3 Joon 1 - ŊWÀʼ NYÙY

¹ Sàŋ mo wo dzəə̀n taà kintatì ke wìr Nyùy ŋwàʼ və̀n fo wò Gayur. À dzə̀ ŋkar yem féyì. A m koŋ wò, bìʼ fo wòsò tíy e Nyùy kinyò ke ru kí adzə̀m.

² Ŋkàr yèm, m kìíy ne ji shilív shé shi tíy e Nyùy wùn kitávín. M nén a lon ji Nyùy ku yiì, é wún wóo wáa dzə sa e távín, é vinyo vé vidzə̀m vi wáa dù fo mbìy.

³ Mò‑oò shéʼri feyì, bìʼ fo afə́r vesən ámóʼó‑oò wìyìn, a fèr ji à tíy e kinyò ke dzəə̀n ké ru kí á shilív shimòʼón, réŋréŋ mo m kiìn ji à tíyí.

⁴ Kinyo ke dzə̀ m shèʼrí é ŋàŋén kí yòʼ dzə̀, e shaà ke m yú ji ven vee wón vémé kù tíy e kinyò ke dzəə̀n ké ru kí.

Liì wo juŋ wùn à wo bi woó kintatì

⁵ Ŋkàr yèm, m kì sá mo à rə́si sə́ afə́r vesən adzə̀m, bo taaka ve dzəə̀n viŋgwìy, réŋréŋ mo Nyùy taʼ ji vèsən wáa yiì.

⁶ Aámóʼó‑oò lo wìy fèn, e fèr e wír veé kintatì fène mo wò‑oò koŋ áwune, kér áwune. Kii wò, kú a sə áwune bey mo Nyùy koŋè, aá wáa ghan ghán yév,

⁷ bìʼ fo áwune ghán a dzə̀ bìʼ kinyo ke Jesus Kristu, a bo á yòʼ ghán bèy, leey shúu wìr ve bó yòʼ dzəə̀n vé Nyùy.

⁸ Kí nen ghèén ji vèsən ve dzəə̀n wír Nyùyi kú a sə áwune, é vèsən áwune tátí, a yiì lim ye áwune lim bìʼ kinyo ke Nyùy ke ru kí amòʼón.

⁹ Mò‑oò sàŋ sá ŋwàʼ wúmóʼó fo věn kintatì, e yù ji Diyotefer wo wù kù yii táŋ kfə́ a dzə̀ mbìy tèn á fó yu jí yem.

¹⁰ M wíy wìy, yén ven, é m tóʼtí vinyo və́, é wíri yú mo wù súʼ kinsuʼ, bóʼti vinyo ve kisaŋ vi e mǒ bàm. A bó yòʼ mày kee shooy. Wù tèn sá fó a ker afə́r vesən ve á gháné, kfə̀n sháʼnin fo wír ámóʼó wáa səəsí áwune. Á lóo səəsí, wù nèn a jùm áwune fó kintatì.

¹¹ Ŋkàr yèm, lá à yòʼ bìʼnìn liì wo bi. Kú a bìʼnìn a dzə̀ wo juŋ, a kiíy jii, wìr wo wù kér liì wo juŋ dzə̀ á wo dzəə̀n wan Nyùy. A bó wìr wo wù kér liì wo bi yòʼ fə̀m kì Nyùy gheéy.

¹² Ké Demetiyur ki dzə̀, a wìr dzə̀m búri liì və. A vinyo ve wù yii vidzə̀m vi din sa ji wù tíy a dzə̀ e Nyùy kinyò ke ru kí. Kù dzə̀ sá réŋréŋ mo m bínsi liì və wo juŋ woo shooy. À kì sá ji m suuy bèn, a m yii suuy a dzə̀ á kinyo ke ru kí.

Shaʼtì

¹³ Vinyo vi dzə̀ vinín ve kì dzə̀ m fèr e wò. A bó m yòʼ sáŋ a dzə̀ é ŋwàʼ fèn.

¹⁴ M leey jii, m táv keèrí kintóʼ, e bóo wìy, é wòsò dzəʼəm fó si, é bo m fer wò vinyo vee shoon vidzə̀m.

¹⁵ M nén a shàʼtì, a lon jii, Nyùy ku yiì, é shilív shé shi wáa dzə a nyaáŋ. Ŋkar sé see fen si shaʼtì wò. Shàʼtì sá sém sí sidzə̀m e kitu kitu, e fò e mò.