun mo. Wun woo Nyùy Tàr wáa suúy e mò jii,

⁶ «Bó yòʼ dzə̀ à kù jòʼsì cáʼ ji wír wom lìm. Yòʼ dzə̀ cáʼ ji à ku lì rám Jakov, é yí wiy fo mǒ wùn. Yòʼ dzə̀ cáʼ ji à wiy e kibér ke wìr keé Isray ke kí bòyìn kí. Dzə̀ sá ji m yíi nàn wò ji kikaʼày fo wír ve bó yòʼ dzəə̀n veé Israyi, áà yii, é wìr msòŋ woó kitu ke nsay dzə̀m fiʼ lùŋ.»

⁷ Nyùy Tàr dzə̀ Mfə̀ə́r wìr veé Isray, a dzə̀ wun Ŋgaà wo Ranén wo áwune ghvə́mé. Wù yoŋ ŋgaà wo vitúm vi nyaysì nyàysìn, wun wo wù‑uù foon kitú kfə́, a lìm fo atǎr saʼa. Wù yoŋ wun, suuy sho jii, «Afone wíy yen wò, e ŋaʼáy fo akàvàʼ, a ghvəm wò, áàtǎr wòŋe wáa gvəʼtí e wò si. Á wíy a yiì bèy, bìʼ Nyùy Tàr, wun woo Ŋgaà wo Ranén woó Isray. Wù yoŋ kinyo, bo wù yii a dzə̀ kíwun, a shòʼ wun wò.»

Á siír Jerusalem fo

⁸ Nyùy Tàr kfə́n a suúy e wìr və lìm jii, «Mò‑oò ji ji m wáa sə wíri, a m kì yù ne tóŋ yé, e shàm wò. Mò‑oò lóo lùŋèr wíri, e nèn kù sə̀ wò. M lèm ne wò ji kilaa ke *mensàŋ me vèr à wíri, aà wíy siìr wíri aáwuné nsay, é wíri kfə́n é nsay ye yì‑iì dzəə̀n yéev féyì feyì, é bo yì kfə́n é vifə̀m.

⁹ À wíy suúy e wír ve á dzəə̀n é sháŋé ji á fəə́, e suúy e ve á dzəə̀n é mesənérí ji á fəə́ á fo meranén. Áwune wíy fəə, a dzə moo njiì wo á tósin wóʼ shó, a vifá ve yi vi ján janén é ghaa dzəə, tsəətìn tsəə̀tìn áàgwan ve vé‑eè sí tíy kisáŋ.

¹⁰ Jìŋ yòʼ dzəə́ wìy a yar áwune, a bó kilòŋ kí yòʼ dzəə́ wìy a yum áwune. Shwér wo lumèné yòʼ dzəə́ wìy a feè áwune, a bó shùy yòʼ dzəə́ wìy a tòn áwune. Kí dzə̀ jii, mo woo Nyùy Tàr wo m shám áwune, m wíy a dànèr áwune é dzəə ye juŋ, a dù sho fo ntòŋ sé ndzəv se dzə̀ á wàa no si dzə̀kìn.

¹¹ «M wíy bìnèr agwan vém, aá kfə́n é leŋ, é dzəə̀ wáa shaà fo, dzə́ə, aá túŋ, e yàvír, yì kfə́n e fur.

¹² Rúrú, wír vém ve á dzə̀kìn é vitum vee kwaʼdáa wíy kfən e bàm. Ámóʼó wíy kfən fo vitum ve ví dzəə̀n Juda fo kùy, aámóʼó wáa kfən fo mbìv yee fo shùy yii nəə. Ámóʼó wíy a kfən fo Aswan, fo mbìv yee tsə́n.»

¹³ Éè yùv, á yòv bìʼ vijuŋ ve à yú. Éè kitu ke nsay, á sàvnìn. Agwane wáa yòv lúŋ nsiì kitávín, a sheʼrí. Vèn wáa yòv, bìʼ fo Nyùy Tàr shamen ne wír və́, a wù kù wíy a rər mendzən me wìr və́ ve vé‑eè yén ŋgeʼ.

¹⁴ Yii bèy, wír veé Sione kú a suúy kév jii, «Nyùy Tàr màʼày ne ver. Wù làysìn ne ver ŋkuuŋkùŋ.»

¹⁵ Nyùy Tàr nén a bìnèr kfə́, a suúy jii, «A dzə̀ yeè wàn làysìn wán wo wù nyoorì a? A dzə̀ wù nèn tèn rú fó rər mendzən me wàn woo vitó və́ á? Rúrú, a dzə̀ vikìy ámóʼó làysìn wón vév, yii bèy, éè wìr veé Isray, bó yòʼ dzə̀ féyì m wìy làysìn ven.

¹⁶ Vèn leéy, e yèn, m sàŋ ne yír Sion e mǒ mbvə̀ʼ kiwo, a m kù yíi a kuumé virə́ʼ veé Jerusalem ve á kètìn, ví wáa neŋ e nsay.

¹⁷ Wón véné sí lo, a kfən e bàm, a wír ve vé‑eè kètìn ŋkàlaʼ yené lo, e màʼtì ven, a nyeŋkír.

¹⁸ Vèn nan síi, e lèéy virə́ʼ ví, é vèn yén mo wón véné baʼtin ne, a kfən fo laʼ. Mo woo Nyùy Tàr suuy jii, mo m dzəə̀n shó, ŋkàlaʼ rə̀n wíy a yu vijuŋ ve won ve á kfənen, kù moo jín, wo wù wayrin vifá ve sùsù e wùn, a sheʼrí.

¹⁹ «Rúrú, fə̀m mo á sàʼtìn ne ŋkàlaʼ yen, a kfə̀ʼ kifa feyì yoʼ bèr fó, ké lèn ki, yì sí lo, a dornín fo wír ve á lo, e wìy, a dzə foo, é wír ve á laàrìn vené nyéŋkír, e dùkìr kwaʼda.

²⁰ Wón ve vèn‑eè dzəən é kwaʼ nsàmé wíy lò, e suúy e vèn jii, ‹Nsay rə̀n dòr fo vèr, vèr taʼ kirə́ʼ ke kuʼùn ké a dzə sho.›

²¹ Á bèy, é wìr mòʼón mòʼón wáa rə̀m bvəm bvəm jii, ‹Kù yòʼ‑oò lo dzə̀ə́ ver wón vin a? Ver, a wóné‑eè kpùkír ne, vèr ku gòʼ, a dìy a dzə̀ kpú. Vèr‑iì dzə̀ é kwaʼ nsàm moo vé sháŋé. Vèr kù‑uù sí dzə́ fo moo wír ve á màʼàyìn ne. Wón víne dzə̀ lèn bèn, a yì‑iì lìy la, é bo á kúykír? Áwune lòkìr a dzə̀ fó feé?› »

²² Nyùy Tàr woo Taà Ndzə suuy e wír vəə́ jii, «Vèn yuúrí, m wíy kwàr vitúm, e nàn cícíwàr wóm, é vitúm vi yén. Yéné, aá kóytí wón vén vee vilum e koy, e jàjàŋ vee vikìy, a kfən sho fo laʼ.

²³ Afone wíy a lìy wón vén, é vikǐy ntoʼ véví wáa nyoór. Á wíy a gvəʼtí, a tsəm sí fo nsay e věn si, a la kibvər fo věn wuù. Á bèy, é vèn nèn kìíy ji m dzə̀ á Nyùy Tàr, a wír ve á yoy, tiir e mǒ wùné yòʼ wíy woomé.»

²⁴ A vé rər vee antavi tòn kitúm, e faàsì vifá vév, a dzə̀ wìr sə̀ á? A vé rərí koò wíri é kwaʼ rər, a nyàvrì sho, a dzə̀ wìr faàsì wír vee shooy a?

²⁵ Yii bèy, Nyùy Tàr bìnèr jii, «Rúrú, a fə̀m dzə̀ wír ve á koorin é kwaʼ rər, bo á kù wíy faàsì, aá wíy sə vifá ve vé rərí tònèn kitúm, e faàsì fo áwune. A dzə̀ jii, m wíy tam vèr à wír ve á sə́ kóy vèn áwuneé, e bòyìr wón vén.

²⁶ M kér fó wìy yiì, é wír ve á nəʼsì vené kfə́r jáv yev wùn, e yiì, aá nó mensə́ mev, a tùŋkìr mo á nò a dzə̀ meluʼ. Á bèy, é wìr msòŋ e dzə̀m nèn kìíy ji mo woo Nyùy Tàr dzə̀ á Ŋgaà Lùŋèr won, mo woo Ŋgaà wo Ghaʼán wo Jakov ghvə́mé, a kù boyìr wun ven.»