Aysaya 16 - ŊWÀʼ NYÙY

Shwéme sì e wír veé Moaví kinyò

¹ Wír veé Moavi sí túm wíri ji á taʼ á wón njiì fo Sela, aá líysín wóʼ, e dù mbaà taà saʼ woó Sion sho.

² Á ku dù, e tiìsí a jii, wír veé Moavi sàm ne, aá sì é tuumé sé ndzəv yee Arnon, aá kù sì moo menə́n me á kèmèn fó laʼ, mè wáa kàtìr féŋ.

³ Á nen dù, a lon jii, Éè tàr wor, á ku dìn a kinyo ke a dzə̀ vèr yiì, e tìnén a kinyo kér é nsànloŋ. Fòn ku kìŋsìn a ver, é vèr wáa dzə kijuŋ, moo wír wo wù beèn é kindzə̀ə́ndzəm e ntìntìn shùy, a fóo səə́ne, rəsìnè. Ver ve á jùmèn ne vìn, fòn ku lìtì a ver. Lá fòn yòʼ dìn ver e wír ve á jum a verí.

⁴ Fòn ku màʼtì, é ver veé Moav ve á nyeŋen rə́r víne yoyri á e wun nsay. Ké ru kí, dzəə̀ wìr wo wù nyavrì e wíri yíi ndzə̀y, é ŋgeʼ may, é wun woo ŋgaà nə̀ʼsì lay fó wòŋ ŋkuuŋkùŋ.

⁵ Á bèy, bìʼ koŋ ye Nyùy koŋ wír və́, á wíy bùn wír woo Davir ram ji fon, a fòn və̀n wíy a suúy kinyo, e kù a tiy a dzə̀ e kíwun ki. Wù kù wíy a yiì kinyo a dzə̀ kee tìítiy, e way feyì kitávín ji á kú a tinén vinyo e nsànloŋ, a yiì vinyo və́ vidzə̀m a dzə̀ vee réŋ.

⁶ Ver veé Juda adzə̀me kì ji wír veé Moavi dzə̀ vé kiŋkoʼòrwùné. Kiŋkoʼòrwùn kév kí yii, aáwune káy wíri. Yii bèy, a kiŋkoʼòrwùn kév kí dzə̀ là mvə́m.

⁷ Á bèy, wír veé Moav adzə̀me kú a dìynìn. Wìr dzə̀m kú a toŋ bìʼ Moav. Ven ve á loòn ji á ton ven, e tòn e dzəə̀ kisaŋ, vèn wáa dìy, a kuumé vifá ve vèn‑eè nyav e wùn é Kir‑Hareset.

⁸ Vifá ve yi ve ví dzəə̀n é sum seé Heshbon vi yùm ne. Vitiír vé *vayin veé Sibma vi yúm sá. Atǎr saʼ ve á sáʼ vitúme gwàr ne vitiír vé vayin ve ntay vi, vitiír, a tám si‑iì ràm ne, e dù, e mèé e Jaser, e tàʼám, e dù e virə̀ʼ vé woʼ ví, to sə́ sí sáŋrí, e dù, e mèé e rìbà ndzə̀v.

⁹ Mo woo Aysaya ku nèn a toŋ vitiír vé vayin veé Sibma, réŋréŋ mo wír veé Jaseri‑iì tóŋé. Éè wìr veé Heshbon, e lì veé Eleale, m tóŋ, sə́ʼər mensíy bìʼ ven. Vèn lò ne ji á káv vifá, a yu shirəə́, shirəə́, a dzə̀ shé vé rərí, e shaà shé vé ŋkavi.

¹⁰ Kishéʼrì keé ghan sé ŋkav vifa ki mày ne, vijuŋ vee ji vèn sí káv vifá vi yòʼ dzə̀ə́. Yòv mày ne fo sum sé vitiír vé vayin, aá yòʼ dzəə́ ndzə́ʼ fo, a wìr yòʼ dzəə́ nyeŋ tútúʼ e bii ji wun fiʼ kòóy meluʼ. Á màyìr ne kishéʼrì kév, a bó yòʼ dzə̀ wìr kfə̀n a ndzəʼ.

¹¹ Bìʼ vinyo vìn, mendzən me Moav mè sí rə́r mo, a m ká ndzə. Mendzən me ŋkàlaʼ yee Kir‑Hareset mè rə́r mo, nəə e mǒ vighvər.

¹² Kí dzə̀ jii, wír veé Moavi kóʼ ji á du, e cù anyùy vév, du, rə́si ton ghán é virə̀ʼ vé anyùy. Á du, rə́si bunrì aáwuné virə̀ʼ vé cù ntéŋ ntéŋ, á kù dzə̀v a dzə̀ wó e nsay.

¹³ Á ntum ye Nyùy Tàr‑iì tiisin fó mbìy kùm kitúm kee Moav.

¹⁴ Yii bèy, ké lèn ki, Nyùy Tàr súŋnin, suuy jii, «E bǎm viya vitaár, e kèʼ fo lèn, kù mo wìr wo á tsəərin é shùu lìm yii táŋ vishiíy və́ vé lìm, bùʼ woó Moav wíy rèŋ e dzə̀m, aá taʼ kinyè ké wìr vee fó ntéŋ, fə̀m mo vé‑eè dzəə̀n nyanyày. Wír ámóʼó wíy ber fo áwuné mvəm, yii bèy, aá wíy ber wír ashàr, a ber bèy, aá wéʼ ne wéʼen féyì.»