Aysaya 11 - ŊWÀʼ NYÙY

Sáʼ ye yí kér nyaáŋ

¹ Á bèy, taà saʼ wo fíy wíy fəə fo Jessi woo tàr à Fòn Davir ram, rám, a yí sì moo kicí ke á bàʼàn, ku gòʼ kiŋkfəy ke kinyè. Rúrú, kí wíy tokír, é tám wo fíyi fəə́ fó ghaŋ fóo fèy, a kuy.

² Kiyoy ke Nyùy Tàr kí wíy a dzə wùn wun, a dànèr wun. Kí wíy fo wun vifií ve ru ví, e yiì, é wù wáa kiíy jeéyjeéy fó kinyò, e kfə̀n yiì, é wù wáa dzə ŋgaà saʼ wo ghaʼán, a kiíy mó a kwàŋrì vinyo veé wòŋ. Kí wíy yiì, é wù kiíy Nyùy Tàr, a ghvəm wun woo Taà Vitu.

³ Vifií vé taà saʼ və̀n vi kù wíy a tiy a dzə̀ é ghvəm ye wù ghvə́m Nyùy Tàr. Bó wù yòʼ wíy a tinén kinyo, a leéy sí wìr, a bó wù yòʼ wíy a yuurí kisùúyjii, e bó a kwàŋ nsaʼ.

⁴ Wù wíy a tinén kinyo ke aghéʼncey é dzəə yee réŋ, a kìŋsìn gháy alàŋgaàbenben vee wun nsay. Wù wíy fəə́r sáʼ, é yí maʼ ŋgeʼ e vé jayí kitu, súŋnin sùŋnín, é wír ve á méŋ Nyùyi kpúkír.

⁵ Wù wíy sə̀ntì kinyo kee réŋ kí ji kikuúví kee wun mentìntìn, a kur ndzə̀y sə́ a dzə̀ vinyo ve ru ví ve wù tíy sho ghán sidzə̀m.

⁶ Wíy lòo dzə e ghan fóo fèy, áàkoosàʼa wáa dzə e wón njìí mvəm là kinyo, é abáa wáa neŋnín wùn à wón bvəyi kirə́ʼ kimòʼón. Abvərə̀ʼə́ wíy a dzə wùn à wón nyàme, a dzə wùn à vinsòŋ ve nyàm vi kirə́ʼ kimòʼón, a wíy a shìy wón ve bóri áwune.

⁷ Nàʼ wùn à nyàm ye bi yee *bear wíy tatí, a yi viŋgà, é wón véví wáa neŋ kirə́ʼ kimòʼón. Bvərə̀ʼ wíy lò, a kfər viŋgà moo mbòŋ.

⁸ Shiwán shibór shi wíy a baa kibaá e ghaa mfìŋ sé abúv là fan, a tsənsí kóy e mfìŋ sé vifiy, a bó yòʼ dzə̀ yò wìy tè.

⁹ Gwan Nyùy Tàr wo ranén dzə̀, a fan yee ji á lémér wír, kìn ji á laar wune yòʼ kfə̀n wíy a dzə fo. Wìr dzə̀m kù sí wìy a tiy a dzə̀ e Nyùy Tǎr kinyò, e kiíy wun bèn e mbòŋén. Kiíy rə̀ne wíy sàmèr wún, kù moo rìbà ndzə̀v wo wù taʼamen, e dù.

Wír ve á dzəə̀n é kwaʼ nsàmé wíy kfən e bàm

¹⁰ Ghán sin si wíy gheén, é taà saʼ wo fíy wo wù wíy fəə fo Jessi ram tiím moo cícíwàr fo wìr dzə̀m woó kitu ke nsay. Vitúm vi wíy a mèʼèm, a wìy, a yen wun e wun kirə̀ʼ ké dzə, a ghvəm wun.

¹¹ Wíy lòo dzə e ghan fóo fèy, é Nyùy Tàr ramsi wó rə́, e kfə̀n sə̀ kibér ke wìr və́, e siìr, é kí kfə́n é bàm fó kwaʼ nsàm. Wù wíy siìr áwune, aá kfə́nkír é bàm fó vitum vinín. Á wíy kfənkír fo Assiriya, à fó Ejiv, à fó Patros, à fó Etiopia, à fó Elam, à fó Shinar, à fó Hamat, e lì veé vitum ve ví dzəə̀n é ŋguùŋè rìbà ndzə̀v, à ve ví dzəə̀n é mvə̀m ndzə̀v, a ndzə́ví kaárí, e tàr ví.

¹² Nyùy Tàr wíy nàn cícíwàr ji vitúm vidzə̀m vi fiʼ yèn, nanè, é wù báʼtí wír veé Isray ve vé‑eè jùmèn fo áwuné nsay. Wù wíy baʼtí wír veé Juda ve á dzə́ e vitum vímóʼ ví vinín, aá wiykir fó buu se ndzə sidzə̀m, e tàr kirə́ʼ kimòʼón.

¹³ Bó wír veé Efrayime yòʼ kfə̀n dzəə́ wìy a yu nyár wìr veé Juda, a rə́r se wír veé Judàa maʼ veé Efrayim sho si wíy seéy. Wír veé Efrayime yòʼ kfə̀n dzəə́ wìy a tàʼ kinyè ké wìr veé Juda ntéŋ, a bó wír veé Judàa yòʼ kfə̀n dzəə́ wìy a dzə aŋgàa vibǎn wìr veé Efrayim.

¹⁴ Wír veé Efrayim wùn à veé Judàa wíy suusín, e ghiʼ wír veé Filistia e rə́r sí, áwune ve á dzə́ e sar se agwan, e mbìv yee fo shùy yii nəə, e kfə̀n kuúy vifá ve wìr ve á dzə́ e mbìv ye shùy yii tó fo fo. Á wíy boŋ wír veé Edom wùn à veé Moavi, a dzə̀ e kiŋkoòvì ki, é wír veé Ammone wáa neŋ a dzə̀ aáwuné sar saʼ.

¹⁵ Nyùy Tàr wíy yumér ndzə́v yee Naay, ndzə́v, a yí táʼám, e yì nsay, e bóo nəə́ e rìbà ndzə̀v woó Ejiv. Wù wíy nàn kiwó, kiʼ ndzə́v yee Yufret sho, é shwér wo lumèné fəə́, e yùmér. Wù wíy toʼtí, é yí fəə́r mewón me ndzə̀v saàmbà, é wíri fiʼ yù fó a tum e nsay kiyúmér.

¹⁶ Kí kooy bèy, é Nyùy Tàr nèn yiì, é dzəə̀ yee réŋ fəə́sín. Dzə́ə ye ashàr wìr ve á berin é Assiriyàa fəə́ shó fo fo, réŋréŋ mo wun woo Nyùy Tàr‑iì kivin dzə́ə, wír veé Israyi fəə́ shó fo wòŋ Ejiv.