Atǎr Nsaʼ 8 - ŊWÀʼ NYÙY

Á máysí, e tòn wír veé Midian

¹ Wír veé Efrayime ló, e dzə̀r e Gidiyon jii, «À mùm kin e vèr a dzə̀ ka? Wò‑oò lóo dù ji à du, e fùnèn wír veé Midian, e làa yòʼ yòŋ e vèr bìʼ ka?» Á nèn a roòmè wun, a kí nyár áwune féyì.

² Yii bèy, wù bìnèr jii, «Aá kì bìʼ fo kin ki, bo m yiì a dzə̀ ka, e shaà ke vèn yiìn ne? Bó vifá ve wír veé Efrayime siyin síyín ví yoʼ bòŋ, e shaà ve kfə́ə Abieseri kavin kávín a?

³ Nyùy wày ne Fòn Orev wùn Seev veé Midian e věn kiwo. A dzə̀ m wàa fìʼsìn vèsən ji m yiì ne ka?» Mo wù suuyin kin, dòʼshwíiy wov nèn kpùrín.

⁴ Gidiyon wùn à wír və́ vee ghii taári nèn tùm ndzə́v yee Jordan, a tum, aá dórkír ne, yii bèy, e kù shaà fo mbìy, a jùm aŋgaà vév vibàn.

⁵ Á meé é ŋkàlaʼ yee Sukkot, wù suúy e wír vee fóo jii, «Vèn ku fò vé rər vémé ntuʼ se kiban, aáwune yí, bìʼ fo áwune sí toóŋe toòŋén. M dzəə́ jum Seba wùn Tsalmunna vee afon veé Midian.»

⁶ Vé saʼ veé Sukkoti bìnèr jii, «Seba wùn Tsalmunna sì e věn wo à, é bo vèr wáa fo vé rər vén kibán?»

⁷ Gidiyon bìnèr jii, «Rúrú, ku màʼtì, ghán sí yíi gheén, Nyùy Tàr wáy Seba wùn Tsalmunna e mǒ kiwo, é m taʼ ŋgwàn njoŋe wùn à vimbìn ví fó kwaʼ, e shòʼóy jáv sho fo věn wùn, é vèn yú mo á koó.»

⁸ Wù lò fo fo, e kòʼ é Penuel, e kfə̀n lòn sá áwune réŋréŋ. Á bèy, wír veé Penueli ku tè sá a dzə̀ lám réŋréŋ mo wír veé Sukkoti kì teen.

⁹ Gidiyon nèn sùúy e wír veé Penueli jii, «M du, e tòn áwune, kfə́n e bàm, é m nèn kèr kirùmèn ke vèn bomen kin.»

¹⁰ Yì‑iì dzə̀ é ghan fen, a Seba wùn Tsalmunna dzə̀ é Karkor wùn à vé rərí moo nsə̀kì nshòv tàn e ghvə̀m (15,000) bèy. Kù‑uù dzə̀ shishàr wìr wo wù‑uù berin fo áwuné mànjòŋ, woo wír veé mbìv yee fo shùy yii tó, aá yúyrí ne wír vév nsə̀kì kishóv mbaà e wiì (120,000) é shùu rər.

¹¹ Gidiyon nèn kòʼ a dzə̀ fó dzəə ye agàyi yii shaa sho, e ŋkìʼnìn Noba wùn Jogbeha, fo mbìv yee fo shùy yii tó, e sùm vé rər viy fo e kimbùmmbúm.

¹² Seba wùn Tsalmunna vee afon veé Midiane nyéŋ, Gidiyon jùm áwune, e koò. Vé rərí bvəə́rí, a nyeŋkír.

¹³ Gidiyon woo wan Joash nèn a kfən e bàm fó kwaʼ rər, a wù kóʼ dzə́ə fó bam Heres.

¹⁴ Wù lòo wìy, e koò wánlè nsùm woó Sukkot wùmòʼ, a dzətí vinyo sho, e lèvtí, wù sáŋ yír sé vé saʼa veé Sukkot nshòv saàmbà e msaàmbà.

¹⁵ Wù nèn dù, e yèn vilìmbìy veé Sukkot, e dzə̀r aáwune jii, «Vèn dzəə́ kuúme ji vèn‑eè tèn fóo sə mo á? Vé rər vémé‑eè dòrkír, vèn tén fóo fo áwune viyíkìr ji bìʼ fo m yóʼ ne tòn Seba wùn Tsalmunna. Àshè, kí áwune víne.»

¹⁶ Wù nèn lì vilìmbìy veé mvə̀mlaʼ, e kfə̀n tàʼ ŋgwàn njoŋe wùn à kimbìn kí, e dìn áwune kinyo sho.

¹⁷ Wù lò fo fo, e kèr kirùmèn keé Penuel, e yùyrí wír veé ŋkàlaʼ foo fèy.

¹⁸ Gidiyon lò, e dzə̀r e Seba wùn Tsalmunna jii, «Vèn ku naàrì e mò kfə́ə wìr ve vèn‑eè yuyrin é Tabor.» Á bìnèr jii, «Yì‑iì dzə̀ kfə́ə wìr vee moo wò bèn. Áwune adzə̀me kù‑uù shwínin a dzə̀ kfə́ə wón ntoʼ.»

¹⁹ Gidiyon njáʼám jii, «Héèy, wír vee shooyi‑iì dzə̀ afə́r vém, wón yè wor féyì feyì. Mo Nyùy dzəə̀n shó, a vèn‑eè màʼtì áwune, e làa yòʼ yuyrí, bo m kì bàvtí ven lèn.»

²⁰ Wù suúy bey, e bìnkìr, e yòŋ e Jeter woo wán və mbìy jii, «Ŋáʼáy, e yùyrí áwune.» Yii bèy, la Jeter yòʼ shòʼ nyùy rə fó kiburúʼ. Wù‑uù fanè, bìʼ fo wù‑uù dzə̀ə́ wánlè.

²¹ Seba wùn Tsalmunna nèn sùúy e Gidiyon jii, «Lá à yòʼ a fo lim ye kì dzə̀ lìm ŋgàywìr e wánlè. Wówò, ŋáʼáy, e yùyrí ver.» Á bèy, Gidiyon ŋáʼáy, e nèn yùyrí Seba wùn Tsalmunna, e nèn shòʼtí vifá ve sùsù ve ví‑iì dzəə̀n áàkamer véví vilòŋ.

²² Wír veé Israyi nèn yiì lò, e yòŋ e Gidiyon jii, «À kù wíy a saʼ ver, é rám yée ku wìy a saʼ sa fo bàm, bìʼ fo à fəərin ver fo wír veé Midiané wo.»

²³ Gidiyon nèn bìnèr aáwune jii, «M yòʼ wíy a saʼ ven, a bó wón vémé yòʼ wíy a saʼ sa. Kù yíi a saʼ Nyùy Tàr ven.»

²⁴ Gidiyon kú a shaà fo mbìy, a yòŋ aáwune jii, «M kù‑úù lón a dzə̀ kifá kimòʼón cáʼ fo vèn. Wìr mòʼón mòʼón ku fò mo a dzə̀ yèreŋ fo vifa ve ŋgaàŋ‑eè faàsìn.» Wù yòŋ bèy, a wír veé Midiane‑eè wáy ayèreŋ vee *kisha ke mbàm ke baar kí, bìʼ fo yì‑iì dzəə̀n wír vee Ishmael ram.

²⁵ Áwune bìnèr jii, «Vèr ló a fo e kishéʼrì ki.» Á ku nèn sàŋrì ndzə̀y, wìr mòʼón mòʼón wáa lì ayèreŋ fo mvə̀m vifa ve wù‑uù faàsìn, a màʼ e ndzə̀y fey.

²⁶ Á fìʼ ayèreŋ vee kisha ke mbàm ke baar kí, ve vé‑eè foon, vidzəəsì ví wáa dzə kilu nshòv bvə̀ʼə̀ e ghvə̀m e kimbéʼ ki, e bóo lì vifá ve sùsù wùn à ndzə̀y sé afòn veé Midian se sí səə́ne moo yòm si, à visháráŋ ve ví‑iì kér aàkamer véví vilòŋ ví.

²⁷ Gidiyon nèn lì ayèreŋ vìy, e fèr kifá sho e njà shiŋkèéy shé kikum, e lèm e wun ŋkàlaʼ yee Ofra. Wír veé Isray adzə̀me nèn màʼày Nyùy, e wìy, a ghvəm a dzə̀ kifá kìn, kí nen kfə̀n ji kitám ke Gidiyon wùn à kfə́ə rəə́‑əə̀ liìn shó.

²⁸ Á bèy, á mo Isray‑iì səʼərin kóy wìr veé Midian e nsay, vitaáví vév vé rər ví nèn kù mày bèy, e dù meé mo Gidiyon‑eè dzə̀ʼə̀mèn, e wìy a kpu. Nyaáŋ wáa dzə e kitum foo fèy kiyá mkweè.

Kpú Gidiyon

²⁹ Gidiyon woo wan Joash wo yír rə́ yímóʼó‑oò dzəə̀n Jerubbaal lò, e kfə̀n e wun laʼ, a dzə fo.

³⁰ Wù‑uù kér wón vee vilum msaàmbà, bìʼ fo wù‑uù kér vikìy anín.

³¹ A wù‑uù kér wiíy wo lemèn wùmòʼ é Shekem. Wù dzəə́ sá wán woo lumèn e mòʼón, Gidiyon shù yír ji Abimelek.

³² Á bèy, Gidiyon woo wan Joash wáa kpu, a wù dzə́n ne, e kòŋrí. Á nèn dzəə̀mè wun e tàr wov woo Joash sày, e ŋkàlaʼ yee Ofra ye dzəə̀n kirə́ʼ ké rám Abieser.

³³ Kù mo Gidiyon kpuun, wír veé Israyi nen kfə̀n màʼày Nyùy, a cù a dzə̀ mebvə̀m mee *Baal, e nèn lì Baal‑Berit ji nyùy wov.

³⁴ Wír veé Israyi yòʼ‑oò dzəə́ kuúme Nyùy Tàr woo Nyùy wov, wo wù‑uù fəərin áwune fo aŋgaà vév vibàné wo, ve vé‑eè gìŋèn áwune, e tàrí.

³⁵ Fə̀m mo Gidiyon wo yír yímóʼó‑oò dzəə̀n ji Jerubbaal‑iì yiìn vinyo ve juŋ vi e wír veé Israyi, bó áwune yòʼ‑oò ló a ker kfə́ə rə́ kijuŋ.