Aysaya 26 - ŊWÀʼ NYÙY

Nyùy wíy yiì, é wír vəə́ yov nsiì

¹ Kishiíy kí wiyì ke á wíy a yòv luŋ e wòŋ woo Juda, a wú dzə̀ jii: Ŋkàlaʼ yer sì e kiŋsìn féyì. Nyùy kiŋsìn ver, kù moo kay, kiŋsìn, kù moo kirə́v ke á bomen kí táv.

² Á ku mvə̀ʼtì shuu se kày, é wír ve á ghán e Nyùy mbòví nəə́. Dzə̀ áwune ve á lumen Nyùy, e kpù shó.

³ Nyùy Tàr, à yii darìr dzəʼə̀m wìr ve vifií vév ví tíy e wò wùn, yii, aá dzə́ dzə́ yee nyaáŋé, bìʼ fo áwune kù sí yoy, tiir a dzə̀ e wò wùn.

⁴ Ven adzə̀m, vèn kú a yòy, a tiír a dzə̀ e Nyùy Tǎr wùn ghán sidzə̀m, Wun woo Nyùy Tàr dzə̀ kilán késən, e wìy dù, e mày.

⁵ Nyùy Tàr sèn ne wír ve á kóʼor wún. Wù tsə̀y ne ŋkàlaʼ ye á naŋsin, e bàʼrì e loògwan, e kèr bèn, yì wáa neŋ fo nsay, a neŋ bèn e kibvə̀r,

⁶ vé kitàne wáa koʼrí sho, wír ve á nəʼsìi wáa nyèŋrì e wuú.

⁷ Dzəə̀ wìr ve á yúnin Nyùy sì é leŋ. Nyùy Tàr, rúrú, à yii yii, a dzəə̀ wìr ve á ghán e wò mbòv dzə́ bèn ji fèm.

⁸ Nyùy Tàr, vèr kù sí ghán a dzə̀ é dzəə ye ntir yè dinè, kiʼ a dzə̀ wò, kù diy feyì ji á wáa ghvəm yír yé, a kuumé vinyo ve à yii.

⁹ M lo, m dìy wò feyì vitsə́ʼ vifur ji bo à kù kì dzə̀ wòsò. Ndzə lóo jàv, kiyoy kém kí kù a dìy ji bo à kì dzə̀ wòsò. Kí dzə̀ jii, a wìr dzə̀m woó kitu ke nsay lòo dzə, e kìíy nsər yè, é wù nèn yèʼéy mo kinyo kee ji wìr wáa dzə là jay ki dzəə̀n.

¹⁰ Aá lò, a yiì a dzə̀ vinyo ve juŋ vi e wír ve á méŋ Nyùyi, bo bó yòʼ dzə̀ féyì, áwune wìy yèʼéy kinyo kee tínén é nsànloŋ. Fə̀m mo á dzə́ e nsay ye wír vee fóo tíy e suuyrú, áwune kù dzəə́ lóʼ kiloʼ, a bó áwune yòʼ dzəə́ wìy binsí vikuʼùy vé Nyùy Tàr.

¹¹ Éè Nyùy Tàr, à nàn ne kóy wó e yuv ji à lo, e màʼ ŋgeʼlàʼ e wír ve bií kitu, yii bèy, a bó áwune yòʼ fə̀m yén, a síi rúné. Nyùy Tàr, ku dìn koŋ ye à kér fo wír vée, é yí yii, aáwune méŋ fo á dzəə̀n. Dòʼshwiiy wò ku baàrí, e tòn aŋgaà vé vibàn.

¹² Nyùy Tàr, kù ló yiì wò, é bo vèr wáa dzə dzəʼə̀m ye juŋe. Kù yii yii wò, a vinyo vér ví ghán e mboʼ.

¹³ Nyùy Tàr, atǎr saʼ ámóʼó lò ne, a saʼ ver anín, yii bèy, ku yiì, é vèr wáa sùyrì a dzə̀ yír yé.

¹⁴ Atǎr saʼ vìne kpùkír ne, a bó á yòʼ kfə̀n dzəə́ wìy a ŋèʼ. Á sìkìr áàŋkfəə́ wòŋ, a bó á yòʼ kfə̀n dzəə́ wìy fəə fo fo. Rúrú, Nyùy Tàr, à laàr ne áwune ŋkuuŋkùŋ. À sə̀ʼsí ne, a bó wìr yòʼ kfə̀n wíy a kuumé áwune.

¹⁵ Yii bèy, fo kér kí, Nyùy Tàr, wò‑oò lò ké, e kùʼùr kitúm kér kúʼurin. Wò‑oò kùʼùr kitúm kér, e dzə̀sì bìíy sér sé wòŋ, kí yií, wíri wáa burí wò, a koʼór yír yé.

¹⁶ Nyùy Tàr, e ghan se wír vée‑eè dzəə̀n é nsòvkìtu, vé‑eè bìnkìr, a lon ji à ku sə̀ áwune. Wò‑oò màʼ ŋgeʼ aáwuné kitu, á wáa bùnrì wò e nyárí wùn.

¹⁷ Éè Nyùy Tàr, vèr‑iì dzə̀ e wò si, kù moo wiíy wo wù yuun wán, a saŋrí, a toŋ e mvə̀m nyar,

¹⁸ Vèr‑iì dzə̀ moo ji á kù dzə̀ a dzə̀ e bvə́me, yú nyár e ŋàŋ réŋréŋ moo yé wiíy wo wù dzəə wán. Yii bèy, fo kér kee kidzəə́y kí, vèr‑iì dzə̀v a dzə̀ wó e nsay. Vèr yòʼ‑oò lo faàsì nsay fo aŋgaà vér vibàné, a bó vèr yòʼ‑oò lo yòv nsiì e vitúm veé kitu ke nsay ví kitu.

¹⁹ Éè Nyùy Tàr, ku yiì, é wír vé ve á kpukin nee fəə́ fó kpu. Ku yiì, é dzə́n sé wìr vér ve á kpukin ne si ŋáʼáy é yuv. Ven ve á sí néŋ e nsay, vèn ŋáʼáy é yuv, a yòv, a sàvnìn, bìʼ fo Nyùy Tàr dzəə̀n kfə́ ji ŋweʼ ye yí gbu, njaʼkìrì, gbu bèy, a nsay yú, a vifá vi tókirì.

Nyùy wíy saʼ wír veé Juda, e kfə̀n siìr áwune é bàm

²⁰ Mo woo *ŋgaà ntum Nyùy nén a suúy kém jii, «Wìr vem, vèn nəə́kír e věn melav, e sə̀tí shuu se lav si. Vèn lir fó, fo shintàm, e meé mo dòʼshwiiy Nyùy Tàr yíi mày.

²¹ Rúrú, Nyùy Tàr sí wiy fo wun kirə̀ʼ ké dzə, wiy ji wun maʼ ŋgeʼ e wír veé kitu ke nsayí kitu, bìʼ vinyo ve á buʼtì. Nsay wíy fəə́r lím kinjuyrì e dzə̀m fo meranén, a bó yì yòʼ dzəə́ wìy a lìtì wír ve vé‑eè yuyrin.»