Aysaya 41 - ŊWÀʼ NYÙY

Nyùy káʼ ji wun wíy bòyìr wír və́

¹ Nyùy Tàr suuy jii: «Ven ve vèn dzə́ e ŋguùŋè rìbà ndzə̀v, vèn sə́sín, e yuùrí kinyo ke m suuy ki. Vitúm vi ku kùr shilív, e kòʼtí e mǒ mentsə̀m. Á kóʼtí, e fíʼ suúy kinyo ke á kérí. Vèsən kóʼtí adzə̀m e kibàʼ ke nsaʼ, a tàr vinyo.

² «Vèn kwaʼ ji bàyír la taà vitu woó mbìv yee fo shùy yii tó? Tsə̀ə́r la wun e shùu lìm ji wù wáa lìm lím ŋgaàŋ? Yì‑iì yiì la, é bo wù wáa tòn vitúm, a nyèŋrì afon vév e wuú? Wù lo, wù sə̀ʼsí áwune e nyùy rə rə̀r, á dù é kibvə, e tàtí áwune wir dzə̀m, e laàr e kinte kfə́ kí, kù mo á fètí mvə́y.

³ Wù lo, wù wàa nyoòrì vé rər vév, a dù fo wù du, tèéter, a shaà e virə̀ʼ ji ghàár, kù moo ji wuú yòʼ kum nsay.

⁴ Wìr wo wù yiìn ne vinyo vìn dzə̀ la? Yì‑iì tooy la ŋgwàʼ si, e kèʼ fo kèʼ? Dzə̀ mo woo Nyùy Tàr, a m kù‑uù sì, é bo ndzə wìy a kèʼ, a m kù wíy a dzə, e dù, e meé mo yì wíy mày. Dzə̀ mo və̀n wo m yiìn vinyo vìn.»

⁵ Wìr dzə̀m wo wù dzə́ e ŋguùŋè rìbà ndzə̀v é ndzəywoŋ yèn ne, shúu má. Wúné kù sí beéme wír veé kitu ke nsay adzə̀m, aá yaʼ yàʼàn. Á kù sí báʼti kirə́ʼ kimòʼón, suúsinè,

⁶ a wìr dzə̀m kù sí sə́nin vitú, távir ŋgaà və shweèsí ji wù ku ghàr á tím.

⁷ Wìr woo taà kilàm lo, wù tàvír ŋgaà wo wù sheŋrì visha, ŋgaà wo wù dzəvtì visha wàa tavír wo wù náŋsin, navtì. Wù wàa tavír, a binsí ji lim rə̀ne dzə̀ e juŋ. Á fer shibvə̀m shìn, á nèn tùúy e nsay, e tà e mban si, fo shí gbu.

⁸ Yii bèy, wír veé Isray, vèn dzə̀ vé lìm vém. Ven vee rám Jakov, m shòʼ ne ven ji wír vém. Vèn dzə̀ rám Abraham wo yì‑iì dzəə̀n ŋkar yem,

⁹ a mò‑oò lì ven fó buu se ndzə, e fə̀ə́r ven fó vijèʼ ve ndzə, fo vèn‑eè dzə́, e yòŋ e vèn ji vèn dzə̀ á aŋgàa lìm vém. Yì‑iì shòʼ mo ven, a m yòʼ‑oò ghàn ne ŋwày ven.

¹⁰ Lá vèn yòʼ a fàn, m dzə̀ vèsən. Lá kindzə́m kí yòʼ a gwàr ven, m dzə̀ Nyùy won. M kù wíy a fo ven vitaáví, a sə ven. M wíy a kìŋsìn ven e vitaáví vém ve ghaʼán ví.

¹¹ Vèn yuúrí, e yù, m yíi shoór wír ve á tsə́y kóy vèn áwune, aá wáa woomé. M yíi dìn kisáŋ ke wìr ve á funèn ven, e yiì, aá kpúkír.

¹² A vèn fə̀m wìy a tàʼ wír ve á ghíʼ ven vin, bo bó yòʼ dzə̀ vèn wìy yèn. Á wíy səʼsí aŋgàa vibàn vén, aá ŋeémé, e lày.

¹³ Lá vèn yòʼ a fàn, vèn sì e mǒ kiwo, mo woo Nyùy Tàr woo Nyùy won. Kù dzə̀ mo wo m suuy e vèn ji lá vèn yòʼ a fàn, m kù wíy a sə ven.

¹⁴ Rúrú, rám Jakov, fə̀m mo vèn dzəə̀n là kitar moo kiŋgoóŋgoŋ, ven vee wír veé Isray, lá vèn yòʼ a fàn. Mómò, m wíy a sə ven. Suuy mo woo Nyùy Tàr woo Mfə̀ə́r won, mo woo Ŋgaà wo Ranén woó Isray.

¹⁵ Vèn yuúrí, e yù, m wíy yiì, é vèn wáa dzə kimbuʼ ke saŋ ke á wíy a buʼ vitúm sho. Kimbuʼ, aá fér, e tàrí mban si shó. Vèn wíy a buʼ vitúm, kù mo á kètì agwan, e bvə̀ʼə́y, á kfə́n é kibvə̀r. Vèn wíy bìnèr aŋkoŋ, aá kfə́n moo mvə́y.

¹⁶ Vèn wíy buʼ, e fetí, é shwéri li kibvər, é kinsəm ki kú a taʼár, a dù sho. Á bèy, é vèn nèn a sheʼrí mo woo Nyùy Tàr, a tuy shwín bìʼ mo woo Ŋgaà wo Ranén woó Isray.

¹⁷ Vé kitàn wùn à vé ŋgeʼe wíy lòo tàʼ mendzə́v, lóo tàʼ, é la á yòʼ yèn, é kilòŋ kí wáa yum áwune. Kí lóo yum, é mo woo Nyùy Tàr yú tóŋ yév. Mo woo Nyùy wìr veé Isray yòʼ wíy làysìn áwune.

¹⁸ M wíy yiì, é ndzə́ví wáa leŋ, a səy fo agwan ve á yúm yumén, e yiì, é ntòŋ sé ndzəv sí wáa meekír fo viwoóy. M wíy yiì, é visə̀m vé ndzəv ví wáa tiynín e virə̀ʼ vé woʼ ví, e yiì, é ntòŋ sé ndzəv sí fəə́ é virə̀ʼ ve ndzə́ví yòʼ‑oò ghàn ne, a dzə fo.

¹⁹ Vicí vee ji kicí ké *sidar, ké *akaasia, ké *mirtel, e lì ké *oliv, m wíy yiì, é ví wáa kuy e kirə̀ʼ ké woʼ kí. M kfə̀n wíy yiì, é dzəʼə̀y wùn à vicí vé *payin vi, à vé *fir vi wáa kuy e nsay ŋgaŋ.

²⁰ Kí kooy bèy, é wíri fiʼ yèn kinyo ke m yiìn, yéné, aá kiíy ji yiì a mo féyì feyì. Kiiyì, aá wáa kwàʼtì sho, a kiíy mo kí dzəə̀n. Á wíy kiíy ji yiì a rú Nyùy Tàr vinyo vìn. Á wíy kiíy ji yiì a mo woo Ŋgaà wo Ranén woó Isray, é bo ví koóy.

Nyùy Tàr dín kisáŋ ke anyùy vitum

²¹ Nyùy Tàr yoŋ aànyùy vitume jii: «Vèn wáy nsaʼ yen, e naàrì kinyo kén kí kijuŋ.» Rúrú, wun woo Fon rám Jakov suuy jii, «Vèn din rú kisəəm kee ji vèn dzə̀ anyùy ki.

²² Vèn meésín, e fèr e vèr kinyo ke kí dzəə́ wìy koóy ki. Vèn fer ó ver kinyo ke kí dzəə́ wìy koóy. Vèn ku naàrì e vèr ke vèn‑eè yooyin ji á mo kí wíy a dzə. Vèn fer, é vèr wáy sí, e yèn ó ji kí sà‑aà lo kòóy rú á.

²³ Vèn ku yoòyí o kinyo ke kí dzəə́ wìy koóy ki, é vèr nèn kìíy ji vèn sà dzə̀ rú anyùy moo ŋgáŋ á. Vèn ku yiì o kinyo ki, kìn dzə̀ ke dzə̀ kí sə̀ wír, kìn ke dzə̀ kí fò a dzə̀ kileémé, é vèr yén, é shúu má ver, aá wáa fàn.

²⁴ Rúrú, ven vee anyùyi dzə̀ kifá kisáŋ, a dzə̀ vèn yiì kee ka féyì? Wìr wo wù shoʼon a dzə̀ ven, a ghvəm, yiì ne joonè, a koʼóy.

²⁵ «Fo kém kí, m yiì ne, wìr ŋáʼáy fó mbìv yee kuy, a wìy. Wù lò a dzə̀ fó wòŋ woó mbìv ye shùy yii tó fo fo, wúnwun wíy a ghvəm yír yém. Wù wíy nyèŋ vé saʼa e wuú mo wìr nyèŋ kishaʼàr, e nyèŋ mo wìr wo wù bóm antòn nyèŋ nsay mbóm, yì táŋ.

²⁶ Nyùy fo vèn wo wù‑uù yooyin kinyo kìn fo yàŋgùʼ ji vèr fiʼ kìíy mo kí wíy a dzə dzə̀ la? Nyùy fo věn mvəm wo wù‑uù toʼon kinyo kìn, é bo kí wìy a koóy, é bo vèr wáa binsí ji wù suuy rú dzə̀ la? Nyùy fo vèn wo wù‑uù tiisin vinyo vìn, fə̀m e mòʼón yòʼ dzə̀. Nyùy wo wù‑uù fèrìn yòʼ dzə̀ gheéy. Fə̀m kighiísí, á yòʼ‑oò lò ghàn yù, a nyùy fo vèn kiísí.

²⁷ Dzə̀ mo Nyùy Tàr wo mò‑oò tòmbìy sùúy e wír veé Sione jii, ‹Vèn leéy, vèn leéy, áwune vísə, aá wiyì›, a m yíi tsənsí ŋgaà ntum e Jerusalem ji wù tiísí á ntum vijùŋ rə̀n fo.

²⁸ Yii bèy, a m leey ji yoóyí á anyùy, a m yòʼ yén wùwun. Feyì feyì, nyùy wo wù meésin ji a dzə̀ wun tìr mo yòʼ dzə̀, a wo dzə̀ wù bìnèr kinyo ke m dzə́rí yòʼ dzə̀.

²⁹ Rúrú, anyùy adzə̀me kù dzə̀ kifá kisáŋ, Kinyo feyì ke dzə̀ á yiì shishàr, e bó a dor ki yòʼ dzə̀. Vibámmbó vee anyùy vi dzə̀ shwér, kinyè kí yòʼ dzə̀ shó.»