Aysaya 44 - ŊWÀʼ NYÙY

Nyùy Tàr kù mày wun Nyùy

¹ Nyùy Tàr suuy jii: «Ké lèn ki, ven vee rám Jakov vee vé lìm vém, vèn yuúrí kijuŋ. Ven vee wír veé Isray, wír feyì ve mò‑oò shavin, vèn yuúrí kijuŋ.

² Dzə̀ mo Nyùy Tàr wo wù‑uù bomen ven, é bo vèn wáa dzə e bvə̀m, kù‑uù lèm mo ven fó, a m kù wíy a sə ven. Ven vee rám Jakov vee vé lìm vém, lá vèn yòʼ a fàn. Jeshurun, ven vee wír ve mò‑oò shoʼon, lá vèn yòʼ a fàn.

³ Kí dzə̀ jii, m wíy səə̀vì nsay ye yì yúm ji káv, e fəə́r ndzə́v, é yí wáa leŋ e nsay ye yì yumen ne, e mày. M wíy səə̀vì rám yén, e fo Kiyoy kém aáwune, é kiŋgoòy kén kí wáa yu vijuŋ ve kisəə̀vì kém.

⁴ Áwune wíy a rə̀sìn e nsay fo áwune dzə́ moo viŋgà ve ví yú mendzə́v, a dzə moo kicí ke kí kúy e ghaa ndzəv.

⁵ Vitúm vi wíy lò, é wìr nèn a binsí jii, ‹M dzə̀ wo Nyùy Tàr.› Wùmòʼ woo wír wíy a tasín jii, ‹M dzə̀ rám Jakov›, é wùmòʼ wáa saŋ e koy jii, ‹M dzə̀ wir Nyùy Tàr›, e nèn a yòŋ kitú kfə́ ji wír woó Isray.»

⁶ Nyùy Tàr woo Taà Mànjòŋ, wun woo Fon wìr veé Isray, woo Mfə̀ə́r wov suuy jii, «Dzə̀ mo keʼ, a kù dzə̀ mo kinjòʼsì, kù mày mo wo dzəə̀n Nyùy.

⁷ Dzə̀ la wo wù dzəə̀n moo mo? A ŋgaàŋ dzə̀, wù naàrì kiránén. Naarì, é wù din e mò ji á mo kí waà dzəə̀n. Wù ku naàrì vinyo mo mò‑oò yii, e kèʼ fo yàŋgùʼ wo mò‑oò gwàrìn kitúm kìn. Wù ku naàrì rì vinyo ve ví dzəə́ wìy a koóy.

⁸ Wìr vem, lá vèn yòʼ a fàn. Mò‑oò sùúy ne e vèn, e kèʼ fo kèʼ, vinyo vidzə̀m ve ví kù kér fó wìy a koóy, a vèn dzə̀ anjen vém. Á bèy, vèn naari e kibér ke wìr ki. Nyùy wùmòʼ kfə̀n dzə̀ shó, e shaà mo á? Nyùy wùmòʼ kfə̀n dzə̀ shó wo wù kiŋsìn ven, a bó dzə̀ mo á?»

Nyùy Tàr shéʼ wír ve á ghvə́m mebvə̀m

⁹ Wír ve á fer mebvə̀m adzə̀me dzə̀ viyúŋ, a bó kinyè kí yòʼ dzə̀ aáwune. Mebvə̀m me áwune yú vijuŋ sho mè yòʼ dzə̀ mè sə̀ wír gheéy. Wír ve á cu mebvə̀me dzə̀ amfìr, aá yòʼ kì fo kí binè. Áwune kù wíy a yiì kinyo a dzə̀ kée shoór kitú sho.

¹⁰ Tén dzə̀ kiyúŋ, bo dzə̀ la wo dzə̀ wù fèr shibvə̀m ji nyùy, a bó yòʼ dzə̀ shí sə̀ wun.

¹¹ Rúrú, á kù wíy shoór wír ve á ghvə́m mebvə̀m adzə̀m, aá wáa woomé, a wír ve á fer vifá vìn adzə̀me kù wíy a woomé, bìʼ fo áwune kù dzəə̀n kév wír fo wìr. Áwune suúsín, e bàʼtí e lav nsaʼ, e tùnér kitú kév. Yii bèy, áwune kù wíy a fàn, a yàʼ yàʼàn adzə̀m, aá kù wíy shoór áwune, aá wáa woomé.

¹² Taà kilàm lo, wù wày kisha e kiy kilàm, e sə̀tì. Wù sətì, wù nèn fèr shibvə̀m sho e mbom ye wù koŋè, a lì kisha, a dzə̀vtì sho vitaáví vitaáví. Jìŋ lóo yar, vitaáví vé lìm vi nèn a buú, mendzə́v mée no mè lóo buú, síi nèn a səəné.

¹³ Wìr wo wù kóm vifá lo, wù lì kfəə̀, e fìʼ mo wù taʼ é shibvə̀m shi wáa dzə. Wù fiʼì, wù nèn lì kicí ké saŋ, e sə̀ŋ nsə̀ŋ mo mbom shibvə̀m yíi a dzə, e sèm, e fə̀ə́r mbom shibvə̀m, e səə̀m virə́ʼ ve wù dzəə́ yiì a nàvtì. Wù maysì, ferì, shí wàa shwinín wír, a wù yii bèy, e dù, e tiír a dzə̀ é kirə̀ʼ ké anyùy.

¹⁴ Ŋgaà fèr yee kicí kí lo, wù bàʼtì vicí vé *sidar, e fèr mebvə̀m fo fo. Lo yímóʼó, wù tày kfə́ə vici vé dzəʼə̀y vímóʼ ví, kìn vee oak fo mvə̀m kòv. Lo yímóʼó, wù bìy vímóʼ ví, e màʼtì, wuú wàa lo sho, ví wàa kuy.

¹⁵ Wù baʼ kicí, wù shètì mbìv yìmòʼ ji meŋkaʼ, a tòn, a yor, wúné wàa lùm, li memoʼ mè, wù tòn və́y shó, e fèr vifá ve yi sho. Wù kfə́n li mbìv kicì kee shooy yìmòʼ, wù fèr shibvə̀m sho ji nyùy və, a ghvəm. Shibvə̀m, a wù fér ji nyùy və, lo, wù wàa gbù e si wo, a ghvəm.

¹⁶ Rúrú, wù li kintsə̀m ké kici ji meŋkaʼ, wù wàa tòn nyám sho, a kfər, e kfə̀n a fèr vifá ve yi sho. Yí, bvə́me kúrí, wù wàa yu vijuŋ. Wù ton və́y, lóo yor, wúné lóo lùm, wù wàa binsí jii, «M biìmé və́y vən, yú ben mo m yorin, a koo.»

¹⁷ Wù maysì kintsə̀m ké kici kiy, wù sèm shibvə̀m sho ji nyùy. Wù lo, wù wàa tsəm e si wo, a ghvəm, a ka jii, «Ku bòyìr mo, bìʼ fo à dzəə̀n nyùy wom.»

¹⁸ Wír ve á fer mebvə̀me yòʼ kér vifií gheéy shishàr bó a dor. Sí yéví sə̀tí ne, a bó á yòʼ dzəə́ yén virə́ʼ, vifií vév ví bvəə́rí, a bó á yòʼ dzəə́ kiiy jeéyjeey kinyò.

¹⁹ Wìr fo áwune wo wù tar vinyo réŋ yòʼ kfə̀n dzə̀. Wìr fo áwune yòʼ kfə̀n kér vifií vé a ghay jii, «Mò‑oò li mbìv kicì yìmòʼ ji shiŋkaʼ, ton kibán ke tonèn kí é kay, ton nyám, kfə́rí, fer vifá ve yi, yí. A dzə̀ m kfə̀n lì kibér ke kici, e fèr kifá ke Nyùy ban sho e le? A dzə̀ m kfə̀n tsə̀m, a ghvəm kicí fó kici á?»

²⁰ Ŋgaàŋ ghàn é le, e bó a ghvəm kifá, a dzə̀ ji kibvə́? Vifií və́ ví kù sì kimboʼtì kimboʼtì, a wù kù jày ne dzə́ə. Bó yòʼ dzə̀ wù kfə̀n fə̀ə́r kitú kfə́ fó fo. Wù yòʼ kfə̀n yú fó suúy jii, «Shibvə̀m she m ghvə́m shìn shi dzə̀ kifá kisáŋ.»

Nyùy Tàr dzə̀ Ŋgaà Mbom, a dzə Mfə̀ə́r

²¹ Éè rám Jakov, vèn wáa kuumé vinyo vìn vi. Wír veé Isray, vèn dzə̀ wír vém lìm. Yì‑iì bòm mo ven, a vèn dzə̀ wír vém lìm. Éè wìr veé Isray, bó m yòʼ wíy làysìn ven.

²² M làysìn ne ajay vén, e sə̀ʼsí, á ŋeémé, e lày, kù moo mbàʼ ye shwéri jùmèn. M shàʼàr ne vinyo vén ve bi ví, ví máy, kù moo kintòn ke shùy lóo ban, kí mày. Vèn kfə́n é bàm, e kòʼtí e mǒ mentsə̀m, mò‑oò yùn ne ven, e làʼ.

²³ Yúví wáa kooné yòv, bìʼ fo Nyùy Tàr yiìn ne kinyo ke ghaʼán kí. Nsay wáa ndzəʼ, à loònsay sho, áàgwane wáa yòv, é kicí kimòʼón kimòʼón ki wáa yòv e kòv. Kí dzə̀ jii, Nyùy Tàr tìn ne rám Jakov fo vikwàn. Á kù wíy a burí Nyùy, bìʼ vinyo ve ghaʼtín ve wù yii e wír və́ veé Israyi.

²⁴ Nyùy Tàr wo wù‑uù tinen ven, wun feyì wo wù‑uù bomen ven, e nàŋsín e bvə̀m, wù suuy jii, «Dzə̀ mo Nyùy Tàr wo m bomen kifá kidzə̀m. Kù‑uù bòm mo yúv, e sàŋrì fo, e bòm nsay, yì wáa neŋ ji moòr. Dzə̀ la wo mò‑oò yii vinyo vìn, a wù dzə̀ fó?

²⁵ Kù dzə̀ mo wo m lo, m bvə̀ə́r vinyo ve vé fùú suuy ji ví yíi a koóy. Bvəərì, m yiì, vé fù víne wàa sənín viyúŋ. Kù dzə̀ mo wo m bvəər vinyo ve wìr ve á yén ji á fìír, din ji vifií vév ví dzə̀ á kiyúŋsì.

²⁶ Yii bèy, ŋgaà lìm wom yíysi kinyo, m yiì, kí kòóy, ŋgaà ntum fiʼtì ntum yem, m yiì, yì ghèén. Kù dzə̀ mo wo m suuy ké Jerusalem ji wíri kfə̀n wíy a dzə fo, suuy ké ŋkà se laʼ seé Juda ji á kfə̀n wíy nàn fó, é virə́ʼ ve ví‑iì sàʼkìn ne vi kfə́n fó.

²⁷ Kù dzə̀ mo wo m lo, m sùúy e rìbà ndzə̀v jii, yúm, wù kù nèn yùm, bìʼ fo m yumerin ne ndzə́v se sí léŋ, nəə sho.

²⁸ M suuy kee kùm Sayrus jii, kù dzə̀ wun wo m liìn ji wù wáa dànèr wír vém, a wù kù wíy a yiì vinyo vidzə̀m ve m kér e mǒ kwàʼtì. Wù wíy yòŋ kee kùm Jerusalem jii, á kfən bàʼrì a fó, e yòŋ kee kùm lav cù jii, á neer á kinsə̀ŋ kfə́.»