Aysaya 40 - ŊWÀʼ NYÙY

Jí se sí rəər melív me wìr Nyùy

¹ Ven vee wír ve Nyùy shoʼon ne, Nyùy won tiísi aàŋgàa ntum vəə́ jii, «Vèn ku rəə̀r melív me wìr vém. Vèn ku rəə̀r melív mev mè.

² Vèn kú a suŋnín lám wo juŋe, a rəə̀r wír veé Jerusalem sho jii, ghán se áwune‑eè rə́si yén ŋgeʼ ye tavín sí shaà a ne, aá làysìn a ne ajay vév. Fə̀m mo Nyùy Tàr màʼàn ne ŋgeʼ aáwuné kitu, e tòm e ŋgeʼ, bìʼ vinyo vidzə̀m ve áwune rə́si buʼtì, ké lèn ki, wù shàm á ne áwune.»

³ Jì wìr fúŋ ntum jii, «Vèn náŋsín dzə́ə é kwaʼ ye dzə̀ Nyùy Tàr shaà shó. Vèn náŋsín dzə́ə é kirə̀ʼ ké woʼ, é yì du tìítiy, é bo Nyùy wòsən wáa ghan sho.

⁴ Vèn rúnsí viwoóy ví vidzə̀m, e sə̀ʼə́r virùmèn wùn aàgwane, aá kfə́n é mboʼ. Vèn koti virə́ʼ vé vilan vi vidzə̀m, e rùnsí vidoʼ, é dzəə̀ wáa dzə ji fèm.

⁵ Á bèy, é wíri nèn yèn vitaáví vé Nyùy Tàr. Wìr dzə̀m wíy yen, a ŋgaàŋ fə̀m soò fèé. Á mo Nyùy Tàr suuyin ji kí wíy a dzə.»

⁶ Mò‑oò yù jí wìr, a yì suuy e mò jii, «Ku fìʼtì sáʼka e wíri.» M dzə́r jii, «M lo, a fìʼtì ji ka?» Yì binèr ji m fiʼti á jii, «Wìr dzə̀m kù dzə̀ moo viŋgà. Vijuŋ ve wìr vi kù dzə̀ moo kibuushì keé kwaʼ.

⁷ Nyùy Tàr lo, wù yiì, shwér wo lumèné wàa shaà, a yumér viŋgà, vibuushì ví wàa yovrí. Kí dzə̀ jii, wìr msòŋ e dzə̀m kù dzə̀ ji viŋgà.

⁸ Rúrú, viŋgà ví lo, ví yùm, vibuushì ví yòvrí, yii bèy, a jì Nyùy wòsən kù wíy a tiy fo, e dù, e jòʼsì.»

⁹ Wír veé Sion, ven ve á yii fiʼtì sáʼka wo juŋ, vèn kóʼ é ntoò gwan. Wír veé Jerusalem, ven ve á yii fiʼtì sáʼka wo juŋ, vèn tiísí ntum yem. Vèn tiísí ntum rə̀n kijuŋ, e làa yòʼ a fàn. Vèn suúy e wír veé Judàa jii, «Vèn leéy, e yèn, Nyùy won və̀ne.»

¹⁰ Rúrú, Nyùy Tàr woo Taà Ndzə sí wiyì, a wù kér vitaáví é ŋàŋ. Wù wíy a saʼ wíri e vitaáví və́ ve ghaʼán ví. Vèn leéy, e yèn, wù wiy, kér vilaámé, wiy ji wun laámé wír ve á jumrì wun sho.

¹¹ Wù wíy a leéy fo wír vəə́ kijuŋ, kù mo nshìy lèéy fo njiì və. Wù wíy a geʼsín aáwune, kù mo nshìy yii lo, wù shùr wan njiì, e kòytí. Wù wíy a dànèr áwune ji weè weè, kù mo á dànèr anjiì ve á nyoor wón.

Nyùy wìr veé Isray yòʼ kér mfìʼ

¹² Dzə̀ la wo dzə̀ wù bàʼtí rìbà ndzə̀v é mvə̀m kiwo, e fìʼ? Dzə̀ la wo dzə̀ wù màʼ ntàm kiwo, e fìʼ yúv shó? Dzə̀ la wo wù‑uù yiìn ne bàʼtí kibvər keé kitu ke nsay, e wày é ŋkaà ye á yii fiʼ vifá sho? Dzə̀ la wo wù‑uù ghanen ne fìʼ vidzəəsì vé agwan wùn aàŋkoŋe?

¹³ Wìr wo dzə̀ wù kìíy kinyo ke Nyùy Tàr kwaʼtì dzə̀ la? A dzə̀ tìr la wun mo wù wáa yiì vinyo?

¹⁴ Dzə̀ la féyì feyì wo Nyùy Tàr‑iì ghanen ne beè ji wun fíʼ a ker vifií? Dzə̀ la wo wù‑uù yiìn ne, a yeʼéy wun mo á yii tínen kinyo e nsànloŋ? Yì‑iì ghàn ne la, e yèʼéy Nyùy Tàr ji wù kiíy vinyo vidzə̀m, e naàrì wun mo wù wáa kiíy jeéyjeéy fó vinyò?

¹⁵ Rúrú, aá lì vitúm, a fìʼsìn Nyùy Tàr shó, bo ví dzə̀ vidzə̀m moo céʼ shindzə̀v she shí yii shém fo ŋkaà. A dzə̀ ji á wáa fìʼsìn, bo vitúm vìn vi dzə̀ là ndzə̀n, moo kibvər ke á fiʼ kifá, a kí gbu e mfìʼ. Vèn leéy, e yèn, Nyùy Tàr leey woŋ wo ndzə́ví kaarin, e tàr, a wú dzə̀ fo wun feyì moo kibvər ke kí kpuun é mbòŋ.

¹⁶ A wìr fə̀m lò ji wun‑éè cu Nyùy Tàr e cu ye tonèné, bo bó yòʼ dzə̀ vicí veé Lebanon vi fə̀ə́r meŋkaʼ megheénén. Bó yòʼ dzə̀ sá, á lo ji cu ye tonèné, nyám see fó si ghèén.

¹⁷ Aá lò ji á tátí vitúm vidzə̀m, a fìʼsìn wùn à Nyùy Tàr, kù a dzə moo ji bó kitúm ki yòʼ‑oò ghàn ne a dzə, a nsay yee fó kù tíy kisáŋ.

¹⁸ Wìr dzə̀ shó wo a dzə̀ á lì Nyùy Tàr, a fìʼsìn wùn wun a? Kifá feyì ke dzə̀ á lì, a fìʼsìn ji nshwìnin Nyùy Tàr kí dzə̀ kiné kí?

¹⁹ Shibvə̀m shi dzə̀ kfə́, a kù‑uù fèr wír e wóo. Ferì, taà kilàm nèn laàrì e *kisha ke mbàm ke baar kí, e fèr ashàŋ e kisha ke mbàm ke fəvír kí, e keèrì sho.

²⁰ Ŋgaà kitàn lo, wù tàʼ kfə́ kicí ke bó yòʼ dzə̀ kí tàv fòy, e nèn tàʼ wír wo wù yii sém shibvə̀m ji wù sém shee nyùy və. Sémé, é wù tuúy é dzəə ye bó yòʼ dzə̀ shí gbù.

²¹ Vèn yòʼ‑oò ghàn ne kìíy kinyo à? Vèn yòʼ‑oò ghàn ne yù kinyo à? Bó wìr yòʼ‑oò ghàn ne sùúy kinyo e vèn a? Kèʼ mo kitú ke nsay ki‑iì kèʼèn, bó vèn yòʼ‑oò ghàn ne kìíy jeéyjeéy fó vinyò à?

²² Dzə̀ Nyùy Tàr wo wù màʼàn kàvàʼ və é ntoò yùv. Wù maʼ sí fo fo, lóo leéy wír veé nsay, á wàa dzə aŋeérín moo vintàn. Wù lo, wù sàŋrì yúv mo wìr sàŋrì ndzə̀y, e sàŋrì, kù mo wìr tàm kibàn kée beè sho.

²³ Wù yii baʼtì atǎr saʼ fo áwuné antaʼ ve kuʼkìné, lo sa, wù fèér vé saʼa fo áwuné vikòʼtìn.

²⁴ Á kù dzə̀ moo mbìy kifa ye á shoʼon, e dù bìy, a dzə moo ŋgoòy kifa ye á kù wayin wáyín. Vifá vìn vi keʼ lóo kuy, shwér woó tsəné shaa, fee, ví nèn kù rə̀ʼtí, e yùm. Kù dzə̀ réŋréŋ mo ké atǎr saʼ ki dzəə̀n e Nyùy si. Wù lo, wù yèr áwune fó antaʼ mo kinsəm ki fèér vishaárín.

²⁵ Nyùy dzə́r jii, «A dzə̀ vèn kwàʼtì kfə́ə wìr wo a dzə̀ á fìʼsìn vèr wun a? Dzə̀ la, wo a dzə̀ wù dzə̀v kiwó vèr wun?» Suuy wun woo Ŋgaà wo Ranén.

²⁶ Ké ru kí, vèn leéy yúví, é vèn yén shúy wùn à ŋwee, à mejiy mè. Yì‑iì bòm la vifá vìn? Kù fə̀ə́r Nyùy Tàr vifá vìn e yuv, a kù kì wun vifá vee shoon e yír yir. Danèr wun vifá veé yuv e vitaáví və́ ve ghaʼán ví. Wù tàv é ŋàŋ, a bó yòʼ dzə̀ kimòʼón ki kùvsín kirə́ʼ kee fo wù‑uù lèmèn.

²⁷ Á bèy, ven vee rám Jakov, vèn ndzə́kir bìʼ ka? Ven vee wír veé Isray, vèn suuy jii, «Nyùy Tàr yòʼ yén kfə́ə ŋgeʼ se vèr shaa e mvəm wó, a bó wù yòʼ kiŋsìn ghay wór.» Vèn suuy vinyo vìn bèn bìʼ ka?

²⁸ Vèn yòʼ‑oò ghàn ne kìíy kinyo à? Vèn yòʼ‑oò ghàn ne yù a? Nyùy Tàr kù dzə̀ wun Nyùy wo wù gòʼòn kàŋ mòʼón là may. Kù‑uù bòm wun kifá kidzə̀m ke kí dzəə̀n shó lèn. Wù yòʼ yii njoó, a bó wù yòʼ yii dórí. Wìr wo dzə̀ wù kìíy mo vifií vé Nyùy Tàr ví dzəə̀n yòʼ dzə̀.

²⁹ Kù yii fó wun vitaáví aànjoó, távir wír ve á dzəə̀n là kitar.

³⁰ A fə̀m dzə̀ wir wàʼbìn, bo wù kù lo, e wèʼ, e dor. Wónlě nsùme kù lo, e seèmè, a bàyrìn, a gbùkìr.

³¹ Yii bèy, wír ve á yoy, tiir a dzə̀ e Nyùy Tǎr wùné kù wíy a gàr, a dù duùn fó mbìy, a gàr, là dór, kù moo lùŋ wo wiy wo wù féŋ e yuv. Áwune wíy a nyeŋ, e làa yòʼ a dor, a ghan, é la shwín sév sí yòʼ a seèm.