Amos 5 - ŊWÀʼ NYÙY

Wír veé Isray Kùyi ku bìnèr melív mev

¹ Wír veé Isray, éè mò, vèn yuúrí yòv dìy wo m yov, sheŋ kitú bìʼ ven.

² Isray gbù ne. Óò mboò, jìn Nyùy Tàr gbù ne. Á tòn ne wun, a bó wù yòʼ dzəə́ wìy ŋaʼáy. Wù sí bér berín e wun nsay, a bó ŋgaà sə yòʼ dzə̀. Wù sèsín ne e kibvə̀r, a bó ŋgaà nàn yòʼ dzə̀.

³ Nyùy Tàr woo Taà Ndzə wáa toʼór kee kùm Isray jii, «A ŋkàlaʼ tsə̀nsí wíri é shùu rər nsə̀kì, bo kù yíi kfən vee wií. Ŋkàlaʼ tsə́nsí wír e shùu rər wií, bo kù yíi kfən vee ghvə̀m cáʼcáʼ.»

⁴ Á bèy, Nyùy Tàr woo Taà Ndzə ku nèn a suúy e wír veé Israyi jii: «Vèn kfə́n é bàm, e yèn mo, e fíʼ bàʼàr kpú ye yí wiyì.

⁵ Lá vèn yòʼ dù, a tàʼ sə́mo, a dzə̀ fó Betel, lá vèn yòʼ dù e Gilgal, kìn ji wìr líysín é Beersheba. Wír veé Gilgali kù yíi fəə nsàm, aá laar Betel, é wù du é vifə̀m.»

⁶ Ven vee rám Joosev, vèn ku kfə̀n é bàm e Nyùy Tǎr wùn, e wìy lùŋ. A vèn tèn, bo wù yíi wìy moo və́y wo wú mey virə́ʼ, e tòn ven, e səʼsí, a bó wìr yòʼ yíi a dzə e Betel wo a dzə̀ wù ndzə̀mér.

⁷ Ven ve vèn jwivrì kinyo kee tínén é nsànloŋ, vèn yú. Vèn ku yù, ven ve vèn tén fó a fo gháy wíri áàŋgaàŋe.

⁸ Kù‑uù fèr Nyùy Tàr kikámkám ké mejìy mee Pleyades à mee Orion mè. Kù binèr wun ndzə ye yì sə́n, beéme ji wùm, a yì kfə́n ji kijàvndzə, binèr ndzə yee shùy, a yì kfə́n ji vitsə́ʼə́. Səŋ wun kiyúy fó rìbà ndzə̀v, yii, a kí kfə́n ji wuú. Yír rəə́ dzə̀ Nyùy Tàr.

⁹ Wù lo, wù laàr antav, e sàʼtì virə́ʼ ve tavkín ví, ve ví kiŋsìn áwune.

¹⁰ Wír veé Isray, vèn ban wír ve á tínen kinyo e nsànloŋ, nyaysì wír ve á suuy suuyrú.

¹¹ Bìʼ bey, mo vèn nyavrì e ŋgaà kitàn, sə́ nshwǐ vifa ve wù lim fo fo, bo bó vèn yòʼ wíy shiíy e lav se vèn bomen, sí wáa njàʼkìr. Vèn bìy ne vitiír vé vayin, ví wáa tèʼ, a səəné, a bó vèn yòʼ wíy luʼ bàr shilùʼ fo fo e shuù.

¹² M kì mo vinyo ve vèn buʼtì vi kùʼùn, e mèé, a m kì vinyo ve bi ve vèn yiìn vidzə̀m. Vèn nyavrì aàlànjòó, sə́ kòyàr, jívir fo á wáa tinén kinyo ke aghéʼncey é nsànloŋ.

¹³ Bìʼ bey, fiì nen gòʼ kfə́ kisə́sə, bìʼ fo ghán sí kù siìn sé yiì ye bií.

¹⁴ Lá vèn yòʼ a yiì kinyo ke bi kí. Vèn wáa yiì a dzə̀ ke juŋ ki, é vèn wìy lùŋ, é Nyùy Tàr woo Taà Mànjòŋ wìy a dzə ŋgaà sə won réŋréŋ mo vèn kì suuyin.

¹⁵ Vèn wáa bàn kinyo ke bi kí, a kòŋ a dzə̀ kee tìítiy. Vèn nəə e làv nsaʼ, vèn kù wày ji á wáa tinén kinyo ke wìr e nsànloŋ. Á bèy, tàm é ghan símóʼ sí, é Nyùy Tàr woo Taà Mànjòŋ wìy shàm mendzən me kibér ke rám Joosev.

¹⁶ Kí nén a dzə jii, Nyùy Tàr woo Taà Ndzə, wun woo Taà Mànjòŋ suuy jii: «Wíri wíy a toŋ, a jeetí mentàrnín medzə̀m. Á wíy a rəəmé e ŋgvə̀n kwaʼ jii, ‹Óò, wír a e věr wùn.› Á wíy a jàŋ vé sumé wùn à vindìykpu vi ji á wiy, é wùn áwune tátí, a dìy adzə̀m.

¹⁷ Tóŋ ye tavíné wíy a koʼ fo sum sé vitiír vé vayin sidzə̀m, bìʼ fo m wíy wìy, e màʼ ŋgeʼ e věn kitu. Suuy mo woo Nyùy Tàr.»

¹⁸ Lòné dzə̀ wó wìr wo wù diy ji kishiíy ké Nyùy Tàr kí wiy cér. Kinyo ke juŋ ke kishiíy kin ki wíy yiì e vèn kí dzə̀ ka? Kù wíy a dzə ndzə ye sənér, a bó ráne yòʼ wíy a dzə.

¹⁹ Kishiíy kin ki wíy a dzə, kù moo ji wìr sòsìn fo bvərə̌ʼ wo, e lèʼ, e dù, e tò e nyàm ye á yoŋ ji *bear wo. Kìn moo wír wo wù nəə e wun lav, e lòo toomé wún lav, yò té.

²⁰ Bó kishiíy ké Nyùy Tàr kin ki yòʼ kù wíy a dzə ndzə ye sənér, a bó ráne yòʼ wíy a dzə à? Rúrú, kishiíy kin ki wíy a sən ji cùm, a bó ráne yòʼ wíy a dzə.

²¹ Nyùy Tàr suuy jii, «M ban vishiíy vén vé ŋkàʼ, leey feyì, taʼ ntéŋ, a bó m yòʼ leey kitár kén kee ji á bunrì mo, yú vijuŋ.

²² Fə̀m mo vèn wiy ji á cu mo e cu ye tonèné, cu mo e yé ŋgoòy se vifaa, bó m yòʼ yíi səəsí cu yén yee shooy. M yòʼ yíi səəsí vinsòŋ ve nyàm ve vèn seéri ji cú kikòŋnìn.

²³ Vèn kíŋrí e luŋ se vèn yov, yii njèʼèr sho e mǒ vitùʼùr sin si. M yòʼ taʼ, e yu kiléŋléŋ kén ké lúŋ nshì.

²⁴ Vèn kú a tinén kinyo ki é nsànloŋ, a yiì a dzə̀ kinyo kee réŋ, e kù a yiì bèy ghán sidzə̀m, moo ndzə́v ye yí léŋ ghán sidzə̀m, a bó yí yòʼ yii yúmé.»

²⁵ Wír veé Isray, vèn‑eè ghán e kirə̀ʼ ké woʼ kí kiyá mkweè, seéri nyám si, cu a dzə̀ mo shó à?

²⁶ Vèn‑eè ghvə́m a dzə̀ mebvə̀m, kifá, a fér ven e wó yéné. Vèn‑eè ghvə́m shee Sakkut ji fon anyùy vén. Ghvə́m shee Kaywan ji shijiy shee anyùy vén. Á bèy, bo vèn kù lo, e bèʼèy mebvə̀m mee shooy lèn,

²⁷ é m tsə́nsí ven é kwaʼ nsàm, é vèn du, e shaà Damaskus shaán. Suuy Nyùy Tàr wo yír rəə́ dzəə̀n Nyùy woo Taà Mànjòŋ.