2 Wòŋ 7 - ŊWÀʼ NYÙY

Fòn Solomon fó lav cù e Nyùy Tàr

¹ Fòn Solomon màysì bunrì rə́, və́yí sə́y fó yuv, e tòn cu se vé‑eè cu Nyùy sho, rán Nyùyi rún é lav cù.

² Atàá cùu yòʼ‑oò lo dzəə yù fó nəə́ e Nyùy Tǎr lav, bìʼ fo rán Nyùyi‑iì runen ne e Nyùy Tǎr lav.

³ Wír veé Israyi‑iì yèn və́y, a wú sə́y fó yuv, e kfə̀n yèn rán Nyùy Tàr é kitu ke lav cù, e nèn tsə̀m ndzəə́ e kirə̀ʼ ke vé‑eè fiìn, e làʼ kitú fo nsay, e nèn a ghvəm Nyùy Tàr, a burí wun, a suúy jii, «Nyùy Tàr dzə̀ e juŋ. Koŋ ye wù koŋ wír vəə́ yòʼ wíy mày.»

⁴ Fòn Solomon wùn à wìr dzə̀m nèn kfə̀n cù Nyùy Tàr.

⁵ Wù‑uù yiì cu si e nàʼ nsə̀kì nshòv sibaà e mbaà (22,000), e yiì e bvə́y si nsə̀kì kishóv mbaà é wiì (120,000). Kù bey, Fòn Solomon wùn à wìr dzə̀m nèn fò lav cù e Nyùy.

⁶ Atàá cùu kù‑uù tíy aáwuné virə̀ʼ, a wír veé ram Levìi tíy e vév ví, tíy bèy, kér vifá ve yòv. Vifá ve yòv vìn vi dzə̀ ve Fòn Davir‑iì fèrìn ji á wáa sùyrì a Nyùy Tàr shó. Fòn Davir‑iì lóo sùyrì, wù wàa yòv jii, «Koŋ ye Nyùy Tàr koŋ wír vəə́ yòʼ wíy mày.» Atàá cùu‑uù tíy e ŋkìʼnìn wìr veé ram Levi, tíy bèy, tóŋ sóŋ, a wír veé Isray adzə̀me kù tíy e yuv.

⁷ Fòn Solomon‑eè ràŋ kirə́ʼ é ntìntìn maàndzə ye yì‑iì dzəə̀n é mbìy shùu lav cù, e nàŋsín ji kirə́ʼ kee jeéy kí, e nèn a yiì cu ye tonèné fó, e kfə̀n a tòn fóm se nyàm se cù kikòŋnìne fó. Wù‑uù yiì bey, bìʼ fo kíy cù woo kisha kee *brons ki wo wù‑uù fèrìn, e tìír e shùu lav cùu yòʼ‑oò dzə̀ wú keèrí cu sìn sidzə̀m.

⁸ Yì‑iì dzə̀ é ghan fóo fèy, Fòn Solomon wùn à wír veé Isray adzə̀me nèn shaà fo mbìy, e yì ŋkàʼ woó ŋwee foo fèy kishiíy saàmbà, a wíri meʼèm, wiy virə́ʼ vidzə̀m, e kèʼ fo Hamat, e dù, e meé e kiwoóy keé Ejiv.

⁹ Kishiíy kí meé ji waamé, áwune wáa ker dzəʼə̀m yee jeéyí ji á maar á vinyo ve vé‑eè yiìn vishiíy saàmbà ji á fó á kíy cù ji wó Nyùy Tàr, e kfə̀n maàr vən woo ŋkàʼ wo vé‑eè yiìn sá vishiíy saàmbà.

¹⁰ Wáa dzə e kishiíy kee ji nshòv sitaár e mbaà fó ŋwee woo ji saàmbà, Fòn Solomon siìr wíri é bàm aáwuné melaʼ, a wìr dzə̀m yú vijuŋ, shéʼri vinyo ve juŋ ve Nyùy Tàr‑iì yiìn e Davir, e yiì e Solomon, e kfə̀n yiì e wír və́ veé Israyi.

Nyùy Tàr wíy fo Fòn Solomon wùn

¹¹ Á mo Fòn Solomon‑eè màysìn kibaʼrì ke lav Nyùy Tàr wùn à ké ntoʼ rə kí bey. Wù‑uù lo màysì vinyo vidzə̀m ve wù‑uù wayin ji wun ku yiì kijuujùŋ, e fíʼ bàʼrì lav cù Nyùy Tàr wùn à ntoʼ rə.

¹² Nyùy Tàr nèn wìy vitsə́ʼ vímóʼ ví, e sùúy e wun jii, «M yù ne bunrì yé, e shòʼ lav rə̀n ji yéem ji á fo á yíi a cù mo.

¹³ A m lòo dzə, e yiì, wuú táv é yuv, e tèn fó a lo, kìn m tsə̀nsí a dzə̀ ŋguùmé, sí wíy, e laàr vifá fo wòŋ, kìn m màʼ a dzə̀ kifə̀ʼ e wír vémé wùn,

¹⁴ a m yiì bèy, wír ve dzəə̀n ji wír vémé biímé jay wov, a bùnrì, a lon mo, e neèr liì kisaŋ wo áwune kérí, bo m lo, e yu bunrì yév é yuv, e làysìn ajay vév, e nèn yiì, é nsay yev kfə́n e juŋ.

¹⁵ A kí dzə̀ jii, vifií vém ví wíy a tiy e lav cù fèn, a m wíy a yuurí bunrì ye á bunrì fo.

¹⁶ M shòʼ ne lav cù rə̀n, e lèm ji kirə́ʼ kee fo á wíy a cù mo, e wìy dù, e mày. M kù wíy a leéy lav cù rə̀n, é shilív shém shí wáa tiy sho ghán sidzə̀m.

¹⁷ Fo ké ki, aà lò, a ghan e mǒ mbòv mo Davir woo tàr won‑eè gháné, a yu sáʼ yém, a yiì mo nsər sém sí dzəə̀n, e kfə̀n a ghar vinyo ve m tinen vidzə̀m,

¹⁸ bo m wíy yiì, é sáʼ yé vifòne wáa tiy fo. A dzə̀ kinyo kíwun ke mò‑oò gwàrìn *mensaŋ, e kàʼ tàr won Davir sho, a kí dzə̀ ji bó rám rəə́ yòʼ wíy buŋ wír wo wù wáa saʼ Isray.

¹⁹ Yii bèy, a vèn lò, e bìn ndzə̀m e mò, a ghvəm anyùy kisaŋe, a cù áwune, e làa yòʼ dzə́ə a yu sáʼ yém, e làa yòʼ dzə́ə a yunín nsər se m foon e vèn,

²⁰ bo m yíi fəə́r ven fó nsay ye m foon e vèn, é m kfən mèŋ lav cù rə̀n, ye m kì lèmèn ne jeéy ji á wíy a cù mo shó, aá nèn wìy a màʼ a dzə̀ é ŋgàn, é vitúm vidzə̀m vi wáa jàʼ jàʼàn.

²¹ Kí kooy lav rə̀n bèy, lav, a yì‑iì dzə̀ e gháʼtín, wíri wíy lóo shaà, lóo yen, é shúu wáa ma áwune, aá wáa ghay jii, Nyùy Tàr yiì kee ben a dzə̀ ka é Isray, é bo lav cù rə̀n kfə́n é vifə̀m.

²² Bo binèri kù wíy a dzə jii, ‹Nyùy Tàr lòvtí aáwune ben, bìʼ fo áwune bìnèn ne ndzə̀m e Nyùy Tàr woo Nyùy atàr vév, wo wù‑uù fəərin áwune fó Ejiv, e nèn ghàr a dzə̀ anyùy kisaŋe, a ghvəm, a cù áwune.› Á kinyo ke kí‑iì yiìn, é bo Nyùy Tàr lóvtí aáwune ben.»