Aysaya 19 - ŊWÀʼ NYÙY

Nyùy wíy màʼ ŋgeʼ e wír veé Ejiví kitu

¹ Sáʼ Nyùy yee kùm Ejivi rə̀ne. Yí dzə̀ jii: Vèn yuúrí, Nyùy Tàr sí du e Ejiv, a wù du a dzə̀ é mvə̀m mbàʼ ye yì shaa ji ghàár. Wù yíi meé fo, áànyùy veé Ejivi wáa fàn, a yàʼ, é tím wìr dzə̀m woó Ejivi kpú, e rə̀.

² Nyùy Tàr suuy jii, «M wíy bayír wír veé Ejiv, aá wáa fùnèn áwune áwune. Wìr kfəə wíy a fùnèn wùmòʼ, é wìr wáa fùnèn ŋgaà və shùu lav. Ŋkàlaʼ wíy a fùnèn yìmòʼ, é wír fòn wùmòʼó wáa fùnèn vé wùmòʼ.

³ Wír veé Ejivi yòʼ kfə̀n wíy a ker melív mé a taamé kifá sho. M kù wíy a bvəə́r antaŋ vév bvəərín. M wíy bvəə́r antaŋ vév. Bìʼ bey, aáwune nèn kù a tàʼ ntir a dzə̀ fo anyùyi, a tàʼ fo wír ve á mbaa aŋkfəə. Á wíy a dù fo vé ŋgàŋe, a dù fo wír ve á shwéŋ vinyóo.

⁴ M wíy fo áwune atǎr saʼ, a dzə̀ ve á wáa nə̀ʼsì áwune. Fòn wíy a saʼ áwune, a sáʼ rəə́ wíy bir e ŋàŋ. Suuy mo, Nyùy Tàr woo Taà Mànjòŋ, vinyo vìn.»

⁵ Ndzə́ví wíy yum fo ndzəv ye kuʼùn yee Naay, e yum bèn, é fóo káŋrí kaŋrín.

⁶ Ndzə́v seé Ejiv si wíy lòo shùŋrìn, lóo yum, é ndzə́v yee Naay wùn à mewón me ndzə̀v mè kfə́n ji kicòó, a shàŋ shàŋèn. Ŋkiʼ wùn à viŋgà ve darkìn ví wíy yum fo meshavtí wó.

⁷ Vikwiíy ve ví yii teʼ e ghaa meshavtí me Naay vi wíy yum, e yum bèn, e dù, e meé mo Naay nəə e rìbà ndzə̀v. Vifá veé sum ve á lìmèn é ghaa meshavtí ví kù wíy yum, yúmé, é shwéri feér, e dù sho, é la kfə̀ʼ yòʼ bèr.

⁸ Wír ve á koó sə́ adzə̀me wíy a dìy, a jeetí. Wìr dzə̀m wo wù maʼ lóv wíy a ka ndzə, é ve á maʼ láláne wáa dzə, aá wày kiwó e wìr shuù, la wù yòʼ lùm.

⁹ Yì wíy sən wír ve á bá ndzə̀y e làv, e làŋsìn, é ve á tsə́m ndzə̀y e làv wo fəvírí wáa yaŋyáŋ.

¹⁰ Melív me wìr dzə̀m ve á bá vifá mè wíy seèm. Vé lìm adzə̀m ve á lim mbàme wíy a dzə e mensíy mè si.

¹¹ Ké ru kí, vé saʼ veé ŋkàlaʼ yee Tsoane yùŋsí feyì. Vé ntir ve á tír Faraòo tír wun e kiyúŋ kí. Vèn jwe, vèn ghàn é le, e bó a bùn fon, é wìr wáa suúy ji yì‑iì yèʼéy afií wun, a wun ràm fo afon ve vé‑eè sáʼ fo yàŋgùʼú?

¹² Farao, a dzə̀ rú ji fòn kér wír ve dzəə̀n afií, bo á sà bèékír lèn a? Aá dzə̀, fòn dzə̀r, aá naari á kinyo ke á tàrìn, e yèn. Kinyo ke á yenen ji Nyùy Tàr woo Taà Mànjòŋ wày ji wun yii e Ejiv.

¹³ Vé saʼ veé Tsoane yii kinyo kiyúŋsì kiyúŋsì. Kitan ke vifii kí koò ne veé Memfis. Visən ve wìr veé Ejiv vi dànèr ne kitúm, kí jáy dzə́ə.

¹⁴ Nyùy Tàr bvə̀ə́r ne vifií vé atǎr saʼ veé Ejiv, á tóvsín woŋ, vinyo vidzə̀m vi dú kintéŋ, wíri wáa tùŋkìr moo mfoòkìnó wo wù màʼàn, a lèrìr, a to sho.

¹⁵ A fə̀m dzə̀ taà saʼ, kìn wír woo və̀y, a fə̀m dzə̀ ceʼ wìr, kìn tànfóneèrshwín, bo wìr yòʼ kfə̀n dzə̀ é Ejiv wo dzə̀ á nò shindzə́v fó fo.

Wír veé Ejivi wíy a cù Nyùy Tàr

¹⁶ Vinyo vìn vi wíy lòo koóy, é wír veé Ejivi wáa fàn fan moo vikìy. Nyùy Tàr woo Taà Mànjòŋ wíy nàn kiwó ji wun sí dzəv áwune shó, é fan ye tavíné sum áwune, aá wáa yàʼ.

¹⁷ Woŋ Judàa kù sí wìy a beemé wír veé Ejiv beémén. Wìr yoŋ kinyo kee kùm Juda yóŋen, é tímé kpú fo áwuné bvə̀m. Kí wíy koóy bèy, a dzə̀ bìʼ kinyo ke Nyùy Tàr woo Taà Mànjòŋ báʼti ji wun yii aáwune vee wír veé Ejivi.

¹⁸ Wíy lòo dzə e ghan fóo fèy, é wír veé Ejivi wáa ker ŋkà se laʼ sitàn se wír vee fóo súŋnin Lám Hibru, táti vitú vév, fó e Nyùy Tàr woo Taà Mànjòŋ, yú fo fo. Á wíy a yòŋ ŋkàlaʼ fo ŋkà se laʼ sìn si jii, Ŋkàlaʼ Shùy.

¹⁹ Wíy lòo dzə e ghan fóo fèy, aá bóm kíy cù e Ejiv, a dzə̀ fo á wíy a ghvəm Nyùy Tàr. Á wíy tuúy tíy é bìíy wòŋ, e fíʼ dìn ji á ghvə́m a Nyùy Tàr.

²⁰ Kù wíy a dzə kisəəm ke kí din ji wír veé Ejivi cu Nyùy Tàr woo Taà Mànjòŋ. Kí wíy a dzə jii, aáwune wìy lò, a toŋ ji Nyùy Tàr sə́ áwune, bìʼ aŋgaà vév vibàn ve á nyavrì aáwune, é Nyùy Tàr ku nèn tsə̀nsí wír wo wù boyir áwune, e fə̀ə́r fo aŋgaà vév vibàné wo.

²¹ Nyùy Tàr wíy dìn kitú kfə́ e wír veé Ejivi. Á bèy, é wír veé Ejivi kiíy rú ji Nyùy dzə̀ á Nyùy wov. Áwune wíy kiíy, a wìy e nyám si wùn à vifá veé sum ví, a cù wun sho. Á lo, aá kfə́n a kàʼ wun e vinyò vímóʼ ví. Kaʼà, aá ku yiì kíwun.

²² A kí kòóy ji Nyùy Tàr maʼ ŋgeʼ e wír veé Ejiví kitu, bo wù kù wíy màʼ. Wù maʼà, é wù kfən tsə̀ʼ fo áwuné kitu. Á wíy kfən e bàm fo Nyùy Tǎr wùn, a lon wun. Lóné, é wù yú tóŋ yév, e fèr áwune.

²³ Ghán see shooy si wíy gheén, aá túŋ kimà ké dzəə, é kí lo fó Ejiv, e lìysín e Assiriya. Wír veé Assiriyàa wíy a ghan, a dù e Ejiv, é veé Ejivi wáa ghan, a dù e Assiriya. Áwune wíy tatí wír adzə̀m, a sùyrì Nyùy Tàr.

²⁴ Wíy a dzə e ghan fóo fèy, é Isray tátí vitúm vee Ejiv wùn Assiriya, aáwune wáa dzə ŋkèʼ yev e mòʼón, a vitúm veé kitu ke nsay vi wíy a ker kisəəvì, a dzə̀ bìʼ áwune vee ataár vìn.

²⁵ Nyùy Tàr woo Taà Mànjòŋ wíy səə̀vì áwune, a yòŋrì amòʼón amòʼón, a suúy jii, «Ven vee wír veé Ejiv, vèn dzə̀ wír vém, a m səə̀vì ne ven. Ven vee wír veé Assiriya, yiì mo e wó yémé, é bo vèn wáa dzə ji kitúm. Ven vee wír veé Isray, vèn dzə̀ rú vém vee wír feyì feyì, wír ve m shoʼon.»