Aysaya 13 - ŊWÀʼ NYÙY

Nyùy wíy màʼ ŋgeʼ e wír veé Babilone

¹ Sáʼ Nyùy ye wù‑uù ghemen ndzə, e fò e Aysaya woo wan Amot kùm Babilone rə̀ne. Yí dzə̀ jii:

² Á kóʼór cícíwàr rər é kitu ke gwan wo wù dzəə̀n é ŋgèŋgèr. Á kóʼorì, vèn jàŋ vé rərí kitávín, aáwune wiy. Á ku kwàr áwune, aáwune nəə́ ŋkàlaʼ, a dzə̀ fó shùu kày woo fo vé mbàme dzə́.

³ Mo woo Nyùy Tàr, m fò ne sáʼ e wír ve m shavin ji á yii lim ye dzəə̀n yémé. M tòóy ne vintav vém vé vé rərí, wír, aá yúʼti wún, a m túm ji á maʼ ŋgeʼ e wír ve á ton shilív shémé.

⁴ Vèn yuúrí mo kiyor ki kóʼ fo agwan, a kí kóʼ mo ko màŋgòŋ wìr nyanyày, a wù ló fó vitum vinín, e kaàrí, a koʼór kiyor. Dzə̀ Nyùy Tàr woo Taà Mànjòŋ mo wù báʼti vé rər və́. Wù báʼti áwune é mfòn ji á du, e màʼ rə́r.

⁵ Áwune wìykìr fo vitum kwaʼda, a ví dzə̀ féyì ji é ndzəywoŋ. Dzə̀ Nyùy Tàr mo wù sí wiy wùn à vé rər vəə́, wiy ji wun din á mo dòʼshwíiy və dzəə̀n, e tatí woŋ, e laàr e dzə̀m.

⁶ Vèn wáa toŋ, a dìy, bìʼ fo kishiíy ké Nyùy Tàr kí siìn fó mentsə̀m, Kishiíy ke wun woo Ŋgaà Vitaàví Vidzə̀m wíy laàr wíri, e laàr bèn à nsay yev shó.

⁷ Á bèy, fáne wíy yiì, é wìr dzə̀m weʼ wéʼen, a bó wìr yòʼ kfə̀n dzəə́ wìy yu fóo yiì kifá.

⁸ Wúné wíy a beemé áwune, é nyári sum áwune mo sòv sòv. Á wíy a buʼ e mvə̀m nyar mo wiíy yù wán. Wìr wíy a leéy wùmòʼ, é shúu wáa ma wun, a wìr dzə̀m kù sí kiʼ fan fan.

⁹ Vèn yuúrí, kishiíy ké Nyùy Tàr kí sí wiyì, kishiíy ke Nyùy Tàr wiy, e màʼ ŋgeʼ e wíri. Wù wíy a màʼ là mendzən, a dòʼshwiíy kív wun kívín. Wù wíy lò e mvə̀m dòʼshwiíy, e siìr kitú ke nsay, é kí kfə́n é woʼ, e laàr vé yiì ye bií adzə̀m ve á dzə́ fo.

¹⁰ Mejiy mè yòʼ wíy a ran e kishiíy fóo fèy, a fə̀m dzə̀ me mè dzəə̀n é kikamkám. Shùy wíy lòo to, é kifá ki sə́tí, a bó ŋwee yòʼ wíy a ban.

¹¹ Nyùy Tàr suuy jii, «M wíy màʼ ŋgeʼ e kitu ke nsay, bìʼ liì kisaŋ wo wíri yii, e lovtí e wír ve á méŋ moó bìʼ vinyo ve á rə́si buʼtì. M wíy səʼə́r kóy wìr ve á yén ji wìr wùmòʼ yòʼ kfə̀n dzə̀ moo áwune, e sə̀r wír ve á guynìn, aá yòʼ fó shiŋkfəŋ e wìr.

¹² M wíy fàr wíri, aá wáa dzə e kibuŋ, e shaà *kisha ke mbàm ke baar kí ke á shèŋrìn, jòkìnyàʼ, kisha ke mbàm ke baar ke kí loòn fó Ofir.

¹³ Kí wíy bir, e meé e ntìm ye m yii, é yúví wáa sə̀ʼ. M wíy sə̀ʼsì kitú ke nsay, é kí səʼ fo wun kinsə̀ŋ. Mo woo Nyùy Tàr woo Taà Mànjòŋ wíy jevrí e kishiíy fó, kí li njáŋ, é vinyo vìn vi nèn kòóy.»

¹⁴ Kí dzə̀ jii, wíri wíy a leʼ, kù mo njà lèʼ vé jwime, a leʼ moo njiì wo wù yòʼ kér wír wo wù báʼti. Wìr mòʼón mòʼón wíy a leʼ, a dù aáwuné laʼ, aá tátí wir dzə̀m, a leʼ, a dù aáwuné wòŋ.

¹⁵ Vé rərí wíy yen wír, a wù taʼ, e leʼ, aá sovti, e yùyrí. Ghár wír e kiwo, é ŋgaàŋ ku kpù yé mensəə.

¹⁶ Á wíy a lì wón wìr ve á koon, a dzə̀v e vilan, a yuyrí aàtàrí si. Á wíy kivtí lav sév, e kuúy kifá kidzə̀m, a ghatí vikìy vév aáwuné si.

¹⁷ Nyùy Tàr suuy jii, «Vèn leéy, m sí báʼti wír veé Media ji á ghíʼ veé Babilon, a bó yòʼ dzə̀ áwune biìmé kisha ke mbàm ke fəvír ke á fó, a bó áwune yòʼ kér shií é kishà ke mbàm ke baar kí.

¹⁸ Áwune wíy a terí vé rər vee wónlě nsùm e mvəne, a yuyrí. Á yòʼ wíy a rər mendzən me wóné. Á wíy yen wán, a wù fə̀m dzə̀ e bór, é la á yòʼ shàm.»

¹⁹ Babilon dzə̀ kitúm, a kí bòŋ, e shaà vitúm vidzə̀m, a dzə̀ vikuʼùy ve wír veé *Kaldeàa túy shwín shó, a Nyùy kù wíy laàr ŋkàlaʼ yev mo wù‑uù laàrìn Sodom wùn Gomorra.

²⁰ Bó wìr yòʼ kfə̀n dzəə́ wìy a dzə e ŋkàlaʼ yee Babilon, mo ŋgwàʼ rə̀y wíy a mày, é rə̀y wáa koʼ. Bó beèshaà yòʼ fə̀m wíy tam táv fó, é bo anshìyi wáa dànèr njiì e nsay foo fèy.

²¹ Kù wíy a dzə nyám se kwaʼ fo. Lav see fó si dzə̀, a wíy a dzə jwí se kwaʼ si shó, é viŋkfə̀y vi wáa shiíy sa fo. Kù dzə̀ fó, fo bvə́y se kwaʼ si wíy a ghan, a liynín.

²² Wíy a nyàmkìr akuúrá é virə̀ʼ vee fó ve tavkín ví, a ví sì é vifə̀m. Ntoʼ see fó se vé‑eè bomen, a yu vijuŋ sho, é wáa toŋnín viŋgày ve sìm fó. Ghán se kinyo kìn ki wíy a koóy Babilon si sì fó mentsə̀m, a ntàm yòʼ kfə̀n‑éè dar.