Aysaya 23 - ŊWÀʼ NYÙY

Ntum yee kùm Taya wùn Sidon

¹ Sáʼ Nyùy yee kùm wír veé Tayàa rə̀ne. Yí dzə̀ jii: Ven vee ansə̀ŋkìkoŋ ve á kfə́n fo Tarshish, vèn wáa toŋ, a jeetí. Á laàr ne Taya, e tàtí lav sidzə̀m wùn à virə́ʼ ve á tsəər vikóŋ fo vi. Sáʼka wo vèn‑ee meen é Saypur, e yù və̀y dzə̀ rú.

² Éè wìr ve á dzə́ e ŋguùŋè rìbà ndzə̀v, vèn wáa dìy, ven vee mbèʼŋkùm woó Sidon. Mbèʼŋkùm won‑eè lìysín rìbà ndzə̀v ji wun wiy, e yiì, é vèn kuʼkir.

³ Áwune‑eè lìysín ndzə́v sinín, líysin, du, bin vifá veé sum fó Shihor e ghaa ndzəv yee Naay, wiy, dzəsì vikuʼùy vén shó. Vèn‑eè kfə̀n ne ji mbèʼŋkùm wo wù ghán, kávnin wáy vitúm vidzə̀m.

⁴ Éè wìr veé Sidon, vèn wáa woomé, ven ve kirə́ʼ kén ke tavín kí dzəə̀n a dzə̀ é ghaa rìbà ndzə̀v. Rìbà ndzə̀v mèŋ ne ven, a yiì mo súŋnin wír, a suúy jii, «Kí sì moo ji bó m yòʼ‑oò ghàn ne lùm wán, jòkìnyàʼ, e bóo dzəə́, a dzə moo ji bó m yòʼ‑oò ghàn ne lìy wón vee vilum, e bóo lìy vee vikìy.»

⁵ Sáʼka woo kùm Taya yíi to e wír veé Ejiví kitùʼùr, á yú ji á laàr a ne fó, aáwune yú nyár e ŋàŋ.

⁶ Ven vee wír ve á dzə́ e ŋguùŋè rìbà ndzə̀v, vèn nyéŋ, e lìysín e Tarshish, e dù, a toŋ fo, a jeetí.

⁷ Vèn yén búʼú kinyo ke kí kooyin ŋkàlaʼ yen ye yì‑iì rə́si dzə́ e juŋ ki. Ŋkàlaʼ, a vé‑eè tùúy ne fo yàŋgùʼ, a vèn dzə́ fo, yú vijuŋ, tsə́nsi vé wayí, aá du e virə̀ʼ vee kwaʼda, kávnin wáy fó.

⁸ Wír feyì wo wù ghaamen, e tìím bèn, e bà ntaŋ woo ben, kùm Taya fèn dzə̀ la áy? Ŋkàlaʼ Taya, a yì‑iì ghán, kóʼor afon. Kirə́ʼ, a vé‑eè ghvə́m wónlě way vén ghvəmén ji vilìmbìy ve wíri. Wír feyì, a vé‑eè nəə e kitum, a fə̀m dzə̀ kiné kí, wìr dzə̀m kù a ghvəm áwune.

⁹ Kù‑uù bà Nyùy Tàr woo Taà Mànjòŋ ntaŋ və̀n, ji wun fiʼ dìn ji kinyè kí yòʼ dzə̀ é vinyò ve wíri raʼsì wún shó, e sèn wír ve á ghvə́mé fo áwuné antaʼ ve kuʼkìné.

¹⁰ Éè wìr veé Tarshish, vèn ŋáʼáy lèn, e yòv nsay yen, a dzə sho. Vèn saŋri wúné e věn nsay, kù moo ndzə́v yee Naay ye yí runen, e fəə̀ é meshavtí. Wìr wo wù kfə̀n yíi a fo sáʼ e vèn yòʼ dzə̀.

¹¹ Nyùy Tàr dìn ne vitaáví və́ é rìbà ndzə̀v, e yiì, vitúm vi wáa yàʼ. Wun woo Nyùy Tàr fò ne sáʼ, á laár ŋkà se laʼ se tavkín seé ghaa rìbà ndzə̀v.

¹² Nyùy Tàr suuy jii, «Wír veé Sidon, vèn yòʼ dzəə́ yiì a yu vijuŋ ve vèn‑ee yú. Á sí nəʼsì a dzə̀ ven lèn. Vèn koŋ, á lìysín, e dù e Saypur, fə̀m fó, bó vèn yòʼ yíi yu vijuŋ aàŋgaà vén vibàné wo.»

¹³ Vèn wáy síi e woŋ Babiloné wùn. Kù‑uù laàr áwune Taya, e siìr ji kirə́ʼ ké nyàm se kwaʼ, bó yòʼ‑oò lo laàr wír veé Assiriya. Vé‑eè bàʼrì virùmèn ve ŋkiy e ghaa kày yeé ŋkàlaʼ, e nə̀ə́ fo, e sàʼtì virə́ʼ vév ve tavkín ve vé‑eè luŋen, fóo kfə́n é vifə̀m.

¹⁴ Ven ve á səŋ vikóŋ ve ví béʼ vifá ve way, wiy sho fo Tarshish, vèn wáa dìy. Á laàr ne ŋkàlaʼ ye vèn‑eè bàʼrìn ji yì wáa kìŋsìn ven.

¹⁵ Vinyo ve Nyùy yooyin vin vi wíy koóy, aá laysin ŋkàlaʼ yee Taya láysin, kiyá msaàmbà. Kiyá, a dzə̀ ke aá kòʼór fon, wù kù sàʼ. Kiyá kee msaàmbà kìn ki shaa, é kinyo ke wiíy woo sàkì ke á lo, a yòv, a taŋ e lùŋ fèn ki nèn kòóy Taya, a kí dzə̀ jii:

¹⁶ Éè wò woo kindzə̀n ke sàkì, wò wo vé‑eè sí ŋwáy ŋwayín, kfən lì lúŋ yée, a kùm, a kaarí mvəmlaʼ sho. Á kùm bèn, a kwayír jí yòv, lóo yòv, à wàa kuvsín yòv. Kú a yòv, é kí fiʼ yìmrì wíri, aá wáa kuumé wò.

¹⁷ Kiyá ki wíy shaà msaàmbà, é Nyùy Tàr kfən sə̀ʼə́r kimbùŋ ké ŋgeʼ fo wír veé Tayàá mbèʼ. Áwune kfə̀n wíy a kavnín wáy, a ghan vitúm vidzə̀m veé kitu ke nsay, é mbàm si wáa nəə́ áwune.

¹⁸ Yii bèy, á wíy yiì, é vikuʼùy vév ví kfə́n ji vé Nyùy Tàr, à séʼ wov shó. Á yòʼ wíy lèm e vitàv ji á wíy a yiì vinyo sho e ghan se sí wiyì, a bó á yòʼ wíy lìtì ji fo wìr kum. Bùʼ və̀n wíy dù a dzə̀ e wír ve á lim e Nyùy Tǎr lavi, aáwune wáa yun viyíkìr nyanyày, a kur ndzə̀y a kù dzə̀ fó fo.