Amos 2 - ŊWÀʼ NYÙY

Sáʼ Nyùy yee kùm Moav

¹ Nyùy Tàr suuy jii: «Abaày, wír veé Moavi fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu, Yìiy, áwune‑eè tòn vighvə́r vé fòn woó Edom, ví dú é kibvə.

² Á bèy, m kù‑úù tsə́nsí və́y, e laàr Moav, e tòn virə́ʼ vév ve tavkín veé Keriot. Á wíy a yòr, a toŋ sóŋ, é melaà mè ŋáʼáy, é wír veé Moavi kpúkír adzə̀m.

³ M wíy yuyrí fon woó Moav, yúyri, é m laar atǎr saʼ vee wun kitum.» Á mo Nyùy Tàr suuyin.

Sáʼ Nyùy yee kùm Juda

⁴ Nyùy Tàr suuy jii: «Abaày, wír veé Judàa fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune ŋwày Nsər sém, e tèn fó a yu sáʼ yém. Áwune kù ghán a dzə̀ áàtàr véví mbòv, tiir vifií a dzə̀ áànyùy kisaŋe, nèn bin e dzəə ye bi.

⁵ Á bèy, m kù‑úù tsə́nsí və́y, e laàr Juda, e tòn virə́ʼ vév ve tavkín veé Jerusalem.»

Kinyo ke Nyùy tinen kùm Isray Kùy

⁶ Nyùy Tàr suuy jii: «Abaày, wír veé Israyi fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, á kan alànjò, aá lim vikwàn ji áwune fiʼ kòóy, li ghéʼncey, á kàv kiwuú ké lábáʼ shó.

⁷ Áwune kóʼri aàghéʼnceyí kitu, nyeŋrì mo á nyèŋrì kibvər e dzəə, ŋwéy ghay fo vé ŋgeʼe. Jòkìnyàʼ, tàr wùn wàn sí li wiíy e mòʼón, li bèy, shoor yír yém, mo wo m dzəə̀n e ránén.

⁸ Áwune sev e virə̀ʼ vé ŋkàʼ sé cù, sev e ndzə̀y sí wùn, a dzə̀ se á koon fo aghéʼnceyí. Áwune koó meluʼ fo vév vé kaa, nó aáwuné virə̀ʼ vé cù.

⁹ «Yii bèy, Isray, mò‑oò tàtí, e laàr wír veé Amor, a dzə̀ bìʼ ven. Wír, a vé‑eè dàrkìr moo vicí vé *sidar, e tàv moo vee *oak. M tátí, e laàr áwune wùn à run yéví, e tàtí, e laàr, à gháŋé shó fo nsay.

¹⁰ Kù dzə̀ mo və̀n wo mò‑oò fəərin ven fó wòŋ woo Ejiv, e tsəə̀né ven, vèn ghán, e tòsín wóʼ kiyá mkweè. M fó nsay wìr veé Amor ji vitsə́ʼ vén.

¹¹ Mò‑oò shòʼ wón vén ámóʼó ji aŋgàa ntum vém, e yòʼ wónlě nsùm vén ámóʼó fó ji wír Nasir. Wír veé Isray, bó yòʼ dzə̀ mo kí‑iì dzəə̀n a? Yoŋ mo woo Nyùy Tàr.

¹² «Yii bèy, vèn kán wír Nasir vìn e meluʼ mè, á shóʼór kilìʼ kév, e kàntì aŋgàa ntum vém, fo á wáa yooyí vinyo vém.

¹³ Ké lèn ki, m lo, e fòr ven é nsay, e fòr, mo fòr kiténtén ke á wayin vifá sho, kí rún, á dóm, e kòʼ shó e kifá kí kitu, kí wáa konsí.

¹⁴ Bó wìr yòʼ wíy bàʼàr fo m sen wun, fə̀m wír wo wù lonen kiwuú fo nshàá. Ntav yòʼ wíy bòy, bìʼ vitaáví və́, a wìr fə̀m ghaàmé e shùu rər é le, bo wù yòʼ wíy sə kitú kfə́.

¹⁵ Wír ve á maʼ mvəne yòʼ wíy bòy, a wír ve á kiìn kinyeŋe yòʼ wíy bàʼàr, a wír ve á kiìn móo koʼ nyamŋkoʼo yòʼ wíy sə kitú kév.

¹⁶ Kishiíy kin ki wíy gheén, áàntav veé shùu rərí maʼay vifá ve rər, a leʼ kinshóʼ.» Á mo Nyùy Tàr suuyin.