Atǎr Nsaʼ 3 - ŊWÀʼ NYÙY

Vitúm ve ví‑iì gòʼòn é nsay Kanan

¹ Vin vi dzə̀ vitúm ve Nyùy Tàr‑iì lèmèn ji wun ghíʼ wír veé Isray sho, áwune ve á yòʼ‑oò ló ne kìíy kinyo kee kùm rə́r é Kanan.

² Nyùy Tàr‑iì yiì kin ji wun fiʼ yèʼéy ŋgwàʼ e mòʼón mòʼón, ye yì‑iì kóʼ e Isray, aá kiíy kinyo kee kùm rə́r, bo taaka ve á yòʼ‑oò yiì ne fəə̀ é shùu rər.

³ Vitúm ve ví‑iì gòʼòn é nsay foo fèy vi‑iì dzə̀ jii, ŋkà se laʼ seé Filistia see sitàn, wír veé Kanan, à veé Sidone, e lì wír veé Hiv ve vé‑eè dzə́ e Gwan Lebanon, e kèʼ fo Gwan Baal‑Hermon, e dù, e bàʼ e dzəə ye yì nəə e Hamat.

⁴ Nyùy Tàr‑iì màʼtì vitúm vìn ji ví ghíʼ Isray, é wun fiʼ yèn ó a ji áwune sà yíi yunín nsər sə́ se wun‑eè foon áàtàr véví, e shaà fo Mooser a?

⁵ Á bèy, wír veé Israyi nèn a dzə wùn à wír veé Kanane, à veé Hiti, à veé Amori, à veé Perisi, à veé Hivi, e bóo lì veé Jebus.

⁶ Wír veé Israyi nèn lò, a lì wón vitum vìn, a wayrí e lav ji vikìy vév, e kfə̀n a ghvəm anyùy vitum vee shooy.

Otniel bóyír wír veé Isray

⁷ Á bèy, wír veé Israyi kù‑uù dzə́, yii vinyo ve bi ví, tínsin Nyùy Tàr shó. Áwune‑eè bìn ndzə̀m e Nyùy Tàr woo Nyùy wov, e nèn a ghvəm a dzə̀ mebvə̀m mee *Baal wùn à mee *Ashera mè.

⁸ Nyùy Tàr nèn shwìíy kilòŋ, e wày áwune e Kushan‑Rishatayim wo, wo yì‑iì dzəə̀n fon wìr veé Mesopotamia, wù tón áwune. Á nén a dzə e wun sar saʼ, wù wáa nə̀ʼsì áwune e mèé kiyá waamé.

⁹ A kí‑iì dzə̀ jii, wír veé Israyi‑iì lòn Nyùy Tàr, wù fó áwune ŋgaà sə, wù fəə́r áwune fo fòn və̀n sar saʼ. Ŋgaà sə və̀n‑eè dzə̀ Otniel woo wan Kenas wo yì‑iì dzəə̀n bám Kalev.

¹⁰ Kiyoy ke Nyùy Tàr kí wìy fo wun, e tàvír wun ji wù wáa dzə tàr nsaʼ wìr veé Isray. Nyùy Tàr yiì, wù fəə́ rə́r, e tòn Fòn Kushan‑Rishatayim woo fon woó Mesopotamia.

¹¹ Á bèy, nyaáŋ nén a dzə e nsay Isray fèy, e dù, e meé kiyá mkweè, é bo Otniel woo wan Kenas wáa kpu.

Ehud bóyír wír veé Isray

¹² Wír veé Israyi kfən lò, a yiì vinyo ve bi ví, a tinsín Nyùy Tàr. Bìʼ bey, Nyùy Tàr nèn yiì, Fòn Eglon woó Moav táv, e shaà áwune.

¹³ Eglon suúsín wùn à wír veé Ammone, à veé Amaleki, e fəə̀ rə́r, e tòn wír veé Isray, e faàsì ŋkàlaʼ ye téné‑eè kúy sho.

¹⁴ Wír veé Israyi ku nèn a dzə e Fòn Eglon sar saʼ kiyá nshòv waamé e ghvə̀m.

¹⁵ Wír veé Israyi lón Nyùy Tàr, wù fó áwune ŋgaà sə, a yì‑iì dzə̀ Ehud woo wan Gera. Wù‑uù dzə̀ wír woó ram Benjamin, a dzə̀ ŋkoòvì. Wír veé Israyi túm wun ji wù wáa dù, a fo nshwì e Fòn Eglon woó Moav.

¹⁶ Ehud nèn lò kfə́, e tòn shwàʼ wo á baàyìn mbìv sidzə̀m, a wù dzə̀ ntàm se kiwo sibaà fó vidà, e kùr é sar ndzə̀y fo wun koy yìyí.

¹⁷ Wù yiì bèy, e nèn lì nshwì, e dù, e fò e Fòn Eglon wo yì‑iì dzəə̀n fon woó Moav, a yì‑iì dzə̀ wír wo faŋèn.

¹⁸ Mo Ehud foon nshwì, e nèn siìr wír ve vé‑eè béʼé, á wáa kfən e bàm fó laʼ.

¹⁹ Wùn áwune dù, e lòo meé e ghaa Gilgal fo mebvə̀m me vé‑eè semen e tíyí mè‑eè dzəə̀n, wù nèn lò kfə́, a kfən fo Fòn Eglon wùn. Wù kfə́n, e bùn fon, e sùúy sho jii, «Nyàr, m kér a ntum yée tiisí, é ku kìíy a vèr tàr wor wír abaà.» Fòn nèn tòóy nsheèlav sə́ ji sí fəə́ á e ndzə sidzə̀m. Sí kù nèn fəə̀kír.

²⁰ Mo sí fəəkin bey, Ehud nèn kòʼtí e fòn si, a fòn kì dzə́ e wun ntoʼ ye yì‑iì dzəə̀n é kinsəʼ ke lav kee fó yuv, koó shwér. Ehud nèn bùn fon, e sùúy sho jii, «M kér a ntum ye yì loòn fo Nyùy ji m tiísí á e wun.» Fòn nèn tùm é yuv fó kàvàʼ.

²¹ Mo fòn tumen é yuv, Ehud tsə́nsí kiwó kfə́ ké ŋkoòvì ki, e shòʼ shwàʼ wo á baàyìn mbìv sidzə̀m, wo wù kì dzəə̀n e wun mentìntìn e koy yìyí, e nèn tùy e fòn bvə̀m.

²² Wù túy, shwàʼ tó e fòn bvə̀m, à ŋgùr shó. Fóm si meé, e sùm shwàʼ súmen, bìʼ fo Ehud yòʼ‑oò lo sə̀ŋ, e shòʼ fo fòn wùn. Wù gòʼ fo, a wù meésín é ndzə̀m.

²³ Ehud nèn fəə̀ fó kirəsí kee fó yuv kiy, e sòn fó vitom veé ghaa lav, a wù sə́ŋrí ne shuu si fó mvəm, e fìnrì.

²⁴ Wù fəə́, e dù, nsheèlav si siíy e wìy, e lòo yen, a shuu se kibùʼ si dzə̀ sifinrìn, e nèn kù a kwàʼtì ji fòn dù a e kishwaŋ.

²⁵ Áwune nèn kù gòʼ a shìy, e shìy ntéŋ ntéŋ, la fòn yòʼ mvə̀ʼ kibuʼ. Á nèn lì vimbàʼ ve shuù se kibùʼ, e mvə̀ʼtì shuu se kibùʼ, e nèn yèn, a fòn néŋ e nsaàlav kibùʼ, a wù láy ne.

²⁶ Kù mo áwune‑eè dzə́, shiyì, Ehud nèn fəə̀, e lèʼ, e dù dzə́ə fó ghaa mebvə̀m me vé‑eè semen a dzə̀ e tíyí, e nèn dù e Seira.

²⁷ Wù dù, e mèé, e nèn tòŋ sóŋ é wòŋ agwan woó Efrayim foo fèy. Wír veé Israyi báʼtí, wùn áwune nèn a səy fo agwan fèy, a wù sì kilìmbìy kév.

²⁸ Wù suúy aáwune jii, «Vèn wáa wìy e mǒ bàm. Nyùy Tàr wày ne aŋgaà vén vibàn vee wír veé Moav e věn kiwo.» Á bèy, áwune nèn a səy e wun bàm. Á sə́y, e nèn faàsì tuúmé sé ndzəv yee Jordan fo wír veé Moavi kì yíi tumsín aáwuné nsay, e làa yòʼ kfə̀n biimé ji wìr túmsín, e lèʼ.

²⁹ Wáa dzə e ghan see shooy, áwune yúyrí vé rər veé Moav moo nsə̀kì e ghvə̀m bèy, a kù‑uù dzə̀ antav adzə̀m, e làa yòʼ biimé, é wùmòʼ léʼ.

³⁰ Á bèy, wír veé Israyi nèn tòn veé Moav, e kèʼ fo kishiíy kee shooy, áwune nèn a yu sáʼ a dzə̀ fo wír veé Israyi. Nyaáŋ nèn a dzə e nsay Isray kiyá mwaamé.

Shamgar bóyír wír veé Isray

³¹ Ehud‑iì bòyìr wír veé Isray, Shamgar woo wan Anat nèn kòʼ e wun bàm, e bòyìr sa wír veé Isray. Wù‑uù lì ŋgwàn wo á yii bánri ambòŋ sho, aá lim súm, e yùyrí wír veé Filistia sho wír ghií ntuùfú.