Amos 9 - ŊWÀʼ NYÙY

Nsaʼ Nyùy Tàr

¹ Mò‑oò yèn Nyùy Tàr, a wù tíy e ghaa kiy cù, wù suúy e mò jii, «Tsə́y vitóm ve lav cù vi fó yuv, é ví səʼsi, e mèé e kinsə̀ŋ. Tsə́y, é lav keesi e wìr dzə̀m kitu. Wír ve á berin, é m yúyrí e rə́r sí. A wìr fə̀m bàʼàr, bo wù yòʼ wíy lùŋ, a ŋgaà leʼ yòʼ wíy bòy.

² Aáwune fə̀m túŋ shuu ji á du áàŋkfəə́ wòŋ, e lìr fo, bo m kù yíi sə̀ŋ, e fəə́r fo fo. Aáwune fə̀m kòʼ é yuv, bo m kù sə́ʼər áwune fó fo.

³ Aáwune fə̀m lìr e kitu ke Gwan Karmel, bo m kù taʼ áwune, e koorí fo fo. Aáwune fə̀m lìr e sar rìbà ndzə̀v, bo m kù fəər kigàgǎʼsòŋ keé ndzəv, é kí lúmrí.

⁴ Aàŋgaà vév vibàné koòrí áwune, e dù sho ji wír kibàm, aá fə̀m dù sho a dzə̀ feé, bo m kù yii, é rə́r sí nyoori áwune fó, e yùyrí. M kíy áwune, taáme ji m ku màʼ ŋgeʼ aáwuné kitu, a bó m yòʼ yíi rər mendzən mev gheéy.»

⁵ Nyùy Tàr woo Taà Ndzə, wun woo Taà Mànjòŋ kum kitú ke nsay, kí sə̀ʼsì. Nsay wàa liy, a koʼ moo ndzə́v yee Naay, a liy, a səy moo ndzə́v yeé Ejiv. Wíri wàa kpukír, wìr dzə̀m wàa dìy.

⁶ Nyùy Tàr bàʼrì ntoʼ rə é ntoò yùv, e fèr kikum e mbàʼ. Wù səŋ kiyúy fó rìbà ndzə̀v, kí kòʼ é yuv, wù yiì, kí wàa səy e nsay ji wuú. Yír rəə́ kù dzə̀ Nyùy Tàr.

⁷ Nyùy Tàr suuy jii, «Wír veé Isray, vèn kwaʼ ji m lo, m wàa ker ven jeéy fo wír veé Etiopiàa wùn à wír ámóʼó a? Kí mò‑oò fə̀ə́r wír veé Filistia fo Kaftor, e fə̀ə́r veé Siiria fo Kir mo mò‑oò fəərin ven fó Ejiv.

⁸ Vèn wáa kiíy jii, mo woo Nyùy Tàr woo Taà Ndzə, m kíy woŋ wón, woŋ, a dzə̀ wó vinyò ve bi ví, kíy feyì, a m yíi laàr fo kitu ke nsay. Yii bèy, a bó m yòʼ yíi səʼsí rám Jakov rə̀n e dzə̀m. Suuy mo woo Nyùy Tàr.

⁹ «Rúrú, m yíi fo sáʼ, áàŋgàa vibàné nyoori wír veé Isray, aá sìkìr e vitúm ví mvəm. A dzə̀ jii, m yíi cèkèrèʼ áwune mo á cèkèrèʼ kibán, e fəə́r wír ve bií fo áwuné mvəm, a bó woo mòʼón yòʼ yíi tum e nsay.

¹⁰ Rə́r sí kù wíy yuyrí vé yiì ye bií fo wír vémé mvəm, áwune adzə̀m ve á kù tíy kév tiyín ji bó yòʼ dzə̀ féyì Nyùy biìmé ji ŋgeʼ ye tavín sum ver vee wír və́.»

Nyùy wíy siìr kitúm kee Isray e bàm

¹¹ Wíy lòo dzə e kishiíy fó, é m shám wír vém, e nàŋsín lav Davir ye yì‑iì gbuùn ne. M wíy siìr kinsàʼ ke lav kee shooy fo, siirì, é yì wáa dzə mo yì‑iì dzəə̀n fó mbìy,

¹² é wír veé Israyi nèn yòv kibér ke nsay Edom, e yòv sa vitúm ve m liìn ji vém vidzə̀m. Suuy mo woo Nyùy Tàr, wo m yíi yiì, é bo vinyo vìn vi koóy.

¹³ Nyùy Tàr suuy jii, «Ghán sí sí wiyì, a kù sì se vifá ve á wayin é sum ví lo, e biy cércér, e biy, e kùʼnìn, e ghaʼ vé kavi. Báŋ se *vayin si wíy kùʼnìn, e ghaʼ ŋgaà nyèŋ fo wù nyeŋ. Meluʼ me nyomèn mè wíy a shem fo vitiír vé vayin ve á bìyìn áàgwan, a shem, a leŋ, a səy fo aŋkoŋ.

¹⁴ M yíi siìr wír vém veé Isray fo kwaʼ nsàm, aá kfə́n aáwuné nsay, kfə́né, aá náŋsín ŋkà se laʼ sév se sí‑iì gbùkìn ne, a dzə sho. Áwune wíy bìy vitiír vé vayin, a fèr meluʼ e báŋ sə́ sí, a no, a bonén, a lìm viboó vév, a bòn vifá ve á lìmèn shó.

¹⁵ M wíy yiì, é wír vém veé Israyi tuúy aáwuné nsay, a bó m yòʼ dzəə́ wìy mèn áwune fó nsay ye m foon ji yéev. Suuy mo woo Nyùy Tàr woo Nyùy won.»