2 Wòŋ 6 - ŊWÀʼ NYÙY

Fòn Solomon súŋnín e wíri

¹ Fòn Solomon‑eè bùnrì, e sùúy jii, «Éè Nyùy Tàr, wò‑oò sùúy ji à kù yii dzə́ ké e mvə̀m mbàʼ ye sənér.

² Á bèy, m lò ne lèn, e bàʼrì lav yè e gháʼán, kirə́ʼ ke dzə̀ à wàa beè sho, e wìy dù, e mày.»

³ Fòn Solomon ló, e bìnkìr, e lèéy wír veé Isray adzə̀m, aá kù tíy fo, e nèn a lon ji Nyùy ku səə̀vì a áwune,

⁴ a suúy jii, «Búríi wáa dzə fo Nyùy Tàr woo Nyùy wìr veé Isray, wo wù yiìn ne kinyo ke wù‑uù kàʼàn tàr wor Davir sho. Wúnwun kitú kfə́‑əə̀ lo yòŋ jii,

⁵ kèʼ fo ghan se wun‑eè fəərin wír veé Isray fo nsay Ejiv, wun yòʼ‑oò lo shòʼ á ŋkàlaʼ yìmòʼ fó ram seé Isray sidzə̀m ji á baʼri á lav ye á wáa ghvəm wun sho. Wun yòʼ‑oò lo shòʼ á wír wùmòʼ ji wù wáa saʼ a wír və́ vee Isray.

⁶ Yii bèy lèn, wun shòʼ á ne Jerusalem ji á wáa cù a wun fo, e shòʼ Davir ji wù wáa saʼ a wír və́ veé Isray.»

⁷ A tàr wov Davir‑iì ló a ker e shiliv ji wun‑éè baʼri á lav ye á wáa cù a Nyùy Tàr shó, wun woo Nyùy wìr veé Isray.

⁸ Nyùy Tàr nèn sùúy e tàr wor Davir jii, «Mo wù kér e wun shiliv ji wun baʼri á lav ye á wáa cù wun sho, bo dzə̀ á kwaʼtì ye juŋe.

⁹ Yii bèy, yòʼ wíy bàʼrì a wun. Wíy bàʼrì a wán və wo dzəə̀n vitó və́ lav ye á wáa cù wun a sho.

¹⁰ Nyùy Tàr dzə̀, a wù yiì ne kinyo kee shooy lán. M lì ne kirə́ʼ ké tàr wor Davir, e kòʼ é kàvàʼ woó Isray, kù mo Nyùy Tàr‑iì kàʼàn. M bàʼrì ne lav ye á wáa cù Nyùy Tàr woo Nyùy wìr veé Isray sho.

¹¹ M lèm ne ŋkùv mensàŋ e lav foo fèy, ŋkùv wo wù kér ŋwàʼ mensàŋ me Nyùy Tàr‑iì gwàrìn wùn à wír veé Israyi.»

Bunrì Solomon

¹² Fòn Solomon nèn dù, e tìím e Nyùy Tǎr mbìy kiy cù, a wír veé Israyi yéné, e nàn wó rə́, e kìʼ yúv shó.

¹³ Wun woo Fòn Solomon‑eè ghàn ne fèr kitaàtì e kisha kee *brons ki, e tìír e ntìntìn maàndzə. Kí‑iì dzə̀ kóy e ntàm se kiwo si sibaà fó medà wùn à fó mbvə̀ʼ, a vida vee kóʼ é yuv ví dzə̀ é mbuù ntàm se kiwo sibaà fó koy. Wù nèn kòʼ é kitaàtì fèn, e tsə̀m ndzəə́ e màŋgòŋ e dzə̀m woó Isray si, e kù nàn wó rə́, yí wáa kìʼ yúv,

¹⁴ e nèn a bùnrì jii, «Áà Nyùy Tàr, Nyùy wìr veé Isray, Nyùy wùmòʼ yòʼ kfə̀n dzə̀ moo wò, ǎ yuv, ǎ nsay. À kù yii tíy e wò ŋkàʼmé, kfə̀n din koŋ yé ye ruú aàŋgaà vé lìm ve á yúnin wò shilív shév shidzə̀me.

¹⁵ À yiì ne kinyo ke wò‑oò kàʼàn tàr wor Davir woo ŋgaà wò lìm sho. Wò kitú ké, wò‑oò kàʼ wun e kinyò fèn, e nèn yiì e vitaáví vé vi, kí koóy lán.

¹⁶ Éè Nyùy Tàr, Nyùy wìr veé Isray, kii wò, ku yiì sa kinyo ke wò‑oò kàʼàn tàr wor Davir sho ki. Kinyo, a dzə̀ ke wò‑oò yòŋèn e wun woo ŋgaà lìm wò jii, wù yòʼ wíy buŋ a wír fo wun ram wo wù wáa dzə e kàvàʼ wìr veé Isray, a wón vəə́ fèn tiir kiwuú kév, fiʼì, yúnin nsər sé mo wù‑uù yúninè.

¹⁷ Éè Nyùy Tàr, Nyùy wìr veé Isray, ku yiì ji vinyo vidzə̀m ve wò‑oò kàʼàn Davir woo ŋgaà lìm wò sho vi koóy.

¹⁸ «Rúrú, Nyùy, a dzə̀ wò, à dzə̀ʼə̀m é kitu ke nsay vèn à wíri á? Yúví yoʼ fə̀m kùʼ ye dzə̀ wú keèrí wò. Bo lav cù rə̀n yòʼ fə̀m mèé e gha, e bóo keerí wò.

¹⁹ Nyùy Tàr woo Nyùy wom, ku si yuùrí rì bunrì ye mo woo ŋgaà lìm wò yii e wò sii. Ku yù tóŋ yémé, e fò mo kifá ke m lóné.

²⁰ Á bèy, áà kú a leéy lav cù rə̀n ghán sidzə̀m, a kòŋ. Dzə̀ fó, fo wò‑oò kàʼàn ji á wíy a cù a wò. Ŋgaà lìm wò lóo bùnrì, lóo leéy fó, à yù bunrì rə́.

²¹ Ŋgaà lìm wò lóo lon wò, kìn lón wír veé Isray, lóo kìʼ lav rə̀n, à kù yù bunrì yév. Kú a yu e wòŋ woó yuv fo à dzə́. À yú bèy, à kù nèn làysìn ajay vév.

²² «Wìr wíy jáy kinyo e wùmòʼ, á li, wiy sho e wò lav ji wù wàá liʼ é shùu kiy cù,

²³ à kù yù é yuv, e tìnén nsaʼ aŋgàa lìm vé, e fò ŋgeʼlàʼ e ŋgaà jay, e nèn bòyìr woo là jay, bìʼ fo wù yòʼ kér njò.

²⁴ «A wír vé veé Israyi jày e wò, aŋgàa vibàné ton áwune, á kuúmé wò, e tuùné jay wov, a bùnrì e lav cù fèn, a toŋ e wò,

²⁵ à kù yù é yuv, e làysìn jay wìr vé veé Isray, e lì áwune, e siìr e nsay ye wò‑oò foon e wùn aàtàr véví.

²⁶ A wuú lò, e tàv é yuv, e tèn fó a lo, bìʼ fo wír vée jayin e wò, áwune maʼti jay wov, a bùnrì, a yòŋ yír yé, a leéy lav cù rə̀n,

²⁷ à kù yù é yuv, e làysìn ajay aŋgàa lìm vé vee wír veé Isray. Ku làysìn, a yeʼéy áwune mo á wáa ghan e wò mbòv, e nèn tsə̀nsí wuú é nsay ye wò‑oò foon e wír vée ji vitsə́ʼ vév.

²⁸ «A jìŋ koò é wòŋ, kìn gbù kifə̀ʼ, kìn tòn kiŋgáŋ vifá ve yi, kìn kòʼ mfə̀m, kìn gbù ŋguùmé, kìn ntèmntém, kìn aŋgàa vibàné nəə wír vé e rə́r sí aáwuné ŋkàlaʼ, kìn koò yàsí woo ka áwune,

²⁹ wìr lo, a bùnrì, kìn lò wir dzə̀m, a bùnrì, a lon wò e mendzən mè si, a nàsì wó, a kìʼ lav rə̀n sho,

³⁰ à kù yù é yuv fo à dzə́, e làysìn jay wov. Kù jòʼ wò cáʼ vèn mòʼón wo à kiìn shilív shé wìr msòŋ e dzə̀m. Kú a làʼ wir mòʼón mòʼón mo vinyo ve wù yii vi dzəə̀n,

³¹ aáwune fíʼ a fàn wò, a ghan e wò mbòv ghán sidzə̀m se áwune dzə́ e nsay ye wò‑oò foon áàtàr véví.

³² Wír ve yòʼ dzəə̀n wír veé Israyi wíy a wìy fo vitum vímóʼ ví kwaʼda. Á wíy a wìy bìʼ yír yé ye ghaʼáné, a wìy bìʼ vitaáví vé wùn à viŋgaʼnìn ve vinyò ve à yii vi. Wìr wiy bèy, lóo bùnrì, lóo kìʼ lav cù rə̀n,

³³ à kù yù é yuv fo à dzə́, e fò ŋgaàŋ kifá kidzə̀m ke wù lóné, é wír veé kitu ke nsay adzə̀me fiʼ kìíy wò, e nèn a fàn wò moo wír vé veé Isray. Á bèy, aáwune nèn kìíy ji lav rə̀n, ye m bàʼrìn dzə̀ rú á lav yè.

³⁴ «Aà yòŋ ji wír vée du, e nə̀ə́ aŋgàa vibàn vév e rə́r sí, a fə̀m dzə̀ feé, áwune wáa lon wò, a lon bèy, a kìʼ ŋkàlaʼ rə̀n ye à shoʼon, e kfə̀n a kìʼ lav rə̀n, lav ye m bomen ji ye,

³⁵ à kù yù bunrì yév fo à dzə́ e yuv, e màʼ rə́r sév.

³⁶ «Mo bó wìr woo là jay yòʼ dzəə̀n, a wír vée lòo dzə, e jày e wò, à shwiíy kilòŋ, e màʼtì aŋgàa vibàn véví koórí áwune ji akwàn, e dù sho e wòŋ wúmóʼó kwaʼda, kìn woo fó mentsə̀m,

³⁷ áwune du bey, e màʼtì jay wov, e bìnèr melív mev, a toŋ e wò, a suúy jii, vèr jày ne, vèr yiì ne yii ye bií,

³⁸ aá tóŋ bèy, kiʼ nsay rə̀n ye wò‑oò foon áàtàr véví, kfə̀n kiʼ ŋkàlaʼ ye wò‑oò shoʼon, à lav ye m bàʼrìn ji á wáa cù wò fo rə̀n, aáwune fen kùvsín rú kwaʼtì yév e dzə̀m, à shilív shév shí shidzə̀m, e wòŋ vikwàn fóo fèy,

³⁹ à kù yù bunrì yév é yuv fo à dzə́, e yù tóŋ yév, e sə̀ áwune, e làysìn ajay ve wír vée jayin e wò.»

⁴⁰ «Á bèy, Nyùy wom, kú a leéy ver, a yu bunrì ye á yíi a bùnrì e kirə̀ʼ féne.»

⁴¹ «Éè Nyùy Tàr, wò woo Nyùy, ŋáʼáy lèn, e dù e wò kirə̀ʼ ké dzə, à wò, à ŋkùv mensàŋ wo dzəə̀n kisəəm ké vitaaví vé. Éè Nyùy Tàr, wò woo Nyùy, ku səə̀vì lím atàá cù vée, é wíri fiʼ lùŋ. Yìi, é wír vée wáa sheʼrí bìʼ vinyo ve juŋ ve à yii aáwune.

⁴² Éè Nyùy Tàr, wò woo Nyùy, lá à yòʼ bìn ndzə̀m e fòn wo à yoʼon. Ku kuùmé koŋ yé ye wiyí, ye wò‑oo kér fo Davir woo ŋgaà lìm wò.»