Atǎr Nsaʼ 2 - ŊWÀʼ NYÙY

Nshìylav Nyùy Tàr dú é Bokim

¹ Nshìylav Nyùy Tàr nèn lò, e nànèn fo Gilgal, e kòʼ é Bokim. Yì dù, e sùúy e wír veé Israyi jii, «Mò‑oò fə̀ə́r ven fó wòŋ Ejiv, e wìy sho e nsay ye mò‑oò kàʼàn, e kfə̀n lìʼ ji m wíy fo aàtàr véné. Mò‑oò sùúy ji m yòʼ wíy bvəʼ a *mensaŋ me mò‑oò gwàrìn vèsən,

² a vèn yòʼ wíy gwàr a mensaŋ vèn à wír ve á dzə́ e nsay foo fène. Vèn kér a fó wìy kètì kíy sév sé cù. Yii bèy, vèn yoʼ yùnín nsər yem. Vèn yii kee ben a dzə̀ ka?

³ A mò‑oò lo sùúy sa ji a vèn lò, a yiì bèy, bo m yòʼ wíy jùm wír vìn fo věn mbìy. Á bèy, áwune kù sí wìy a tsəy a dzə̀ kóy vèn áwune, áànyùy véví kfə́n ji vitám ve vèn wíy a lì sho.»

⁴ Mo nshìylav Nyùy Tàr suuyin vinyo vìn e wír veé Israyi, e màysì, áwune fúŋ tóŋ.

⁵ Á bèy, á nèn shù yír kirə̀ʼ kee shooy ji Bokim, e nèn cù Nyùy Tàr fó.

Kpú Joshua

⁶ Yì‑iì dzə̀ é ghan se Joshua‑aà baʼtin wír veé Isray, e lòo màʼtì ji á wáa dù, wìr mòʼón mòʼón nèn lò, e dù ji wun yov á rə́ə yee nsay ye vé‑eè foon ji və́ vee vitsə́ʼ.

⁷ Áwune dù bèy, e nèn kù a tiy e Nyùy Tǎr wùn ghán sidzə̀m se Joshua‑aà dzə̀ə́ sho, e kù sìíy, a tiy sa bèy, a vilìmbìy ve ví‑iì yenen viŋgaʼnìn ve lìm ve Nyùy Tàr‑iì yiìn e wír veé Israyi dzə̀ə́ sho.

⁸ Á bèy, Joshua woo wan Nun nèn a kpu, a wù sì kiyá kishóv ghvə̀m e wiì.

⁹ Wù kpú, á nèn dzəə̀mè wun e wun kirə̀ʼ ke wù‑uù kér ji vitsə́ʼ və́ e Timnat‑Heres, a kí‑iì dzə̀ é wòŋ agwan woó Efrayim, e mbìv Gwan Gaash yee kuy.

¹⁰ Ŋgwàʼ yee shooy‑iì kpù, e mày, yìmòʼ yee ŋgwàʼ siíy, e kòʼ, e nèn a meŋ Nyùy Tàr, a bó á yòʼ kiiy lim se wù‑uù lìmèn e wír veé Israyi.

Wír veé Israyi bín ndzə̀m e Nyùy Tàr

¹¹ Á bèy, wír veé Israyi nèn lò, a yiì vinyo ve bi ví, a tinsín Nyùy Tàr shó. Áwune‑eè lò kév, a ghvəm mebvə̀m mee *Baal,

¹² e màʼày Nyùy Tàr wo atàr véví‑iì ghvə́mé, wun woo Nyùy Tàr wo wù‑uù fəərin áwune fó wòŋ Ejiv. Áwune nèn a cù a dzə̀ anyùy vitum ve ví‑iì kaarin áwune, e tàr, a gvəʼtí, a fo ghvə́m aànyùy vìne, e nèn ŋàʼár dòʼshwiiy Nyùy Tàr.

¹³ Áwune‑eè bìn ndzə̀m e Nyùy Tàr, e nèn a ghvəm a dzə̀ mebvə̀m mee Baal, à mee *Ashtoret mè.

¹⁴ Dòʼshwiiy Nyùy Tàr ŋáʼáy kùm wír veé Isray e dzəə ye biibí, wù wáy áwune e vé kimfaàsìí wo, á wáa nəə́ nsay yev, a faàsì vifá vév. Wù‑uù fiìnè áwune áàŋgàa vibàn vév ve vé‑eè gìŋèn áwune, e tàrí, á wáa ghiʼ áwune, a bó yòʼ‑oò dzə̀ á kfə̀n yù fóo tam wùn áwune.

¹⁵ Áwune fəə́ e shùu rər, la Nyùy Tàr yòʼ dzəə tòm áwune, wù kù màʼ áwune máʼan réŋréŋ mo wù‑uù kàntìn áwune fó ghan, e lìʼ ji wun wàa wíy yiì. Á bèy, áwune ku nèn a dzə e mvə̀m ŋgeʼ ye tavín.

¹⁶ Nyùy Tàr nèn a fo áwune vilìmbìy vee jeéy, aá yoŋ ji atǎr nsaʼ, á wáa sə áwune, a fəə́r fo vé kimfaàsìí wo.

¹⁷ Yii bèy, bó wír veé Israyi yòʼ‑oò lo fò vituʼùr é kinyò ke atǎr nsaʼ véví‑iì suuyì. Áwune kù‑uù maʼày Nyùy Tàr máʼayin, du, ghvə́m anyùy ámóʼó, cu áwune. Atàr véví‑iì ló a yunín Nyùy Tàr, yii bèy, ŋgwàʼ ye fíy rə̀n ku lò kév, e nèn tèn ténén fó a yunín.

¹⁸ Ghán sidzə̀m se Nyùy Tàr‑iì fó tàr nsaʼ e wír veé Israyi, wù kù a tom wun, wù wàa fəə́r wír veé Isray fo aŋgaà vév vibàné wo, á wàa dzə nyaáŋ, e meé mo tàr nsaʼ və̀n‑eè dzəə̀n shó. Nyùy Tàr‑iì lèéy ŋgeʼ se áwune‑eè yén e wír ve vé‑eè nyavrì aáwuneé sar, a rər mendzən mev.

¹⁹ Yii bèy, tàr nsaʼ‑aà kpú, áwune nèn siì kfə̀n é liì kisaŋ wo áwune‑eè kér fo mbìy və̀y, a bùʼtì vinyo, a shaà mo atàr véví‑iì yii. Áwune‑eè gvə́ʼti, ghvə́m anyùy ámóʼó, a bó á yòʼ‑oò lo yàr fó a ker liì kisaŋ, a bùʼtì vinyo.

²⁰ Á bèy, dòʼshwiiy Nyùy Tàr ŋáʼáy kùm wír veé Isray e dzəə ye biibí, wù suúy jii, «Mo wír vìne yaʼayin ne *mensaŋ me mò‑oò gwàrìn vèr aàtàr véví, e tèn fó yunín jí yem,

²¹ bo m yòʼ dzəə́ yìi jùm vitúm ve Joshua‑aà màʼtìn é nsay là ton, e bó a kpu.

²² A m wíy lì vitúm vee shooy, e ghiʼ wír veé Isray sho, e yen o ji áwune sà ghán e mǒ mbòv á? Áwune sà‑áà wáa yiì mo atàr véví‑iì yii moo ŋgáŋ á?»

²³ Á kinyo ke kí‑iì yiìn, é bo Nyùy Tàr maʼti vitúm vee shooy e nsay, e làa yòʼ jùm kàŋ mòʼón. Wù yòʼ‑oò lo màʼtì ji Joshua ton áwune.