2 Wòŋ 5 - ŊWÀʼ NYÙY

¹ Á bèy, Fòn Solomon màysì lim yee Nyùy Tǎr lav cù e dzə̀m, e nèn lì vifá ve tàr wov Davir‑iì lèmèn ne jeéy ji vé Nyùy Tàr, e wìy sho, e wày é vitàv veé lav cù. Vifá vìn vi‑iì dzə̀ jii, *kisha ke mbàm ke baar kí wùn à ke fəvír kí, à vifá ve ker vi vidzə̀m.

Á wíy e ŋkùv mensàŋ e lav cù

² Fòn Solomon‑eè tòóy kfə́m sé wìr veé Isray, e tòóy atǎr ram wùn aàtǎr kfəə véví ji á wàá wiy é Jerusalem ji á fiʼ dù, e lì a ŋkùv mensàŋ Nyùy Tàr fó Ŋkàlaʼ Fòn Davir ye á yoŋ sa ji Sion, e kòʼ á sho e lav cù.

³ Vilum veé Isray adzə̀me nèn bàʼtí e fòn si e kishiíy ké ŋkàʼ wo wú yii dzə́ e ŋwee woo saàmbà.

⁴ Kfə́m sé wìr veé Isray si wìykìr, wír veé ram Levìi nèn bèʼèy ŋkùv mensàŋ, a koʼ sho.

⁵ Atàá cù wùn à wír veé ram Levi ámóʼó nèn bèʼèy sa *kibàn ké ntàsín, à vifá vee jeéy ví vidzə̀m veé mvəm wó, a koʼ sho.

⁶ A Fòn Solomon wùn à wír veé Isray adzə̀m ve vé‑eè baʼtiné du e mbìy ŋkùv mensàŋ, du bèy, yii cu aànjìi wùn aànàʼa, ve bó yòʼ dzə̀ wìr tàŋ, e tòʼ.

^7-8 Atàá cùu dù, e nèn tìír ŋkùv mensàŋ Nyùy Tàr e wun kirə̀ʼ. Kirə́ʼ, a dzə̀ kee jeéy kí féyì feyì, a kí dzə̀ fó mvəə́mvəm. Ŋkùv mensàŋ nèn a tiy fo, a vav se vifa veé yuv ve ví tíy e kitu wo si násí wún é kitu ke ŋkùv, e kfə̀vsí ŋkùv wùn à vintoòr və́ ví.

⁹ Vintoòr vìn vi‑iì dàr é ŋàŋ, a wìr lóo tiy e mvə̀m lav cù, wù wàa yen mo ví soŋ kitú fo kirə̀ʼ kee jeéy kí féyì, kirə́ʼ, a kí dzə̀ fó mvəə́mvəm. Wìr‑iì lóo tiy a dzə̀ fó ndzə, la wù yòʼ a yen. Ví kù dzə̀ə́ fo, e wìy shem lán.

¹⁰ Kifá ki yòʼ‑oò dzə̀ é ŋkùv *mensàŋ, bánlà viwaŋ ve tiy vibaà ve Mooser‑iì wayin shó e Gwan Sinay fo Nyùy Tàr‑iì gwàrìn mensaŋ wùn à wír veé Israyi e ghan se vé‑eè fəən fó Ejiv.

Rán Nyùy Tàr

¹¹ Atàá cùu nèn lò, e fəə̀ fó kirə̀ʼ kee jeéy kí keé lav cù, aá dzə̀ fó adzə̀m mo vé‑eè kfəmrin ne vitú vév wir dzə̀m, a bó yòʼ‑oò *kfə̀mrí káŋ woó kishiíy fóo fèy cáʼ.

¹² Wír veé ram Levi adzə̀m ve yì‑iì dzəə̀n vé yòvi wáa tiy e ghaa kiy cù, fo mbìv ye yì kiʼ fo shùy yii tó. Vé‑eè dzə̀ jii, Asav, Heman, Jedutun, e bóo lì wón vév wùn à wír vee áwuné kfəə, aá máʼ ndzə̀y se á fèrìn e làv wo fəvír woo fèm, kwáʼ viŋkwaʼ, kum lúŋ mbàytì, kum yé nshì. Atàá cù ve vé‑eè tóŋ sóŋé‑eè tíy aáwuné ghaŋ, aá dzə̀ wír kishóv mbaà é wiì (120).

¹³ Aŋgaà ve vé‑eè tóŋ sóŋ wùn à vé yòvi‑iì tàtí amòʼón, a sùyrì Nyùy Tàr, e kfə̀n a beèrì wun. Vé‑eè yov luŋ kitávín woo jii: «Nyùy Tàr dzə̀ e juŋ, a koŋ ye wù koŋ wír vəə́ yòʼ wíy mày.» Á lòo yòv, lòo kùm vifá ve kumèn ví, lòo toŋ sóŋ sí, lòo kwaʼ vifá ve kwaʼán ví, mbàʼ nèn gbù, e rùn lav Nyùy Tàr.

¹⁴ Á bèy, la atàá cùu yòʼ dzəə yù fó a tiy, a yiì lim yév, bìʼ mbàʼ ye yì‑iì gbuùn, rán Nyùy Tàrí rún lav Nyùy.