Atǎr Nsaʼ 6 - ŊWÀʼ NYÙY

Gidiyon bóyír wír veé Isray

¹ Wír veé Israyi kfən lò, a yiì vinyo ve bi ví, a tinsín Nyùy Tàr. Wù nèn wày áwune e wír veé Midiané wo, áwune nə́ʼsí wír veé Isray kiyá saàmbà.

² Wír veé Midiane kù‑uù gháʼ wír veé Isray gháʼán. Áwune nèn lèʼ, e dù, a lìr e mbvə̀ʼ se sí‑iì dzəə̀n áàgwan, a laáy e virə̀ʼ vé kilìr vímóʼ ví.

³ Ghán sidzə̀m se wír veé Israyi‑iì wáy ŋgoòy sév sé vifa e nsay, wír veé Midian wùn à veé Amaleki, à veé mbìv yee fo shùy yii tóo kú a ghiʼ áwune e rə́r sí.

⁴ Vé‑eè lo, á bàʼtí é nsay Isray, nèn laàr vifá ve yi ve ví‑iì dzəə̀n é kwaʼ vidzə̀m, e dù, e bàʼ e Gasa, a bó á yòʼ‑oò lo bèr kfəʼ kifa ye a dzə̀ wìr woó Isray wày é shuù. Áwune‑eè kùúy anjiì vév wùn aàmbòŋ véví, à vimbèʼbìy ví, e làa yòʼ ber kifá.

⁵ Áwune‑eè lóo dù fo, á wàa ker nyám sév wùn à ndzə̀y se vé‑eè du, e tam táv sí shó. Áwune‑eè meʼèm, du wùn aàkamer véví moo ŋguùmé, a bó yòʼ‑oò dzə̀ wìr yù fóo taŋ. Lóo dù, á wàa laàr vifá ve yi ve ví‑iì dzəə̀n é nsay foo fèy.

⁶ Wír veé Midiane‑eè nyàvrì e wír veé Israyi, áwune kfə́n ji kifá ke kisaŋ ki. Á bèy, wír veé Israyi nèn a toŋ e Nyùy Tàr ji wù sə́ á áwune.

⁷ Mo wír veé Israyi toŋen e Nyùy Tàr kùm wír veé Midian bèy,

⁸ wù nèn tsə̀nsí *ŋgaà ntum və fo wír veé Israyí wùn. Wù wìy, e sùúy aáwune jii, «Nyùy Tàr woo Nyùy wìr veé Isray suuy jii, mò‑oò fə̀ə́r ven fó Ejiv, e bòyìr ven fó vikwàn ve vèn‑eè reŋè.

⁹ Mò‑oò faàsì ven fo wír veé Ejiví wo, e kfə̀n fə̀ə́r ven fo wìr dzə̀m wo, wo wù‑uù táy ven, e jùm áwune, e fò nsay yev e vèn.

¹⁰ M kfə̀n‑eè sùúy e vèn jii, dzə̀ mo Nyùy Tàr woo Nyùy won, lá vèn yòʼ a ghvəm anyùy wìr veé Amor ve vé‑eè dzəə̀n é nsay ye vèn dzə́ sho lèn. Yii bèy, vèn yòʼ‑oò lo yùnín mo.»

¹¹ Wáa dzə e kishiíy kímóʼ kí, nshìylav Nyùy Tàr nèn wìy, e dzə̀ʼə̀m e sar kici ké *terebint, e ntèʼ yee Ofra, a yì‑iì kér Joash woo wír woo Abieser ram kicí kin. Gidiyon woo wán və‑əə̀ búʼ saár é bii wo vé‑eè bùʼùn é kilan, ji wun fiʼ lìtì a fo wír veé Midiane.

¹² Nshìylav Nyùy Tàr wìy, e yèn wun, e sùúy sho jii, «Wò woo wír wo tavín é shùu rər, Nyùy Tàr dzə̀ vèn wun.»

¹³ Gidiyon bìnèr sho jii, «Éè tàr wor, a Nyùy Tàr kì dzə̀ rú vèr áwune, bo vinyo vìn vi ghàn é le, e bó a koóy ver? Bo viŋgaʼnìn ve vinyò ve atàr vérí‑iì fiʼtì e vèr ví bèé lèn? Vé‑eè lo, á kù gòʼ ji bó yòʼ‑oò fə̀ə́r Nyùy Tàr ver fó wòŋ Ejiv à? Ké lèn ki, Nyùy Tàr bìn ne ndzə̀m e vèr, e wày ver e wír veé Midiané wo.»

¹⁴ Nyùy Tàr nèn bìnèr e wun jii, «Bó yòʼ tùm mo wò à? Lì vitaáví ve à kér vìn vi, e dù, e faàsì wír veé Israyi fo veé Midiané wo.»

¹⁵ Gidiyon kfən bìnèr sho jii, «Éè Tàr wor, a dzə̀ m ghàn é le, e bóo bòyìr wír veé Isray? Ké ru kí, kfə́ə yémé dzə̀ kfəə́ ye yí njoon e Manasse mvə̀m ràm, a m dzə̀ kém shiwiwìr e tàr wór kfəə.»

¹⁶ Nyùy Tàr suúy shó jii, «M yíi a dzə wòsò, aà yíi laàr wír veé Midian, kù moo ji kì dzə̀ á wír e mòʼón bèy.»

¹⁷ Gidiyon bìnèr e Nyùy Tàr jii, «Aà fen yèn ji m ghèén wò, à dìn mo kisəəm ke kí din ji súŋnin wò e mò.

¹⁸ Kii wò, lá à yòʼ lò fo fèn, a bó m táʼ fómo wò, e wìy sho.» Nyùy Tàr bìnèr jii, «M kù yíi a dzə, e meé mo à yíi kfən e bàm.»

¹⁹ Á bèy, Gidiyon nèn dù e wun laʼ, e nàŋsín wan kibev, e lì meŋkfəŋ ŋkaà fur, e tòn kibán kee là nyaà shó. Wù tón, e nèn wày nyám e ŋkaà, e wày nshèv é ntòn, e nèn wìy sho, e fò e nshìylav Nyùy, e sar kici ké terebint.

²⁰ Nshìylav Nyùy suúy e Gidiyon jii, «Lì nyám wùn à kibán ki, e neèr e kilan, e sə̀tì nshèv é kitu wo.» Gidiyon ku nèn yiì bèy.

²¹ Nshìylav Nyùy Tàr nèn ràmsì kitú ke mbàŋ ye wù‑uù kér e kiwo, yì kùm nyám wùn à kibán ki, və́yí fəə́ fó kilan, e tòn nyám wùn à kibán kìy ki. Nshìylav Nyùy Tàr rə̀y ku nèn lày fo wun si.

²² Gidiyon nèn kìíy ji wun yèn ne a yìwun yee nshìylav Nyùy Tàr, e tòŋ jii, «Éè Nyùy Tàr woo Taà Ndzə. Ábáy, m yèn ne nshìylav Nyùy Tàr e sí yémé.»

²³ Nyùy Tàr ku sùúy sho jii, «Nyaáŋ wáa dzə e wò dzə̀ʼə̀m. Lá à yòʼ a fàn, à yòʼ yíi kpu.»

²⁴ Á bèy, Gidiyon nèn bòm kíy cu Nyùy Tàr fó, e yòŋ kirə́ʼ kee shooy jii, «Nyùy Tàr dzə̀ nyaáŋ.» Kíy cù woo shooyi kù dzəə́ tíy e Ofra, a dzə̀ kirə́ʼ ké wìr veé Abieser.

²⁵ Kú a dzə vitsə́ʼ vee shooy, Nyùy Tàr suúy e Gidiyon jii, «Fəə́r wan nyàm woo lumèn fo tàr wón mvə̀m nyàm, lúm nyàm woo kiyá saàmbà, e kèr kíy cù *Baal wo tàr won‑eè bomené, e gwàtì wúr nyùy woo *Ashera wo wú tíy e ghaŋ woo.

²⁶ À ketì, à bòm kíy cù Nyùy Tàr woo Nyùy won é kitu ke kilan foo fèy mo wú kì kér fó a dzə. Bómé, à nèn bàʼtí vimbéʼ ve wúr Ashera, e tòn e kiy cù, e nèn lì lúm nyàm woo kiyá saàmbà və̀y, e neèr e kitu ke və̀y fóo fèy, e tòn ji cu ye tonèné.»

²⁷ Gidiyon nèn shòʼ wíri e ghvə̀m fo wìr ve vé‑eè lim fo wune, wùn áwune nèn yiì réŋréŋ mo Nyùy Tàr kì suuyin e wun. Wù‑uù yiì kinyo kìn a dzə̀ vitsə́ʼə́, bìʼ fo wù‑uù fan kfə́ə rə́ wùn à wír veé ŋkàlaʼ foo fèyi.

²⁸ Wír veé ŋkàlaʼa bvəə́shí, e ŋàʼáy e yuv kijàvndzə kee shooy, e yèn, aá kétí ne kíy cù Baal, e kfə̀n gwàtì wúr nyùy woo Ashera wo wú‑uù tíy e ghaŋ wo, jòkìnyàʼ, aá kfə́n ne lì mbòŋ woo kiyá saàmbà və̀y, e yiì cu sho e kiy cù wo vé‑eè bomen.

²⁹ Áwune yén bey, e nèn a ghaynín jii, «Mùm la woo ben woo kuv?» Áwune bónén, e tàr, e yèn ji yiì a Gidiyon woo wan Joash kinyo kìn.

³⁰ Wír veé ŋkàlaʼa nèn wìy, e ghàr Joash jii, «Fəə́r wan wò cér, é vèr yúyrí. Wù kèr ne kíy cù Baal, e kfə̀n gwàtì wúr Ashera wo wú tíy e ghaŋ wo.»

³¹ Yii bèy, Joash bìnèr e wír ve á kì ghíʼ wun vìyi jii, «Vèn yíi a màʼ rə́r sé Baal à? Dzə̀ ji vèn yíi a sə wun à? Wìr wo wù maʼ rə́r sé Baal dzə̀ wo á yíi yuyrí, é bo ndzə yiì a ran. A Baal kì dzə̀ nyùy, bo kì yíi a màʼ wun rə́r sə́, bìʼ fo á kètìn a dzə̀ kíy və́ cù.»

³² Kèʼ fo kishiíy fóo fèy, á nèn a yòŋ Gidiyon ji Jerubbaal, bìʼ fo Joash woo tàr wov‑iì suuyin ji á maʼti, é Baal wáa màʼ rə́r wùn wun, ji wù kètì a kíy cù və́.

³³ Wáa dzə e ghan fóo fèy, wír veé Midiane tátí wír veé Amalek, e kfə̀n tàtí ámóʼó sá vee fó mbìv yee fo shùy yii tó. Áwune adzə̀me nèn tùmsín ndzə́v yee Jordan, e bàʼtí e Kiwoóy ké Jesreel, a ghiʼ wír veé Isray e rə́r sí.

³⁴ Yii bèy, Kiyoy ke Nyùy Tàr kí nèn wìy, e bànrí Gidiyon, wù tóŋ sóŋ, wír veé Abieseri yú, e bàʼtí, a dù e wun bàm.

³⁵ Wù nèn tsə̀nsí vé ntume ji á du, e yèn á rám Manasse, à yé Asheri, à yé Sebulune, e lì yé Navtali, e tiìsí a ji vé rər véví ku bàʼtí, e kòʼ, e yèn á wun. Á ku nèn wìy.

³⁶ Gidiyon suúy e Nyùy jii, «Aà fey yèn rúrú ji dzə̀ à yiì, m bòyìr wír veé Isray mo wò‑oò kàʼàn, à dìn kisəəm e mò.

³⁷ Kí dzə̀ jii, a m lì wuy njiì ye á komen, e neèr e nsaàlav ye á yii búʼ saár shó, ŋwéʼe gbu shó, nsaàlav wáa yum yumén, bo m kìíy ne rú ji à yíi yiì, é boyir mo wír veé Isray mo wò‑oò kàʼàn.»

³⁸ Kí ku nèn kòóy bèy. Gidiyon ŋáʼáy é yuv kijàvndzə kee shooy, e lì wuy njiì rə̀y, e kaàmé, ŋwéʼe sə́y fó fo kighín ké mendzə̀v kifur.

³⁹ Gidiyon nèn sùúy e Nyùy jii, «Kii wò, lá à yòʼ shwìíy kilòŋ wòsò. M kfə̀n‑éè lón wò, áà yii kinyo kímóʼ kí kimòʼón. Ké lèn ki, yìi, é wúy njìi yúm, é ŋwéʼe gbu é nsay ye yì kaarin wúy njiì rə̀n e dzə̀m.»

⁴⁰ Á bèy, kù vitsə́ʼ vee shooy, Nyùy ku nèn yiì réŋréŋ mo Gidiyon kì dzərin, ku nèn yùm wúy njiì rə̀y cáʼcáʼ, ŋwéʼe gbú, nsay rə́ e dzə̀m.