Biblia Todo Logo
Bìoball air-loidhne

- Sanasan -

Aysaya 22 - ŊWÀʼ NYÙY


Ntum yee kùm Jerusalem

1 Sáʼ Nyùy yee kùm Jerusaleme rə̀ne, Jerusalem wo dzəə̀n kiwoóy ke mò‑oò yenen é njà kinjeenjèm. Sáʼ rə̀ne dzə̀ jii: Vèn kóʼ e věn vikfəv ve lav, yí ŋkàʼ fó bèy, kwaʼtì ji vèn yii a dzə̀ ka?

2 Kiyor ki kù sí kóʼ virə́ʼ vidzə̀m, a ŋkàlaʼ dzə̀m kù sí biŋrì bìŋrìn, a mvə̀mlaʼ e dzə̀m kù sí shéʼri rə́r se á bòyìn fó fo. Yii bèy, a bó wír vén ve á yén ji á kpù é shùu rərí yoʼ kpù yé rər, a bó áwune yoʼ kpù a dzə̀ yé nyùy rə̀r.

3 Vé saʼ véné tàtí ne adzə̀m, e nyèŋkír nyeŋkín. Vé‑eè koòrí áwune, a bó á yoʼ fə̀m màʼ mvən. Vé‑eè jùm vé saʼ vén, e tàtí, e koòrí adzə̀m, a koorí, aá kì dù ne ntàmda.

4 Á kinyo ke kí yiìn, é bo mo woo ŋgaà yen wáa suŋnín e wíri, a suúy jii, «Vèn maʼti mo bey, m kér fó a dìy e ŋàŋ, a jeetí, bìʼ fo á laàrìn ne wír vém. M lóo dìy, lá wìr yòʼ a mùm ji wun sə́mér mo.»

5 Rúrú, yiì Nyùy Tàr woo Taà Mànjòŋ, wun woo Taà Ndzə vinyo vìn. Bìʼ bey, mbvəərì sì é kiwoóy fen, kíwun ke mò‑oò yenen é njà kinjeenjèm, a wíri fan, nyéŋ, yaʼà. Vé‑eè kèr ne virə́v vé kày vidzə̀m, wíri wáa toŋ ji á sə́ á áwune, kiléŋléŋ kí wáa dù, a meé aàgwan.

6 Vé rərí‑iì wiy fo Elam, béʼ ŋkòʼ sé mvə̀n. Wiy, aá kóʼ *viténtén vé rər, a vé nyàm se ŋkoʼo wiy e vitu ve nyàm. Vé rər veé Kiri‑iì wiy kibáʼtín aàŋkeè véví wo wo.

7 Viténtén vé rər ví‑iì rùn mboʼ sén se sí néŋ e leŋ sidzə̀m, vé rər ve á kóʼ nyám se ŋkoʼo wáa tiy e věn shuù se kày, a teʼ ven.

8 Kí‑iì kooy e ghan fóo fèy, a Nyùy Tàr fə́tí ne wó rə́ fó kìŋsìn ye wù kiŋsìn wír veé Juda, a vèn kù dzə́ kén, yoy, tiir a dzə̀ é vifa ve rər ve vèn‑eè lèmèn é lav ye á yoŋ ji kóv.

9 Vèn ló fó fo, e lèéy vintóʼ ve ví dzə̀kìn é wǔn kày ye yí giŋ Jerusalem woo ŋkàlaʼ Davir, e kfə̀n lì ndzə́v ji yí fíʼ a leŋ, a nəə́ e kisə̀m kee fó tsən.

10 Vèn‑eè ghàn, e shwèʼ lav seé Jerusalem, e sàʼtì símóʼ sí, e lì tíy fó fo, e lùŋ kay yeé ŋkàlaʼ sho.

11 Vèn kfə̀n‑eè fèr kisə̀m é kintìntìn ke virəv vé kày, e fèr ji mendzə́v mè lóo leŋ fo kisə̀m ke mvə kí, é mè wáa nəə́ sho. Vèn‑eè yii vinyo vìn vidzə̀m, a bó vèn yòʼ dzəə́ mbaa wun woo Ŋgaà wo wù yii, é bo vinyo vìn vi wáa koóy. Vèn yòʼ‑oò ló a yòy, a tiír e wun wùn, a kù dzə̀ wun wo wù‑uù sìysìn ne vinyo vìn fo yàŋgùʼ.

12 Yì‑iì dzə̀ é ghan fóo fèy, Nyùy Tàr woo Taà Mànjòŋ, wun woo Taà Ndzə súŋnín, e sùúy jii: «Vèn wáa toŋnín, a dìynìn. Vèn kwaay vitú vi, e màʼ ndzə̀y sé kpu si.»

13 Á bèy, a vèn kù sev kén sévin, yí ŋkàʼ sí, seéri nyám si, seéri anjiì, yí vitú, nóninè, sév jii, á kú a yi yiín, a no noón, bìʼ fo a tàm kibvəə́shí, á kpùkír.

14 Yii bèy, Nyùy Tàr woo Taà Mànjòŋ tòʼór ne vinyo vén e mò. Wù yòʼ wíy làysìn vinyo vén ve bi ví, e dù, e meé mo vèn wíy kpu. Á ke Nyùy Tàr woo Taà Mànjòŋ suuyin, wun woo Taà Ndzə.


Á roomè Shebna

15 Nyùy Tàr woo Taà Mànjòŋ, wun woo Taà Ndzə‑əə̀ sùúy e mò jii, «Dù cér e ntoʼ, e dù yèn Shebna woo nshìylav ye kuʼùn, e roòmè, e sùúy sho jii,

16 ‹Jwè, Shebna, à mùm a dzə̀ ka kin fèn? À kwaʼtì ji à dzə̀ ké la, e bó a bùʼ say fèn, yee bùʼ é kilan ji yé? Abaày, à lò bèn, e bùʼ say yé, a dzə̀ é kirə̀ʼ kee fó yuv, e bònén bèn, e bùʼ e wǔn kilan ji á fo á wíy dzəə̀mè wò à?

17 Yuúrí, e yù, Shebna, wò woo mfáŋgúm, Nyùy Tàr wíy ghar wò bèn e wo ye tavíné, e tuʼ fo fèn, e rəə́r e ròŋ.

18 Wù wíy bootí wò, e rəvír, áà du, e gbù kwaʼda e kirə̀ʼ keé ŋgèŋgèr. À wíy kpu fo, e wò ghaa vitentén vé rər. À kpú, é viténtén ve à kóʼ sho, wíri wàa ghvəm wò vi kfə́n ji kifá ke nshoórmé ki é ntoʼ.›

19 «Nyùy Tàr suuy jii, ‹M wíy sèn wò fo wò ntaʼ, e feér wò fo wò kikòʼtìn ke lìm.

20 Wíy lòo dzə e ghan fóo fèy, é m toóy wir lìm wom woo Eliakim woo wan Hilkia ji wù wàá wiy.

21 Wù wiyì, é m li ndzə̀y sé seé ntoʼ, e màʼ e wun wùn, e lì kikuúví ké, e kùr e wun sar, bo sì ji m sə̀ ne vitaáví vé, e fò e wun. Wù wíy a leéy fo wír veé Judàa, a leéy fo veé Jerusaleme, e kù a leéy bèy mo kitàr kí lèéy fo wàn.

22 M wíy way kimbàʼ ke kí mvəʼ ntoʼ Fòn Davir e wun kiwo. Wù mvəʼə̀, é la wìr wo a dzə̀ wù kfə̀n sə̀tí yòʼ a dzə, sə́ti, é la wìr wo a dzə̀ wù mvə̀ʼ yòʼ a dzə.

23 M wíy tuúy sáʼ rə́, é wù táv moo mban ye á kùmèn é wǔn lav, a bó yòʼ dzə̀ wìr wìy sə̀ʼ wun fo wun lìm. Wíri wíy a ghvəm kfə́ə tàr wov bìʼ wun,

24 a wír vee tàr wóv kfəə kù wíy a yeʼtí e wun wùn, à wóné, aàfə́rí. Á kù wíy a njeŋtín mo á keèrì vighín wùn à mbìʼ sí.›

25 «Yii bèy, Nyùy Tàr woo Taà Mànjòŋ kú a shaà fo mbìy, a suúy jii, ‹Ghán sí wíy gheén, é mban ye vé‑eè kùmèn, yì táv kijuŋ rə̀n shóʼóm, e gbù fo nsay, é kifá ke kí‑iì kér sho kidzə̀m ki gbu, e bvə̀ʼə́y.› » Suuy a wun woo Nyùy Tàr vinyo vìn vidzə̀m.

© 2022 CABTAL

Lean sinn:



Sanasan