Atǎr Nsaʼ 10 - ŊWÀʼ NYÙY

Tola wáa dzə tàr nsaʼ woó Isray

¹ Abimelek‑iì kpù, Nyùy Tàr shóʼ Tola woo wan Pua, a kfə̀n‑eè dzə̀ wan wàn Dodo, e yiì, wù kóʼ ji tàr nsaʼ, ji wù fiʼ bòyìr a wír veé Isray. Wù‑uù lò fó ram Issakar, yii bèy, a wù‑uù dzə́ e mvə̀mlaʼ yee Shamir e wòŋ agwan e rám Efrayim.

² Wù‑uù dzə̀ tàr nsaʼ wìr veé Isray kiyá nshòv sitaár e mbaà, e nèn kpù, á dzəə̀mè wun e Shamir.

Jayir wáa dzə tàr nsaʼ woó Isray

³ Tola‑aà kpù, e wun bàm, Nyùy Tàr nèn fò wír woó Gilead wo vé‑eè yoŋ ji Jayir ji tàr nsaʼ, wù sáʼ wír veé Isray kiyá nshòv sibaà e mbaà.

⁴ Wù‑uù kér wón vee vilum mtaár, aá kóʼ vimbèʼbìy mtaár.

⁵ Jayir wìy kpù, á dzəə̀mè wun e Kamon.

Jefta kóʼ ji tàr nsaʼ wìr veé Isray

⁶ Wír veé Israyi kfən lò, a yiì vinyo ve bi ví, a tinsín Nyùy Tàr shó. Áwune kù‑uù ghvə́m mebvə̀m mee *Baal, à mee *Ashtoret, kfə̀n ghvə́m anyùy veé Siiria wùn à veé Sidone, à veé Moavi, à veé Ammone, e lì veé Filistia. Áwune‑eè bìn ndzə̀m e Nyùy Tàr, e làa yòʼ dzə́ə a sùyrì wun gheéy.

⁷ Dòʼshwiiy Nyùy Tàr ŋáʼáy kùm wír veé Isray e dzəə ye biibí, wù nèn wày áwune e wír veé Filistia wùn à veé Ammoné wo.

⁸ Áwune nèn tòn wír veé Isray adzə̀m, a tay áwune é kiya foo fèy, e kù a nə̀ʼsì áwune ve á dzəə̀n é ndzə̀n Jordan, e mbìv yee fo shùy yii tó, kiyá nshòv waamé e ghvə̀m, a fóo dzə̀ nsay ye yì‑iì dzəə̀n ye wìr veé Amor.

⁹ Wír veé Ammone lò, e tùmsín sa Jordan ji á fiʼ fùnèn wír vee rám Juda wùn à vee rám Benjamine, e lì rám Efrayim. Wír veé Israyi nèn a dzə e mvə̀m nyar ye ghaʼáné.

¹⁰ Wír veé Israyi nèn a toŋ e Nyùy Tàr, a suúy jii, «Vèr jày ne e wò, bìʼ fo vèr meŋen ne wò, a ghvəm a dzə̀ mebvə̀m mee nyùy woo Baal.»

¹¹ Nyùy Tàr wáa bìnèr áwune, a dzər jii, «Wír veé Ejivi‑iì nyavrì e vèn, veé Amori wíy, a nyàvrì sa, e lì veé Ammon, à veé Filistiàa, m yée?

¹² Veé Sidone‑eè lò, a nyàvrì sa e vèn, veé Amaleki wìy, a nyàvrì, e lì veé Maon, vèn tóŋ, e kàn mo. Bó m yòʼ‑oò lo fə̀ə́r ven fo áwuné wo à?

¹³ Yii bèy, mo vèn ŋwayin mo, a ghvəm a dzə̀ anyùy ámóʼó, bo m yòʼ dzəə́ yìi bòyìr ven.

¹⁴ Ŋgeʼ si lóo dzə̀r ven, vèn dù, a toŋ aànyùy ve vèn ghvə́mée, aá wáa bòyìr ven.»

¹⁵ Wír veé Israyi bìnèr e Nyùy Tàr jii, «Vèr yiì ne kinyo ke bi kí e wò. Yiì kinyo ke kí gheenen wò ki e vèr. Ke vèr lón wò lán cáʼ ki dzə̀ ji à ku bòyìr a ver.»

¹⁶ Wír veé Israyi nèn tsə̀ʼ mebvə̀m mee anyùy kisaŋe fo áwuné ghaŋ, a sùyrì a dzə̀ Nyùy Tàr. La Nyùy Tàr yòʼ dzəə yù fóo kur tím, a yen mo wír veé Israyi yén ŋgeʼ e ŋàŋ.

¹⁷ Kú a dzə e ghan fóo fèy, wír veé Ammone báʼtí é Gilead, a taamé rə́r, wír veé Israyi nèn bàʼtí vév vé rərí é Mispa.

¹⁸ Vilìmbìy ve wìr veé Gilead vi nèn lò, a kfə̀ynìn áwune áwune jii, «Òó mbaà, a dzə̀ yiì kèʼ la rə́r see vèsən à wír veé Ammone? Wìr wo wù yíi kèʼ, bo ŋgaàŋ yíi a dzə taà saʼ wìr ve á dzə́ e Gilead.»