Aysaya 32 - ŊWÀʼ NYÙY

Fon wo fíy woo ŋgaà saʼ yee réŋ

¹ Vèn leéy, fòn wùmòʼ wíy fəə, a sáʼ rəə́ wíy a dzə yee réŋ, a vé saʼ vəə́ wíy a ker woŋ là medzə̀jeéy.

² Wìr mòʼón mòʼón wíy a dzə moo kirə́v ke kí kiŋ shwér, a dzə moo táv wo wíri bee kinsəm sho. Áwune wíy a dzə moo ndzə́v ye yí léŋ e kirə̀ʼ ké woʼ, yii, a fóo rəsìnè, a dzə moo kindzə̀ə́ndzəm ke màkìlan fó e kirə̀ʼ ke lumèn kí.

³ Kifá ki yòʼ kfə̀n wíy fìr sí wìr ve á yén virə́ʼ. Wír ve á yú vinyóo wíy mvə̀ʼtì vituʼùr, a yuurí vinyo kijuŋ.

⁴ Wír ve á yii vinyo e kigìr là kwaʼtìi kù wíy a səʼə́m, e bó a yiì kinyo. Wír ve á bév kimbevi wíy a suŋnín kicaárín, é kí wáa ran, e làa yòʼ a siʼsíʼ.

⁵ Á yòʼ kfə̀n dzəə́ wìy a yen viyúŋ ji kfə́m sé wìr, a bó á yòʼ kfə̀n dzəə́ wìy a yen wir kisaŋ ji ceʼ wìr.

⁶ Kí dzə̀ jii, kiyúŋ kí dzə̀ wír wo wù suuy kinyo, a kí yòʼ kér vifií. Dzə̀ wír wo shilív shí kù kwaʼtì a dzə̀ kinyo kée bùʼ. Wù dzə̀ kfə́, a wù méŋ Nyùy méŋén, lo, wù bòm yéʼéy kisaŋe kùm Nyùy Tàr. A wù kfə̀n ŋwéy viyíkìr fo aŋgàa ŋgeʼe, ŋwéy mendzə́v fo wír ve kilòŋ kí yúmée.

⁷ Vé kisaŋe kù sí yii vinyo kighèʼ kighèʼ, bá antaŋ ve bií ji á maʼ ŋgeʼ e vé kitàné kitu. A vé kitàne fə̀m suuy suuyrú é le, bo wír kisaŋe kù‑úù tiím vinjen ve kisaŋ vi aáwuné bàm.

⁸ Yii bèy, wìr woo wír kù kér vinyo ve wù yii, a dzə̀ ve dzə̀ á wàa ghvəm. Wù táŋ kinyo ke juŋ ke wù taʼ e yiì, wù kù a tiy a dzə̀ e kíwun ki.

Ŋgeʼlàʼ wìr veé Juda wùn à vijuŋ vee fó bàm ví

⁹ Ven vee vikìy ve vèn dzə́, yí vitú, vèn yuúrí kinyo ke m suuy ki. Ven vee vikìy ve vèn yén ji á mèé, vèn səəm jí sém sí kijuujùŋ.

¹⁰ Kiyá ki yíi lòo jì ji kí wáa kum, a ven ve á yén ji á mèé vìne sí fan, yaʼ yàʼàn. Vèn wíy a yàʼ, bìʼ fo tútúʼ yòʼ dzəə́ yìi koóm, a bó kifá kée kav ki yòʼ kfə̀n dzə̀ə́.

¹¹ Ven vee vikìy ve vèn dzə́, yí vitú, vèn wáa yàʼ. Ven ve vèn yén ji á mèé, vèn wáa fàn, é wúné wáa dzən ven dzə́nén. Vèn shóʼóy ndzə̀y sí fo věn wùn, e kùr a dzə̀ sé kpu.

¹² Vèn wáa dìy, a dzə̀v vín sén sí, bìʼ fo súm sén sí lo, e wuy. Súm sé vitiír vé *vayin si dzə̀, a tútúʼ yòʼ dzəə́ yiì a koóm sho.

¹³ Kí wíy a dzə bèy, bìʼ fo nsay ye wír vesəné limè kù wíy wuy, é wáa tèʼ vitiír vé njoŋ fo wùn à vimbìn ví. Vèn wáa dìy sa bìʼ láʼ se sí yú vijuŋ e ŋkàlaʼ kisheʼrì fèn si.

¹⁴ Rúrú, á wíy màʼày ntoʼ yev, é yì kfə́n é vifə̀m, é màŋgòŋ sám fó ŋkàlaʼ. Virə́ʼ vév ve tavkín wùn à vé ŋkiy vi wíy kfən ji mbvə̀ʼ fo nyám si dzə́, a kù wíy a dzə mbvə̀ʼ yev bey ntàmda. Dzə̀ fó, fo vimbèʼbìy veé kwaʼ wùn à nyám seé laʼ si wíy a yikír, a yu vijuŋ.

¹⁵ Kí wíy a dzə bèy, e dù, e meé mo Nyùy Tàr wíy tsənsí Kiyoy kfə́ e vèsən. Wù tsə́nsi, é kirə́ʼ ké woʼ kí kfə́n lèn ji súm, é súm sí rəŋsin, a dzə ji kóv.

¹⁶ Á bèy, é wír ve á dzə́ e kirə̀ʼ ké woʼó wìy a sheʼrí sáʼ yee réŋé, é ve á dzə́ e nsay ye boríné wáa sheʼrí woŋ woo là medzə̀jeéy.

¹⁷ Yii yee réŋé wíy wìy e nyaáŋ, a yiì, é wíri wáa neŋ ji dèʼ, là kinyo ké a fàn.

¹⁸ Kí wíy koóy bèy, é wír vémé nèn a dzə e kirə̀ʼ ke kí dzəə̀n nyaáŋ, é láʼ sév sí wáa dzə, a bó yòʼ dzə̀ wìr wáa dzə sho, wù wàa fàn kifá, a sí sì ji virə́ʼ vé meèmè ve a wìr dzə́ fo, wù wàa rə̀sìn.

¹⁹ Láʼ sìn si kù wíy a dzə bèy, a fə̀m dzə̀ ji gbù mentíy, e suù vicí fó kòv, kìn ji wiy aŋgàa vibàn, e kèr ŋkàlaʼ dzə̀m e nsay.

²⁰ Bòŋ ké wìr ve á wáy ŋgoòy se vifa, a dzə̀ é nsay yeé ghaa ndzəv, maʼtì, aàmbòŋ vév wùn à vimbèʼbìy ví ghán kicaárín, yíkirì.