Aysaya 34 - ŊWÀʼ NYÙY

Nyùy wíy màʼ ŋgeʼ aàŋgaà və́ vibàné kitu

¹ Ven vee vitúm, vèn kóʼtí e mǒ mentsə̀m, e yuùrí. Wíri, vèn fó vituʼùr ví. Woŋ e dzə̀m wùn à kifá kidzə̀m ke kí dzəə̀n shó ki yuúrí. Kitú ke nsay wùn à kifá kidzə̀m ke kí fəə́ fo fo ki səəm jí sìn.

² Kí dzə̀ jii, Nyùy Tàr shwìíy ne kilòŋ bìʼ vitúm vidzə̀m, a wù kù lo, e dìn dòʼshwíiy və e vé rər véví kitu. Wù wày ne ji wun kù kér fó yìi laàr áwune, a wù fò ne áwune ji á kù kér fó seerí.

³ Á wíy màʼrì dzə́n sév, é sí wáa neŋnín fo nsay. Dzə́n sév sí wíy a koʼór kishaŋ, é kí sə́ fó e dzə̀m, é mensə́ mev mè wáa sù agwan súun.

⁴ Vifá veé yuv ve ví bán, fó rán vi wíy bvəʼə́y, e dù e kibvə. Á wíy kaarí yúv moo ŋwàʼ, e tsə̀ʼ, a kifá kidzə̀m ke kí dzəə̀n é yuv kí wíy gbù. Kí wíy gbù, kù moo ji sòóy vav fo kici ké vayin, kìn moo báŋ se kici ké *fig se sí tùʼùn, a tumkír.

⁵ Nyùy Tàr suuy jii: «Nyùy yem rə̀r lìm ne lim rə́, e màysì, lim ye dzəə̀n nsaʼ vifa ve ví bán e yuv ye wù tínenè. Vèn leéy, e yèn, yì lo lèn, e lovtí e wír veé Edome, wír ve m wayin ne ji m kù kér fó laàr.»

⁶ Rúrú, Nyùy Tàr kér nyùy rə̀r é kiwo, a yì dzə̀ mensə́ mensə́, a dzə fóm fóm. Mensə́, a dzə̀ me wón njiì, à me bvəy mè, fóm, a dzə̀ sé kiyaʼ seé shintay. Á mo Nyùy Tàr lo, e yiì cu e Bosra. Wù yíi yuyrí wíri Edom e dzə̀m.

⁷ Wù wíy yuyrí áwune moo anyar veé kwaʼ, e yuyrí moo vinsòŋ ve nyàm, kìn ambòŋ ve faŋkìné. Mensə́ mev mè wíy leém, e sə nsay, é kibvər ki nyóŋ fóm sév.

⁸ Kí dzə̀ jii, Nyùy Tàr lèm ne kishiíy ke wù wíy siìr ŋkfə́tír. Kishiíy ke wù wíy kwàŋ kinyo ke wìr veé Sion, bìʼ kinyo ke wír veé Edome yiìn aáwune.

⁹ Ndzə́v seé Edom si wíy bìnkìr e kishay ke meŋgvə̀r, é nsay yev kfə́n ji mekàŋ me mè baári. Woŋ wóví wíy kfən ji kunta wo wù baári moo və́y.

¹⁰ Və́y və́ne kù wíy a shwi là ndzə́mén, a shwi e shùy, a shwi vitsə́ʼ. Kindzə́ʼ ki kù wíy a koʼ fo fo, e dù, e jòʼsì. Nsay yev kù wíy a dzə e vifə̀m, a lò fo ŋgwàʼ rə̀y, a liysín e rə̀y. Feyì feyì, e wìy dù, e mày, bó wìr yòʼ kfə̀n dzəə́ wìy tiír kiwuú fó.

¹¹ Kù sí wìy yòv vighvəŋ wùn à viŋgùm vé mboò vi fó. Fóo wíy a dzə láʼ viŋkfə̀y wùn à vilùŋ vi. Nyùy Tàr wíy nəə́ e Edom, e ghar fó, e tòvsìn, tovsìnè, é wù yii, é fóo kfə́n kisáŋ.

¹² Atǎr wòŋ ve dzə̀ á kòʼór fóne yòʼ kfə̀n dzəə́ wìy a dzə. Atǎr saʼ vee fóo kù sí wìy ŋeemé, e lày làyìn.

¹³ Vitiír vé njoŋ vi wíy kuy, e sə ntoʼ seé Edom sidzə̀m, é kiv wùn à kimbìn kí sə́ virə́ʼ vév ve tavkín ví vidzə̀m. Fóo wíy a dzə kirə́ʼ kee fo viŋgày ve akoosàʼ vi wíy a shiíy, a viŋkfə̀y vi wíy sə fó səə́n e dzə̀m.

¹⁴ Akuúrá wùn à nyám seé woʼ símóʼ sí wíy a shiíy fo. Bvə́y se kwaʼ si wíy a toŋ, a jàŋ símóʼ sí. Dzə̀ fó, fo vighvəŋ vi wíy ghan, é ví yoyri, e bó a tàʼ kirə́ʼ ké meèmè.

¹⁵ Viŋkfə̀y vi wíy bàʼrì láʼ yév, a màʼ wúm fó. Maʼà, é ví kay, a leéy fo wóné, a kuʼtí e sar vàv. Vilùŋŋgùrúʼ ví kù wíy a baʼtí sa fo vibaà vibaà, kee lumèn wùn à kee wiíy ki.

¹⁶ Vèn leéy, e tàr vinyo vìn vi fo Nyùy Tǎr ŋwàʼ, e yòŋ. Kí din fo ji bó nyàm e mòʼón, kìn shinə́n shí yòʼ wíy lày. Nyàm yee lumèn kù wíy a ghan wùn yee wiíy, é shinə́n shee lumèn shi kú a gbù kiwuú kimòʼón wùn à shee wiíy shi. Kí wíy a dzə bèy, bìʼ fo foon Nyùy Tàr sáʼ rə̀n. Yiì kiyoy kfə́ ji vifá vìn vidzə̀m vi báʼtí.

¹⁷ Kù dzə̀ Nyùy Tàr wo wù màʼtìn Edom e vifá vìn vi. Kù tòʼtí wun Edom e vibàr vibàr, e bóo fo e vifá vìn vi. Vifá vìn vi kù sí wìy yòv Edom, e dù, e jòʼsì. Ví kù sí wìy a dzə fo, e kèʼ fo ŋgwàʼ rə̀y, e dù e yìmòʼ.