Amos 4 - ŊWÀʼ NYÙY

¹ Ven vee vikìy veé Samaria, vèn yuúrí kinyo kìn ki. Vèn yuúrí, ven ve á fàŋkìn moo anàʼ veé Bashan. Vèn nyavrì aàŋgàa kitàne, táy aghéʼncey, lo, á wàa tiy tiyín aàlúm vén vee kfə́m sé wírií kitu jii, vèn wáa dzə rì, e làa yòʼ fo meluʼ é vèr nó.

² Nyùy Tàr woo Taà Ndzə kan kitú kfə́ moo Nyùy, suuy jii: «Rúrú, ghán sí wiyì, se á wíy koo ven e lóvi, koó, é wìr dzə̀m fo vèn wáa dzə moo sə́ ye yì liìn é lov.

³ Á wíy sə̀ŋ ven, e fəə́r a dzə̀ fó kintóʼ ke kày, a sə̀ŋ, a cuúr wùmòʼ e wùmǒʼ bàm. Aá ku fə̀ə́r ven bey, e màʼ e Harmon.» Á mo Nyùy Tàr suuyin.

Wír veé Israyi tén fó yeʼéy fo kinyò ke Nyùy dìnèn

⁴ Nyùy Tàr woo Taà Ndzə té lám e vèn jii: «Vèn du ri e Betel, a bùʼtì vinyo vi. Vèn du ri e Gilgal, a bùʼtì vinyo, a dù duùn é kindzəʼ. Vèn koŋè, vèn wàa yiì rì cu sén kijàvndzə kidzə̀m. Vèn wáa jàv rì vifá vén kilíŋ e ghvəm, a fo kee kimòʼón ki ji kém e bǎm vishiíy vitaár vitaár.

⁵ Vèn wáa yiì rì cu vibeèrìí e kibán ke kí kér nyaà kí, a dzə̀v nsaŋ, bìʼ fómo wo vèn wiy sho, yoŋ ji woo jeéy. Á kinyo ke wír veé Israyi koŋ a sə ŋgúm shó. Suuy mo woo Nyùy Tàr woo Taa Ndzə.

⁶ «Jìŋ ye yì‑iì koó ŋkà se laʼ sén sidzə̀m, bó yòʼ‑oò yii mo a? Kù‑uù bùúr mo vifá ve yi fo virə̀ʼ ve vèn dzə́ sho vidzə̀m. Suuy mo woo Nyùy Tàr woo Taà Ndzə.

⁷ «Kfə̀n‑eè yiì mo, é bo wuú táv é yuv, yí táv, a dzəə́ bér ŋwee e taár, é bo á keʼ, a kav vifá. Mò‑oò yiì, wuú wáa lo e ŋkàlaʼ yìmòʼ, e tìír tiirín, fo yí wáa lo e yìmòʼ. Wuú‑uù ló e virə̀ʼ vímóʼ ví, a vímóʼ ví yúm yumén.

⁸ Kilòŋ ke yumén kí gháʼ, wíri wáa ŋaʼáy fo virə̀ʼ jeéy jeéy, a dù e ŋkàlaʼ fo vé‑eè yoy kinyo ke mendzə̀v, tiirì. Du bèy, e làa yòʼ koóy mendzə́v mée no, e yu. Yii bèy, la vèn yòʼ kfə̀n é bàm e mǒ wùn. Suuy mo woo Nyùy Tàr.

⁹ «Dzə̀ akàŋ anín ve m lo, m laàr vifá fo věn viboo, e laàr fo věn sum sé vitiír vé *vayin. M lo, m fə̀ə́r shwér wo wú tonnìnè wùn à koʼòr sí, vifá vi wàa yovrí. M lo, m fə̀ə́r ŋguùmé, sí yì vicí vén vé *fig wùn à vé oliv vi. Yii bèy, la vèn yòʼ kfə̀n é bàm e mǒ wùn. Suuy mo woo Nyùy Tàr.

¹⁰ «Mò‑oò yiì, kifə̀ʼ ki nəə́ ven mo kí‑iì nəən wír veé Ejiv. Mò‑oò yùyrí wónlě nsùm vén e rə́r sí, e tàtí, e yùyrí wùn à nyám se ŋkoʼ se áwune‑eè koorin fó shùu rər sí. Mò‑oò yiì, kiyúy ké dzən sé wìr ki wáa nəə́ e věn yuy. Yii bèy, la vèn yòʼ kfə̀n é bàm e mǒ wùn. Suuy mo woo Nyùy Tàr.

¹¹ «Mò‑oò laàr ŋkà se laʼ sén símóʼ sí mo mò‑oò laàrìn Sodom wùn Gomorra. Kibér ki bóy ji cóʼ moo shiŋkaʼ she shí shwiin, e lòo mày, á jón fó kiy. Yii bèy, la vèn yòʼ kfən é bàm e mǒ wùn. Suuy mo woo Nyùy Tàr.

¹² «Bìʼ bey, óò mboò, wìr veé Isray, m lo lèn, e màʼ ŋgeʼ e věn kitu. M kù kér fóo yiì kinyo ke m wayin. Á bèy, Isray, vèn báʼtí, é vèn à Nyùy won tám é kibàʼ ke nsaʼ.»

¹³ Rúrú, dzə̀ wun Nyùy wo wù‑uù tuuyin agwan, e fə̀ə́r shwér. Wù kfən yiì, wíri kiíy kwaʼtì rə́. Wù lo, wù bìnèr ndzə ye ranén, yì kfə̀n ji ye sənér. Kù sáʼ wun kitú ke nsay kidzə̀m. Yír rəə́ dzə̀ Nyùy Tàr, Nyùy woo Taà Mànjòŋ.